7 Tau Mahani

KO E KAKANO

Ko e tau mahani po ke tau aga he tagata ne fifili ke lata mo e moui. Ma e fakatai, eketaha nakai a koe ke mahani fakamooli ke he tau mena oti? Ti liga manako a koe ke fakaako e tau mahani mitaki ia ke he tau fanau.

Putoia foki he mahani mitaki e tau aga he mahani. Ma e fakatai, ko e tagata ne faliki aki e tau aga mitaki kua gahua malolō, mahani tonu, mo e manamanatu ke he falu​—ko e tau mahani kua feaki fakamitaki he tagata he vahā tote.

MATAPATU FAKAAKOAGA HE TOHI TAPU: “Kia fakaako a e tama ke lata mo e hana puhala; ka hoko foki ke he vaha ke motua ai a ia, nakai ni fano kehe ai a ia.”​—Tau Fakatai 22:6.

KAKANO NE AOGA

Ko e vahā he tau matini hila anei, ti aoga lahi e tau aga mitaki. “Maeke e tau mahani kelea ke moua he tau matini utafano he ha magaaho,” ui he matua fifine ko Karyn. “Maeke e tau fanau ke nonofo he tau tapa ha tautolu ka e kitekite ke he tau mena fakalialia!”

MATAPATU FAKAAKOAGA HE TOHI TAPU: “Lata ia mo e tau tagata motua, ko lautolu ni kua mahani he ako mua ai ke mailoga e tau mena mitaki mo e tau mena kelea.”​—Heperu 5:14.

Ko e tau aga mitaki kua aoga lahi foki. Putoia e tau mahani mukamuka (tuga e “fakamolemole” mo e “fakaaue”) mo e manamanatu ke he falu​—ko e aga ne lavea mogonei ha kua tuga kua fiafia lahi e tau tagata ke he tau matini ka e nakai ke he tau tagata.

MATAPATU FAKAAKOAGA HE TOHI TAPU: “Tuga ne loto a mutolu kia eke he tau tagata kia mutolu, kia eke pihia foki e mutolu kia lautolu.”​—Luka 6:31.

MENA KE TAUTE E KOE

Talahau e tau aga mitaki haau. Ma e fakatai, fakakite he kumikumiaga ko e tau fuata mui kua liga kalo kehe he taute e mahani fakataane mo e fifine ato mau ka fakaako fakamaaliali kua hepe e mahani ia.

PUHALA: Fakaaoga e mena ne tupu mogonei ke kamata e fakatutala ke he tau mahani mitaki. Ma e fakatai, ka talahau he nusi e vihiatia fakakelea, maeke a koe ke pehē: “Kelea mooli e puhala ne ita pihia e falu tagata ke he falu. Hokotia fēfē e tau tagata ke mahani pihia he manatu haau?”

“Uka lahi ma e fanau ke fifili e mena hako mo e hepe ka nakai iloa e lautolu e mena kua hako po ke hepe.”​—Brandon.

Fakaako e tau aga mitaki. Maeke foki e tau tama ikiiki ke talahau “fakamolemole” mo e “fakaaue” mo e manamanatu ke he falu. “Ka lahi e kitia he fanau ko lautolu ko e vala he magafaoa, aoga, mo e maaga, to omoomoi a lautolu ke mahani totonu ke aoga e tau tagata oti ka e nakai ni ko lautolu hokoia,” talahau he tohi Parenting Without Borders.

PUHALA: Kotofa age e tau fekau ke he tau fanau ke fakaako e lautolu e aga ke taute e tau mena ma e falu.

“Ka mahani e fanau ha tautolu ke taute fekau mogonei, to nakai ofo a lautolu ka nonofo hoko lautolu ni. Ko e taute e tau matagahua pihia kua eke tuai mo vala he tau momoui ha lautolu.”​—Tara.