He malolō e mauokafua haau ki a koe, to tumau a koe ke he tau afā malolō
MA E TAU FUATA
9 Muokafua
KO E KAKANO
He mauokafua ki a koe, kua nakai ni ko e higoa mo e foliga haau ne aoga. Putoia haau a tau mahani, tau taofiaga, mo e aga fakatagata. Mooli, ko e mauokafua haau kua kitia ke he tau mena oti haau.
KAKANO NE AOGA
Ka mauokafua lahi a koe ki a koe, to tumau a koe ke he tau taofiaga haau ka e nakai fakaatā e tau kapitiga haau ke pule ki a koe.
“Tokologa e tagata ne tuga e tau mena ne fakatui aki e tau koloa ke fakatātā he fale koloa. Nakai fifili e lautolu e tau mena ke tui; ka e fakatui he falu.”—Adrian.
“Fakaako au ke tumau ke he mena kua hako pete he uka. Maeke au ke kitia e tau kapitiga mooli ha ko e tau mahani ha lautolu mo e mahani haaku he haia mo lautolu.”—Courtney.
MATAPATU FAKAAKOAGA HE TOHI TAPU: “Aua neke mahani foki a mutolu fakalataha mo e lalolagi nai, ka kia faliu a mutolu ke he liu foki fakafou he tau loto ha mutolu.”—Roma 12:2.
MENA KE TAUTE E KOE
Feaki e logonaaga mooli ki a koe ni mogonei mo e vahega tagata kua manako a koe ka lahi hake, he iloa e tau mena ne malolō, lolelole, mo e mauokafua a koe ki ai. Ko e puhala mitaki ke kamata ko e tali e tau hūhū nā.
Tau malolō: Ko e heigoa e tau taleni mo e tau lotomatala haaku? Ko e heigoa e tau mena kua mauokafua au ke taute? (Ma e fakatai: Fakamooli nakai au ke he tau magaaho fafati? ke he mahani fakalatalata? ke he malolō he gahua? ke he fakamokoi?) Ko e heigoa e tau mena mitaki ne taute e au?
PUHALA: Uka kia a koe ke iloa e tau mena mitaki ki a koe ni? Hūhū ke he matua po ke kapitiga fakamooli ke tala atu ki a koe e tau malolō ne kitia e ia mai ia koe, mo e kakano.
MATAPATU FAKAAKOAGA HE TOHI TAPU: “Kia igatia mo e fakamoli hana ni a gahua, ti ha ha ia ia e mena ke hula ki ai a ia ni, ka e nakai ha he taha.”—Kalatia 6:4.
Tau lolelole: Ko e tau vala fe he mahani haaku kua lata ke gahua fakalahi ki ai? Magaaho tonu fe kua hihiga au ke mahala ke he kamatamata? Ko e tau faahi fe kua lata au ke fakagahua fakalahi e mahani fakalatalata?
MATAPATU FAKAAKOAGA HE TOHI TAPU: “Kaeke ke pehe a tautolu, Nakai fai hala a tautolu, kua hehe tuai a tautolu kia tautolu.”—1 Ioane 1:8.
Mauokafua: Ko e heigoa e tuaga he tau mahani kua muitua e au, ti ko e ha? Talitonu nakai au ke he Atua? Ko e heigoa kua fakamooli ki a au ati mauokafua au na fai Atua? Ko e heigoa e tau gahua ne kitia e au kua nakai tonu, ti ko e ha? Ko e heigoa ne mauokafua au hagaao ke he vahā i mua?
MATAPATU FAKAAKOAGA HE TOHI TAPU: “To leveki a koe he loto manamanatu; to leoleo a koe he pulotu.”—Tau Fakatai 2:11.