Ua Fakaata Hau a Malolo ke Eke mo Lolelole Hau

Ti 16 e poko ne nakai maeke ke hoko e vai ki loto, ne manamanatu ai ke he toga Titanic talahaua ke nakai tomo. He holo fakamua hana he 1912, ne uta ai kavi ke hafa e numera he tau posi fakamomoui mai he numera kua lata. Ne oka e toga he tepu aisa makifoili ti tomo, galo ai ke molea 1,500 he tau momoui.

KO E patuiki matakutaku Atua ko Usia i Ierusalema i tuai ko e takitaki kau iloilo lahi. Fakalataha mo e lagomatai a Iehova, ne fakakaumahala takitaha e ia e tau fi hana. “Ti hoko atu e ogo kia [Usia] ke he tau motu mamao; ha ko e lagomatai ne moua e ia, ko e mena ke ofo ai haia, ato malolo a ia.” Ka e “fakatokoluga ai hana loto, he holifono a ia kia Iehova, hana Atua.” Ha ko e fakatokoluga a Usia, ne moua a ia he lepela.​—2 Nofoaga he Tau Patuiki 26:15-21; Tau Fakatai 16:18.

Ko e tau fakamauaga ua nei kua fakaako a tautolu ko e malolo, ka nakai lagotatai fakalataha mo e pulotu, fakalatalata, mo e fakatokolalo, kua mukamuka lahi mo tau lolelole po ke tau fakateaga. Kua alaala lahi e mena nei, ha ko e ha puhala ni, igatia a tautolu oti mo e tau malolo, po ke tau mena fakaalofa pauaki, ti manako a tautolu ke he tau mena nei mo tau aogaaga mo e punaaga he olioli ki a tautolu ni mo e falu, mua atu ke he Tufuga ha tautolu. Moli, kua manako a tautolu ke fakaaoga katoatoa ai ha mena fakaalofa he Atua ne moua e tautolu ka e he magaaho taha ke feaki mau ai ke tumau e aoga lahi.

Ma e fakatai, ko e tagata kua ofania hana gahua kua mukamuka lahi ke liliu e mena fakaalofa nei ke lolelole he gahua fakagoagoa. Ko e tagata mataala kua nakai mukamuka ke goagoa po ke fakavaia, ka e liga mataala a ia ke he manatu he nakai taute e tau fifiliaga. Ko e fua mitaki e makaukau foki, ka uta fakamao ai, ke fakaheu e tau foliga he tagata, ko e fua to makalili, mo e mao kikiha ai e fakahikuaga ke nakai fiafia. Ti fai magaaho ke fakaata ke he malolo ni hau. Fakatokatoka mitaki nakai e koe? Ko e tau fakamonuinaaga kia ke he falu? Mua atu ai, fakaaoga nakai e koe ke fakaheke a Iehova, ko e Punaaga he “tau mena mitaki oti.” (Iakopo 1:17) He fakaotiaga, kia manamanatu la he onoono fakatata ke he falu fakafifitakiaga he tau malolo ka tupu atu ke he tau lolelole, pihia ke he fakateaga, ka nakai matakite ki ai.

Fakaaoga Fakapulotu e Tau Lotomatala

Ko e mitaki kua aoga lahi. Ka e maeke agaia ke lolelole kaeke ke takitaki ke molea e mauokafua po ke fakatupu a tautolu ke feaki e manatu malolo ha tautolu ni, mua atu ka nava fakalahi po ke fakaheke he falu a tautolu. Po ke liga feaki e tautolu e onoonoaga iloilo he Kupu he Atua mo e fakaakoaga ne fakave ke he tau tohi faka-Tohi Tapu.

Ko e molea e mauokafua kua kitia ke he tau puhala kehekehe. Ma e fakatai, ka moua he tagata kua ha ha i ai e manamanatu mitaki e kotofaaga ke lauga he fakapotopotoaga Kerisiano, liga ko e lauga ke he tau tagata po ke lauga he Aoga Fekafekau Fakateokarasi, kua liga toka e ia ke he magaaho fakahiku, liga nakai liogi foki ma e fakamonuina a Iehova. Ka kua falanaki a ia ke he iloilo moua hana mo e hana a lotomatala ke manamanatu fakalutukia. Ko e lotomatala pauaki hana kua liga fakamalu aki hana fakateaga ma e magaaho, ka e ka nakai moua e fakamonuinaaga katoatoa mai ia Iehova, to fakamanou hifo ai hana a malolo fakaagaga, liga to oti katoa ai. Ko e moumou ha ia he mena fakaalofa mitaki ia!​—Tau Fakatai 3:5, 6; Iakopo 3:1.

Fai tagata manamanatu lahi ka liga uta foki e onoonoaga lotomatala ke he Tohi Tapu mo e tau tohi lagomatai ke fakaako e Tohi Tapu. Pete ia, ko e iloilo “kua fakaikaluga,” po ke taogo ai e fakatokoluga tuga e paluni; nakai ‘ati hake’ he mena ia e tau fakafetuiaga Kerisiano fakaalofa. (1 Korinito 8:1; Kalatia 5:26) He taha fahi, ko e tagata fakaagaga, pete ni hana tau lotomatala, kua liogi tumau a ia mo e falanaki ke he agaga he Atua. Kua eke hana malolo ke aoga lahi mahaki he tupu a ia ke he fakaalofa, fakatokolalo, iloilo, mo e pulotu​—mo e kua lagotatai mitaki oti ai e tau mena nei.​—Kolose 1:9, 10.

To eke foki e lotomatala mo lolelole ka feaki e tautolu i ai e manatu ha tautolu ni, he fakakite e nakai fakatokolalo. Ko e tagata taleni​—mo lautolu ni kua nava fakaheke a ia​—ne liga nimo ko Iehova kua “nakai kitekite a ia ke he taha ia lautolu ne iloilo ai e tau loto,” pete ni kua fai taleni a lautolu. (Iopu 37:24) Kua talahau mai he Kupu he Atua kua “ha ha i ai e iloilo kia lautolu kua fakatokolalo.” (Tau Fakatai 11:2) Ko e aposetolo ko Paulo, pete ni e tokoluga he iloilo hana mo e pulotu lahi, ne tala age ke he tau Korinito: “Ko au foki, ko e tau matakainaga na e, ne fina atu au kia mutolu nakai fina atu ai au mo e tau kupu kua mua ue atu, po ke iloilo . . . Ti ha ha i ai au ia mutolu mo e lolelole, mo e matakutaku, mo e vivivivi lahi. Nakai taute foki haku a kupu, mo e haku a fakamatalaaga ke he tau kupu mitaki he iloilo he tau tagata, ka ko e fakakiteaga he Agaga mo e malolo; neke ha ha i ai ha mutolu a tua ke he iloilo he tau tagata, ka e nakai ko e malolo he Atua.”​—1 Korinito 2:1-5.

Ko e tagata iloilo moli kua nakai fakavaia he iloilo he lalolagi nei, po ke tuaga he kautuaga. Ti he nakai fakaaoga e tau taleni hana ke moua e tau taliaaga he tau tagata po ke mautu ke he tau koloa fakalalolagi, kua foaki e ia e mitaki lahi ue atu hana ki a Ia ne foaki age ki a ia e moui hana mo e tau lotomatala. (1 Ioane 2:15-17) Fakahiku ai kua tuku mua e ia e tau mena he Kautu he hana a moui, ti eke ai mo “akau [tupuolamoui] kua to ke he tapa he tau vai lele.” Fakaaue ke he monuina a Iehova, nakai ke he hana ni a tau taleni pauaki, “to monuina foki a ia ke he tau mena oti kana ke eke e ia.”​—Salamo 1:1-3; Mataio 6:33.

Fakaata e Faka-Kerisiano ke Lafi ke he Malolo Hau

He pihia pauaki ai, ne monuina lahi e faka-Kerisiano he malolo ne nakai maeke he tau pulotu fakalalolagi ke tata atu ki ai. Ko e puhala moui he Kerisiano, ma e fakatai, kua taute e tau tane mo e tau hoana ke mitaki lahi mahaki, ko e tau katofia mitaki lahi mahaki, mo e tau tagata gahua mitaki lahi mahaki​—ko e tau tagata kua mahani fakamoli, fakalilifu, mafola, mo e makai. (Kolose 3:18-23) Lafi atu ai, ko e fakamahani Kerisiano he vagahau mo e fakaako kua ati hake e tau puhala matutakiaga mitaki. (1 Timoteo 4:13-15) Nakai ofo ai, mogoia, ko e tau Kerisiano kua fa manako ki ai e tau takitaki gahua ha lautolu ke lalafi ki luga e tau matagahua mo e tau holo hake. Ka ko e tau malolo pihia kua maeke foki ke fakahehe ka nakai takitaki fakamitaki. Ko e holo hake po ke gahua mitaki kua kakano ke tuku fakalahi e tukulele ke he gahuaaga, he fakato tumau e tau feleveiaaga Kerisiano, po ke fakaaoga e magaaho aoga mo e magafaoa hana.

I Ausetalia ko e motua Kerisiano mo e tagata tane fai magafaoa, ne kua eke foki a ia ko e tagata ne kautu ke he gahua pisinisi, “ne ha ha ia ia e tau koloa loga,” pihia e talahauaga ia. Ka e fakaheu e ia e kamatamataaga ia ke muhu koloa ke he fakatokaaga nei. “Manako au ke fakalahi e magaaho mo e magafaoa haku mo e he fekafekauaga Kerisiano,” he talahau e ia. “Ti talia he hoana haku mo au ke fakatote hifo e magaaho ne fakaaoga e au he gahua tupe haku. Ko e gahua he ha a au ke lima e aho he fahitapu ka nakai lata ia au?” he lafi e ia. He taute e tau hikihikiaga manamanatu fakamitaki he hana moui, kua moua he motua nei kua maeke agaia a ia ke leveki hana magafaoa he gahua laga tolu po ke laga fa e aho he fahitapu. Nakai leva, ne uiina a ia ke fakalataha ke he falu a fekafekauaga foki, tuga e gahua ke he fakatokatokaaga he Komiti he Fale Toloaga he matakavi mo e kau leveki he fonoaga fahimotu. He takitaki fakapulotu ai, ne ta mai he hana tau malolo ki a ia mo e magafaoa hana e olioli mo e makona.

Aga Lagotatai ke he Tau Kotofaaga

Ko e tau tagata tane Kerisiano kua fakamalolo ke hokotia atu ke he tau matagahua he fekafekauaga he fakapotopotoaga. “Kaeke kua foli e taha ke he feua he epikopo [po ke fekafekau lagomatai], kua manako a ia ke he gahua mitaki.” (1 Timoteo 3:1) Ke lata mo e tau malolo kua fita he talahau, ko e makai ke tali e tau matagahua kua lata foki ke lagotatai aki mo e fifiliaga mitaki. Nakai fai tagata kua lata ke taute e tau matagahua loga ati galo e ia hana olioli he fekafekauaga a Iehova. E, ko e aga makai kua fakamalolo, kua lata moli, ha kua nakai talia e Iehova e aga fakatevateva; ka kua lata foki e makai ke fakaata mai e mailoga mo e “nonofo fakalatalata.”​—Tito 2:12; Fakakiteaga 3:15, 16.

Ko e totonu, maama, mo e tetotonu a Iesu ne taute foki e tau tagata tokolalo ke logona e totokaaga ke he hana a fakalatahaaga. Pihia foki he vaha nei, kua logona he tau tagata e totokaaga mo lautolu kua ha ha e malolo ha lautolu kua aga fakaalofa mo e leveki. He fakapotopotoaga Kerisiano, kua uho moli ko e “tau mena fakaalofa ke he tau tagata” e tau motua mafanatia mo e mukamuka ke tutala ki ai. Ko lautolu ko e “fakamumuliaga mai he matagi, mo e mena ke malu ai ka to e afa, ke tuga ne tau vailele ke he motu paku lā, ke tuga ne malu foki he kau maka lahi ke he motu nakai fai vai.”​—Efeso 4:8; Isaia 32:2.

Ka kua lata e tau motua ke lagotatai e magaaho ne fakaaoga e ia he lagomatai falu mo e ha lautolu ni he lata mo e fakaako fakatagata, manamanatu, liogi, mo e fekafekauaga ke he tau tagata. Pauaki ai, kua lata e tau motua fai tokoua ke fakalahi e magaaho mo e tau magafaoa ha lautolu, ko lautolu kua lata ke mukamuka he o atu ki a ia.

Tau Fifine Lotomatala Ko e Fakamonuina Homo Ue Atu

Tuga ni e tau motua lotomatala, ko e tau fifine manamanatu fakaagaga kua aoga moli ke he fakatokatokaaga a Iehova. Mahani ai, na taleni e tau fifine aki e fiafia ke he falu tagata​—ko e aga ne uho mo e fakamalolo e Iehova. Tumau ke “aua neke takitokotaha mo e manamanatu ke he tau mena hana, ka e takitokotaha mo e manamanatu ke he tau mena he falu” he tohia he aposetolo ko Paulo. (Filipi 2:4) Ka ko e “manamanatu ke he tau mena he falu” kua fai fakakaupaaga, ha kua nakai fai Kerisiano kua manako ke “ahiahi teao e tau mena he falu a tagata”; po ke kua lata ke eke mo tagata uta tala.​—1 Peteru 4:15; 1 Timoteo 5:13.

Loga atu foki e tau mena fakaalofa he tau fifine. Ko e hoana Kerisiano, ma e fakatai, liga kua taleni lahi ke iloilo mai he hana tane. Moha ia, ko e “fifine mahani mitaki” kua matakutaku ki a Iehova, to fakalilifu e ia hana tane mo e fakaaoga e tau mena fakaalofa hana ke lagomatai a ia, nakai ke fetotokoaki mo ia. Mo e he nakai mahekeheke po ke tiaki a ia, ko e tane pulotu mo e fakatokolalo to tanaki e malolo he hoana hana mo e fiafia ki ai. To fakamalolo e ia a ia ke fakaaoga katoatoa hana tau taleni ke ati hake hana magafaoa mo e ke lagomatai e fanau hana ke ‘matakutaku ki a Iehova,’ tuga ni he taute e ia. (Tau Fakatai 31:10, 28-30; Kenese 2:18) Ko e tau tane mo e tau hoana fakalatalata mo e fakatokolalo pihia kua feaki e fakamauaga kua fakalilifu moli a Iehova.

Hufia he Aga Malolo Lahi

Ko e aga malolo lahi kua fakamau ke he mahani tututonu mo e taute solu katoa e finagalo ha Iehova kua eke ai mo aoga ka foa aki e fakalatalata mo e fakatokolalo. Ka e, maeke ke lolelole ka fakatupu aki taha ke pule malolo po ke fakamatakutaku aki e falu. Kua moli pauaki e mena nei i loto he fakapotopotoaga Kerisiano. Kua lata e tau Kerisiano ke logona e okiokihaga mo e falu, lauia ai ka fakalataha mo e tau motua he fakapotopotoaga.​—Mataio 20:25-27.

Ko e tau motua, kua lata foki ke totoka he fakalataha mo e falu. Ka feleveia fakalataha a lautolu, ko e agaga tapu, nakai ko e malolo lahi he aga fakatagata, ka lata ke fakalagalaga e tau fifiliaga ha lautolu. Moli, kua fakalagalaga he agaga e ha motua he kau, putoia ai a ia kua fuata po ke motua gutu fakanono. Ti ko lautolu kua malolo lahi e tau aga fakatagata, ti pihia foki ka logona e lautolu e tutonuhia kua hako a lautolu, kua lata ke tautaofi e malolo ha lautolu he ako e puhala he nakai tataiaga, ti “fakakite e fakalilifu” ke he falu motua. (Roma 12:10) Kua hataki totonu he Fakamatalaaga 7:16: “Aua neke tututonu a koe ke lahi ue atu, ti ua fakalahi e koe hāu a iloilo ke lahi ue atu; ke tamate e koe a koe he ha?”

Ko Iehova, ko e Punaaga he “tau mena mitaki oti,” ne tautaofi e malolo ofoofogia hana mo e mitaki katoatoa ue atu. (Iakopo 1:17; Teutaronome 32:4) Ko ia ko e Faiaoga ha tautolu! Ti kua lata ia tautolu ke ako mai ia ia mo e gahua fakamalolo, he feaki e tau mena fakaalofa pauaki, po ke tau malolo ha tautolu, mo e he tautaofi ai fakapulotu, fakatokolalo, mo e fakaalofa. Ko e fakamonuinaaga ha ia a tautolu ke he falu kaeke ke pihia!

[Tau Fakatino he lau 31]

Ko e tolomaki fakaagaga kua falanaki ke he fakaakoaga he liogi mo e falanaki ki a Iehova

[Fakatino he lau 32]

Ko e fiafia fakatagata ke fakalataha mo e fakalatalata ko e fakamonuinaaga

[Fakatino Credit Line he lau 29]

Courtesy of The Mariners’ Museum, Newport News, VA