Fakaaue ke he “Tau Mena Fakaalofa ke he Tau Tagata”
“Ke iloa e mutolu a lautolu kua gahua kia mutolu, mo e . . . kia fakahelehele fakalahi a lautolu mo e fakaalofa, ha ko e gahua ha lautolu.”—1 TESALONIA 5:12, 13.
1. Hagaao ke he Gahua 20:35, ko e heigoa ne ha ha i ai he malolo he foaki atu? Fakamaama.
“KUA mua e monuina hana ke foaki atu, ke he monuina hana ke talia mai.” (Gahua 20:35) Manatu nakai e koe e magaaho ne mailoga e koe e moli he tau kupu ia a Iesu? Liga ko e mena fakaalofa ne age e koe ke he taha tagata ne fakahele lahi e koe. Ne fifili fakamitaki e koe, ha kua manako a koe ke eke mo taha mena ka tokiofa he fakahele hau. Ko e fofoga fiafia he hau fakahele—kua fakamafanatia aki e loto hau! Ka omoi he manatu mitaki, to eke e foaki atu mo fakakiteaga he fakaalofa, mo e ha ha he fakakiteaga he fakaalofa e malolo ke ta mai e fiafia ki a tautolu.
2, 3. (a) Ko e ha ne pehe ai kua nakai fai foki ne mua atu e fiafia ki a Iehova, mo e maeke fefe e foakiaga he “tau mena fakaalofa ke he tau tagata” ke fakafiafia hana loto? (e) Ko e heigoa ne nakai manako a tautolu ke taute aki e mena fakaalofa mai he Atua?
2 Ko hai, mogoia, ka mua atu e fiafia ka ko Iehova, ko e Foaki he ‘tau mena foaki noa mitaki oti’? (Iakopo 1:17; 1 Timoteo 1:11) Ko e tau mena fakaalofa oti ne foaki mai e ia kua fakaohooho ni he fakaalofa. (1 Ioane 4:8) Kua moli lahi e naia, ha ko e mena fakaalofa ne foaki he Atua he puhala ia Keriso ke he fakapotopotoaga—ko e “tau mena fakaalofa ke he tau tagata.” (Efeso 4:8) Ko e foakiaga he tau motua ke leveki e fuifui mamoe ko e fakakiteaga a ia he fakaalofa hokulo he Atua ma e tau tagata hana. Ko e tau tagata tane nei kua fifili fakamitaki—kua lata ke moua e lautolu e tau tutuaga faka-Tohiaga Tapu. (1 Timoteo 3:1-7; Tito 1:5-9) Iloa e lautolu kua lata a lautolu ke “fakahelehele e fuifui mamoe,” mogoia ka fai kakano e tau mamoe ke fakakite e fakaaue ke he tau leveki mitaki pihia. (Gahua 20:29; Salamo 100:3) He magaaho ka kitia e Iehova kua puke he fakaaue e tau loto he tau mamoe hana, moli ni kua fiafia hana loto!—Tau Fakatai 27:11.
3 Ti kua nakai manako a tautolu ke fakatote e uho he mena fakaalofa mai he Atua; mo e nakai manako foki a tautolu ke fakateaga ke he tau mena fakaalofa hana. Ati ua ai e huhu ne mafuta hake: Kua lata ke kikite fefe e tau motua ke he matagahua ha lautolu i loto he fakapotopotoaga? Ti fakakite fefe he falu foki he fuifui mamoe e fakaaue ha lautolu ke he “tau mena fakaalofa ke he tau tagata”?
‘Ko e Tau Lagomatai a Mautolu ki a Mutolu’
4, 5. (a) Fakatatai aki e Paulo e heigoa e fakapotopotoaga, mo e ko e ha ne latatonu ai e fakataiaga nei? (e) Ko e heigoa ne fakakite he fakataiaga a Paulo ke he puhala kua lata ia tautolu ke fekitiaaki mo e fehagaiaki mo e falu?
4 Ne fafati age e Iehova ke he “tau mena fakaalofa ke he tau tagata” e pule i loto he fakapotopotoaga. Moli, kua nakai manako e tau motua ke fakahanoa e pule ha lautolu, ka e iloa e lautolu kua mukamuka lahi ke taute pihia ha ko e tau tagata nakai mitaki katoatoa. Ti maeke fefe mogoia a lautolu ke kitia a lautolu ni ka fehagai mo e falu foki he fuifui mamoe? Kikite ke he fakataiaga ne fakaaoga he aposetolo ko Paulo. He oti e fakatutalaaga hagaao ke he kakano ne foaki mai ai e “tau mena fakaalofa ke he tau tagata,” ne tohia e Paulo: “Kia tutupu ai a tautolu ke he tau mena oti kana kia ia, ko e ulu ni, ko Keriso haia. Mai ia ia foki e tino katoa kua fakamau, mo e tutaki fakalataha, kua tupu ai e tino ha ko e lagomatai mai he tau fatia takitaha, ke lata mo e gahua he fafatiaga he tau fahi tino takitaha, kia ati hake ai he tino e ia a ia ni ke he fakaalofa.” (Efeso 4:15, 16) Ti kua fakatai e Paulo e fakapotopotoaga, katoa mo e tau motua mo e falu foki, ke he tino tagata. Ko e ha kua latatonu ai e fakataiaga nei?
5 Ko e tino tagata kua kehekehe e tau valavala ka e taha ni e ulu. Ka e, nakai fai mena i loto he tino—nakai ko e tau tegatega, nakai ko e tau hohoko, nakai ko e tau vakavaka—kua nakai aoga. Ko e tau vala oti kua uho ni mo e fai mena ne lafilafi atu ke he tino malolo mo e fuluola ha lautolu katoa. Ti kua ha ha he fakapotopotoaga foki e tau tagata kehekehe, ka e kua igatia a lautolu—pete he fuata po ke fuakau, malolo po ke lolelole—ke lafilafi taha mena ke he malolo mo e fuluola he fakapotopotoaga. (1 Korinito 12:14-26) Nakai lata he taha ke logona hifo kua nakai aoga a ia. Ke he taha fahi foki, kua nakai lata he taha ke fia tokoluga, ha ko tautolu oti—tau leveki mo e tau mamoe—ko e tau vala he tino, ti taha ni e ulu, ko e Keriso. Kua vali ai e Paulo e fakatino mafanatia he fakaalofa, leveki, mo e fakalilifu ne kua lata ke foaki e tautolu ke he taha mo e taha. Ke mailoga e mena nei ka lagomatai e tau motua ke moua e onoonoaga fakatokolalo, mo e lagotatai ke he matagahua ha lautolu i loto he fakapotopotoaga.
6. Pete ni he ha ha ai e pule fakaaposetolo, ne fakakite fefe e Paulo e agaga fakatokolalo?
6 Ko e “tau mena fakaalofa ke he tau tagata” nei kua nakai lali ke pule ke he tau momoui po ke tua he tau matakainaga tapuaki auloa ha lautolu. Ko Paulo, pete ni kua moua e pule fakaaposetolo, ne tala age fakatokolalo a ia ke he tau Korinito: “Nakai ko e mena fia pule a mautolu ke he ha mutolu a tua, ka ko e tau lagomatai a mautolu ke he ha mutolu a fiafia; ha ko e tua kua tumau ai a mutolu.” (2 Korinito 1:24) Kua nakai manako a Paulo ke pule ke he tua mo e tau puhala moui he tau matakainaga hana. Kitia e ia kua nakai lata ke taute pihia, ha kua fakakite e ia e mauokafua kua fita he eke a lautolu mo tau tagata tane mo e tau fifine fakamoli ne kua ha ha tuai i loto he fakatokatokaaga ha Iehova kakano kua manako a lautolu ke taute e mena hako. Ti he vagahau a ia hagaao ki a ia ni mo e hana a hoa o fenoga ko Timoteo, kua tuga pehe a Paulo: ‘Ko e matagahua ha maua a ia ke gahua mo mutolu ke fekafekau ke he Atua mo e fiafia.’ (2 Korinito 1:1) Ko e loto fakatokolalo ha ia!
7. Ko e heigoa ne mailoga he tau motua fakatokolalo hagaao ke he matagahua ha lautolu i loto he fakapotopotoaga, mo e ko e heigoa e mauokafua ne ha ha ia lautolu ke he tau matakainaga gahua auloa ha lautolu?
7 Kua pihia foki e matagahua he “tau mena fakaalofa ke he tau tagata” he vaha nei. Ko lautolu ko e ‘tau lagomatai ke he ha tautolu a fiafia.’ Kua mailoga ai he tau motua loto fakatokolalo kua nakai ko e mena ha lautolu a ia ke fifili e lahi he fekafekauaga he falu ke he Atua. Iloa e lautolu pete kua fakamalolo e lautolu falu ke fakalahi po ke fakalaukauka e fekafekauaga ha lautolu, ko e matafekau ke he Atua kua lata ke mai he loto fakamakai. (Fakatatai 2 Korinito 9:7.) Kua mauokafua a lautolu ha ko e mena ka fiafia e tau matakainaga gahua auloa ha lautolu, to taute e lautolu e tau mena ne fahia ki ai. Ti ko e manako mai he loto a ia ha lautolu ke lagomatai e tau matakainaga ha lautolu ke ‘fekafekau kia Iehova mo e fiafia.’—Salamo 100:2.
Lagomatai Oti ke Fekafekau mo e Fiafia
8. Ko e heigoa falu puhala ne kua maeke he tau motua ke lagomatai e tau matakainaga ha lautolu ke fekafekau ki a Iehova mo e fiafia?
8 Ma tau motua, maeke fefe ia mutolu ke lagomatai e tau matakainaga ha mutolu ke fekafekau mo e fiafia? Maeke ia koe ke fakamalolo ha ko e fakafifitakiaga. (1 Peteru 5:3) Kia toka noa hau a makutu mo e fiafia ke he fekafekauaga ke kitia, ti liga to fakamalolo aki falu ke muitua ke he fakafifitakiaga hau. Nava ke he falu ha ko e tau gahua mo e loto katoa ha lautolu. (Efeso 4:29) Ko e fakaheke mafanatia mo e fakamoli ka lagomatai e falu ke logona e aoga mo e manako. Kua fakamalolo e tau mamoe ke manako ke taute e mena kua fahia ke fekafekau ke he Atua. Kalo kehe he ha tau fakatataiaga kelea. (Kalatia 6:4) Ko e tau fakatataiaga pihia ka fakalolelole ka e nakai fakaohooho falu ke tupu ki mua. Ha ko e tau tagata takitokotaha e tau mamoe ha Iehova—ne kehekehe e tau tutuaga mo e tau malolo. Ke tuga a Paulo, fakakite e mauokafua ke he tau matakainaga hau. Kua “talia [he fakaalofa] e tau mena oti,” ti kua lata ia tautolu ke talitonu na fakaalofa e tau matakainaga ha tautolu ke he Atua mo e manako ke fakafiafia a ia. (1 Korinito 13:7) Ka fakakite e koe e “lilifu ke he falu,” to futiaki mai e koe e mitaki ia lautolu. (Roma 12:10) Kia iloa moli ko e he magaaho ka fakamalolo e tau mamoe mo e fakahauhau, to taute he tokologa e mena kua fahia a lautolu he fekafekau ke he Atua, ti moua ai e lautolu e fiafia he fekafekauaga ia.—Mataio 11:28-30.
9. Ko e heigoa e onoonoaga he tau matakainaga motua ka lagomatai e tau motua takitaha ke fekafekau mo e fiafia?
9 He onoono hifo ni ki a koe ko e taha ‘lagomatai’ ka taute a koe ke fekafekau mo e fiafia mo e ke fakaaue ke he tau mena fakaalofa homo he tau matakainaga motua hau. Kua igatia e tau motua mo e hana ni a tau taleni mo e tau lotomatala ne kua maeke ia ia ke fakaaoga ke lagomatai aki e fakapotopotoaga. (1 Peteru 4:10) Taha ka liga makaka ke fakaako. Taha ka liga ko e tagata fakatokatoka mena mitaki. Taha foki ka liga ke mukamuka ke o ki ai ha ko e hana mafanatia mo e fakaalofa hofihofi. Ko e moli anei, nakai fai motua ne makaka ke he tau mena oti. Ti ka makaka kia ke he taha mena—tuga, ke fakaako—ko e pehe ka ia kua mua atu taha motua ke he taha? Nakai pihia! (1 Korinito 4:7) Ke he taha fahi, kua nakai lata ke mahekeheke ke he makaka he taha po ke maimaina he magaaho ka fakaheke he falu taha motua ha ko e hana lotomatala. Kia manatu, ha ha ia koe e makaka ne kua kitia e Iehova ia koe. Ti to lagomatai e ia a koe ke feaki e tau makaka ia mo e fakaaoga ai ke lagomatai aki e tau matakainaga hau.—Filipi 4:13.
‘Kia Omaoma mo e Kia Fifitaki’
10. Ko e ha kua latatonu ke fakakite e tautolu e fakaaue ke he “tau mena fakaalofa ke he tau tagata”?
10 Ka moua e tautolu e mena fakaalofa, kua tonu ni ke fakakite e fakaaue. “Kia mahani foki a mutolu ke fakaaue,” he talahau he Kolose 3:15. Ka e kua mogoia e “tau mena fakaalofa ke he tau tagata,” ko e mena fakaalofa uho ne mai e Iehova ma tautolu? E moli, kua fakaaue fakamua a tautolu ki a Iehova, ko e Foaki Mena Fakaalofa fakamokoi. Ka e kua ni a lautolu ko e “tau mena fakaalofa ke he tau tagata”? Fakakite fefe e tautolu kua fakaaue a tautolu ki a lautolu ia?
11. (a) Maeke fefe a tautolu ke fakatata e fakaaue ha tautolu ke he “tau mena fakaalofa ke he tau tagata”? (e) Ko e heigoa e kakano he tau kupu “kia omaoma” mo e “fifitaki”?
11 Maeke ia tautolu ke fakatata ha tautolu a fakaaue ma e “tau mena fakaalofa ke he tau tagata” he mafiti ke oma e tau fakatonuaga mo e tau fifiliaga ha lautolu ne fakave ke he Tohi Tapu. Ne tomatoma mai e Tohi Tapu ki a tautolu: “Kia omaoma a mutolu ke he tau takitaki ha mutolu, mo e fifitaki a mutolu ki ai; nukua leoleo a lautolu ke he tau agaga ha mutolu, to tala atu foki e lautolu e tala ki ai, kia eke ai e lautolu mo e fiafia, ka e aua neke eke mo e fakaatukehe; ha ko e mena nakai aoga ia kia mutolu.” (Heperu 13:17) Mailoga kua lata ia tautolu ke nakai ni “kia omaoma” ka e “fifitaki” foki a lautolu nukua leoleo mai. Ko e kupu Heleni ma e “fifitaki” kua kakano moli ko e “haia i lalo a koe.” Tutala hagaao ke he tau kupu “kia omaoma” mo e “fifitaki,” ne pehe e tagata fakaako Tohi Tapu ko R. C. H. Lenski: “Kua omaoma e tagata he magaaho ka talia e mena ne tala age ke taute e ia, kua fakamakamaka ke he hana hako mo e fua; kua fanogonogo a ia . . . ka ha ha ia ia e manatu kehe.” He magaaho ka maama mo e talia e tautolu e hatakiaga ha lautolu ne takitaki, liga mukamuka ke omaoma. Ka e kua ka nakai maama e tautolu e kakano i tua he taha fifiliaga pauaki?
12. Ko e ha kua lata ia tautolu ke fifitaki, po ke fakamakai, pete ni kua nakai maama katoa e tautolu e kakano i tua he taha fifiliaga pauaki?
12 Hanei e mena kua lata ia tautolu ke fifitaki, po ke fanogonogo. Ko e ha? Ke he taha mena, kua lata ia tautolu ke tua kua ha ha he tau tagata he tutuaga fakaagaga nei ha tautolu a levekiaga mitaki he tau loto. Ha kua iloa mitaki e lautolu kua lata ia lautolu ke tuku e lagoaga ki a Iehova ma e tau mamoe ne age ke leveki e lautolu. (Iakopo 3:1) Ke lafi ki ai, kua lata ia tautolu ke manatu na liga ai iloa oti e tautolu e tau mena tutupu ne takitaki atu a lautolu ke taute e fifiliaga.—Tau Fakatai 18:13.
13. Ko e heigoa ka lagomatai a tautolu ke fifitaki ka hoko atu ke he tau fifiliaga he tau motua?
13 Ka e kua mogoia ka fifitaki he magaaho ka fehagai mo e tau fakafiliaga? Moli kua nakai mukamuka e mena nei, mua atu ka taute e fifiliaga ke tuku ki tua a ia ne fakahele e tautolu—ko e taha he magafaoa po ke kapitiga tata. Hanei foki, kua mitaki ni ke fanogonogo ke he fifiliaga he “tau mena fakaalofa ke he tau tagata.” Ha kua haia a lautolu he tuaga ke lahi e maamaaga ki a tautolu, mo e liga lahi e mena ne iloa e lautolu ke he tau mena ne tutupu. Ko e tau matakainaga nei kua taufetului ke taute e tau fifiliaga pihia; ko e matagahua lahi ke ‘fakafili ma Iehova.’ (2 Nofoaga he Tau Patuiki 19:6) Kua lali tumau a lautolu ke fakaalofa hofihofi noa, ha kua iloa e lautolu kua ‘fakamagalo he Atua e tau hala.’ (Salamo 86:5) Kua lata foki ia lautolu ke fakamea tumau e fakapotopotoaga, ti kua takitaki he Tohi Tapu ke tuku ki tua e lautolu e tau tagata mahani hepehepe ne nakai tokihala. (1 Korinito 5:11-13) Ka ke he tau mena loga kua talia ni he tagata mahani hepehepe e fifiliaga. Kua liga latatonu a ia mo e akonaki ke liuaki mai a ia. Ti kaeke a tautolu, ne fakahele e ia, ke fifitaki he magaaho he fifiliaga, liga to lagomatai e tautolu a ia ke aoga mai he akonakiaga.—Heperu 12:11.
“Kia Fakahelehele Fakalahi a Lautolu”
14, 15. (a) Hagaao ke he 1 Tesalonia 5:12, 13, ko e ha kua lata e tau motua mo e manamanatuaga ha tautolu? (e) Ko e ha ne pehe ai kua ‘gahua lahi e tau motua kia tautolu’?
14 Kua maeke foki ia tautolu ke fakatata ha tautolu a fakaaue ma e “tau mena fakaalofa ke he tau tagata” he fakakite ki a lautolu e loto manamanatuaga. He tohia ke he fakapotopotoaga i Tesalonia, ne tomatoma age a Paulo ki a lautolu i ai: “Ke iloa e mutolu a lautolu kua gahua kia mutolu, mo e pule kia mutolu ke he tau mena he Iki, mo e tomatoma atu kia mutolu. Kia fakahelehele fakalahi a lautolu mo e fakaalofa, ha ko e gahua ha lautolu.” (1 Tesalonia 5:12, 13) ‘Gahua lahi’—nakai kia kua fakakite he mena ia e tau motua gahua fakamoli ne fakamakai lahi ke foaki ni a lautolu ke lagomatai a tautolu? Manamanatu fakaku la, ke he tau matagahua mamafa ne lautaki he tau matakainaga fakahelehele nei.
15 Ka kua laulahi ia lautolu ko e tau tagata tane fai magafaoa ne gahua tupe ke leveki aki e magafaoa ha lautolu. (1 Timoteo 5:8) Kaeke ke fai fanau e motua, kua lata a lautolu ikiiki nei ke fai magaaho mo e leveki mitaki mai he matua tane ha lautolu. Liga lata ia ia ke lagomatai e tau gahua aoga ha lautolu, ti lata foki ke setulu taha magaaho ke fakaaoga e malolo fuata ha lautolu ke he taha fakafiafiaaga mitaki. (Fakamatalaaga 3:1, 4) Ko e mena ne mua, ke leveki e ia e tau manako fakaagaga he magafaoa hana, taute tumau e fakaakoaga Tohi Tapu he magafaoa, gahua auloa mo lautolu he fekafekauaga he fonua, mo e uta a lautolu ke he tau feleveiaaga Kerisiano. (Teutaronome 6:4-7; Efeso 6:4) Kia nakai nimo e tautolu kua fai matagahua foki e tau motua ne kehe mai he tau matagahua nei ne kua mahani e tokologa ia tautolu ki ai: ko e tauteute tuai e tau vala ma e feleveiaaga, taute e tau ahiahi leveki, tokaga atu ke he levekiaga fakaagaga he fakapotopotoaga mo e, ka lata ai, taute e tau fifiliaga. Falu kua lahi atu e matagahua tuga ke he tau toloaga mo e tau fonoaga he fahi motu, talagaaga he tau Fale he Kautu, mo e ha ha he Komiti Matutaki Fale Gagao. Moli ni, kua ‘gahua lahi’ e tau matakainaga nei!
16. Fakamaama falu puhala ne kua maeke ia tautolu ke fakakite e manamanatuaga ma e tau motua.
16 Maeke fefe a tautolu ke fakakite e manamanatuaga ki a lautolu? Ne talahau he kupu fakatai he Tohi Tapu: “Mo e kupu ke he hana aho ke lata ai, kua mitaki lahi haia.” (Tau Fakatai 15:23; 25:11) Ti ko e tau kupu fakaaue moli mo e fakamalolo ka fakakite ki a lautolu kua nakai fakateaga a tautolu ke he tau gahua uka ha lautolu. Lata ia tautolu ke mailoga foki e tau mena ne amaamanaki a tautolu ki a lautolu. Ke he taha mena, kua lata ia tautolu ke ataina ke o atu ki a lautolu ke moua lagomatai. Liga to hoko e magaaho ka ‘hopo ha tautolu a ate’ mo e lata ke moua mai he Tohiaga Tapu e fakamaloloaga, takitakiaga, po ke fakatonuaga mai ia lautolu ne kua “aga ke fakaako atu” e Kupu he Atua. (Salamo 55:4; 1 Timoteo 3:2) He magaaho taha ia ni, kua lata ia tautolu ke manatu kua fakakaupa e magaaho he motua ma tautolu, ha kua nakai maeke ia ia ke tiaki e tau manako he hana magafaoa po ke he falu i loto he fakapotopotoaga. He “loto fakalataha” ma e tau matakainaga nei ne gahua lahi, to nakai manako a tautolu ke fakafi tumau ki a lautolu. (1 Peteru 3:8) Ka kua lata ia tautolu ke fakakite e fakaaue ke he ha magaaho mo e leveki mitaki ne kua maeke ia lautolu ke foaki mai ma tautolu.—Filipi 4:5.
17, 18. Ko e heigoa e tau poa ne taute he tau hoana he tau motua, mo e fakakite fefe e tautolu kua nakai fakateaga e tautolu ke he tau matakainaga fifine fakamoli nei?
17 Ka e kua e tau hoana he tau motua? Nakai kia lata foki a lautolu mo e manamanatuaga ha tautolu? Ha ko e mena fakafetui foki e lautolu e tau tane ha lautolu mo e fakapotopotoaga. Ti ko e poa anei he vala ha lautolu. He falu magaaho, kua fakamole he tau motua e tau matahola he mogo afiafi ma e tau mena he fakapotopotoaga he magaaho ne kua lata ia lautolu ke fakaaoga mo e magafaoa ha lautolu. He tau fakapotopotoaga loga kua fakamakai e tau fifine Kerisiano fakamoli ke taute e tau poa pihia ke maeke he tau tane ha lautolu ke leveki e tau mamoe ha Iehova.—Fakatatai 2 Korinito 12:15.
18 Fakakite fefe mogoia e tautolu kua nakai fakateaga a tautolu ke he tau matakainaga Kerisiano fifine fakamoli nei? He nakai fakafi tumau atu ke he tau tane ha lautolu. Ka e nakai lata foki ia tautolu ke nimo e malolo he tau kupu fakaaue. Ne talahau he Tau Fakatai 16:24: “Ko e tau kupu fulufuluola, ko e meli kua hihina hifo haia; kua humelie ke he loto, ko e mena foki ke malolo ai e tau hui motua.” Kikite la ke he taha mena ne tupu. He taha feleveiaaga Kerisiano, ne o atu e tokoua mau ke he taha motua mo e ole ke tutala ki a ia hagaao ke he tama tane fuata ha laua. He tala e motua mo laua, ne fakatali fakaeneene hana hoana. He mogo fakamui, ne finatu e matua fifine ke he hoana he motua mo e talahau: “Manako au ke fakaaue ki a koe ke he magaaho ne fakaata he tane hau ke lagomatai e magafaoa haku.” Ko e tau kupu mukamuka mo e humelie ia he fakaaue ne aamotia e loto he hoana he motua ia.
19. (a) Ko e heigoa e tau manatu ne fa e lautaki fakamoli he tau motua kua kau auloa? (e) Ko e heigoa kua lata ia tautolu oti ke fakamalolo ke taute?
19 Ko e foakiaga he tau motua ke leveki e tau mamoe ko e taha he ‘tau mena foaki noa mitaki’ a ia ha Iehova. (Iakopo 1:17) Nakai, ko e tau tagata tane nei kua nakai mitaki katoatoa; tuga ni a tautolu oti, kua taute e lautolu e hehe. (1 Tau Patuiki 8:46) Pete ia, he kau auloa, ne taute fakamoli he tau motua he tau fakapotopotoaga he lalolagi katoa ke lautaki e tau manako a Iehova ma lautolu—ko e fakakatoatoa, ati hake, kaufakalataha, mo e puipui e fuifui mamoe. Kia igatia ai e tau motua ke fakatumau ke leveki mo e fakahelehele e tau mamoe ha Iehova, ati fakakite moli ai a ia ko e mena fakaalofa, po ke fakamonuina, ke he hana tau matakainaga. Ti o mai a a tautolu ke fakamalolo ke fakakite e fakaaue ha tautolu ma e “tau mena fakaalofa ke he tau tagata” he omaoma mo e fifitaki ki a lautolu mo e he fakakite ki a lautolu e manamanatuaga ma e gahua lahi ha lautolu. Kua fakaaue ha a tautolu he foaki mo e fakaalofa e Iehova e tau tagata tane ne tuga ke talahau ke he tau mamoe hana: ‘Ko e matagahua ha mautolu a ia ke lagomatai a mutolu he fekafekau ke he Atua mo e fiafia’!
To Tali Fefe a Koe?
◻ Ko e ha kua latatonu ke fakatai e fakapotopotoaga ke he tino?
◻ Maeke fefe he tau motua ke lagomatai e tau matakainaga ha lautolu ke fekafekau ki a Iehova mo e fiafia?
◻ Ko e ha kua nakai lata ni ia tautolu ke omaoma ka e ke fifitaki foki ki a lautolu ne takitaki?
◻ Ko e tau puhala fe ne kua maeke ia tautolu ke fakakite e manamanatuaga ke he tau motua?
[Fakatino he lau 26]
Ma tau motua, kia nava ke he falu ha ko e tau gahua mo e loto katoa ha lautolu
[Fakatino he lau 27]
Ha ko e fakataiaga makutu ha lautolu ke he fekafekauaga, kua maeke he tau motua ke lagomatai a lautolu he magafaoa mo e falu foki ke fekafekau mo e fiafia
[Tau Fakatino he lau 28]
Fakaaue lahi a tautolu ke he tau motua gahua lahi ha tautolu