‘Iloa a Lautolu kua Gahua Lahi kia Mutolu’
“Ke iloa e mutolu a lautolu kua gahua [“lahi,” NW] kia mutolu, mo e pule kia mutolu ke he tau mena he Iki, mo e tomatoma atu kia mutolu.”—1 TESA. 5:12.
1, 2. (a) Ko e heigoa e tuaga he fakapotopotoaga Tesalonia he mogo ne tohia e Paulo e tohi fakamua haana ki a lautolu? (e) Ko e heigoa ne fakamalolō e Paulo ke he tau tagata Tesalonia ke taute?
MANAMANATU LA ko koe taha he fakapotopotoaga Tesalonia he senetenari fakamua, ko e taha fakapotopotoaga fakamua atu ne fakatū i Europa. Kua lahi e magaaho ne fakaaoga he aposetolo ko Paulo he ati hake e tau matakainaga i ai. Liga kua kotofa e ia e tau patu ke takitaki, tuga he falu fakapotopotoaga. (Gahua 14:23) Ka e mole he fakatū e fakapotopotoaga, ne fakatoka he tau Iutaia e tau matakau vale ke utakehe a Paulo mo Sila he maaga. Ko e tau Kerisiano ne toe hifo ne liga moua e logonaaga kua tiaki, po ke matakutaku foki.
2 Maama ai, he mole e toka a Tesalonia, ne tupetupe pauaki a Paulo hagaao ke he fakapotopotoaga foou. Ne lali a ia ke liu, ka e ‘fakalekua e Satani’ e puhala haana. Ti fakafano e ia a Timoteo ke fakamalolō e fakapotopotoaga. (1 Tesa. 2:18; 3:2) Mogo ne liuaki mai e Timoteo e hokotaki mitaki, ne omoomoi a Paulo ke tohia e tohi ke he tau tagata Tesalonia. Ke he falu mena foki, ne fakamalolō atu a Paulo ki ai ‘ke iloa a lautolu mo e pule kia lautolu.’—Totou 1 Tesalonia 5:12, 13.
3. Ko e heigoa e tau kakano ne ha ha he tau Kerisiano Tesalonia he fakahelehele fakalahi e tau patu?
3 Ko e tau matakainaga taane ne takitaki he tau Kerisiano Tesalonia ne nakai lotomatala a lautolu tuga a Paulo mo e tau hoa faifano haana; po ke moua e lautolu e tufaaga fakaagaaga ne lahi mahaki he tau motua i Ierusalema. Mole ia, nakaila katoa e tau he fakatū e fakapotopotoaga! Ka ko lautolu he fakapotopotoaga kua fai kakano ke loto fakaaue ke he tau patu ha lautolu, ne “gahua lahi” mo e “pule” po ke, takitaki ke he fakapotopotoaga mo e “tomatoma” ke he tau matakainaga. Mooli, kua fai kakano mitaki ke “fakahelehele fakalahi [e tau motua] mo e fakaalofa.” Ko e ole nei ne mui mai he fakatonuaga a Paulo ke “nonofo . . . mo e mafola.” Kaeke ko koe i Tesalonia, to fakakite nakai e koe e loto fakaaue hokulo ma e gahua he tau motua? Fēfē e onoonoaga haau ke he “tau mena fakaalofa ke he tau tagata” ne foaki he Atua puhala he Keriso ke he fakapotopotoaga ha mutolu?—Efeso 4:8.
“Gahua Lahi”
4, 5. Ko e ha ko e gahua uka lahi ma e tau patu he vahā a Paulo ke fakaako e fakapotopotoaga, ti ko e ha kua pihia he vahā nei?
4 He mole e fakafano atu a Paulo mo Sila ki Perea, “gahua lahi” fēfē e tau patu i Tesalonia? He fifitaki a Paulo, ne fakaako mooli e lautolu e fakapotopotoaga he fakaaoga e tau Tohiaga Tapu. ‘Loto fakaaue nakai e tau Kerisiano Tesalonia ke he Kupu he Atua?’ he manatu e koe. Mole ia, pehē e Tohi Tapu ko e tau tagata Perea “kua mua e mahani mitaki ha lautolu nai ke he tau tagata Tesalonia; ha kua . . . kumikumi [“fakamakutu,” NW] ke he tau Tohi ke he taha aho mo e taha aho.” (Gahua 17:11) Ko e fakatataiaga mogoia ko e tau tagata Tesalonia Iutaia ne tokologa ka e nakai ke he tau Kerisiano. Ko lautolu ne eke mo tau tagata kua tua ne ‘talia e kupu he Atua, nakai ko e kupu he tau tagata, ka ko e kupu he Atua.’ (1 Tesa. 2:13) Ko e tau patu ne liga gahua lahi ke fagai fakaagaaga a lautolu ia.
5 He vahā nei, ko e vahega fekafekau fakamoli mo e loto matala kua foaki ke he fuifui he Atua e ‘tau mena kai ke he tau magaaho tonu.’ (Mata. 24:45) He takitakiaga he fekafekau, kua gahua lahi e tau motua he fakapotopotoaga ke fagai fakaagaaga e tau matakainaga ha lautolu. Kua liga moua e lautolu he fakapotopotoaga e tau tohi loga ne fakavē ke he Tohi Tapu, mo e he falu vagahau kua ha ha i ai e tau koloa tuga e Watch Tower Publications Index mo e Watchtower Library he CD-ROM. Ke fakamakona e tau manako fakaagaaga he fakapotopotoaga, kua lahi e magaaho ne fakaaoga he tau motua ke tauteute e tau vala he feleveiaaga ke maeke ia lautolu ke foaki mai e tau vala tala ne kotofa ke he puhala lauia mitaki. Kua manamanatu nakai a koe ke he lahi he magaaho kua fakaaoga he tau motua ke tauteute e tau vala ha lautolu ma e tau feleveiaaga, tau toloaga, mo e tau fonoaga?
6, 7. (a) Ko e heigoa e fifitakiaga ne moua he tau patu i Tesalonia ia Paulo? (e) Ko e ha kua liga paleko ma e tau motua he vahā nei ke fifitaki a Paulo?
6 Ne manatu he tau patu i Tesalonia e fifitakiaga mitaki ne fakatoka e Paulo he leveki e fuifui. Nakai ko e taute noa ni e ia e levekiaga ha ko e matagahua. He fakatutala ki ai he vala tala fakamua, kua “mahani molu [a Paulo] tuga ne fifine fakahuhu tama kua leveki fakamitaki hana ni a fanau.” (Totou 1 Tesalonia 2:7, 8.) Kua makai foki a ia ‘ke ta atu haana a moui’! He gahua leveki, kua lata e tau patu ke tuga a ia.
7 Kua fifitaki he tau leveki Kerisiano he vahā nei a Paulo he fakahelehele e fuifui. Ko e aga pauaki he falu mamoe kua nakai totonu mo e fakakapitiga. Ka e lali e tau motua ke fakakite e maamaaga mo e ‘moua e mena mitaki’ ia lautolu. (Fakatai 16:20) Mooli, he nakai mitaki katoatoa, liga taufetului e motua ke moua e onoonoaga mitaki ke he tau tagata takitaha. Ka e, he eketaha fakalahi a ia ke totonu ke he tau tagata oti, nakai kia lata ke nava ke he laliaga haana ke eke mo leveki mitaki i lalo he Keriso?
8, 9. Ko e heigoa falu puhala he tau motua he vahā nei kua ‘leoleo ke he tau agaga ha tautolu’?
8 Fai kakano oti a tautolu ke omaoma ke he tau motua. He tohia e Paulo, kua ‘leoleo a lautolu ke he tau agaga ha tautolu.’ (Hepe. 13:17) Fakamanatu he talahauaga ia ki a tautolu e leveki mamoe kua nakai mohe ke maeke ke puipui e fuifui mamoe haana. Pihia foki, liga nakai momohe e tau motua he vahā nei he falu mogo ha ko e hagaaki ke he tau manako ha lautolu kua nakai malolō e tino po ke lekua e logonaaga po ke tuaga fakaagaaga. Ma e fakatai, ko e tau matakainaga taane he tau Komiti Matutaki Fale Gagao ne aala he momohe ke fakakia e tau matematekelea fakaekekafo. Ka e, he fehagai a tautolu mo e tuaga pihia, kua loto fakaaue mooli a tautolu ke he tau gahua ha lautolu!
9 Ko e tau motua he tau Komiti Tafale he Matakavi mo e tau komiti foaki lagomatai kua gahua lahi ke lalago e tau matakainaga. Latatonu mooli a lautolu mo e lalagoaga loto katoa ha tautolu! Manamanatu ke he laliaga foaki lagomatai he mole e Afā Nargis ne lauia a Myanmar he 2008. Ke hohoko atu ke he Fakapotopotoaga Bothingone he matakavi ne lauia kelea ko Irrawaddy Delta, ne fenoga atu e matakau lagomatai he matakavi kua malona lahi ne tafola he tau gati tino. He kitia he tau matakainaga he matakavi e matakau lagomatai fakamua ne hohoko atu ki Bothingone ne ha ha i ai e leveki takaiaga fakamua ha lautolu, ne tagi a lautolu: “Kitiala! Ko e leveki takaiaga ha tautolu! Kua fakahao e Iehova a tautolu!” Loto fakaaue nakai a koe ke he gahua lahi ne taute he tau motua he aho mo e pō? Falu motua kua kotofa ke fekafekau ke he tau komiti pauaki ke taute e tau lekua matafakatufono ne uka. Nakai fakaikaluga e tau motua nai ke he tau mena ne taute e lautolu; ka ko lautolu ne aoga mai he gahua ha lautolu kua loto fakaaue mooli.—Mata. 6:2-4.
10. Ko e heigoa e gahua kua nakai iloa lahi ne taute he tau motua?
10 Tokologa e motua he vahā nei kua fai gahua pepa foki ke taute. Ma e fakatai, ko e leveki he kau he tau motua kua tauteute e tau fakaholoaga ma e tau feleveiaaga he faahi tapu. Kua tuku fakalataha he tohikupu he fakapotopotoaga e tau hokotaki he gahua he fonua he mahina mo e tau katoa. Kua manamanatu fakahokulo e leveki aoga ke he fakaholoaga he aoga. He tau mahina tolu oti, kua totou mo e fakamau e tau fakamoleaga he tupe he fakapotopotoaga. Kua totou he tau motua e tau tohi mai he la ofisa ti fakagahua e takitakiaga kua lagomatai ke fakatumau e “loto fakalataha ke he tua.” (Efeso 4:3, 13) Ko e tau laliaga he tau motua gahua lahi ia, kua “eke e tau mena oti mo e fulufuluola mo e taute fakamitaki.”—1 Kori. 14:40.
“Pule Kia Mutolu”
11, 12. Ko hai ne pule ke he fakapotopotoaga, ti ko e heigoa ne putoia he taute pihia?
11 Ne fakamaama e Paulo e tau patu ne gahua lahi i Tesalonia kua “pule” ke he fakapotopotoaga. Ko e kupu he vagahau fakamua ne hagaao ke he “tū ki mua” mo e kakano foki “fakahakohako; ke takitaki ki ai.” (1 Tesa. 5:12; matahui tala NW.) Ne hagaao a Paulo ke he tau motua taha ia kua “gahua lahi.” Kua tutala a ia hagaao ke he tau tagata taane momotua oti he fakapotopotoaga. He vahā nei, laulahi he tau motua ne tūtū i mua he fakapotopotoaga mo e taute e tau feleveiaaga. Ko e hikiaga foou ke fakaaoga e matahigoa “leveki he kau he tau motua” kua lagomatai a tautolu ke onoono ke he tau motua oti ko e tau tagata kau fakalataha.
12 He “pule” ke he fakapotopotoaga ne nakai ni ko e fakaako hokoia. Kua tatai mo e talahauaga ne fakaaoga ia 1 Timoteo 3:4. Ne pehē a Paulo kua lata e leveki ke “pule fakamitaki ke he hana ni a magafaoa, ha ha ia ia e tau fanau kua omaoma, mo e nonofo fakatekiteki ni.” Ko e talahauaga nei “pule” ne putoia mooli e fakaako he tau tama haana pihia mo e takitaki e magafaoa mo e “tau fanau kua omaoma.” E, kua takitaki he tau motua e fakapotopotoaga he lagomatai e tau tagata oti ke omaoma ki a Iehova.—1 Timo. 3:5.
13. Ko e ha kua liga fai magaaho ke hokotia ke he fifiliaga he fonoaga he tau motua?
13 Ke maeke ke pule fakamitaki ke he fuifui, kua fakatutala e tau motua hoko lautolu ni ke he puhala ke lagomatai e fakapotopotoaga. Liga mukamuka lahi ka taute ni he taha e motua e tau fifiliaga oti. Ka ko e mumui ke he fifitakiaga he kau fakatufono he senetenari fakamua, ko e tau kau he tau motua he vahā nei kua atāina ke fakatutala ke he tau manatu, he kumi e takitakiaga mai he tau Tohiaga Tapu. Ko e foliaga ha lautolu ke fakagahua e tau matapatu fakaakoaga he Tohi Tapu ke lata mo e tau manako he fakapotopotoaga. Lauia mitaki lahi e mena nei ka tauteute e tau motua takitaha ma e tau fono he tau motua, manamanatu ke he tau Tohiaga Tapu mo e tau takitakiaga he fekafekau fakamoli mo e loto matala. Mooli, lata ke fai magaaho ma e mena nei. Ka kehekehe e tau manatu, tuga ni ne tupu ke he kau fakatufono he senetenari fakamua he fakatutala ke he matakupu he peritome, liga lata ke lahi e magaaho mo e kumikumiaga ke tatai mo e manatu ne fakavē ke he tau Tohiaga Tapu.—Gahua 15:2, 6, 7, 12-14, 28.
14. Loto fakaaue nakai a koe ke he kau he tau motua kua gahua auloa fakalataha? Ko e ha ne manatu pihia a koe?
14 Ko e heigoa ka liga tupu ka taha e motua kua fakamakamaka ke he puhala ni haana po ke lali ke peehi ni e tau manatu haana? Ka e kua ka fai tagata—tuga a Tioterefe he senetenari fakamua—ne gana e tau tega he feveheveheaki? (3 Ioa. 9, 10) To matematekelea mooli e fakapotopotoaga katoa. Ka lali a Satani ke fakatauhele e fakapotopotoaga he senetenari fakamua, to iloa mooli e tautolu kua manako foki a ia ke tauhele e mafola he fakapotopotoaga he vahā nei. To liga fakalagalaga e ia e tau hihiga lotokai he tagata, tuga e manako ma e tuaga matalahi. Ti kua lata he tau motua ke feaki e mahani fakatokolalo mo e gahua auloa fakalataha ko e tino taha. Kua loto fakaaue mooli a tautolu ke he mahani fakatokolalo he tau motua kua kaufakalataha tuga e tino!
‘Tomatoma a Mutolu’
15. Ko e heigoa e manako he tau motua ka tomatoma e matakainaga taane po ke matakainaga fifine?
15 Ne fakamaama mogoia e Paulo e gahua uka ka e aoga lahi he tau patu: ko e tomatoma e fuifui. He tau Tohiaga Tapu Heleni Kerisiano he New World Translation, ko Paulo ni ne fakaaoga e kupu Heleni ne fakaliliu “tomatoma.” Maeke ke hagaao ke he fakatonuaga malolō ka e nakai fakakite e totokoaga. (Gahua 20:31; 2 Tesa. 3:15) Tuga anei, ne tohi e Paulo ke he tau Korinito: “Nakai tohi atu au e tau mena nai kia mutolu ke fakama aki a mutolu, ka kia tomatoma atu kia mutolu ko e haku a tau fanau fakahelehele.” (1 Kori. 4:14) Ko e manako haana i tua he tomatomaaga ko e manamanatu fakaalofa ma e falu.
16. Ko e heigoa kua lata he tau motua ke tokaloto ka tomatoma e falu?
16 Kua tokaloto he tau motua e aoga lahi he puhala nukua tomatoma e lautolu e falu. Eketaha a lautolu ke fifitaki a Paulo he mahani totonu, fakaalofa, mo e lagomatai. (Totou 1 Tesalonia 2:11, 12.) Mooli, ko e tau motua ‘kua taofi mau ke he kupu moli kia maeke ia lautolu ke fakamafana atu ke he tau kupu ke momoui ai.’—Tito 1:5-9.
17, 18. Ko e heigoa kua tokaloto e koe ka moua e koe e tomatomaaga mai he motua?
17 Mooli, kua nakai mitaki katoatoa e tau motua ti liga talahau e tau mena kua tokihala a lautolu he mogo fakamui. (1 Patu. 8:46; Iako. 3:8) Iloa foki he tau motua ko e moua he tau matakainaga fakaagaaga e fakatonuaga kua nakai fa mahani ke ‘fiafia ka e momoko.’ (Hepe. 12:11) Ti ka fina atu e motua ke he taha tagata mo e tau kupu tomatoma kua liga fitā e lahi he manamanatu mo e liogi a ia ke he matakupu. Ka eke kua tomatoma ki a koe, nukua loto fakaaue nakai a koe ke he manatu fakaalofa he motua ia?
18 Liga lekua e malolō tino haau ne liga nakai mahino mitaki e levekiaga fakaekekafo. Ti mailoga mitaki he ekekafo e lekua, ka ko e tuluiaga kua uka ke talia. To fakafualoto nakai a koe ke he ekekafo ia? Nakai! Pete foki ka talahau e ia ke iihi, liga to talia e koe e tuluiaga, he talitonu to aoga ai ki a koe. Ko e puhala kua tala atu he ekekafo e vala tala kua liga lauia lahi e tau logonaaga haau, ka e fakaatā kia e koe e mena ia ke taute e fifiliaga ma haau? Liga nakai. Pihia foki, ua fakaatā e puhala kua tomatoma a koe ke taofi a koe mai he fanogonogo ki a lautolu ne liga fakaaoga e Iehova mo Iesu ke fakailoa ki a koe e puhala ka lagomatai po ke puipui a koe fakaagaaga.
Loto Fakaaue ke he Foakiaga a Iehova he Tau Motua
19, 20. Liga fakakite fēfē e koe e loto fakaaue ma e “tau mena fakaalofa ke he tau tagata”?
19 Ko e heigoa ka taute e koe ka moua e koe e mena fakaalofa kua taute pauaki ma haau? To fakakite nakai e koe e loto fakaaue haau he fakaaoga ai? Ko e “tau mena fakaalofa ke he tau tagata” kua foaki e Iehova puhala ia Iesu Keriso ma haau. Taha puhala ka fakakite e koe e loto fakaaue ma e tau mena fakaalofa nei ko e fanogonogo fakamitaki ke he tau lauga ne foaki he tau motua mo e lali ke fakagahua e tau manatu ne talahau e lautolu. Maeke ia koe ke fakakite foki e loto fakaaue haau he taute e tau talahauaga kakano lahi he tau feleveiaaga. Lalago e gahua kua takitaki he tau motua, tuga e gahua he fonua. Ka moua e koe e aoga mai he fakatonuaga he taha motua, ko e ha he tala age ai ki a ia? Lafi ki ai, ko e ha he fakakite e loto fakaaue haau ke he tau magafaoa he tau motua? Manatu, ma e motua ke gahua lahi he fakapotopotoaga, kua nakai fakatauhele he magafaoa e magaaho ia haana.
20 E, ha ha ia tautolu e kakano lahi ke fakakite e loto fakaaue ma e tau motua, hane gahua lahi ke lata mo tautolu, he pule ki a tautolu, mo e tomatoma ki a tautolu. Ko e “tau mena fakaalofa ke he tau tagata” nei ko e foakiaga fakaalofa mooli mai ia Iehova!
Manatu Nakai e Koe?
• Ko e heigoa e tau kakano ne lata he tau Kerisiano Tesalonia ke loto fakaaue ki a lautolu kua takitaki a lautolu?
• Gahua lahi fēfē e tau motua he fakapotopotoaga ha mutolu ma mutolu?
• Aoga fēfē a mutolu mai he pule he tau motua ki a mutolu?
• Ka tomatoma he motua, ko e heigoa kua lata ia koe ke tokaloto?
[Fakatino he lau 27]
Loto fakaaue nakai a koe ke he tau puhala loga kua leveki he tau motua e fakapotopotoaga?