‘Kia Leveki e Fuifui Mamoe he Atua Ha ia Mutolu’
“Kia leveki e mutolu e fuifui mamoe he Atua ha ia mutolu, kia leoleo ki ai mo e fakamakai, ka e nakai he ole fakamakamaka ai.”—1 PETE. 5:2.
1. Ko e heigoa e tau tuaga ne fehagai he tau Kerisiano he mogo ne tohia e Peteru e tohi fakamua haana?
FAI magaaho to fakatoka mai e Nero e favaleaga ke he tau Kerisiano i Roma, ne tohia he aposetolo ko Peteru e tohi fakamua haana. Ne manako a ia ke fakamalolō e tau matakainaga fakahele haana. Ko e Tiapolo “kua faifano” ke kumi e tau Kerisiano ke faiola ai. Ke totoko mauokafua ki a ia, kua lata ia lautolu “kia nonofo fakalatalata a [la]utolu” mo e ke “fakatokolalo ai a [la]utolu ki lalo he lima malolo he Atua.” (1 Pete. 5:6, 8) Lata foki a lautolu ke nonofo fakalataha. Nakai lata a lautolu ke “fegagauaki mo e fekaiaki,” ha ko e mena ia ka fua mai ke he ‘fakaotioti e lautolu a lautolu.’—Kala. 5:15.
2, 3. Ko hai kua lata ia tautolu ke tau ki ai, ti ko e heigoa ka fakatutala a tautolu he tau fufuta nei ki ai?
2 He vahā nei, kua fehagai a tautolu mo e tuaga pihia. Kua kumi he Tiapolo e tuaga ke faiola ki a tautolu. (Fakakite. 12:12) I mua ha tautolu kua puna mai e “lahi [he] matematekelea, nakai pihia taha mena tali mai he kamataaga he lalolagi.” (Mata. 24:21) Tuga ni e tau Kerisiano he senetenari fakamua ne lata ke puipui mai he fegagauaki a lautolu ni, ti lata foki ia tautolu. Ke taute e mena nei, kua lata ia tautolu he falu magaaho ke moua e lagomatai mai he tau tagata taane momotua kua lotomatala.
3 Fakatutala la tautolu ke he puhala ka fakaholo ki mua he tau motua e loto fakaaue ha lautolu ma e kotofaaga he leveki e ‘fuifui mamoe he Atua ha ia lautolu.’ (1 Pete. 5:2) Mui mai ai, to manamanatu a tautolu ke he puhala kua latatonu he taute e gahua leveki. He vala tala ka mui mai, to kumikumi e tautolu e puhala he fakapotopotoaga ‘ke iloa a lautolu kua gahua kia lautolu, mo e pule’ ke he fuifui. (1 Tesa. 5:12) Ko e fakatutala ke he tau matakupu nai ka lagomatai a tautolu ke taofi mauokafua he totoko ha tautolu a Fī ne mua, he mailoga ko ia hane tau atu a tautolu ki ai.—Efeso 6:12.
Leveki e Fuifui he Atua
4, 5. Lata ke onoono fēfē e tau patu ke he fuifui? Fakatai.
4 Ne fakamalolō e Peteru e tau patu he tau Kerisiano he senetenari fakamua ke moua e onoonoaga mahani Atua ke he fuifui ne tuku age ki a lautolu. (Totou 1 Peteru 5:1, 2.) Pete kua manamanatu ki a Peteru ko e pou he fakapotopotoaga, ne nakai tala fakateaga a ia ke he tau motua. Ka e, tomatoma e ia a lautolu ko e tau motua fakahele. (Kala. 2:9) He aga tuga ha Peteru, kua tomatoma he Kau Fakatufono he vahā nei e tau motua he fakapotopotoaga ke eketaha ke fakamooli e matagahua mamafa he leveki e fuifui he Atua.
5 Ne tohia he aposetolo ne lata e tau patu ke ‘leveki e fuifui mamoe he Atua ha ia lautolu.’ Kua aoga lahi ma lautolu ke mailoga ko e fuifui ha Iehova mo Iesu Keriso. Kua fakalago ke he tau motua e puhala ne leveki aki e lautolu e tau mamoe he Atua. Liga ole e kapitiga uho haau ki a koe ke leveki e fanau haana ka e fano fenoga a ia. To nakai kia leveki fakamitaki e koe a lautolu mo e fagai a lautolu? Ka gagao taha tama, to nakai kia matakite a koe kua moua e ia e lagomataiaga fakaekekafo kua lata? Pihia foki, ko e tau motua he fakapotopotoaga kua leveki e fakapotopotoaga he Atua ne fakafua e ia aki e toto ni he Tama haana. (Gahua 20:28) Kua tokaloto e lautolu ko e tau mamoe takitaha kua fakatau aki e toto uho ha Keriso Iesu. He fai fakalagoaga, kua fagai, puipui, mo e leveki he tau motua e fuifui.
6. Ko e heigoa e matagahua he tau leveki mamoe i tuai?
6 Manamanatu ke he tau matagahua he tau leveki mamoe he vahā Tohi Tapu. Lata ia lautolu ke fahia ke he vevela he aho mo e makalili he pō ke maeke ke leveki e fuifui. (Kene. 31:40) Ne foaki foki e lautolu e tau momoui ha lautolu ma e tau mamoe. Ko e tama taane ko Tavita ne leveki mamoe nukua fakahao e fuifui mamoe haana mai he tau manu favale, putoia e leona mo e urosa. Hagaao ki a lautolu takitaha nei, ne pehē a Tavita kua ‘toto ai e ia e hafe mo e keli ai ti mate.’ (1 Samu. 17:34, 35) Ko e toa mooli! Ne tata lahi mahaki a ia ke he pakakauloa he manu favale! Ka e nakai mataofi a ia ke laveaki e tau mamoe.
7. Liga hamuti fakatai fēfē he tau motua e tau mamoe he tau pakakauloa a Satani?
7 He vahā nei, lata e tau motua ke puipui mai he tau favaleaga he Tiapolo ne tuga e leona. Liga putoia he mena nei e gahua malolō he hamuti fakatai e tau mamoe mai he tau pakakauloa he Tiapolo. He taofi e manu favale he hafe, ke fakatai ki ai, maeke he tau motua ke laveaki e tau mamoe. Maeke ia lautolu ke fakamaama ke he tau matakainaga lolelole kua kamatamata he tau matahele a Satani. (Totou Iuta 22, 23.) Nakai maeke he tau motua ke taute e mena nei ka e nakai fai lagomatai mai a Iehova. Ne leveki fakamitaki e lautolu e mamoe ne pakia, pipi a ia mo e takai a ia ke he lolo mitaki he Kupu he Atua.
8. Ke he matakavi fe kua takitaki he tau motua e fuifui, ti fēfē?
8 Takitaki foki he leveki mamoe e fuifui ke he pā kua latatonu mo e matakavi kua fai vai. Pihia foki, kua takitaki he tau motua e fuifui ke he fakapotopotoaga, fakamalolō ke o atu tumau ke he feleveiaaga ke maeke he fuifui ke fagai fakamitaki mo e moua e ‘tau mena kai ha lautolu ke he tau magaaho tonu.’ (Mata. 24:45) Liga manako e tau motua ke fakaaoga fakalahi e magaaho he lagomatai a lautolu kua gagao fakaagaaga ke talia e huhua he Kupu he Atua. Ko e mamoe ne tafea kehe kua liga lali ke liu mai ke he fuifui. He nakai fakamatakutaku e matakainaga ha lautolu, kua fakamaama fakamitaki he tau motua e tau matapatu fakaakoaga Tohi Tapu ti fakakite ki a ia e puhala ka fakagahua e ia e tau mena nei ke he haana a moui.
9, 10. Lata fēfē he tau motua ke leveki a lautolu ne matematekelea fakaagaaga?
9 Ka gagao a koe, ko e ekekafo fe kua manako a koe ki ai? Ko ia ne tote e magaaho ke fanogonogo ki a koe ti mafiti ke atu e vai ekekafo ka e atā ke kitia e taha tagata gagao foki? Po ke liga manako a koe ke fina atu ke he ekekafo kua fanogonogo ki a koe, fakamaama e mena ne liga lekua a koe, ti tala atu e tau tuluiaga kua lata?
10 Pihia foki, ko e tau motua ka fanogonogo ke he tagata gagao fakaagaaga mo e lagomatai ke fakamaulu e kafokia, he puhala fakatai kua “fakatākai a ia ke he magalolo ke he higoa he Iki [Iehova].” (Totou Iakopo 5:14, 15.) Tuga e pasama i Kiliata, maeke he Kupu he Atua ke fakatotoka a ia ne matematekelea. (Iere. 8:22; Eseki. 34:16) Ka tākai, maeke he tau matapatu fakaakoaga ke lagomatai a ia ne fai lekua ke liu malolō ke he tau mena fakaagaaga. E, kua lahi e mitaki ne taute he tau motua ka logona agataha e lautolu e tau tupetupe he mamoe matematekelea mo e liogi mo ia.
Nakai Ole Fakamakamaka ka e Fakamakai
11. Ko e heigoa ne fakalagalaga e tau motua ke leveki fakamakai e fuifui he Atua?
11 Ne matutaki atu a Peteru ke fakamanatu ke he tau patu e puhala kua lata mo e nakai lata ke taute aki e gahua leveki. Kua lata he tau motua ke leveki e fuifui he Atua, “mo e fakamakai, ka e nakai he ole fakamakamaka ai.” Ko e heigoa kua fakalagalaga e tau motua ke fekafekau fakamakai ke he tau matakainaga ha lautolu? Ti ko e heigoa kua fakalagalaga a Peteru ke leveki mo e fagai e tau mamoe a Iesu? Ko e matapatu ko e haana fakaalofa mo e ofania ma e Iki. (Ioane 21:15-17) Ha ko e fakaalofa, ko e tau motua kua ‘nakai momoui kia lautolu ni, ka ko ia ne matulei ma lautolu.’ (2 Kori. 5:14, 15) Ko e fakaalofa nei ne fakalataha mo e fakaalofa ha lautolu ma e Atua mo e tau matakainaga ha lautolu, kua omoomoi e tau motua ke fekafekau ke he fuifui, he foaki e tau laliaga, tau koloa, mo e tau magaaho ha lautolu ke taute aki. (Mata. 22:37-39) Kua foaki e lautolu a lautolu nakai he ole fakafī, ka e fakamakai.
12. Lahi fēfē e mena ne foaki ni he aposetolo ko Paulo?
12 Lahi fēfē e mena kua lata e tau motua ke foaki a lautolu ni? He leveki e tau mamoe, kua fifitaki a lautolu ke he aposetolo ko Paulo, tuga he fifitaki e ia a Iesu. (1 Kori. 11:1) He ofania e tau matakainaga Tesalonia, ne fiafia lahi a Paulo mo e tau hoa haana ke talahau atu ki a lautolu e ‘nakai kuenaia e vagahau mitaki he Atua, ka e katoa foki mo e moui ha lautolu.’ He taute pihia, kua totonu a lautolu, “tuga ne fifine fakahuhu tama kua leveki fakamitaki hana ni a fanau.” (1 Tesa. 2:7, 8) Ne maama e Paulo e puhala ne logona he matua fifine fakahuhu tama ke he fanau haana. To taute e ia e tau mena oti ke lata mo lautolu, putoia e ala he tulotopō ke fagai a lautolu.
13. Ko e heigoa e lagotatai kua lata ke fakatumau he tau motua?
13 Kua lata e tau motua ke mataala ke fakatumau e lagotatai he tau matagahua leveki mo e tau kotofaaga ke leveki e tau magafaoa ni ha lautolu. (1 Timo. 5:8) Ko e magaaho ne fakaaoga he tau motua mo e fakapotopotoaga ko e magaaho uho kua lata ke fakaaoga mo e magafaoa ha lautolu. Taha puhala ke lagotatai e tau matagahua ua ko e uiina e falu ke he ha lautolu a Tapuakiaga Magafaoa he afiafi he falu magaaho. Ke he tau tau loga, ko Masanao, ko e motua i Sapanī, ne uiina a lautolu ne takitokotaha mo e tau magafaoa fakaagaaga ne matua tokotaha ke he fakaakoaga magafaoa haana. Nakai leva, falu ne lagomatai ne eke mo tau motua ti muitua e lautolu e fifitakiaga mitaki a Masanao.
Fakamamao he Fia Eke Koloa—Loto Fiafia he Leveki e Fuifui
14, 15. Ko e ha e tau motua kua lata ke puipui neke “fia eke koloa,” ti maeke fēfē ia lautolu ke fifitaki a Paulo he mena nei?
14 Kua fakamalolō foki e Peteru e tau motua ke leveki e fuifui, he “aua foki neke eke mo e fia eke koloa, ka ko e loto fiafia.” Ko e gahua he tau motua kua lahi e magaaho, ka e nakai amanaki a lautolu ke moua e totogi fakatupe. Kitia e Peteru e lata ke hataki e tau patu hagaao ke he hagahaga kelea he leveki e fuifui mo e “aua foki neke eke mo e fia eke koloa.” Ko e hagahaga kelea ia kua kitia ke he moui monuina he tau takitaki lotu ha ‘Papelonia Lahi’ ka e tokologa e tagata ne omoomoi ke nonofo mativa. (Fakakite. 18:2, 3) Ko e tau motua he vahā nei kua fai kakano mitaki ke mataala ke he ha hihiga he puhala ia.
15 Kua fakatoka e Paulo e fakafifitaki mitaki ma e tau motua Kerisiano. Pete ko ia e aposetolo ti liga eke mo “fakamamafa atu” ke he tau Kerisiano i Tesalonia, ne ‘nakai kai noa foki a ia ha mena kai he taha tagata.’ Ka e ‘gahua mamafa mo e mamahi a ia ke he po katoa mo e aho.’ (2 Tesa. 3:8) Tokologa e tau motua he vahā nei, putoia a lautolu he gahua faifano, kua fakatoka e fifitakiaga mitaki ke he puhala nei. Pete he talia e lautolu e fakamokoi he tau matakainaga fakahele, ne nakai “fakamamafa” e lautolu ha tagata.—1 Tesa. 2:9.
16. Ko e heigoa e kakano ke leveki e fuifui mo e “loto fiafia”?
16 Kua leveki he tau motua e fuifui mo e “loto fiafia.” Ko e loto fiafia ha lautolu kua kitia ke he aga foaki noa ha lautolu he lagomatai e fuifui. Ka e nakai kakano e mena ia kua fakaohooho e lautolu e fuifui ke fekafekau ki a Iehova; po ke fakamafana he tau motua fakahele e falu ke fekafekau ke he Atua mai he aga fetoko. (Kala. 5:26) Kua mailoga he tau motua e uho he tau mamoe takitaha. Kua loto fiafia a lautolu ke lagomatai e tau matakainaga ha lautolu ke fekafekau mo e makai ki a Iehova.
Aua Neke Fia Iki ke he Fuifui ka e Eke mo Tau Fakafifitaki
17, 18. (a) Ko e ha ne uka e tau aposetolo he falu magaaho ke maama e fakaakoaga a Iesu ke he mahani fakatokolalo? (e) Ko e heigoa e tuaga pihia kua liga ha ha i ai a tautolu?
17 He fakatutala tuai a tautolu, lata he tau motua ke tokaloto ko e fuifui he Atua kua leveki e lautolu, nakai ko e ha lautolu. Kua fakaeneene a lautolu ke “aua neke tuga he tau tagata kua fia iki ke he kaina he Atua.” (Totou 1 Peteru 5:3.) He falu magaaho, ne foli atu e tau aposetolo a Iesu mo e tau logonaaga hehē. Tuga a lautolu kua pule ke he tau motu, kua manako a lautolu ke moua e tuaga talahaua.—Totou Mareko 10:42-45.
18 He vahā nei, ko e tau matakainaga taane kua “foli e taha ke he feua he [“leveki,” NW]” kua lata ke kumikumi a lautolu ke he kakano kua foli atu a lautolu. (1 Timo. 3:1) Ko lautolu mogonei kua liga manako ke eke mo tau motua ka hūhū fakamooli ki a lautolu ni kua ha ha kia ia lautolu e manako ma e pule po ke talahaua tuga falu he tau aposetolo. Ka uka e tau aposetolo ke he faahi nei, maeke he tau motua ke mailoga kua lata a lautolu ke eketaha ke kalo kehe he ha hihiga fakalalolagi ke pule ke he falu.
19. Ko e heigoa kua lata he tau motua ke manatu ka taute taha mena ke puipui e fuifui?
19 Mooli, ha ha i ai e tau magaaho ka lata e tau motua ke tumauokafua, tuga e puipui e fuifui mai he “tau luko favale.” (Gahua 20:28-30) Ne tala age a Paulo ki a Tito ke fakatumau ke “tomatoma atu ai, mo e akonaki atu mo e pule ni.” (Tito 2:15) Ka e, pete foki he taute e mena ia, kua lali e tau motua ke fakalilifu a lautolu kua putoia ai. Kua loto fakaaue a lautolu ka e nakai tuhituhi fakakelea, ti fa lauia lahi e omoomoi totonu ke hokotia ke he tau loto mo e fakalagalaga e taha tagata ke mui ke he puhala hako.
20. Maeke fēfē he tau motua ke mumui ki a Iesu he fakatoka e fifitakiaga mitaki?
20 Ko e fakafifitaki mitaki he Keriso kua omoomoi e tau motua ke fakaalofa ke he fuifui. (Ioane 13:12-15) Mafanatia e tau loto ha tautolu he totou ke he puhala ne fakaako e ia e tau tutaki haana ke he gahua fakamatala mo e taute tutaki. Ko e puhala haana he mahani fakatokolalo kua lauia e tau loto he tau tutaki haana, ti omoomoi a lautolu ke mumui ke he puhala kua fakakite e ‘manatu he loto fakatokolalo kua mua e faoa oti kia lautolu.’ (Filipi 2:3) Ko e tau motua foki he vahā nei kua omoomoi ke mumui ke he fifitakiaga a Iesu, ti manako a lautolu ke eke mo “tau fakafifitaki ke he fuifui mamoe.”
21. Ko e heigoa e palepale ka amanaki ki ai e tau motua?
21 Ne fakahiku e Peteru e tomatoma haana ke he tau patu he hagaao ke he maveheaga ma e vahā anoiha. (Totou 1 Peteru 5:4.) Ko e tau leveki fakauku to “moua ai . . . e foufouiki lilifu nakai tuai popo” mo Keriso he lagi. Ko e tau leveki mamoe lagomatai he ‘tau mamoe kehe’ to moua e lilifu he leveki e fuifui he Atua he lalolagi i lalo he pule he “leveki mamoe ne mua.” (Ioane 10:16) Ko e vala tala ne mui mai ka fakatutala ke he tau puhala he tau tagata he fakapotopotoaga ka lagomatai a lautolu kua kotofa ke takitaki.
Ko e Puhala he Fakamanatu
• Ko e ha kua latatonu ma Peteru ke fakamafana e tau motua ke leveki e fuifui he Atua i lalo ha lautolu?
• Lata fēfē he tau motua ke leveki fakaagaaga a lautolu ne matematekelea?
• Ko e heigoa kua omoomoi e tau motua ke leveki e fuifui he Atua i lalo ha lautolu?
[Fakatino he lau 21]
Tuga e tau leveki i tuai, lata e tau motua he vahā nei ke puipui e “tau mamoe” he levekiaga ha lautolu