“Tau Mena Fakaalofa ke he Tau Tagata” ke Leveki e Tau Mamoe ha Iehova

“Ne haele hake a ia ki luga, ne takitaki e ia e tau tagata ne fofo he tau ke he fakapaeāga; ne foaki noa mai foki e ia e tau mena fakaalofa ke he tau tagata.”​—EFESO 4:8.

1. Ko e heigoa e tau kupu ne talahau he matakainaga Kerisiano fifine hagaao ke he tau motua i loto he fakapotopotoaga hana?

“FAKAAUE lahi he leveki mai a mautolu. Ko e tau mamali, ha mutolu a mafanatia, mo e ha mutolu a tupetupe mai kua maaliali lahi. Kua mautali tumau a mutolu ke fanogonogo mo e foaki mai e tau kupu he Tohi Tapu ne kua lagaki hake e tau agaga ha mautolu. Liogi au ke nakai hoko au ke fakatikai a mutolu.” Ko e tohi a ia he matakainaga Kerisiano fifine ke he tau motua he fakapotopotoaga hana. Kua kitia maaliali ai, ko e fakaalofa ne fakakite he tau leveki Kerisiano tokaga kua aamotia e loto hana.​—1 Peteru 5:2, 3.

2, 3. (a) Hagaao ki a Isaia 32:1, 2, leveki mo e fakaalofa hofihofi fefe he tau motua e tau mamoe ha Iehova? (e) Ko e mogo fe ka kitia ai e motua mo mena fakaalofa?

² Ko e tau motua ko e foakiaga mai ia Iehova ke leveki e tau mamoe hana. (Luka 12:32; Ioane 10:16) Kua fakahele e tau mamoe ha Iehova ki a ia​—kua fakahelehele lahi, ati fakafua e ia a lautolu aki e toto uho ha Iesu. Ti ko e mena haia, ne fiafia ai a Iehova he magaaho ne fakahelehele he tau motua e fuifui mamoe hana. (Gahua 20:28, 29) Mailoga la e fakamaamaaga fakaperofeta ki a lautolu nei ko e tau motua, po ke “tau iki”: “To eke foki e tagata ke tuga ne fakamumuliaga mai he matagi, mo e mena ke malu ai ka to e afa, ke tuga ne tau vailele ke he motu paku lā, ke tuga ne malu foki he kau maka lahi ke he motu nakai fai vai.” (Isaia 32:1, 2) E, kua lata ia lautolu ke puipui, fakahauhau, mo e fakamafana hana tau mamoe. Ko e tau motua ne leveki mo e fakaalofa hofihofi e fuifui mamoe hana kua akafaki ke moui ke he tau amaamanakiaga he Atua ma lautolu.

³ Ko e tau motua pihia kua kitia i loto he Tohi Tapu ko e “tau mena fakaalofa ke he tau tagata.” (Efeso 4:8) Ka manamanatu a koe ke he mena fakaalofa, kua manamanatu a koe ke he mena foaki ke fakapuke aki e manako po ke ta mai aki e fiafia ki a ia ne age ki ai. Kua maeke foki e motua ke eke mo mena fakaalofa he magaaho ne fakalotomatala a ia ke foaki lagomatai mo e ke lafi ke he fiafia he fuifui mamoe. Maeke fefe a ia ke taute e mena nei? Ko e tali, ne moua he tau kupu a Paulo he Efeso 4:7-16, kua fakatokoluga e loto fakaalofa a Iehova ma e fuifui mamoe hana.

“Tau Mena Fakaalofa ke he Tau Tagata”​—Mai Fe?

4. He fakamoliaga ia Salamo 68:18, ko e puhala fe ne ‘haele hake a Iehova ke he mena tokoluga,’ mo ko hai e “tau mena fakaalofa mo e tau tagata”?

⁴ He magaaho ne fakaaoga e Paulo e tau kupu “tau mena fakaalofa ke he tau tagata,” kua fatiaki e ia e tau kupu he Patuiki ko Tavita, ne talahau hagaao ki a Iehova: “Ne haele hake a koe ke he mena tokoluga, ne takitaki e koe e tau tagata ne fofo ke he fakapaeaaga; ne moua e koe e tau mena fakaalofa mo e tau tagata.” (Salamo 68:18) Kua fai tau he mole ne nonofo ai e tau Isaraela he Motu he Maveheaga, ne “haele hake” fakatai e Iehova e Mouga ko Siona mo e taute a Ierusalema mo maaga lahi he kautu ha Isaraela mo Tavita ke patuiki i ai. Ka ko hai e “tau mena fakaalofa mo e tau tagata”? Ko lautolu ko e tau tagata ne fofo ke he fakapaeaaga he vaha he kaumahalaaga he motu. Ko e falu tagata fakapaea nei kua fakahiku ke age ke he tau Levi ke lagomatai e tau gahua he faituga.​—Esera 8:20.

5. (a) Fakakite fefe e Paulo kua fakamoli e Salamo 68:18 i loto he fakapotopotoaga Kerisiano? (e) Ko e puhala fe ne ‘haele hake a Iesu ke he mena tokoluga’?

⁵ I loto he hana tohi ke he tau Efeso, ne fakakite e Paulo kua fakamoli lahi e tau kupu he salamo i loto he fakapotopotoaga faka-Kerisiano. He liu fatiaki e Salamo 68:18, ne tohia e Paulo: “Ka kua ta mai kia tautolu takitokotaha e fakaalofa noa fakalataha mo e mena foaki noa mai e Keriso. Ko e mena ia ne pehe mai ai a ia, Ne haele hake a ia ki luga, ne takitaki e ia e tau tagata ne fofo he tau ke he fakapaeāga; ne foaki noa mai foki e ia e tau mena fakaalofa ke he tau tagata.” (Efeso 4:7, 8) Kua fakahagaao e Paulo e salamo nei ki a Iesu ko e hukui he Atua. Ne ‘kautu a Iesu ke he lalolagi’ ha ko e tau puhala fakamoli hana. (Ioane 16:33) Kua kautu mai foki a ia he mate mo e ki a Satani ha kua liu fakatu mai he Atua a ia he mate. (Gahua 2:24; Heperu 2:14) He 33 V.N., kua haele hake e liu tu mai ko Iesu “ki luga he tau lagi oti”​—tokoluga hake foki he tau mena momoui he lagi. (Efeso 4:9, 10; Filipi 2:9-11) Ko e toa tau, ne uta e Iesu e ‘tau tagata fakapaea’ mai he tau fi. Taute fefe?

6. Kamata mai he Penetekoso 33 V.N., ne kamata fefe e haele hake ko Iesu ke moumou e fale ha Satani, mo e ko e heigoa ne taute e ia ke he ‘tau tagata fakapaea’?

⁶ He magahala ne nofo a Iesu he lalolagi, ne fakatata e Iesu hana pule malolo ki a Satani he laveaki a lautolu ne ha ha he liliaga he tau temoni. Tuga ni kua moumou e Iesu e fale ha Satani, lili a ia, mo e fofo e tau koloa hana. (Mataio 12:22-29) Manamanatu la, kua liu fakatu mai mo e tuku age e “pule oti kana ke he lagi mo e lalolagi,” ko e fofoaga ha ia ha Iesu ka taute! (Mataio 28:18) Kamata mai he Penetekose 33 V.N., ko ia ne haele hake ko Iesu, ko e hukui he Atua, ne moumou e fale ha Satani he ‘taute e fakapaeāga’​—he tau tagata ne kua leva e fakatupa ke he hala mo e mate mo e i lalo he pule a Satani. Ko e ‘tau tagata fakapaea’ nei ne fakamakai ke eke mo “tau tupa a Keriso kua eke e finagalo he Atua ke he loto.” (Efeso 6:6) Ti tuga kua fakatoka mai e Iesu a lautolu he pule a Satani ti, ha ko Iehova, tuku age a lautolu ke he fakapotopotoaga ko e “tau mena fakaalofa ke he tau tagata.” Manamanatu la e ita teao a Satani he fofo a lautolu i mua ni hana!

7. (a) Ko e puhala fe ne fekafekau e “tau mena fakaalofa ke he tau tagata” i loto he fakapotopotoaga? (e) Ko e heigoa e kotofaaga ne age e Iehova ke he tau tagata takitokotaha ne fekafekau mo motua?

⁷ Kitia nakai e tautolu e “tau mena fakaalofa ke he tau tagata” he fakapotopotoaga he vaha nei? E, kitia e tautolu! Kitia e tautolu a lautolu hane fekafekau ko e tau motua, ne gahua fakamakamaka mo ‘tau tagata fakamatala e tala mitaki, tau leoleo katoa mo e tau akoako’ i loto he tau fakapotopotoaga he tau tagata he Atua ne molea e 87,000 he lalolagi katoa. (Efeso 4:11) Ka kua manako lahi ni a Satani ke ekefakakelea e lautolu ia e fuifui mamoe. Ka e nakai ko e kakano a ia ne foaki he Atua he puhala ia Keriso a lautolu ke he fakapotopotoaga. Ka kua foaki e Iehova e tau tagata tane nei ke leveki fakamitaki e fakapotopotoaga, mo e kua fai fakalagoaga a lautolu ki a ia ha ko e tau mamoe ne tuku age ki a lautolu. (Heperu 13:17) Ti kaeke kua fekafekau a koe mo taha motua, kua atu e Iehova ki a koe e kotofaaga homo ue atu ke fakakite moli ko koe ko e mena fakaalofa, po ke fakamonuina, ke he tau matakainaga hau. Maeke ia koe ke taute pihia he fakakatoatoa fa e matagahua aoga.

Ka Ha Ha Ai e Lata ma e “Fakakatoatoa”

8. Ko e tau puhala fe ne kua lata ia tautolu ke taute e fakakatoatoaaga he falu magaaho?

⁸ Ke fakamua aki, ko e “tau mena fakaalofa ke he tau tagata” kua foaki mai ke “fakakatoatoa ai e mitaki he tau tagata tapu,” he talahau e Paulo. (Efeso 4:12) Ko e nauna faka-Heleni ne liliu “fakakatoatoa” kua kakano ke tuku taha mena “ki loto he mena kua lata.” Ko e tau tagata nakai mitaki katoatoa, kua lata ia tautolu oti ke fakakatoatoa he taha magaaho ke he taha magaaho​—ke fakalatalata e tau manamanatu, tau aga, po ke mahani ha tautolu “ke he mena kua lata” mo e manamanatuaga mo e finagalo he Atua. Ne foaki mo e loto fakaalofa e Iehova e “tau mena fakaalofa ke he tau tagata” ke lagomatai a tautolu ke taute e tau fakakatoatoaaga kua lata. Kua taute fefe e lautolu e mena nei?

9. Maeke fefe e motua ke lagomatai ke fakakatoatoa e mamoe hehe?

⁹ He falu mogo, kua finatu e motua ke lagomatai e mamoe hehe, liga kua ‘moua he taha holifono.’ Maeke fefe mogoia he motua ke lagomatai? ‘Kia liuaki mai a ia kua pihia mo e loto mahani molu,’ he talahau he Kalatia 6:1. Ti ka fakatonutonu age, kua nakai akonaki vale e motua ki a ia ne hehe, he vagahau e tau kupu mamafa. Kua lata e fakatonuaga ke fakamalolo, nakai ke “fakamatakutaku” a ia. (2 Korinito 10:9; fakatatai Iopu 33:7.) Kua fita e tagata he logona e fuafua kelea, ti lata e leveki loto fakaalofa ke kalo mai he pepela hifo e agaga hana. He magaaho ka fakatonu, ko e fakahakoaga malolo, kua fakaohooho mo e foaki moli he fakaalofa, ke liuaki mai e manamanatuaga mo e mahani hana ne hehe, ti liu ati hake a ia.​—2 Timoteo 4:2.

10. Ko e heigoa ne putoia he fakakatoatoa e falu?

¹⁰ He foaki mai e “tau mena fakaalofa ke he tau tagata” ke fakakatoatoa a tautolu, ko e manatu ha Iehova a ia ma e tau motua ke fakahauhau fakaagaga ati lata ai ke fifitaki ki ai e tau tagata hana. (1 Korinito 16:17, 18; Filipi 3:17) Ke fakakatoatoa e falu, kua nakai ni ke akonaki ia lautolu ne taute e hehe, ka e ke lagomatai foki a lautolu ne tua fakamoli ke pipiki mau ke he puhala hako.a He vaha nei, ha kua loga lahi e tau mena vihi ne kua fakalolelole aki e tau loto, kua lata he tokologa ke moua taha fakamaloloaga ke kuku ki ai. Kua lata e falu ke moua e lagomatai hofihofi ke fakalautatai e tau manamanatuaga ha lautolu mo e he Atua. Ke fakatai ki ai, kua taufetului falu Kerisiano mo e tau logonaaga hokulo he nakai lata po ke nakai aoga. Ko “lautolu kua manava tote” pihia kua liga logona hifo to nakai mafai a Iehova ke fakaalofa ki a lautolu mo e nakai talia foki e tau gahua mitaki ha lautolu ke fekafekau ke he Atua. (1 Tesalonia 5:14) Ka ko e manamanatuaga nei kua nakai lautatai mo e manatu moli he Atua hagaao ke he tau tagata tapuaki hana.

11. Ko e heigoa kua lata ke taute he tau motua ke lagomatai a lautolu ne taufetului mo e tau logonaaga nakai aoga?

¹¹ Ma tau motua, ko e heigoa ha mutolu ka taute ke lagomatai a lautolu ia? Kia totou fakamitaki mo lautolu e tau fakamoliaga faka-Tohiaga Tapu hane leveki takitokotaha e Iehova hana tau fekafekau mo e fakamafanatia ki a lautolu kua hagaao fakatagata e tau kupu Tohi Tapu nei ki a lautolu. (Luka 12:6, 7, 24) Lagomatai a lautolu ke kitia kua “futia mai” e Iehova a lautolu ke fekafekau ki a ia, ti kua kitia e ia e uho ha lautolu. (Ioane 6:44) Fakamoli age ki a lautolu kua nakai tu takitokotaha a lautolu​—ha kua tokologa e tau fekafekau fakamoli a Iehova ne pihia foki e tau logonaaga. Ko e perofeta ko Elia ne fakaatukehe lahi foki ti manako a ia ke mate. (1 Tau Patuiki 19:1-4) Kua logona he falu Kerisiano he senetenari ke fakamua aki e “fakahala” he tau loto ni ha lautolu a lautolu. (1 Ioane 3:20) Ha i ai mogoia e mafanatia he iloa ko lautolu ne fakamoli he tau vaha Tohi Tapu kua “tuga na tautolu.” (Iakopo 5:17) Maeke foki ia koe ke liu kikite atu ke he tau vala tala i loto he Ko e Kolo Toko mo e Awake! mo lautolu ne loto lolelole. Ko e hau a tau laliaga ke liuaki mai e mauokafua ha lautolu ne pihia to nakai galo noa ke he Atua ne atu ki a koe e “tau mena fakaalofa ke he tau tagata.”​—Heperu 6:10.

“Ati Hake” e Fuifui Mamoe

12. Ko e heigoa ne fakakite he tau kupu “ati hake ai e tino a Keriso,” mo e ko e heigoa e kei ke ati hake e fuifui mamoe?

¹² Ke ua aki, ko e “tau mena fakaalofa ke he tau tagata” kua foaki mai ke “ati hake ai e tino a Keriso.” (Efeso 4:12) Kua fakaaoga e Paulo e tau kupu fakatai. Ke “ati hake” ko e feaki hake a ia, mo e “tino a Keriso” ko e tau tagata​—ko lautolu ne fakauku he fakapotopotoaga Kerisiano. (1 Korinito 12:27; Efeso 5:23, 29, 30) Kua lata he tau motua ke lagomatai e tau matakainaga ha lautolu ke tupu malolo fakaagaga. Ko e amanakiaga ha lautolu ke ‘ati hake nakai ke ulu ki lalo’ e fuifui mamoe. (2 Korinito 10:8) Ko e kei ke ati hake e fuifui mamoe ko e fakaalofa, ha “kua fakamafana e fakaalofa.”​—1 Korinito 8:1.

13. Ko e heigoa e kakano ke loto maama, mo e ko e ha ne aoga ai ma e tau motua ke fakakite e loto maama?

¹³ Taha fahi he fakaalofa ne lagomatai e tau motua ke ati hake e fuifui mamoe ko e loto maama. Kua lata he loto maama ke manamanatu tuga e falu tagata​—ke manatu tuga a lautolu, he mailoga ha lautolu a tau kaupaaga. (1 Peteru 3:8) Ko e ha kua aoga ai ma e tau motua ke loto maama? Ha ko Iehova​—ko ia ne foaki e “tau mena fakaalofa ke he tau tagata”​—ko e Atua he loto maama. He magaaho ka matematekelea po ke mamahi hana tau fekafekau, ne momoko a ia ia lautolu. (Esoto 3:7; Isaia 63:9) Nukua tupetupe a ia ke he tau fakakaupaaga ha lautolu. (Salamo 103:14) Ti maeke fefe mogoia e tau motua ke fakakite e loto maama?

14. Ko e heigoa e tau puhala ne kua lata he tau motua ke fakakite e loto maama ke he falu?

¹⁴ He magaaho ka finatu taha tagata loto lolelole ki a lautolu, ne fanogonogo mo e mailoga e lautolu e tau manatu hana. Kua lali a lautolu ke maama e feakiaga, aga fakatagata, mo e tau tutuaga he tau matakainaga ha lautolu. Ti he magaaho ka foaki he tau motua e lagomatai mai he Tohiaga Tapu, to mukamuka he tau mamoe ke talia ha kua mai he tau leveki ne maama moli mo e fakaalofa ki a lautolu. (Tau Fakatai 16:23) Kua omoi foki he loto maama e tau motua ke mailoga e tau kaupaaga he falu mo e tau logonaaga ka tupu mai ai. Ke fakatai ki ai, liga loto agahala falu Kerisiano manamanatu lahi ha kua nakai maeke a lautolu ke fakalahi e fekafekauaga ha lautolu ke he Atua, liga ha kua motua lahi e tau tau po ke nakai tino malolo. Ka e he taha fahi, kua liga lata falu ke moua e fakamaloloaga ke fakalahi aki e fekafekauaga ha lautolu. (Heperu 5:12; 6:1) To omoi he loto maama e tau motua ke “moua e tau kupu ke fiafia” ke ati hake falu. He magaaho ka ati hake mo e fakalagalaga e tau mamoe ha Iehova, to omoi he fakaalofa ha lautolu ma e Atua a lautolu ke fahia ke he tau mena oti he fekafekau ki a ia!

Tau Tagata Tane ne Fakatolomaki e Kaufakalataha

15. Ko e heigoa ne fakakite he tau kupu “loto fakalataha ke he tua”?

¹⁵ Ke tolu aki, ko e “tau mena fakaalofa ke he tau tagata” kua foaki mai ke “hohoko atu a tautolu oti kana ke he loto fakalataha ke he tua, mo e iloa maliali e Tama he Atua.” (Efeso 4:13) Ko e talahauaga “loto fakalataha ke he tua” kua fakakite ai e kaufakalataha, nakai ni ke he tau talitonuaga ka e pihia foki ke he tau tagata talitonu. Ti ko e hanei taha kakano ne foaki mai e Iehova ki a tautolu e “tau mena fakaalofa ke he tau tagata”​—ke fakatolomaki aki e kaufakalataha he hana tau tagata. Taute fefe mogoia e lautolu e mena nei?

16. Ko e ha ne aoga ai ma e tau motua ke fakatumau ke kaufakalataha ni a lautolu hoko lautolu?

¹⁶ Ke kamata, kua lata ia lautolu ke fakatumau ke kaufakalataha ni a lautolu hoko lautolu. Kaeke ke mavehevehe e tau leveki, liga to matematekelea e tau mamoe he tiaki noa. Ko e tau magaaho uho kua lata ke fakaaoga ke leveki aki e fuifui mamoe kua liga fakamole noa ke he tau fono loloa mo e tau mahalohalo noa ke he tau tama lekua ikiiki. (1 Timoteo 2:8) Kua nakai amanaki e tau motua ti talia e tau mena oti ne tutala a lautolu ki ai, kakano ko lautolu ko e tau tagata tane mo e tau aga fakatagata kehekehe. Kua nakai pa he kaufakalataha e tau manatu kehekehe ha lautolu po ke he fakatutala foki a lautolu ke he puhala lagotatai he magaaho ka fefakatutalaaki ai. Kua fakatumau he tau motua e kaufakalataha ha lautolu he fanogonogo fakamitaki ke he taha mo e taha ka e nakai taute fakamua e fifiliaga. Mo e ane mai kua nakai holitu e matapatu fakaakoaga he Tohi Tapu, kia igatia ke fakamakai ke omaoma mo e ke lago ke he fifiliaga fakahiku he matakau he tau motua. Kua fakakite he agaga fakamakai e takitaki mai he “iloilo mai luga,” ne “mafola, ti totonu.”​—Iakopo 3:17, 18.

17. Maeke fefe he tau motua ke lagomatai ke fakatumau e kaufakalataha i loto he fakapotopotoaga?

¹⁷ Kua mataala foki e tau motua ke fakatolomaki e kaufakalataha i loto he fakapotopotoaga. Kaeke kua fakahagahaga kelea he tau agaga fakamavehevehe​—tuga e uta tala kelea, ko e aga ke talahau e manatu hepe, po ke agaga taufetoko​—fakaneinei e mafola, kua mautali a lautolu ke foaki e fakatonuaga lagomatai. (Filipi 2:2, 3) Tuga anei, liga mailoga he tau motua a lautolu ne tuhituhi tumau po kua fohifo ke hanihani ke he falu, ati eke ai mo tau tagata ahiahi teao. (1 Timoteo 5:13; 1 Peteru 4:15) To lali e tau motua ke lagomatai a lautolu pihia ke kitia ko e puhala nei kua kehe mai he mena ne fakaako e tautolu mai he Atua mo e kua lata ke “igatia e tagata mo e fua hana ni a kavega.” (Kalatia 6:5, 7; 1 Tesalonia 4:9-12) He fakaaoga e tau Tohiaga Tapu, to fakamaama e lautolu kua toka e Iehova e tau fifiliaga loga ki a tautolu takitokotaha, ti nakai lata he taha ia tautolu ke fakafili taha tagata ke he tau lekua pihia. (Mataio 7:1, 2; Iakopo 4:10-12) Ke fekafekau auloa he kaufakalataha, kua lata ke ha ha ai e agaga fefalanaki mo e fakalilifu i loto he fakapotopotoaga. He foaki e fakatonuaga faka-Tohiaga Tapu he magaaho kua lata, kua lagomatai he “tau mena fakaalofa ke he tau tagata” a tautolu ke puipui e mafola mo e kaufakalataha ia tautolu.​—Roma 14:19.

Puipui e Fuifui Mamoe

18, 19. (a) Ko e “tau mena fakaalofa ke he tau tagata” ka puipui mai a tautolu ia hai? (e) Mai he falu hagahaga kelea fe ne kua lata e tau mamoe ke puipui, mo e puipui fefe he tau motua e tau mamoe?

¹⁸ Ke fa aki, ne foaki mai e Iehova e “tau mena fakaalofa ke he tau tagata” ke puipui aki a tautolu mai he hufia he “tau matagi oti he tau kupu fakaako, ko e pikopiko he tau tagata ke he tau lagatau kelea kua taute ke fakahehe ai.” (Efeso 4:14) Ko e kupu fakamua ma e “lagatau kelea,” kua talahau ke kakano ko e “tepu poloka pele fakavai” po ke “makaka he fakaaoga kelea e tepu poloka ia.” Nakai kia fakamanatu he mena ia ki a tautolu e puhala iloilo he tau tagata tiaki taofiaga? He talahau e tau kupu mitaki, ne fakaaoga halahu e lautolu e tau Tohiaga Tapu he lali ke futia kehe mai e tau Kerisiano moli he tua ha lautolu. Kua lata e tau motua ke mamata atu ke he “tau luko favale” pihia!​—Gahua 20:29, 30.

¹⁹ Kua lata e tau mamoe ha Iehova ke puipui mai he falu hagahaga kelea foki. Ko e leveki mamoe he vaha i tuai ko Tavita ne puipui mo e nakai matakutaku e fuifui mamoe he matua hana mai he tau manu vale. (1 Samuela 17:34-36) He vaha nei foki, liga kua ha ha ai e tau magaaho ne fakakite he leveki Kerisiano fakaalofa e malolo ke puipui e fuifui mamoe mai he ha tagata ne ekefakakelea po ke favale ke he tau mamoe ha Iehova, mahomo atu ki a lautolu ne lolelole lahi. To mafiti e tau motua ke uta kehe mai he fakapotopotoaga a lautolu ne agahala ti taute pauaki e tau lagatau, fakavai, mo e pulega ke fakatupu e aga kelea.b​—1 Korinito 5:9-13; fakatatai Salamo 101:7.

20. Ko e ha kua logona e tautolu e haohao mitaki i loto he levekiaga he “tau mena fakaalofa ke he tau tagata”?

²⁰ Ko e loto fakaaue ha ia ha tautolu ke he “tau mena fakaalofa ke he tau tagata”! He ha lautolu a levekiaga, maeke ia tautolu ke logona e haohao mitaki, ha kua fakakatoatoa fakaeneene mai a lautolu ki a tautolu, ati hake a tautolu mo e fakaalofa, mautali ke fakatumau e kaufakalataha ha tautolu, mo e puipui fakamalolo a tautolu. Ka kua lata fefe e “tau mena fakaalofa ke he tau tagata” ke mailoga e matagahua ha lautolu i loto he fakapotopotoaga? Ti fakakite fefe mogoia e loto fakaaue ha tautolu ki a lautolu? Ko e tau huhu nei ka tutala ki ai he vala tala ka mui mai.

[Tau Matahui Tala]

Manatu Nakai e Koe?

◻ Ko hai e “tau mena fakaalofa ke he tau tagata,” mo e ko e ha ne age he Atua he puhala ia Keriso a lautolu ke he fakapotopotoaga?

◻ Fakamoli fefe he tau motua ha lautolu a matagahua ke fakakatoatoa e fuifui mamoe?

◻ Ko e heigoa kua lata ke taute he tau motua ke ati hake e tau matakainaga talitonu ha lautolu?

◻ Maeke fefe he tau motua ke fakatumau e kaufakalataha he fakapotopotoaga?

[Fakatino he lau 20]

Lagomatai he loto maama e tau motua ke fakamalolo a lautolu ne loto lolelole

[Fakatino he lau 20]

Fakatolomaki he kaufakalataha he tau motua e kaufakalataha i loto he fakapotopotoaga