Veveheaga 21
Ko e haau a Fifiliaga ke Fekafekau ke he Atua
1. Ko e heigoa e tau mena kua lata ai ia tautolu ke tuku atu e tau fakaaue mo e fakaheke ki a Iehova ko e Atua?
KUA hā hā i ai e loga he tau mena ke fakaaue mo e fakaheke atu ki a Iehova ko e Atua. Ko ia ne taute mo e fakaalofa e tufaaga foaki noa ke moua ai e tautolu e fiafia ke he moui tukulagi. Kua fita he fakatoka e ia ke holoholo kehe e mate ha ko e malaia he hala mo e foaki mai haana Tama ke eke mo poa he lukutoto. Ko e finagalo he Atua ke moua he haana fanau he he lalolagi nei ke fiafia ai ke he kaina parataiso tukulagi kua teitei hoko mai tuai! Nakai kia kua puke haau a loto ke he fakaaue ke he Atua ha ko e puhala he fakamouiaga ne kua taute e Ia?—Ioane 3:16; 1 Ioane 4:9-11.
2. (a) Kua matapatu mai he tau mena kua iloa e koe mogonei, ko e heigoa haau a manamanatuaga ki a Iehova? (e) Kaeke ke fakaalofa mooli a tautolu ki a Iehova, ko e heigoa kua lata ke fakalagalaga ai a tautolu ke taute?
2 Ko e mooli, nakai fakaai ke iloa oti e tautolu a Iehova mo e haana tau puhala. Kua mua ue atu ni a Ia ko e mena haia ko e tau tagata kua fakaako tumau a lautolu ke he tau mena foou kua hagaao atu ki a ia. (Roma 11:33) Ka ko e fakamatapatu mai he tau mena kua iloa tuai e koe, nakai kia kua tupu ai e fakaaue haau ha ko e tau mena oti kua taute e ia kua tonu ni ti ko e mena haia kua lata ai ke fakatupu fakalahi e falanakiaga haau ki a ia? Mena kua iloa mooli nakai e koe kua lahi ni haana fakaalofa noa, pete ia, ke he magaaho taha ia ni ko e katoatoa he fakafiliaga mo e haana pulotu? (Salamo 86:5, 10, 15) Kaeke kua pihia haau a logona hifo ki a Iehova ko e Atua, to fakalagalaga ai a koe ke eke mo fekafekau ki a Ia, to nakai hā hā i ai ha mena ke taofi ai a koe.
3. (a) Ko e heigoa e tau puhala ne ua kua hafagi ai ke he tau tagata oti? (e) Ko e heigoa e fifiliaga ke takitaki atu ai ke he fiafia lahi mahaki?
3 Ua e puhala kua hafagi ma e tau tagata oti kana. Ko e taha kua takitaki atu ai ke he mate ko e taha ke he moui tukulagi. (Teutaronome 30:19, 20) Ko e ha e fe haau ka uta? Ka taute e koe e fifiliaga ke fekafekau ki a Iehova to takitaki atu ai ke he fiafia kua lahi, ke he vaha nai ato pihia foki ke he tukulagi. Tuga ne pehe mai e Salamo: “Uhoaki e tagata kua matakutaku kia Iehova, kua fiafia lahi ke he hana tau poaki.”—Salamo 112:1.
FAKATAPUAGA MO E PAPATISOAGA
4. Kaeke kua fifili he tagata kua loto mooli a ia ke taute e finagalo he Atua, ko e heigoa kua lata ia ia ke taute?
4 Ha ko e fakaalofa ke he Atua kua fakalagalaga ai a koe ke tupu e manako haau ke taute haana finagalo, ti ko e mena kua lata ke finatu a koe ki a ia ke he liogi mai ia Iesu Keriso mo e fakakite ai haau a manatu ke eke mo taha he haana tau fekafekau, ke faifano ai ke he tau tuaga hui he haana a Tama. Ko e mena ni kua lata ke talaage e koe ki a Iehova kua loto a koe ke eke ma haana mo e loto foki ke eke haana finagalo ke he vaha nai katoa mo e tau vaha i mua. (Salamo 104:33) Ko e puhala nei kua fakauku ai a koe ke he Atua. Ko e haau ni a fifiliaga, tokotaha e mena ia. Nakai maeke he taha ke taute ma haau.
5. (a) Ka mole e fakatapuaga haau ke he Atua, ko e heigoa kua amaamanaki a ia ke taute e koe? (e) Ko e heigoa e lagomataiaga kua galo ki a koe ke maeke ai ia koe ke fakatumau ki ai ke he mouiaga fakatapuina?
5 Ka mole atu he taute e koe haau a fakaukuaga ki a Iehova ke eke haana finagalo, to amaamanaki a ia ke taofi a koe ki ai. Nakai ko e mena fakateaga e mena nei. Kia eke a koe mo tagata he haau a kupu ke taofi fakamooli ki ai ke he fifiliaga nei po ke fakaukuaga ke he leva he haau a moui. (Salamo 50:14) Ko e Tiapolo to fakaaoga e ia e tau mena oti kua maeke ki a koe ke moumou e koe haau a tua ki a Iehova. Ka ko Iehova to fakalataha a ia mo koe. Kia hagaao atu tumau a koe ki a ia ke he liogi, to lagomatai a ia ki a koe. Tuga foki kua fita he iloa e koe, hā hā i ai he lalolagi nei e fakapotopotoaga he Atua, mai ia lautolu ia to kitia ai e koe e tau Kerisiano motua to fiafia a lautolu ke lagomatai mo e fakaalofa ki a koe mo e fakamafanatia.—1 Peteru 5:8, 9; 3:12; 1 Tesalonia 5:11.
6. Ko e ha ne fano ai a Iesu ki a Ioane Papatiso ke he vailele i Ioritana, ko e heigoa kua iloa e tautolu mai he mena ia?
6 Kua pihia haau a fifiliaga ke fekafekau ki a Iehova mo e fakakite e koe haau a fifiliaga ke he liogi kua aoga lahi ia. Ka e hā hā i ai foki falu a mena. Kua fakakite mai ai foki e Iesu Keriso, ne foaki mai e fakafifitakiaga ma tautolu ke muitua ki ai. Kia manatu, ko e loga he tau mena ne taute e Iesu ka e nakai koenaia he talaage ke he haana Matua ko e mena hau a ia ke taute Haana finagalo. (Heperu 10:7) Ko e magaaho ne kamata ai haana fekau he fakamatalaaga he kautu he Atua ti finatu a Iesu ki a Ioane ko e Papatiso, ke he vailele i Ioritana, ti papatiso ai ke he vai.—Mataio 3:13-15.
7. (a) Fefe he fakakite mai he Tohi Tapu e fakamooliaga he Atua ke he papatisoaga a Iesu? (e) Ko e ha e papatisoaga ne poaki e Iesu kua nakai lata mo e tau fanau mukemuke?
7 Kua fakakite mai he Tohi Tapu ko Iehova ko e Atua ne talia fakamooli ke he papatisoaga a Iesu. Kua pehe mai, ko e magaaho ia ne hoko ai e mena lahi ia, “ati maihiua ai e lagi, Kua haele hifo e Agaga Tapu ki luga hana, kua tino mai, tuga ne lupe; kua hoko mai foki e leo mai he lagi, ‘kua pehe mai, Ko e haku a Tama fakahele a koe, kua fiafia ni au kia koe.’” (Luka 3:21, 22) Tali mai he fakatoka e Iesu e fakafifitakiaga, ko e tau Kerisiano fakauku he vaha nei kua lata ke papatiso. Ko e mooli, ne kotofa e Iesu e tau tutaki haana ke eke e tau tagata he tau motu oti kana mo tutaki ti papatiso ai e lautolu e tau tutaki fou nei. Nakai ko e papatisoaga he tau fanau ikiiki. Ka ko e papatisoaga he tau tagata ne kua eke mo tau tagata talia fakatonu, ne fifili ai ke he tau loto ha lautolu ke fekafekau ki a Iehova.—Mataio 28:19; Gahua 8:12.
8. Fakamaama ko e heigoa e kakano he papatisoaga faka-Kerisiano?
8 Ko e heigoa, kua fakakite mai ai ha ko e papatisoaga he Kerisiano? Nakai ko e holoholo kehe he tau agahala, ha ko e fakameaga mai he tau agahala kua moua mai ni ha ko e tua ki a Iesu Keriso. (Efeso 1:7) Ka ko e, fakakiteaga haia kua fakamooli ai ko ia kua taute haana fakaukuaga ki a Iehova ko e Atua mo e tuku atu e ia a ia ke taute Haana finagalo. Ti, ko e papatisoaga nakai kitekite ki ai kua tote haana a aoga. Ka ko e poakiaga haia ma lautolu oti kua omaoma ke mumui atu ke he tau tuaga hui ha Iesu Keriso.
9. (a) Ha ko e kitiaaga ke he puhala ne papatiso ai a Iesu, to fakafifitaki fefe e papatisoaga mooli he Kerisiano? (e) Kaeke kua manako a koe ke papatiso, ko hai i loto he fakapotopotoaga kua lata ke fakailoa ki ai e koe?
9 Kua pehe mai e Tohi Tapu, he mole atu haana papatisoaga, ko Iesu ne “hake mai agataha a ia he vai.” Ne tuku hifo a ia ke he vai ke maeke ai ia Ioane ke fakatomo katoatoa a ia. (Mataio 3:16; Ioane 3:23) Ti nakai ko e fuifui noa ke he vala vai. Ko e papatisoaga tonu he Kerisiano kua fakamooli ai a ia ke eke mo fekafekau fakamooli he Atua—ko e tagata tane, tuga ne taute e Ioane ko e Papatiso ne—fakatomo katoatoa ai e tagata ke he vai ka mole ia ti liu fakatu hake ai a ia ki luga. Kaeke kua fita he fifili e koe ke fekafekau ki a Iehova mo e loto a koe ke papatiso, ti fakailoa ai e ko e e mena nei ke he fekafekau pule he fakapotopotoaga he tau fakamooli a Iehova kua fakalataha a koe ki ai. To fiafia a ia ke lagomatai a koe, mo e nakai fai totogi ke he papatisoaga.
KO E FEKAFEKAUAGA HE KERISIANO
10. (a) Ko e heigoa e mahani a Iesu kua lata ke moua he Kerisiano? (e) Hā hā he lalolagi a Iesu, ko e heigoa e finagalo he Atua ki a ia?
10 Ko e mena hanei, ko e fakatapuaga mo e papatisoaga nakai ko e fakaotiaga a ia he tauteaga he finagalo he Atua. Ko e kamataaga a ia. Kua fakamailoga ai e lautolu e kamataaga he moui fiafia ke fekafekau ki a Iehova, mo e amaamanakiaga ke he matutakiaga ke he moui tukulagi, ke taute ai haana finagalo. Ko e Kerisiano kua fakauku kia taute tumau e manatu nei tuga a Iesu Keriso, ne pehe: “Ko e haku a mena kai hanei, kia eke e au e finagalo hana ne fakafano mai au, mo e fakaoti hana gahua.” (Ioane 4:34) Ko e mena fakamua he veveheaga he gahua he Atua ma Iesu ke he lalolagi nei ke fakamatala e kautu he Atua, mo e fakatoka e fakaveaga ma e fakapotopotoaga fakamatala ke tutaki atu e gahua nei ka mole atu haana mate. Ko e finagalo haia he Atua ma haana, ne taute ai e Iesu mo e fakamooli.—Luka 4:43; Ioane 17:4.
11. (a) Ke lata mo e tau kupu a Iesu he Mataio 24:14, ko e heigoa e finagalo he Atua ma e tau Kerisiano he vaha nei? (e) Ko e ha kua fakatepetepe ai e gahua ia?
11 Ko e heigoa e finagalo he Atua ma e tau Kerisiano he vaha nei? Kia taute e lautolu e gahua taha ia ni ko e fakamatala, ko e gahua lahi mo e fakamakamaka. Ko e perofetaaga kua fakakite mai he Tohi Tapu nakai taumaleku kua nonofo a tautolu he mogonei he “fakaotiaga he lalolagi.” Ne talahaua mai tuai e Iesu hagaao ke he vaha nei: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:3, 14) Ko e finagalo haia he Atua ke taute e gahua fakamatala he mogonei. Ko e fakailoaaga hagaao ke he fakaotiaga he fakatokaaga matahavala nei kia fakailoa atu. Ko lautolu kua loto molu kua lata ke fakakite ki ai e puhala ke hao ai. Maeke nakai ia koe ke kau fakalataha ke he gahua nei?—Sefanaia 2:2, 3; Fakatai 24:11, 12.
12. (a) To taute fefe e gahua fakamatala? (e) Ko e poaki kia a Iesu ke “eke mo tau tutaki” kua lata ia mo e tau Kerisiano oti?
12 Ko Iesu Keriso ne fakatoka e ia e fakafifitakiaga ke he tauteaga he gahua fakamatala. Nakai toe ha mena he fakamatala ai a ia, ke he tau taone, tau maaga, ke he tau kaina mo e tau toloaga tagata—pihia foki ni ke he fifine he tapa vaikeli. (Ioane 4:7, 21-24) Ko e Kerisiano mooli he vaha nei to muitua a ia ke he tau fakafifitakiaga a Iesu. To fakamatala a ia ke he tau mena oti. To nakai fakatali a ia ke he tau tagata ke omai ki a ia, ka e lali a ia ke kumi ki a lautolu kua fai teliga ke fanogonogo. “O atu,” ne poaki mai e Iesu, “ke eke e tau motu oti kana mo tutaki.” (Mataio 28:19; kikite foki 10:11-13.) Ko e poaki nei kua haga ke he tau Kerisiano oti—tau tagata gahua mo e tau fifine fai tane, tau tagata momotua mo e tau fuata—ne taute ni pihia he vaha he senetenari fakamua.—Gahua 4:13, Roma 16:1.
13. Ko fe e mena ka fakahoko ki ai e gahua fakamatala?
13 Ko e tau Kerisiano he vaha fakamua ne mumuitua a lautolu ke he fakaakoaga a Iesu mo e fakafifitakiaga, kua taute pauaki ai ke maeke ke aahi atu ke he tau tagata he tau kaina ha lautolu. (Luka 8:1; 10:1-6; Gahua 5:42) Ne pehe mai e aposetolo ko Paulo: “Ti nakai toka e au taha kupu aoga, neke nakai fakailoa atu kia mutolu, ti fakaako atu kia mutolu ki mua he tau tagata, katoa foki mo e taha fale mo e taha fale.” (Gahua 20:20) Ko e matapatu puhala haia he tau Kerisiano mooli ke he tauteaga he gahua fakamatala ke he vaha nei ha tautolu.
14. Fefe e lagomataiaga he Atua ki a tautolu ke he gahua fakamatala?
14 Ko lautolu kua kau fakalataha ke he gahua mahomo atu nei nakai taute ke he ha lautolu ni a malōlo. Ka ko Iehova ko e Atua ne omoomoi a lautolu. Ko e haana a agaga kua fakaatā mo e fakamalōlo a lautolu ke fakamatala ai. (2 Korinito 3:5, 6; 2 Timoteo 4:17) Ha ko e haana fakapotopotoaga kua kitia kua maeke ai ia ia ke moua mai e fakaakoaga mo e lagomataiaga, ke nakai fai totogi ke lata ai mo e, haana a tau tagata fakamooli oti. Ko, koe foki, to fiafia ai ke he aoga he tufaaga nei ke he Fale he Kautu kua tata ki a koe.
15. Kaeke ke fifili he tagata ke fekafekau ke he Atua, ko e heigoa e tau monuina uho kua fakaputu ma haana?
15 Ko e kamataaga he taute e ko e haau a fifiliaga mo e loto katoa ke fekafekau ki a Iehova ko e Atua, to kitia ai e koe e tau monuina lalahi. Ko e fiafia ne kua moua e koe ha ko e fakaakoaga he kupu mooli ki a Iehova mo e haana finagalo to tupu lahi ia ka tufatufa fakalataha ai e koe mo e falu to kitia ai e liliuaga lahi mahaki ka moua mai ai ke he tau momoui ha lautolu. (Gahua 20:35; Ioane 13:17) Ha ne fakafifitaki e koe haau a moui ke he Kupu he Atua to eke ia ke fakatata aki a koe ke he haau a Tufuga. To fiafia a koe ke he haana fakaalofa noa ke he loga he tau puhala kua nakai iloa e koe he vaha fakamua. (Fakakiteaga 7:9-17) Ko e mooli, ko e puhala lotomatala haau to fakafiafia ai e finagalo he Atua. (Fakatai 27:11) To lahi ai haau a fiafia he kitia mo e iloa ai e fakamooliaga he tau kupu he Salamo: “Uhoaki e motu kua eke a Iehova mo Atua ha lautolu”!—Salamo 144:15.