Hiki e Magafaoa ki Aikupito

NAKAI maeke a Iosefa ke fakauka ke he haana tau logonaaga. Ne tala age a ia ke he tau fekafekau oti haana ke ō kehe mai he poko. Ha ko ia ni tokotaha mo e lafu haana, ne kamata a Iosefa ke tagi. Manamanatu la ke he ofo he tau lafu haana, ha kua nakai iloa e lautolu ko e tagi he ha a ia. Fakahiku ne pehē a ia: ‘Ko au ko Iosefa. Kua moui agaia nakai haaku a matua taane?’

Ne ofo lahi e lafu haana ti nakai maeke a lautolu ke vagahau. Kua matakutaku a lautolu. Ka e pehē a Iosefa: ‘Fakamolemole unuunu mai a ki a au.’ He unuunu atu a lautolu, ne pehē a ia: ‘Ko au ni ko Iosefa ko e ha mutolu a matakainaga, ne fakafua e mutolu au ki Aikupito.’

Ne matutaki a Iosefa ke vagahau ke he puhala totonu: ‘Aua neke mamahi a mutolu ha kua fakafua e mutolu au ki hinei. Ko e Atua ni ne fakafano mai au ki Aikupito ke fakahao e tau momoui he tau tagata. Kua fakatu e Farao au ke pule ke he motu katoa. Kia liliu fakaave ke he matua taane haaku mo e tala age ki a ia e tau mena nei. Ti tala age ki a ia ke hau ke nofo hinei.’

Ti peka atu a ia mo e kuku haana tau lafu mo e figita ki a lautolu oti. Magaaho ne logona e Farao kua o mai e tau lafu ha Iosefa, ne tala age a ia ki a Iosefa: ‘Kia uta e lautolu e tau fata fakataveli ti ō mo e tamai e matua taane mo e tau magafaoa ha lautolu ti liliu mai ki hinei. To foaki age e au e kelekele ne mua atu e mitaki i Aikupito katoa.’

Ko e mena ia ni ne taute e lautolu. Kitia e koe he mena nei a Iosefa ne feleveia mo e matua taane haana he hoko mai ki Aikupito mo e magafaoa katoa haana.

Kua lahi mahaki e magafaoa ha Iakopo. Ko e katoatoa ko e toko 70 he magaaho ne hiki atu a lautolu ki Aikupito, ka totou oti a Iakopo mo e tau tama mo e tau mokopuna haana. Ka kua ha ha i ai foki e tau hoana, ti liga tokologa foki e tau fekafekau. Ne nonofo oti a lautolu i Aikupito. Kua fakahigoa a lautolu ko e tau Isaraela, ha kua hiki he Atua e higoa ha Iakopo ki a Isaraela. Kua eke e tau Isaraela mo tau tagata pauaki he Atua, to kitia e tautolu he vala ka mui mai.