Tutala e Asini

KUA logona nakai a koe he asini ne tutala? ‘Nakai,’ he liga talahau e koe. ‘Mena nakai maeke e tau manu ke tutala.’ Ka e fakakite mai he Tohi Tapu e asini ne tutala. O mai la ke onoono ko e tupu fēfē e mena ia.

Kua teitei tata tuai e tau Isaraela ke huhū atu ke he motu ko Kanana. Ko Palako ko e patuiki ha Moapi, ne matakutaku ke he tau Isaraela. Ti fakafano atu e ia ke hau e tagata lotomatala ne higoa ko Palaamo ke fina atu ke kaialu e tau Isaraela. Ne mavehe a Palako ke foaki age ki a Palaamo loga e tau tupe, ati heke a Palaamo he asini haana ti fenoga atu ke kitia a Palako.

Nakai manako a Iehova ke kaialu e Palaamo e tau tagata Haana. Ti fakafano e ia e agelu mo e pelu loa ke tu he puhala ke fakatū a Palaamo. Ne nakai kitia e Palaamo e agelu, ka e kitia he asini haana. Ti lali e asini ke haga kehe mai he agelu, ati fakahiku ne takoto ai he puhalatū. Ne ita lahi a Palaamo, ti keli aki e ia e akau e asini haana.

Ti fakatupu e Iehova a Palaamo ke logona e asini haana ne vagahau ki a ia. ‘Ko e heigoa kia haaku ne taute ki a koe ke lata a koe ke ta au?’ he hūhū he asini.

‘Ne taute e koe au ke tuga e tagata goagoa,’ he talahau e Palaamo. ‘Ane mai fai pelu au kua tamate ni e au a koe!’

‘Kua lagataha nakai e taute pehē e au a koe?’ he hūhū he asini.

‘Nakai,’ he tali e Palaamo.

Ti fakaatā e Iehova a Palaamo ke kitia e agelu ne tu mo e pelu he puhalatū. Pehē e agelu: ‘Ko e ha ne ta ai e koe haau a asini? Kua hau tuai au ke pupuni e puhala haau, ha kua nakai lata ia koe ke fano ke kaialu a Isaraela. Ane mai nakai aafe kehe e asini haau mai ia au, a po kua tamate tuai e au a koe, ka e to nakai fakapakia e au e asini haau.’

Pehē a Palaamo: ‘Kua hala tuai au. Nakai iloa e au kua tu mai a koe he puhala.’ Ne fakatoka he agelu a Palaamo ke fano, ti fano ai a Palaamo ki a Palako. Kua lali agaia a ia ke kaialu a Isaraela, ka e taute e Iehova a ia ke fakamonuina lagatolu atu a Isaraela.