Fakalaulau he Tau Akoako Pikopiko!

“To ha ia mutolu foki pihia e tau akoako pikopiko.”​—2 PETERU 2:1.

1. Kua amanaki a Iuta ke tohi hagaao ke he heigoa, mo e ko e ha kua hiki e ia e tala?

KO E mena ofoofogia ha ia! Ko e tau akoako pikopiko he fakapotopotoaga Kerisiano he senetenari fakamua! (Mataio 7:15; Gahua 20:29, 30) Kua mailoga e Iuta ko e matakainaga ha Iesu e tupuaga nei. Ne pehe a ia kua amanaki a ia ke tohi ke he tau matakainaga talitonu hagaao “ke he fakamouiaga kua tuku fakalapalapa mai,” ka e fakamaama e ia: “Ko e mena lata ia au ke tohi atu kia mutolu, mo e ole atu kia mutolu ke tau fakalahi ha ko e tua.” Ko e ha ne hiki ai e Iuta hana a tala? Kakano, kua pehe a ia, “ha ko e mena huhū mai fufu e falu a tagata [ke he tau fakapotopotoaga] . . . kua liu e lautolu e fakaalofa noa he Atua ha tautolu ke he mata kakana.”​—Iuta 3, 4.

2. Ko e ha kua tatai lahi ai e 2 Peteru veveheaga 2 mo Iuta?

² Kua tuga ai, ne tohi e Iuta he mole atu e tohi e Peteru e tohi ke ua aki hana. Kua nakai fakauaua ne mahani a Iuta mo e tohi nei. Moli ai, ne fakakite e ia loga e tau manatu tatai ai he hana ni a tohi malolo lahi he fakamaloloaga. Ko e mena ia, he kumikumi e tautolu e 2 Peteru veveheaga 2, to mailoga e tautolu e tataiaga ke he tohi a Iuta.

Tau Fua he Tau Fakaakoaga Fakavai

3. Ko e heigoa ne tupu he vaha i tuai kua talahau e Peteru to liu ke tupu foki?

³ He mole e fakamalolo e Peteru hana tau matakainaga ke mataala ke he perofetaaga, ne pehe a ia: “Ha i ai foki ke he moto tagata e tau perofeta pikopiko [i Isaraela i tuai]; to ha ia mutolu foki pihia e tau akoako pikopiko.” (2 Peteru 1:14–​2:1) Ko e tau tagata he Atua i tuai ne moua e perofetaaga moli, ka e kua taufetului foki a lautolu mo e tau fakaakoaga kelea he tau perofeta pikopiko. (Ieremia 6:13, 14; 28:1-3, 15) Ne tohi e Ieremia: “Kua kitia foki e au e mena vihiatia ke he tau perofeta i Ierusalema; kua faivao a lautolu, mo e o fano a lautolu mo e pikopiko.”​—Ieremia 23:14.

4. Ko e ha kua lata tonu e tau akoako pikopiko ke moumou?

⁴ He fakamaama e mena ka taute he tau akoako pikopiko i loto he fakapotopotoaga Kerisiano, kua pehe a Peteru: “Ti fakatupu fakagalo e lautolu e tau taofi kehekehe ke malaia ai, mo e fakatikai e Iki ne fakafua mai a lautolu, kua fakahoko ai e lautolu kia lautolu e malaia fakatepetepe.” (2 Peteru 2:1; Iuta 4) Ko e fua fakahiku he vahega lotu he senetenari fakamua ko e Kerisitenitome tuga he iloa e tautolu he vaha nei. Kua fakakite e Peteru e kakano kua lata tuai e tau akoako pikopiko ke moumou: “To tokologa foki he mumui atu ke he tau mena ha lautolu ke malaia ai, to eke fakakelea ai e puhala he kupu moli ha ko lautolu ni.”​—2 Peteru 2:2.

5. Ko e heigoa kua lago ke he tau akoako pikopiko?

⁵ Manamanatu la ke he mena nei! Kakano ha ko e fakaohoohoaga he tau akoako pikopiko, tokologa he tau fakapotopotoaga kua eke ke putoia ke he mata kakana. Ko e kupu Heleni ne fakaliliu “mata kakana” kua talahau ai e mahani matahavala, nakai fai fakalatalata, mahani fuafua kelea, manako lahi, mahani nakai fakama. Ne talahau e Peteru fakamua kua “fehola kehe [e tau Kerisiano] mo e kelea ha he lalolagi ha he tau manako lahi haia.” (2 Peteru 1:4) Ka e ko e falu kua eke ke liliu ke he kelea ia, mo e to lago lahi ai ke he tau akoako pikopiko he tau fakapotopotoaga! To fakateteki ai mogoia e puhala he kupu moli. Ko e momoko ha ia! Moli, ko e mena nei kua lata oti he Tau Fakamoli a Iehova ke mataala fakalahi. Kia nakai lata a tautolu ke nimo, kua falanaki ai ke he mahani ha tautolu, ke ta mai e tautolu e fakahekeaga ki a Iehova ko e Atua mo e hana tau tagata po ke eke fakakelea ki a lautolu.​—Tau Fakatai 27:11; Roma 2:24.

Fakakite e Tau Fakaakoaga Fakavai

6. Ko e heigoa kua fakaohooho e tau akoako pikopiko, mo e kumi fefe e lautolu e puhala ke moua e mena ne manako a lautolu ki ai?

⁶ Pulotu ai, kia mailoga e tautolu e puhala kua fakakite he tau akoako pikopiko ha lautolu a tau manamanatuaga kelea. Kua talahau fakamua e Peteru kua taute e lautolu fakaeneene, ke he puhala kua fakagalo, po ke fakatekiteki. Kua lafi e ia: “Ko e velevelemena foki ke eke ai e lautolu a mutolu mo tau mena ke fakafua ke he tau kupu fakatupua ha lautolu.” Ko e manako lotokai kua fakaohooho e tau akoako pikopiko, he tuga kua pehi he talahauaga he The Jerusalem Bible: “To lali fakamakamaka a lautolu ke fakatau a mutolu aki e tau kupu fakavai ha lautolu.” Tatai ai, ke he liliu James Moffatt kua talahau ai hinei: “To moumou he manako lahi ha lautolu a koe aki e tau lagatau totoko.” (2 Peteru 2:1, 3) Ko e tau kupu he tau akoako pikopiko kua fakalata ai ke logona lahi ki a ia kua nakai mataala fakaagaga, ka e ko e tau kupu ha lautolu kua taute fakamitaki ai “ke fakafua” aki e tau tagata, he fakavaivai a lautolu ke fekafekau ke he tau manako lotokai he tau tagata fakavaia.

7. Ko e heigoa e pulotu kua eke ke talahaua ke he senetenari fakamua?

⁷ Nakai fakauaua ai, ko e tau akoako pikopiko he senetenari fakamua ne fakaohooho he tau manamanatuaga fakalalolagi fou he mogoia. Kavi ke he tohi ha Peteru, ko e pulotu ne higoa ko e fakaakoaga Nosotiki kua eke ai ke talahaua. Ko e tau fakaakoaga Nosotiki ne talitonu kua kelea muikau e tau mena oti mo e ko e mena ni kua mitaki ko e vala fakaagaga. Ti kua talahau he falu kua nakai kelea e mena ka taute he tagata aki hana tino. Fakamui, kua taufetoko a lautolu, to nakai ha ha ai he tagata e tino nei. Ko e mena ia, kua fakahiku e lautolu, ko e tino​—fakalataha mo e feuaki​—ne agahala kua nakai mua atu. Kua hagahaga ai, ko e tau onoonoaga pihia kua kamata ke fakaohooho e falu kua talahau ko e faka-Kerisiano.

8, 9. (a) Ko e heigoa e fakakakanoaga keukeu kua lauia e tau tauteaga mena he falu he tau Kerisiano fakamua? (e) Hagaao ki a Iuta, ko e heigoa falu mena taute he tau fakapotopotoaga?

⁸ Taha e tagata fakaako tokoluga Tohi Tapu ne talahau kua “ha ha ai a lautolu he Lotu kua fakakelea e fakaakoaga nakai fai fakamagaloaga,” po ke “fakaalofa noa.” (Efeso 1:5-7) Hagaao ki a ia, ko e taufetoko he falu kua pehe: “Kua pehe kia a koe kua lahi ue atu e [fakaalofa noa] he Atua ke maluia e tau agahala oti? . . . Ti o mai a tautolu ke fakatumau ke agahala, ha ko e [fakaalofa noa] he Atua kua uta kehe e tau agahala oti. Kua moli ko e lahi e agahala ha tautolu to lahi e tau magaaho ka fakagahua e [fakaalofa noa] he Atua.” Kua logona nakai e koe e falu fakakakanoaga hehe pihia foki?

⁹ Kua talahau he aposetolo ko Paulo e manamanatuaga hepe hagaao ke he fakaalofa hofihofi he Atua he mogo ne huhu a ia: “To nonofo mau kia a tautolu ke he hala, kia fakalahi mai ai e fakaalofa noa?” Kua talahau foki e ia: “To hala kia a tautolu ha kua nakai nonofo a tautolu ke he fakatufono, ka ko e fakaalofa noa?” Ke he tau huhu takitaha kua tali mafanatia a Paulo: “Aua ia.” (Roma 6:1, 2, 15) Maaliali ai, tuga he kitekite a Iuta ki ai, ha ha ai falu “kua liu e lautolu e fakaalofa noa he Atua ha tautolu ke he mata kakana.” Pete ia, kua talahau e Peteru ma lautolu ia kua “malaia foki nakai mohe ia.”​—Iuta 4; 2 Peteru 2:3.

Tau Fakataiaga Hataki

10, 11. Ko e heigoa e tau fakataiaga hataki tolu kua foaki e Peteru?

¹⁰ Ke peehi to taute he Atua taha mena ke he tau tagata taute mena kelea pauaki, ne foaki mai e Peteru he Tohiaga Tapu tolu e fakataiaga hataki. Fakamua, kua tohi e ia: “Kua nakai toka he Atua e tau agelu ne hala.” Ko lautolu nei, kua pehe a Iuta, “kua nakai taofi ha lautolu a lilifu, ka kua toka e lautolu e mena ne nonofo ai a lautolu” i luga he lagi. Ne o mai a lautolu ke he lalolagi ato Fakapuke mo e uta ai e tau tino kakano ke maeke ke taute e tau fakafetuiaga fakatane mo e fifine mo e tau tama fifine he tau tagata. He kua fakahala a lautolu ha ko e mahani nakai pauaki mo e nakai tonu, ne tolo a lautolu ki “Tatarusi,” po ke kua talahau he fakamauaga a Iuta, ne “taofi . . . a lautolu ke he tau liliaga tukulagi ki lalo he pouli, ato hoko ke he fakafiliaga he aho lahi.”​—2 Peteru 2:4; Iuta 6; Kenese 6:1-3.

¹¹ Kua fakahagaao foki a Peteru ke he tau tagata he vaha a Noa. (Kenese 7:17-24) Ne pehe a ia ke he vaha ha Noa “nakai toka foki [he Atua] e lalolagi tuai . . . ka e ta mai e fakapuke ke he lalolagi matahavala.” Fakahiku aki, kua tohi e Peteru kua fakatoka he Atua e “fakamailoga ke he tau tagata matahavala a mui” ha ko e “tau māga foki ko Sotoma mo Komora, ne fakahala ke ulu ki lalo, kia eke mo efuefu.” Kua age e Iuta e tau vala tala lafi atu ko lautolu takitokotaha “ne faivao pihia a lautolu na, mo e mumui atu ke he tau tino kehe.” (2 Peteru 2:5, 6; Iuta 7) Kua nakai ni taute he tau tagata tane e tau fakafetuiaga feuaki mo e tau fifine kua nakai fakamatafakatufono ka e manako lahi foki ma e tau kakano he falu tagata tane, manako lahi foki ma e kakano he tau manu.​—Kenese 19:4, 5; Levitika 18:22-25.

12. Hagaao ki a Peteru, ne palepale fefe e mahani tututonu?

¹² Ka e, ke he magaaho taha, kua talahau e Peteru ko Iehova e foaki palepale ha lautolu kua fekafekau fakamoli ki a ia. Ma e fakatai, kua talahau e ia e puhala he Atua ne “laveaki a Noa kua tokovalu aki, ko e ogo he tututonu” he magaaho ne ta mai e Ia e Fakapuke. Kua talahau foki e ia hagaao ke he fakahaoaga ha Iehova “ki a Lota ko e tagata tututonu” he vaha a Sotoma, he fakahiku ai: “Kua fioia he Iki ke laveaki e tau tagata mahani Atua mai he kamatamata, ka e taofi e tau tagata mahani hepehepe ke hoko ke he aho fakafiliaga ke fakahala ai a lautolu.”​—2 Peteru 2:5, 7-9.

Tau Gahua kua Lata mo e Fakahala

13. Ko hai pauaki kua fakatoka ma e fakafiliaga, mo e ko e heigoa e tau miti ne kua liga taute e lautolu?

¹³ Ne fakakite mai e Peteru ko lautolu kua taofi ke lata mo e fakafiliaga he Atua, ko, “lautolu kua mumui ke he tau mena he tino ke he tau manako lahi matahavala, mo e fakalialia a lautolu ke he tau iki.” Teitei ke logona e tautolu e ita ha Peteru he talahau a ia: “Kua fakahanoa a lautolu, kua fakatokoluga, ti nakai matakutaku a lautolu ke vagahau kelea kia lautolu ne lilifu.” Kua tohi e Iuta ko e “tau tagata mohe miti ia, kua fakakelea e lautolu e tino . . . mo e vagahau kelea kia lautolu ne lilifu.” (2 Peteru 2:10; Iuta 8) Kua liga putoia e tau miti ha lautolu ke he tau manako fakatane mo e fifine nakai mea na kua fakamalolo e tau gahua ha lautolu he fiafia ke he mahani fakatane mo e fifine mahani kelea. Ke he kakano fe, mogoia, ka “fakalialia a lautolu ke he tau iki” mo e “vagahau kelea kia lautolu ne lilifu”?

14. Ke he heigoa e puhala he tau akoako pikopiko “kua fakalialia ke he tau iki” mo e vagahau “kelea kia lautolu ne lilifu”?

¹⁴ Ne taute ai e lautolu ha kua tiaki e lautolu e pule malolo ne kotofa faka-Atua. Kua fakakite he tau motua Kerisiano e lilifu ue atu ha Iehova ko e Atua mo e hana Tama ti, ko e fua, kua age e falu lilifu moli ki a lautolu. Moli, kua taute mena hehe a lautolu, tuga ni a Peteru, ka kua fakamalolo he tau Tohiaga Tapu e tau tagata he fakapotopotoaga ke omaoma ki a lautolu ia kua lilifu. (Heperu 13:17) Ko e tau lolelole ha lautolu kua nakai fai kakano ke vagahau kelea ki a lautolu. Kua pehe a Peteru kua nakai ta mai he tau agelu e “hokotaki mo e vagahau kelea [ke he tau akoako pikopiko],” pete ni kua latatonu lahi ki ai. “Ka ko lautolu nai,” he fakaholo atu e Peteru, “tuga ne tau mena momoui a lautolu kua tutupu mai nakai fai manamanatu, ne fanau mai kia tapaki mo e keli, kua vagahau kelea a lautolu ke he tau mena kua nakai iloa e lautolu, to mahakava ni a lautolu.”​—2 Peteru 2:10-13.

“Kaiaga Mena mo Mutolu”

15. Ko e heigoa e tau puhala he tau akoako pikopiko, mo e moua mai fe e lautolu e tau fakatakiaga ha lautolu?

¹⁵ Pete ni ko e tau tagata kelea nei “ko e mena ke fiafia ki ai ke matahavala ke he aho” mo e “ko e tau ila a lautolu mo e tau tepu,” kua fakavaia foki a lautolu. Kua gahuahua a lautolu “fakagalo,” he fakaaoga e “tau kupu fakatupua,” tuga he talahau e Peteru he mogo fakamua. (2 Peteru 2:1, 3, 13) Ti nakai kua kitia lahi ai ha lautolu a totokoaga ke he tau laliaga he tau motua ke toto hake e tau tutuaga mitaki he Atua po ke taute fakakitia ai ha lautolu a fakafiafia mahani fakatane mo e fifine. Ka e, kua talahau a Peteru kua taute mo e “matahavala a lautolu ke he ha lautolu ni a fakahehe, ka kua eke e lautolu e kaiaga mena fakalataha mo mutolu.” Ti tohi e Iuta: “Ko e tau ie he tahi a lautolu ke he ha mutolu a tau kaiaga mena fakaalofa.” (Iuta 12) E, tuga ni e tau feo he toka kua liga ke moumou e lalo kelekele he poti, ti fakatupu e tau kauvaka lolelole ke tomo, kua fakakelea he tau akoako pikopiko a lautolu kua lolelole ti kua fakaalofa fakatupua a lautolu he magahala “kaiaga mena fakaalofa.”

16. (a) Ko e heigoa e “tau kaiaga mena fakaalofa,” mo e ko e heigoa e tau tauteaga taha ia kua taute e lautolu ne mahani kelea he vaha nei? (e) Kua onoono lahi a lautolu e tau akoako pikopiko ki a hai, ti ko e heigoa kua lata ia lautolu ia ke taute?

¹⁶ Ko e tau “kaiaga mena fakaalofa” nei kua hagahaga ai ko e tau magaaho fiafia ka auloa e tau Kerisiano he senetenari fakamua ke olioli e tau mena kai mo e fakalatahaaga. Kua fa fakalataha foki e Tau Fakamoli a Iehova he vaha nei ke fiafia, liga ke he tau fiafia mau hoana, ke he tau pikiniki, po ke fakalatahaaga ke he afiafi. Maeke fefe e tau tagata mahani kelea ke fakaaoga e tau magaaho pihia ke fakataki e tau tagata matematekelea noa? Kua tohi e Peteru: “Kua puke ha lautolu a tau mata ke he fifine faivao . . . , kua tauhele e lautolu e tau tagata hikihikifano.” Kua onoono fakalahi a lautolu ke he “loto kua fakamahani e lautolu ke he velevelemena” ki a lautolu kua hikihikifano fakaagaga ne kua kaumahala ke taute katoatoa e kupu moli ma ha lautolu. Ti ko e hatakiaga tuai ke he mena ne tupu ke he vaha a Peteru, mo e kia mataala ai! Kia kalo kehe mai he ha mena kua fakatupu nakai mea, mo e kia nakai goagoa ke he tau mena fulufuluola fakamana po ke fakatino he taha kua taute e tau fakatupu ki mua kua kelea!​—2 Peteru 2:14.

“Puhala a Palaamo”

17. Ko e heigoa e “puhala a Palaamo,” mo e ne lauia fefe e tau Isaraela 24,000?

¹⁷ Ko lautolu nei kua “ulaafia” kua leva e iloa e kupu moli. Kua tuga ke makai agaia a lautolu i loto he fakapotopotoaga. Ka e pehe a Peteru: “Kua tiaki e lautolu e puhala tonu, kua hehe a lautolu, kua mumui atu ke he puhala a Palaamo ko e tama a Posoro, ko ia ne manako ke he palepale he mahani hepehepe.” (2 Peteru 2:14, 15) Ko e puhala he perofeta ko Palaamo ko e fakatonu e puhala he fakataki mahani kelea ma e hana ni a mouaaga fakatagata. Ne tala age a ia ke he patuiki Moapi ko Palako to kaialu he Atua a Isaraela kaeke ke fakataki e tau tagata ke taute e mahani faivao. Ti ko e fua, tokologa he tau tagata he Atua ne fakataki he tau fifine Moapi, mo e 24,000 kua tamate ha ko e mahani feuaki ha lautolu.​—Numera 25:1-9; 31:15, 16; Fakakiteaga 2:14.

18. Fakatumau fefe a Palaamo, mo e ko e heigoa e fua kua hataki ma e tau akoako pikopiko?

¹⁸ Kua mailoga e Peteru kua tupetupe a Palaamo he magaaho ne vagahau e asini ki a ia, ka e “manako [lahi mahaki a Palaamo] ke he palepale he mahani hepehepe” he magaaho ne tupu foki e mena ia, kua nakai tiaki e ia hana “goagoa.” (2 Peteru 2:15, 16) Ko e mahani kelea ha ia! Oi fakaalofa ki a lautolu kua tuga a Palaamo kua lali ke fakakelea e tau tagata he Atua he kamatamata a lautolu ke taute e mahani kelea! Ne mate a Palaamo ha ko e hana a mahani kelea, ko e ata katoa he mena ka tupu ki a lautolu oti kua mumui ke he hana puhala.​—Numera 31:8.

Tau Fakatakiaga Faka-Tiapolo ha Lautolu

19, 20. (a) Fakatatai ki a hai a lautolu ne tuga a Palaamo, mo e ko e ha? (e) Ko hai ne hele e lautolu, mo e fefe? (i) Ko e ha kua talahau a tautolu ko e tau fakatakiaga ha lautolu kua kelea muitui, mo e puipui fefe e tautolu a tautolu mo e falu mai ia lautolu?

¹⁹ He fakamaama ai a lautolu kua tuga a Palaamo, kua tohi e Peteru: “Ko e tau vai puna [po ke, vai keli] a lautolu nakai toka ai ha vai, ko e tau aolagi kua havilia he afa.” Ma e tagata fano fenoga kua fia inu he tutakale, ko e vai kua mago kua kakano ko e mate. Ti ko e mena ia ‘kua toka e pouli kiki tukulagi’ ma lautolu kua taute e tau mena pihia! “Ha kua vagavagahau fakatokoluga a lautolu ke he tau mena nakai aoga,” kua fakaholo atu a Peteru ke talahau, “kua tauhele ai e lautolu ke he tau manako lahi he tino mo e matahavala kia lautolu kua fehola kehe tuai ia lautolu kua nonofo mo e hehe.” Kua fakataki e lautolu a lautolu kua goagoa he ‘talahau atu kia lautolu e tokanoaaga,’ he talahau e Peteru, “ka ko lautolu kua eke mo tau tupa ke he kelea.”​—2 Peteru 2:17-19; Kalatia 5:13.

²⁰ Ko e tau fakatakiaga he tau akoako kelea pihia ko e mena faka-Tiapolo kelea muitui. Liga ke pehe a lautolu, ma e fakatai: ‘Na iloa he Atua ko e mena lolelole a tautolu mo e omaoma ke he fakaalofa. Ti ka taute e tautolu a tautolu mo e fakamakona e tau manako mahani fakatane mo e fifine ha tautolu, to fakaalofa hofihofi e Atua. Kaeke ke fakakite e tautolu e tau agahala ha tautolu, to fakamagalo e ia a tautolu ke he mena ne taute e ia he magaaho ne iloa fakamua e tautolu e kupu moli.’ Liu manatu na fakaaoga he Tiapolo e talahauaga taha pihia ki a Eva, he mavehe ki a ia to hala a ia ti galo noa. Ke he mena ne tupu ki a Eva, ne talahau e ia ko e hala ke he Atua to foaki age ki a ia e lotomatala mo e tokanoaaga. (Kenese 3:4, 5) Kaeke ke tupu e mena nei he feleveia a tautolu mo e tagata kelea pihia kua fio mo e fakapotopotoaga, ha ha ia tautolu e matagahua ke puipui a tautolu ni ti pihia foki mo e falu he tala age a ia ki a lautolu kua lata he fakapotopotoaga Kerisiano.​—Levitika 5:1.

Puipui he Maama Mitaki

21-23. (a) Ko e heigoa e tau fua he kaumahala ke fakagahua e maama mitaki? (e) Ko e heigoa e mena vihi atu kua fakatutala a Peteru ka manamanatu foki ki ai?

²¹ Ne fakahiku e Peteru e fahi nei he hana a tohi he fakamaama e tau fua he kaumahala ke fakagahua e iloilo ne talahau e ia fakamua kua aoga ke he “moui mo e mahani Atua.” (2 Peteru 1:2, 3, 8) Kua tohi e ia: “Ha ko e mena kaeke kua fehola kehe a lautolu mai he tau mena kelea he lalolagi ha kua maama mitaki ke he Iki, ko e Fakamoui ia ko Iesu Keriso, ka e liu foki lavelave ke he tau mena na ti mahala ni, ati au atu ai e mahani kelea he fakahikuaga ha lautolu ke he kamataaga ha lautolu.” (2 Peteru 2:20) Momoko ha ia! Ko e tau tagata pihia he vaha a Peteru kua tolo ke he mafoa e amaamanakiaga uho he moui nakai mate ke he lagi ha ko e tau magaaho ku he fiafia ke he mahani fakatane mo e fifine.

²² Ti pehe ai a Peteru: “Kua mitaki ane mai nakai iloa e lautolu e puhala he tututonu, ka e kelea he iloa ai e lautolu, ti liliu kehe mo e poakiaga tapu ne tuku age kia lautolu. Ka kua hoko kia lautolu e kupu fakatai moli, Kua liu foki e kuli ke he hana ni a koko, mo e kupu ē, Ko e puaka ne koukou kua liu taveli foki a ia ke he pelapela.”​—2 Peteru 2:21, 22; Tau Fakatai 26:11.

²³ Ko e taha mena vihi ne kua fakamoli ai ne kamata ke lauia e tau Kerisiano fakamua ne tatai ai e lauiaaga ki a lautolu he vaha nei. I tuai, ne gugu moli e falu ke tuga ko e fakatuai ke he ha ha hinei he Keriso ne kua mavehe mai. Kia kumikumi a tautolu ko e taute fefe e Peteru e mena nei.

Manatu Nakai e Koe?

◻ Ko e heigoa e tau fakataiaga hataki tolu kua talahau e Peteru?

◻ Kua fefe e “fakalialia ke he tau iki” he tau akoako pikopiko?

◻ Ko e heigoa e puhala a Palaamo, mo e to fefe a lautolu kua mumui ke lali ke fakataki e falu?

◻ Ko e heigoa e tau fua he kaumahala ke fakagahua e maama mitaki?

[Fakatino he lau 24, 25]

Kua eke a Palaamo mo fakataiaga hataki