Kia Fakatalitali Fakaeneene

KO E leveki mamoe ne fakatumau ke tagi “Luko!” ka e nakai fai luko kua mailoga ko e tagi lagaloga hana ma e lagomatai kua nakai fakateliga ki ai. Pihia foki he vaha nei, tokologa ne fakaheu e aho ha Iehova ne tata lahi mai kakano he kua logona e lautolu e tau hatakiaga loga ne eke mo tau tagi fakavai. Ha kua tokologa ne mahala ke iloa moli ko e hatakiaga fe ne moli ke omaoma ki ai kua mokulu ke he tau lima he fi lahi he Atua, ko Satani, ko e ‘agelu fakavai he maama.’​—2 Korinito 11:14.

Ko e agaga makona lahi kua hagahaga kelea lahi pihia foki ma lautolu ne kua fai magaaho ne fekafekau ki a Iehova. Ko e ha? Kia mailoga e hatakiaga he aposetolo ko Peteru he senetenari ke fakamua aki.

Manamanatu Fakamitaki

Ko e tohi ne omoi he agaga, ke ua aki ha Peteru ko e fakamanatuaga ke he tau Kerisiano he vaha fakamua atu, mo e pihia foki ki a tautolu. “Ko e tau fakahelehele na e,” he tohia e ia, “kua tohi atu e au e tohi ua nai, ko e tau tohi ia kua fakalagalaga ai e au ha mutolu a tau loto fakamoli he haku a fakamanatu atu e au.” (2 Peteru 3:1) Ko e heigoa e fakaveaga ha Peteru ma e hatakiaga nei? Ne fakakite e Peteru e tuaga he tau tagata va ne fakalolelole ha ko e tau va ha lautolu e lata ke fakamafiti hagaao ke he magaaho ne moui ai e tau fekafekau he Atua. Hanei e magaaho ke mataala neke fakahehe he tau tagata va. Ati fakamalolo e Peteru e tau tagata totou hana ke “manatu ai e mutolu ke he tau kupu kua talahau mai fakamua he tau perofeta tapu.” (2 Peteru 3:2; Gahua 3:22, 23) Ko e heigoa ne talahau he tau perofeta?

Ne fatiaki mau he tau fekafekau tua fakamoli he Atua e puhala ne ta mai he fakafiliaga faka-Atua e fakaotiaga ke he tau mahani kelea. Ne fakamanatu e Peteru ke he tau tagata totou hana hagaao ke he Fakapuke he vaha a Noa ne fakaaoga ai e Iehova he magaaho ne pukeina ai e lalolagi he tau mena kelea. Ti fakaoti he Fakapukeaga tafea mahaki ia e lalolagi he magaaho ia. Ka e fakamoui he Atua a Noa mo e hana magafaoa i loto he vaka katoa mo e tau hukui he “tau mena moui oti.” Ne fakamoli he tau tala mai i tuai he lalolagi mo e lagi katoa e molioli he fakamauaga he Tohi Tapu.a​—Kenese 6:19; 2 Peteru 3:5, 6.

Ne ui e Peteru e fakalavelave faka-Atua ia ko e ‘mena galo he falu tagata.’ Ti toho atu e falu ke he tuaga makona lahi he tau tagata va he mogo ia. Ko tautolu, mogoia, kia aua neke galo e tau mena ne kua fita he taute e Iehova. Ne tala mai e Peteru ki a tautolu: “Ka ko e lagi a enei mo e fonua kua fakatoka ha ko e kupu ia ni, kia taofi ma e afi ke he aho ke fakafili ai mo e mahakava ai e tau tagata matahavala.” (2 Peteru 3:7) E, to hoko mai foki e fakalavelave faka-Atua.

Nakai Mule e Atua

Kua fita e afe e tau tau he tau magaaho ne mole. Ko e ha ne leva pihia ai e fakatali he Atua ke taute e tau lekua he tagata? Liu foki a Peteru ke fakamahino atu ke he taha kitiaaga. Ne pehe a ia: “Ko e tau fakahele na e, aua neke galo ia mutolu, ko e aho taha ki mua he Iki tuga ne afe he tau tau ia, ko e afe foki he tau tau tuga ne aho taha ia.” (2 Peteru 3:8) Nukua kehe e kitiaaga a Iehova ke he magaaho mai he ha tautolu. Ke he Atua tukulagi, ko e vaha mai he tufugatia a Atamu ato hoko ke he mogonei kua nakai la katoa ia e fahitapu. Ka ko e heigoa ni e kitiaaga ha tautolu ke he magaaho, ko e tau afe tau takitaha mo e tau aho takitaha ne momole atu, kua fakatata lahi atu a tautolu ke he fakakatoatoaaga he finagalo a Iehova.

“Nakai puna e ulo ka fakakia tumau,” ko e talahauaga ne kakano ke fakatalitali ke he taha mena ko e tuga e fakamule he naia e mena ka tupu. Pete ni ia, ne tomatoma mai a Peteru ke “fakatalitali mo e foli atu kia hoko mai e aho he Atua.” (2 Peteru 3:12) Maeke fefe a tautolu ke feaki e loto manamanatu ke fakamataala a tautolu ke he tata lahi mai he fakalavelave faka-Atua?

Mua Atu e Gahua ke he Tau Kupu

Ne fakamahino atu a Peteru ke he tau matagahua mo e tau gahua. Ne hagaao a ia ke he “tau mahani mitaki” pihia foki e “tau mahani Atua.” (2 Peteru 3:11) Putoia ke he heigoa e tau mena nei?

Ko e fekafekau moli he Atua kua taute e tau mena ne fakafiafia a Ia. Ko e tua he tagata tapuaki moli pihia kua kitia ai he hana mahani. Kua tu kehe ai a ia mai ia lautolu ne vagahau teao ke talitonu ke he Atua mo e hana tau maveheaga. Liga kua mailoga e koe ko e fekafekauaga he Tau Fakamoli a Iehova ke he tau tagata ne taute ai a lautolu ke kehe. Ne o atu a lautolu ke he hau kaina ke fakailoa e tau maveheaga he Atua ne fakamau i loto he Tohi Tapu. Ka e fakamatala foki a lautolu ke he amaamanakiaga mo e tau taofiaga ha lautolu ke he ha kavi ni ka feleveia a lautolu mo e tau tagata.

Ko e Fakamoli ne lavelave lahi ke fakapuloa hana tua ke he falu kua fakamauokafua mo e fakamalolo ai hana tau taofiaga. Kua fakahokulo he tau talahauaga e tau fakaohoohoaga mo e ta mai foki e fiafia he loto mo e makona lahi. Ka fakapuloa e tautolu e tala mitaki he Kautu he Atua, kua fakafiafia foki e tautolu a Iehova. Kua iloa e tautolu ‘ko e mena nakai hepehepe e Atua ke fakanimonimo ai e ia ha tautolu a tau gahua, mo e gahua fakamalolo he fakaalofa kua fakakite mai ai e tautolu ke he hana higoa,’ tuga ne talahaua he katofia aposetolo ha Peteru, ko Paulo.​—Heperu 6:10; Roma 10:9, 10.

Ko e heigoa e fua he gahua nei he fakamatala atu e tala mitaki he Kautu he magahala he tau aho fakamui he fakatokaaga kelea he vaha nei? Ko e tau teau mo e tau afe e tau tagata loto fakamoli hane fa e fakaako e puhala ke o mai ke he fakafetuiaga tata mo Iehova, ke aoga mai he hana fakaalofa noa mo e moua e fiafia moli he amaamanakiaga he moui tukulagi he lalolagi parataiso.

Iloa Fakamua

Pete ni he iloa e tautolu mai he Tohi Tapu to fakalavelave mai a Iehova ko e Atua he magaaho ni hana, kua lata ia tautolu ke omaoma ke he taha hatakiaga foki ne mai e Peteru. “Kia fakaeneene a mutolu kia mutolu, ha kua iloa fakamua e mutolu, neke hekeheketakina a mutolu ke he hehe he tau tagata hemu, ti veveli ai a mutolu mai he mena kua tumau ai a mutolu.”​—2 Peteru 3:17.

Leva e iloa moli e Iehova ko e falu ne nakai malolo e tua to fakalolelole ha kua tuga mule mai e fakalavelave faka-Atua. Iloa foki e ia ko e fakaohoohoaga he tau tagata nakai mahani Atua to fakakelea e tau fekafekau moli hana, po ke fakalolelole ha lautolu a taofiaga kua tata mai e fakatapuaga he higoa he Atua. Ko e matematekelea ha a ia ke veli mai he tuaga tumau he tau aho fakahiku nei!

Nakai ko e magaaho anei ke tehatehaua po ke fakauaua hagaao ke he mena ka taute e Iehova. (Heperu 12:1) Ka e, ko e magaaho anei ke fakatupu e fakaaue lahi ke he mena ne ta mai he kua fakamanavalahi a Iehova​—ko e amaamanakiaga he fakamouiaga ke he totou miliona ne vala he moto tagata tokologa he lalolagi katoa mo e talifaki ke hao mai he matematekelea lahi ne hau. (Fakakiteaga 7:9, 14) Ne tomatoma e Peteru: “Ka kia tutupu a mutolu ke he fakaalofa noa mo e maama ke he Iki ha tautolu, ko e Fakamoui ia ko Iesu Keriso. Kia ha ha ia ia e fakahekeaga ke he vaha nai, katoa mo e aho tukulagi.”​—2 Peteru 3:18.

“Kia Fakatumau e Mutolu a Mutolu ke he Fakaalofa he Atua”

Kua foaki mai he lavelave atu ke he fakamatalaaga he Kautu mo e o tumau ke he tau feleveiaaga Kerisiano ke tapuaki mo e fakaako e Kupu he Atua e puipuiaga. Ati nakai fai magaaho ai a tautolu ke fakatupetupe ha ko e tau tutuaga malolo hifo he fakatokaaga kelea he vaha nei. Ko e tau matakutaku mo e tau fakaatukehe kua nakai lata ke ha ha he tau momoui he tau Kerisiano moli. (1 Korinito 15:58) Ka lavelave lahi a tautolu he fekafekau ki a Iehova, kua mafiti lahi e magaaho he mole.

Ko Iuta, ko e tagata he vaha ha Peteru mo e matakainaga ha Iesu, ne tomatoma mai ki a tautolu: “Ko mutolu, ko e tau fakahele na e, kia ati hake e mutolu a mutolu ke he ha mutolu a tua kua tapu ue atu, ko e Agaga Tapu ke liogi ai a mutolu. Kia fakatumau e mutolu a mutolu ke he fakaalofa he Atua, ti fakatalitali ke he fakaalofa he Iki ha tautolu ko Iesu Keriso, kia hoko atu ke he moui tukulagi.” (Iuta 20, 21) Mailoga la e aoga lahi he aga mitaki kua feaki ha ko e fakauka ke he liogi. (1 Tesalonia 5:17) Ati lafi mai e Iuta: “Kia fakaalofa age a mutolu ke he falu mo e fakalatalata. Ka ko e falu kia fakamoui e mutolu a lautolu mo e matakutaku, kia hamu a lautolu mai he afi, kia fakavihia foki e mutolu e tapulu kua pikitia he tino.” (Iuta 22, 23) Ko e lata lahi ha ia ke fefakamaloloaki he magahala he tau magaaho uka nei! Mo e aoga lahi ha a ia ke nakai mokulu atu ke he matahele, he fakaaoga e ‘aho ke fakamomoui’ loa nei mo piu he “mata kakana,” ne kua holofa he lalolagi mahani kelea he vaha nei.​—Iuta 4; 2 Korinito 6:1, 2.

He omaoma ke he tau fakatonuaga ha Peteru, Paulo, mo Iuta mo e he lavelave mo e gahua ke he fekafekauaga he Atua, kia fakatalitali fakaeneene a koe ke he fakalavelaveaga a Iehova. Ka e to pihia nakai a koe?

Aua neke fakauaua ke o atu ke he Tau Fakamoli he matakavi hau ma e lagomatai ke fakamalolo e tua hau ke he maveheaga he Tufuga ke moui tukulagi. Kia kumi ko e heigoa kua lata ke fakalataha ke he gahua fakamatala nei ka nakai liu taute he lalolagi katoa, ka fakaoti ai he matematekelea lahi ne hau. (Mareko 13:10) To moua ai e koe e amaamanakiaga ke moui he lalolagi fou he tututonu ne mavehe mai e Iehova. (2 Peteru 3:13) Kia oma hana tau fakamanatu! Kia fakatalitali fakaeneene! Kia lavelave!

[Matahui Tala]

[Fakatino he lau 7]

Fakaako he mogonei hagaao ke he maveheaga he Atua ke he Parataiso

[Fakatino Credit Line he lau 5]

Wolf: Animals/Jim Harter/Dover Publications, Inc; young shepherd: Children: A Pictorial Archive from Nineteenth-Century Sources/Grafton/Dover Publications, Inc.