Kakano kua Lata a Tavita ke Hola

MOLE e keli e Tavita a Koliato, ne tamai he takitaki kau ha Isaraela ko Apineru a ia ki a Saulo. Kua fiafia lahi a Saulo ki a Tavita. Ne taute e ia a Tavita mo takitaki kau he haana kautau mo e uta a ia ke nofo he fale he patuiki.

Magaaho ne liliu mai ai e tau kautau he tau mo e tau Filisitia, ti lologo e tau fifine: ‘Ne keli e Saulo e tokoafe, ka e keli e Tavita e tau hogofulu afe.’ Ne mahekeheke a Saulo ha ko e mena nei, ha kua lahi atu e fakalilifu ki a Tavita ke he fakalilifu ki a Saulo. Ka e nakai mahekeheke e tama taane ha Saulo ko Ionatana. Ne hofihofi e fakaalofa ha Ionatana ki a Tavita, ti fakaalofa foki a Tavita ki a Ionatana. Ti taute e laua e maveheaga ki a laua ni ke kapitiga tumau a laua.

Ko Tavita ko e tagata makaka he tā kitara, ti fiafia a Saulo ke he tau leo kofe ne tā e ia. Ka e he taha aho ne fakaohooho he mahekeheke a Saulo ke taute e mena kelea lahi. Magaaho ne tā e Tavita e kitara, ne totō e Saulo haana a tao mo e liti ai, he pehē: ‘To tuina ua a Tavita mo e kaupa he fale!’ Ka e kalo a Tavita, ti nakai lau he tao. Nakai leva ne liu foki a Saulo liti aki e tao a Tavita ka e nakai lau ai. Ti iloa tuai e Tavita kua lata a ia he mogonei ke fakaeneene fakalahi.

Manatu nakai e koe e maveheaga ne taute e Saulo? Pehē a ia to foaki age e tama fifine haana ke eke mo hoana he tagata ka keli a Koliato. Fakahiku ai ne tala age a Saulo ki a Tavita kua maeke a ia ke uta e tama fifine haana ko Mekala, ka e fakamua kua lata a ia ke keli toko 100 he tau fī ha Filisitia. Manamanatu la ke he mena ia! Kua amanaki pauaki a Saulo to kelipopo he tau Filisitia a Tavita. Ka e nakai taute pihia e lautolu ti foaki age e Saulo haana tama fifine mo hoana ha Tavita.

He taha aho ne tala age a Saulo ki a Ionatana mo e tau fekafekau oti haana kua manako a ia ke tamate a Tavita. Ka e tala age a Ionatana ke he haana matua taane: ‘Kia nakai fakamamahi a Tavita. Nakai fai mena hepe a ia ne taute ki a koe. Ka ko e tau mena oti haana ne taute kua lagomatai lahi ki a koe. Ne fakahagahagakelea e ia haana moui he magaaho ne keli ai a Koliato, ti ko e mogo ne kitia e koe, ne fiafia a koe.’

Ne fanogonogo a Saulo ke he tama haana, ti mavehe a ia ke nakai fakamamahi a Tavita. Kua liuaki mai a Tavita ti fekafekau ki a Saulo he haana fale tuga ni he magaaho fakamua. Ka e he taha aho, he tā a Tavita he kitara, ne liu a Saulo liti aki e tao a Tavita. Ne kalo a Tavita ti tuina e tao he kaupa. Ko e lagatolu aki anei! Ne iloa e Tavita mogonei kua latatonu ni a ia ke hola!

He pō ia ne fina atu a Tavita ke he haana fale. Ka kua fakafano atu e Saulo falu tagata taane ke keli a ia. Iloa e Mekala e mena ka taute he matua taane haana. Ti tala age e ia ke he taane haana: ‘Ka nakai fano kehe a koe he pō nai, to mate a koe a pogipogi.’ He pō ia ne lagomatai e Mekala a Tavita ke hola he pu fakamaama. Ti kavi ke he fitu e tau ne fakamumuli a Tavita he taha matakavi mo e taha matakavi neke moua e Saulo a ia.