Aahi e Agelu ki a Maria

KO E fifine mata fulufuluola nei ko Maria. Ko e fifine Isaraela a ia ne nofo he taone ko Nasareta. Iloa he Atua ko ia ko e fifine mitaki lahi. Ko e kakano haia ati fakafano mai e Ia e agelu haana ko Kaperielu ke vagahau ki a ia. Iloa nakai e koe e mena kua tala age e Kaperielu ki a Maria? O mai la ke kitia.

‘Fakaalofa atu, ko koe kua ofania,’ he tala age e Kaperielu ki a ia. ‘Kua fakalataha a Iehova mo koe.’ Ne nakaila kitia e Maria a ia he mogo fakamua. Ne tupetupe a ia, ha kua nakai iloa e ia e kakano he tala he agelu. Ka kua fakatotoka e Kaperielu he mogoia ni e tau matakutaku haana.

‘Ua matakutaku ma Maria na e,’ he ui e ia. ‘Kua fiafia lahi a Iehova ki a koe. Ko e kakano haia to taute e ia taha mena mitaki lahi ma haau. To nakai leva ti fai tama a koe. Ti fakahigoa e koe a ia ko Iesu.’

Ne fakamaama foki e Kaperielu: ‘To homo lahi e tama nei, mo e to fakahigoa a ia ko e Tama he Atua Mua Ue Atu. To fakatū e Iehova a ia mo patuiki, tuga a Tavita. Ka e to patuiki tukulagi a Iesu, mo e to nakai fakaoti e kautu haana!’

‘Maeke fēfē e tau mena oti nei?’ he hūhū e Maria. ‘Nakaila mau ia au. Nakai nofo foki au mo e ha tagata taane, ti maeke fēfē au ke fai tama?’

‘To haele hifo e agaaga he Atua ki luga haau,’ he tali e Kaperielu. ‘To fakahigoa e tama ko e Tama he Atua.’ Ti tala age a ia ki a Maria: ‘Manatu e magafaoa haau ko Elisapeta. Pehē e tau tagata kua fuakau lahi a ia ke fai fanau. Ka e nakai leva to fai tama taane a ia. Kitia e koe, kua ai fai mena e Atua ne nakai maeke ke taute.’

He mogoia ni ne pehē a Maria: ‘Ko au ko e fekafekau fifine ha Iehova! Kia eke pihia ni ki a au tuga ne talahau e koe.’ Ti fano kehe ai e agelu.

Ne fano fakamafiti a Maria ke ahiahi ki a Elisapeta. He logona e Elisapeta e leo ha Maria, ne hopohopo e tama mukemuke i loto ha Elisapeta he fiafia. Kua pukeina a Elisapeta he agaaga he Atua, ti pehē a ia ki a Maria: ‘Kua monuina pauaki a koe he tau fifine.’ Ne nofo a Maria mo Elisapeta ke he kavi ke tolu e mahina, ti liu a ia ki kaina i Nasareta.

Kua teitei mau a Maria mo e tagata ne higoa ko Iosefa. Ka ko e magaaho ne iloa e Iosefa kua fai tama a Maria, ne manatu a ia kua nakai lata ke mau mo Maria. Ti tala age e agelu he Atua ki a ia: ‘Ua matakutaku a koe ke eke a Maria mo hoana haau. Ha ko e Atua ne foaki e tama taane ma haana.’ Kua mau a Maria mo Iosefa, ti fakatali a laua ke fanau a Iesu.