Veveheaga 2

Fakalilifu Fakamua a Ia To Fanau Mai

MOLE atu he tala age e agelu ko Kaperielu ke he tamafine tote ko Maria to fanau e ia e tama tane to eke a ia mo patuiki tukulagi, ne huhu a Maria: “To eke fefe e mena ia, ha kua nakai iloa e au ha tane?”

“To haele hifo e agaga tapu kia koe,” he fakamaama e Kaperielu, “to fakamalu hifo foki e koe he mana hana ne Mua Ue Atu ko e mena ia ke talahaua ai e tama tapu, ko e Tama he Atua.”

Ke lagomatai a Maria ke talitonu e fekau hana, ne matutaki a Kaperielu: “Kitiala, ko e hau a faoa foki ko Elisapeta kua fatu a ia kua motua, ko e tama tane foki hana tama; ko e ono mahina ainei a ia ne talahaua kua tufua. Ha kua nakai fakai taha mena taha ke nakai maeke ke he Atua.”

Ne talia e Maria e kupu ha Kaperielu. Ko e heigoa hana a tali? “Kitiala, ko au nai ko e fekafekau a Iehova,” he talahau e ia. “Kia hoko mai kia au tuga ne vagahau hau.”

Ne nakai leva ti fano a Kaperielu, ne tauteute a Maria mo e fano ke ahi a Elisapeta, ne nofo mo e hana tane ko Sakaria, ke he motu atu mouga a Iutaia. Mai he kaina ha Maria i Nasareta, ko e fenoga loa lahi a nei ko e liga ke he tolu po ke fa e aho.

Ko e magaaho ne hoko a Maria ke he fale a Sakaria, ne hu atu a ia mo e fakafeleveia atu. Ko e magaaho ia, ne puke a Elisapeta ke he agaga tapu, mo e pehe a ia ki a Maria: “Uhoaki a koe ke he tau fifine, uhoaki foki e tama ka fanau mai e koe! Mai fe e mena nai kia au, ha kua hau e matua fifine he haku a Iki kia au? Kitiala, ne hoko mai e leo he hau a fakaalofa ke he na teliga haku, ti hopohopo ai e tama ke he haku a manava he fiafia.”

He logona e mena nei, ne tali age a Maria mo e fakaaue mai he loto: “Kua fakaheke atu haku a loto ki a Iehova. Kua fiafia ni hoku loto ke he Atua ko e haku a Fakamoui; nukua kitekite mai a ia ke he hana fekafekau ko e tagata fakateaga; ha ko e mena kamata mai he vaha nai ke talahau au kua monuina he tau hau oti. Ha ko Ia ne malolo kua eke e ia e tau mena homo atu maku.” Ka e, pete ni kua fakakite e fiafia ki a ia, ne tuku e Maria e tau fakahekeaga oti ke he Atua. “Kua tapu foki hana higoa,” he talahau e ia, “ko e hana fakaalofa foki kia lautolu ne matakutaku kia ia, kua hoko ia ke hahau mo hahau.”

Ne matutaki e fakaheke e Maria e Atua ke he lologo fakaperofeta mai he agaga, he fakapuloa: “Kua fakamalolo e ia hana lima, kua fakamavehevehe e ia a lautolu ne fakatokoluga ke he tau manatu he tau loto ha lautolu. Kua tulutulei hifo ne ia e tau iki he tau nofoaiki ha lautolu; ti fakamatalahi e ia a lautolu ne fakateaga. Kua fagai e ia ke he tau mena mitaki a lautolu ne fia kai; ka ko lautolu ne muhu mena, kua fakafano noa atu e ia. Kua lagomatai a ia ke he hana fekafekau ko Isaraela, he hana manatu mai ke he fakaalofa, kia Aperahamo mo e tau fanau hana tukulagi, tuga he talahau mai e ia ke he tau matua ha tautolu.”

Ne nofo a Maria mo Elisapeta ke he liga tolu e mahina, mo e nakai taumaleku kua lagomatai lahi a ia ke he tau faahi tapu fakahiku he fatu ha Elisapeta. Ko e mitaki moli ha a ia he tau fifine tua fakamoli tokoua nei, fatu tokoua he lagomatai he Atua, ti fakalataha tokoua ke he magaaho monuina he ha laua a tau momoui!

Mailoga nakai e koe e fakalilifu ne foaki ki a Iesu ka e nakai la fanau mai a ia? Ne ui e Elisapeta a ia, ko e “haku a Iki” mo e hopohopo e tama hana ne nakai la fanau mai he magaaho ne hu fakamua mai a Maria. Ka ko e taha faahi, ne taute he falu a Maria mo e hana tama ne nakai la fanau mai mo e tote e fakalilifuaga, ka kitia ai e tautolu. Luka 1:​26-56.

▪ Ko e heigoa ne talahau e Kaperielu ke lagomatai aki a Maria ke maama to fatu fefe a ia?

▪ Fakalilifu fefe a Iesu ka e nakai la fanau mai ia?

▪ Ko e heigoa ne talahau e Maria ke he lologo fakaperofeta ke fakaheke ke he Atua?

▪ Fiha e leva he nofo a Maria mo Elisapeta, mo e ko e ha ne lata tonu ai ke nofo a Maria mo Elisapeta ke he magaaho ia?