Fakamalolō e Iesu e Tau Tagata Gagao

HE MOGO ne fano fenoga a Iesu he motu, ne fakamalolō e ia a lautolu ne gagao. Ne kua talahau atu e tau tala hagaao ke he tau mana nei ke he tau maaga mo e tau taone oti. Ti kua tamai he tau tagata ki a ia a lautolu ne kulikuli mo e matapouli mo e teliga tuli, mo e tokologa foki ne gagao. Ti kua fakamalolō e Iesu a lautolu oti.

Kua molea tuai e tolu e tau tali mai he papatiso e Ioane a Iesu. Ti tala age a Iesu ke he tau aposetolo haana to nakai leva ti hake a ia ki Ierusalema, mo e to tamate a ia, ti fakaliu tu mai he mate. Ka ko e magaaho nei, kua matutaki a Iesu ke fakamalolō a lautolu ne gagao.

He taha aho ko Iesu kua fakaako he Sapati. Ko e Sapati ko e aho okioki ma e tau Iutaia. Ko e fifine ne kitia e koe hinei, ne gagao lahi a ia. Ne 18 e tau ne keu e tua haana, ti nakai maeke ke tū fakahako. Ati tuku e Iesu e tau lima haana ke he fifine, ti kamata agataha a ia ke tū hake. Kua malolō tuai a ia!

Ne fakaita he mena nei e tau takitaki lotu. ‘Kua ono e aho kua lata ia tautolu ke gahua,’ he ui fakalahi he taha ia lautolu ke he tau tagata. ‘Ko e tau aho a ia kua lata ke o mai ke fakamalolō, nakai he Sapati!’

Ka e tali e Iesu: ‘Ko e tau tagata kelea a mutolu. To vevete he taha ia mutolu e asini haau mo e uta ai ke fakainu he Sapati. Ti nakai kia lata e fifine nei kua matematekelea ke he 18 e tau he gagao, ke fakamalolō he Sapati?’ Ko e tali ha Iesu ne fakamā e tau tagata kelea nei.

Fakamui ne fenoga atu a Iesu mo e tau aposetolo haana ki Ierusalema. He momole laia a lautolu he maaga ko Ieriko, ne tokoua e tagata kaiole matapouli ne logona kua fina age a Iesu. Ti tauhea atu a laua: ‘Iesu, lagomatai a maua!’

Ne ui age a Iesu ke o mai e tau tagata matapouli, ti hūhū: ‘Ko e heigoa kua manako a mua ke taute e au ma mua?’ Ne pehē a laua: ‘Iki na e, kia fakaala ha maua a tau mata.’ Ne aamo e Iesu e tau mata ha laua, ti maeke agataha ia laua ke kitia! Iloa nakai e koe e kakano ati taute e Iesu e tau mana homo lahi oti nei? Ha kua fakaalofa a ia ke he tau tagata mo e manako ki a lautolu ke tua ki a ia. Ti maeke ia tautolu ke iloa moolioli ko e mogo ka pule a ia ko e Patuiki to nakai fai tagata he lalolagi ka liu gagao.