Ko e Fakatufono Ka Tamai e Parataiso

Ko e magaaho ne nofo ai a Iesu he lalolagi, ne tala age a ia ke he haana a tau tutaki ke liogi ma e kautu he Atua: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:9, 10) Ne fakamatapatu foki haana a fakamatalaaga ke he “vagahau mitaki he kautu.” (Mataio 4:23) Ka e lahi haana a fakamatalaaga ke he Kautu mai he falu a mena kehekehe ne fakatutala a ia ki ai. Ko e ha? Ko e kakano ha ko e Kautu ko e kanavaakau ni haia ka fakaaoga he Atua ke taute aki e tau mena vihi ne fakamatematekelea aki e moui he vaha nei. Ko e kakano he Kautu, to utakehe mo e fakaoti he Atua e tau latau, tau hoge, tau gagao, mo e tau mahani kelea, mo e tamai e ia e kau fakalataha mo e mafola.

Manako nakai a koe ke nofo he lalolagi pihia? Kaeke ke manako, kua lata ia koe ke totou e tohi nei. I loto he tohi nei, to iloa ai e koe ko e Kautu ko e fakatufono, ka e mua ue atu ke he ha fakatufono ne takitaki po ke pule he tau tagata. To kitia ai foki e koe e puhala ofoofogia ne fakamaama mai fakahaga he Atua ke he haana a tau fekafekau hagaao ke he tau kakano he Kautu. Ko e taha mena foki, to kitia e koe ko e lagomatai fefe he Kautu a koe, ke hoko mai foki ke he vaha nei.

Ko e mooli, to eke foki a koe mo tagata he Kautuhe Atua he magaahotonu nei. Ka e, tofifili e koe ke tautee mena nei, kua latani ia koe ke fai maamaatu foki ke he mena ia. Ko e mena ia, kua fakamafana atu fakalahi a mautolu ki a koe ke kitekite fakamitaki e tohi nei. Ko e tau mena oti ne fakamaama atu ki a koe hagaao ke he Kautu, kua moua mai ni he Tohi Tapu.

Ka e fakamua, o mai la a tautolu ke kitekite ko e ha ne manako lahi ai a tautolu ke he Kautu he Atua.

Ko e kamataaga he tala ke he tagata, ne tufugatia he Atua e tagata mea katoatoa mo e fakatoka ai a ia ke he parataiso. Ti ko e magahala ia kua nakai aoga ke fai Kautu.

Ka e pete ni he pihia, ko Atamu mo Eva ko e ha tautolu a tau mamatua uluaki ne fanogonogo ni a laua ki a Satani, ko e agelu totoko. Ne tukumale pikopiko a ia ki a laua hagaao ke he Atua mo e fakatupu foki ki a laua ke totoko atu ke he Atua. Ko e mena ia, kua fakatoka ai ma laua e mate, “Ha ko e mate ko e palepale ia he hala.”—Roma 6:23.

Ha ko e nakai mea katoatoa, to nakai maeke he tagata hala ke tupu mai e tau fanau mea katoatoa. Ti ko e tau fanau oti ne tutupu mai ia Atamu kua fanau mai ni a lautolu mo e nakai mea, agahala, mo e mamate.—Roma 5:12.

Ti tali mai he vaha ia ke hoko mai ke he vaha nei, kua lata ni he tau tagata ke moua e Kautu he Atua ke lagomatai aki a lautolu ke tului aki mai he kaiaalu he hala mo e mate. To maeke foki he Kautu nei ke fakamea e higoa he Atua mai he tukumale pikopiko ne talahau e Satani ki ai.

Ne mavehe mai e Atua ko Iehova ke he “tega” pauaki (po ke huli) ka fanau mai ke laveaki e tau tagata mai he hala. (Kenese 3:15, New World Translation) Ti ko e “tega” nei ka eke mo Patuiki he Kautu he Atua.

Ko hai la a ia?

Ke he 2,000 he tau tau he mole atu ai e agahala ha Atamu ne ha ha i ai e tagata mahani tututonu ne higoa ko Aperahamo. Ne tala age a Iehova ki a Aperahamo ke toka haana a maaga ka e fina atu mo e nofo ai ke he tau fale ie he kelekele ko Palesitaina.

Ne taute pihia ai e Aperahamo e tau mena oti tuga ni ne tala age e Iehova ki a ia ti lafi atu foki ki ai taha e mena ne uka lahi mahaki. Ne tala age a Iehova ki a ia ke eke haana a tama ko Isaako mo poa ki luga he fatapoa.

Ne nakai matapatu e manako a Iehova ke eke e tagata mo poa. Ka ko e haana a manako ke iloa ko e fakaalofa mooli nakai a Aperahamo ki a ia. Kua hokotia tuai a Aperahamo ke kelipopo a Isaako, ka e taofi ni e Iehova a ia.

Ha ko e lahi he tua ha Aperahamo, ne taute e Iehova e maveheaga ke foaki age e kelekele Palesitaina ke he haana a fanau mo e pehe age ko e Tega he maveheaga to mai ni he matohiaga ia, ko e haana kakano to tupu mai ni he haana a tama ko Isaako.—Kenese 22:17, 18; 26:4, 5.

Ne ha ha ia Isaako e fanau tane mahaga, ko Esau mo Iakopo. Ne pehe mai a Iehova ko e Tega he maveheaga to tupu mai ia, ia Iakopo.—Kenese 28:13-15.

Ko Iakopo, ne fakahigoa ai foki e Iehova ko Isaraela, ne 12 la haana a tama tane, ti fanafanau oti a lautolu nei he magaaho fakamui. Ti kamata agataha e fanau a Aperahamo ke tutupu tokologa.—Kenese 46:8-27.

Ko e magaaho ne to ai e hoge ke he motu, ne o atu ai a Iakopo mo e haana magafaoa ki Aikupito ha ko e uiina mai ha Farao ko e patuiki i Aikupito.—Kenese 45:16-20.

I Aikupito ne fakakite mai ai ko e Tega he maveheaga ko e huli haia ka tupu mai ai he tama tane ha Iakopo ko Iuta.—Kenese 49:10.

Ko e magaaho fakamui, ne mate a Iakopo, ka ko e haana a tau fanau kua tupu lahi e tokologa kua puke ni e motu ia lautolu. Ti tupu ai e matakutaku he motu Aikupito ia lautolu ti eke ai ni a lautolu mo tau tupa.—Esoto 1:7-14.

Ko e magaaho fakamui ne fakafano mai e Iehova a Mose, ko e tagata mahani tututonu, ke tala age ki a Farao he magaaho ia ke toka e fanau Isaraela ke o kehe mai he haana a motu.—Esoto 6:10, 11.

Ne nakai talia e Farao, ko e mena haia ne ta mai ai e Iehova hogofulu e malaia fakahiku, ne fakafano mai e ia e agelu he mate ke tamate oti e tau tama tane uluaki he motu ko Aikupito.—Esoto veveheaga 7 ke he 12.

Ne pehe age e Atua ke he fanau Isaraela kaeke ke keli e lautolu e punua mamoe ke lata mo e kaiaga mena ha lautolu he po ia, kia uta taha vala he haana a toto mo e vali aki e na pou ua he gutuhala, ti fano leva ai e agelu he mate mai he tau fale ha lautolu. Ti fakahao ai e tau tama tane uluaki he fanau Isaraela.—Esoto 12:1-35.

Ko e fakahikuaga, ne fekau agataha e Farao e fanau Isaraela ke o kehe mai i Aikupito. Ka ko e magaaho fakamui ne hiki ai e ia haana a manatu mo e tutuli atu ki a lautolu ke liuaki mai.

Ne hafagi mai e Iehova e puhala he Tahi Kula ke fakahao aki e fanau Isaraela. Ti ko e magaaho ne lali ai a Farao mo e haana a tau kautau ke mumui atu ki a lautolu, ne tomo ni a lautolu.—Esoto 15:5-21.

Ne takitaki atu e Iehova e fanau Isaraela ke he mouga ne fakahigoa ai ko Sinai he tutakale. Ko e mena haia, ne tuku age e ia ki a lautolu haana a Fakatufono mo e pehe atu, kaeke ke taofi a lautolu ki ai, to eke ai a lautolu mo kautu he tau ekepoa, mo e motu tapu. Ko e mena ia, ha ha i ai ke he fakapapaleaga he tau vaha, to moua ai he fanau Isaraela e taha magaaho ke eke ai mo motu talahaua he Kautu he Atua.—Esoto 19:6; 24:3-8.

Mole atu taha e tau he hohoko atu e fanau Isaraela ke he Mouga ko Sinai, ne takitaki atu e Iehova a lautolu ki Palesitaina, ko e motu ne mavehe e ia ke he matua ha lautolu ko Aperahamo.

Ko e magaaho fakamui he motu ko Palesitaina, ne fakaatā ai he Atua e fanau Isaraela ke pule ai he tau patuiki. Ka mole ia, ti kua fai kautu tuai e Atua he lalolagi nei.

Ko e patuiki ke uaaki ha Isaraela ko Tavita, ko ia ko e huli mai ia Iuta. Ne kautu a Tavita ke he tau fi oti ha Isaraela, ti eke ai e ia a Ierusalema mo maaga lahi he motu.

Ko e tau mena oti ne tutupu he vaha ne patuiki ai a Tavita kua fakakite mai ai, kaeke ke lagomatai e Iehova e patuiki, to nakai fai patuiki he lalolagi ke kautu ki a ia.

Ne pehe mai a Iehova ko e Tega he maveheaga ko e taha mai he tau huli a Tavita.—1 Nofoaga he Tau Patuiki 17:7, 11, 14.

Ko Solomona, ko e tama a Tavita, ne pule ai he mole atu a ia. Ko ia foki ko e patuiki iloilo, ti monuina e motu ko Isaraela he vaha ne pule ai a ia.

Ne talaga foki e Solomona e faituga ne mua ue atu i Ierusalema ma Iehova. Ti ko e tuaga he motu ko Isaraela he vaha ne pule ai a Solomona kua fakakite mai ki a tautolu falu e tau fakamonuinaaga ka ta mai he Kautu he Atua ma e tau tagata.—1 Tau Patuiki 4:24, 25.

Ka e pete ni he pihia, ko e tokologa he tau patuiki he mole atu a Solomona ne nakai tua fakamooli.

Ka kuapule agaiae tau huli netutupu mai ia Tavitaki Ierusalema, ne fakaaogae Iehova haana a perofeta ko Isaia ke fakailoa mai e Tama a Tavita ka hoko mai, ko ia haia ka pule ke he lalolagi katoa mo e tua fakamooli. Ko ia nei ko e Tega he maveheaga.—Isaia 9:6, 7.

Ne fakailoa mai tuai he perofeta ko Isaia Haana a pule ko e pule kua mua ue atu e lilifu ke he pule a Solomona.—Isaia veveheaga 11 ke he 65.

Ko e mogonei, kua mua atu ni nakai pihia tali mai, ne manamanatu ai e tau fekafekau he Atua po ko hai la e Tega nei.

Fakamua to hoko mai e Tega, pete ni he kelea lahi e tau mahani he tau patuiki a Isaraela, ka ko e tau 607 V.N.K. (Vaha Nakai Fai Keriso) ne fakaatā e Iehova e motu ko Papelonia, ke moumou mo e uta kehe e motu, ti ko e tokologa he tau tagata ne fakapaea atu ai ki Papelonia. Ka e nakai maeke he Atua ke nimo haana maveheaga. Ko e Tega to tupu mai agaia ni he matohiaga a Tavita.—Esekielu 21:25-27.

Ko e mena ne tupu ki Isaraela kua fakakite mai ai, pete ni kua ha ha i ai he patuiki he lalolagi e iloilo mo e tua fakamooli mo e maeke ke ta mai e tau monuina, ka to fakakaupa ni e tau monuina nei. Ne mamate e tau tagata tua fakamooli ka ko e ha lautolu a tau hukui kua nakai tua fakamooli. Ko e heigoa e fakatokaaga ke taute aki? Ko e Tega he maveheaga.

Ko e magaaho fakamui, he mole atu ai e afe he tau tau, ne hoko mai ai e Tega nei. Ko hai a ia?

Ne moua mai e tali he agelu he Atua ke he tama fifine tote i Isaraela ne higoa ko Maria. Ne tala age e agelu ki a ia to ha ha ia ia e tama taane to ui foki haana a higoa ko Iesu. Hanai e tau kupu ne vagahau he agelu:

“To homo a ia, to talahaua a ia ko e Tama hana ne Mua ue atu; to foaki atu he Iki ko e Atua kia ia e nofoaiki a Tavita hana matua; To eke a ia mo Patuiki.”—Luka 1:32, 33.

Ti ko Iesu ko ia haia ko e Tega he maveheaga ti ko e Patuiki foki a ia he Kautu he Atua. Ka ko e ha ne kehe ai a Iesu mai he tau tagata tua fakamooli ne nonofo he vaha fakamua?

Ha ko e mana ne fanau mai ai a Iesu. Ko e haana a matua fifine ko e tama fifine tote, ti nakai fai matua tane a ia he tino. Ka e nofo fakamua a Iesu he lagi, ko e agaga tapu he Atua, po ke malōlo fakaagaga, ne hiki mai e moui a Iesu mai he lagi mo e tuku ai ke ke manava ha Maria. Ko e mena haia, ne nakai putoia fakalataha ai a ia he agahala ha Atamu. Ti ko e haana a moui katoa, ne nakai agahala a Iesu.—1 Peteru 2:22.

Ko e magaaho ne hoko atu haana a moui ke he 30 e tau tau, ne papatiso ai a Iesu.

Ne talahau mai e ia ke he tau tagata e Kautu he Atua, ka mole ia ti talahau mai e ia ko ia haia ka Patuiki he Kautu na.—Mataio 4:23; 21:4-11.

Ne loga foki e tau mana ne taute ai e ia.

Nefakamalōlo e ia e tau tagata gagao.—Mataio 9:35.

Ko e mana foki ne fagai ai e ia e tau tagata tokologa ne hoge.—Mataio 14:14-22.

Ne fakatutu mai foki e ia a lautolu ne mamate.—Ioane 11:38-44.

Ko e tau mana nei ke fakakite mai aki e tau mena ka taute e Iesu ma e tau tagata ha ko e Patuiki a ia he Kautu he Atua.

Manatu nakai e koe ko e puhala fe ne taute he Patuiki ko Tavita ati eke ai a Ierusalema mo maaga lahi he haana a kautu? Ne fakamaama mai e Iesu ko e Kautu he Atua to nakai mai he lalolagi nei, ka e mai he lagi. (Ioane 18:36) Ko e kakano haia ati fakahigoa ai e Kautu ko “Ierusalema ha he lagi.”—Heperu 12:22, 28.

Ne fakatokatoka e Iesu e fakakaupaaga he fakatufono, ti ko lautolu oti kua fifili ke eke mo tau tagata he Kautu kua lata ni ke omaoma. Ti ko e tau fakatufono nei he magaaho nei ha ha he Tohi Tapu. Ka ko e tau fakatufono ne mua ue atu, kua lata ni he tau tagata ke fakaalofa ke he Atua mo e fefakaalofaaki ko e taha ki a taha.—Mataio 22:37-39.

Ne fakailoa mai foki e Iesu, nakai ko ia ni tokotaha ka pule ke he Kautu. To ha ha i ai a lautolu e tau tagata ka fifili ke pule falataha mo ia ke he lagi. (Luka 12:32; Ioane 14:3) Ti ko e toko fiha la he fakalata? Kua tali mai he tohi Fakakiteaga 14:1: 144,000.

Kaeke ke 144,000 ni e tagata ka o hake ke he lagi ke pule fakalataha mo Iesu, ti ko e heigoa hane fai he laulahi he tau tagata ne toe ka amaamanaki ki ai?

Ne pehe mai e Tohi Tapu: “To eke ni e motu ma e tau tagata tututonu, to nonofo muatua ai a lautolu.”—Salamo 37:29.

Ti ko lautolu ka nonofo tukulagi he lalolagi nei, kua fakahigoa ai ko e “tau mamoe kehe.”—Ioane 10:16.

Ti ko e ua la e amaamanakiaga. Ko e toko 144,000 ne uiina ai he Atua ko Iehova ke o ke he lagi ke pule fakalataha mo Iesu. Ka ko e falu he tau miliona ne toe kua ha ha i ai e amaamanakiaga mooli ke nonofo tukulagi he lalolagi ke eke mo tau tagata he haana a Kautu.—Fakakiteaga 5:10.

Ne vihiatia lahi e Satani a Iesu mo e totoko atu ki a ia. Mole atu e tolu mo e hafa e tau tau he taute ai e Iesu e gahua fakamatala, ne tapaki ai e Satani a ia mo e kelipopo ai, ko e fakamau fao ke he akau fakatautau. Ko e ha ne fakaatā ai he Atua e mena nai.

Manatu, ha ko e tau fanau ne tutupu mai ia Atamu, ko e tau tagata hala oti kana a tautolu mo e kua lata ni ke mamate.—Roma 6:23.

Manatu foki, ha ko e mana e puhala ne fanau mai ai a Iesu, ne mitaki katoatoa a ia ti nakai lata a ia ke mate. Ka e pete ni he pihia, ka kua fakaatā ni he Atua a Satani ke ‘tatuki e muihui a Iesu,’ ke kelipopo a ia. Ka e liu foki fakatu mai he Atua a ia ko e agaga ke moui tukulagi. Ha kua ha ha i ai agaia ia ia e tonuhia ke he moui mitaki katoatoa he tagata, ko e palepale haia he magaaho nei ne fakaaoga e ia ke fakafua mai aki a tautolu ko e tau tagata mai he hala.—Kenese 3:15; Roma 5:12, 21; Mataio 20:28.

Ke lagomatai aki a tautolu ke moua e maamaaga katoa ko e heigoa e kakano he matulei ha Iesu, kua talahau mai he Tohi Tapu e mena ia, ko e kakano ni, ko e tau fakatokaaga fakaperofeta.

Ke fakamaama aki, manatu nakai e koe ko e tala age fefe a Iehova ki a Aperahamo ke foaki haana a tama taane mo poa, ko e kamatamata ke he haana a fakaalofa?

Ko e mena nei ko e fakatokaaga fakaperofeta ni ke he matulei a Iesu. Ne fakakite mai ai ko e fakaalofa a Iehova ke he tau tagata kua lahi ue atu ni, ha kua fakaatā e ia haana a Tama ko Iesu ke mate ma tautolu ke maeke ke moua ai e tautolu e moui.—Ioane 3:16.

Manatu nakai e koe e puhala ne fakahao mai aki e Iehova e fanau Isaraela mai he motu ko Aikupito mo e fakamomoui ai ha lautolu a tau tama taane uluaki ke fakafano leva e agelu he mate ia lautolu?—Esoto 12:12, 13.

Ko e mena nei ko e fakatokaaga fakaperofeta.

Tuga ni e toto he punua mamoe, ko e kakano ko e fakamouiaga ma e tau tama taane uluaki he fanau Isaraela, ko e fakamaligiaga foki he toto a Iesu ko e kakano ko e fakamouiaga ma lautolu ne tua ki a ia. Ti ko e tau mena oti ne tutupu he po ia, ko e kakano ko e fakaatāaga ma e fanau Isaraela, ti ko e matulei ha Iesu kua maeke ka fakaatā mai ai e tagata mai he hala mo e mate.

Ko e kakano haia ati fakahigoa ai a Iesu “ko e Punua mamoe he Atua, ko ia ke uta kehe e hala he lalolagi.”—Ioane 1:29.

Ko e mena ia, he magaaho ne nofo ai a Iesu he lalolagi ne fakapotopoto e ia e tau tutaki mo e fakaako a lautolu ke fakamatala e vagahau mitaki he Kautu, ti pihia foki ni he mole atu haana a mate.—Mataio 10:5; Luka 10:1.

Ti ko lautolu hanei ko e tau fua uluaki ne fifili he Atua ke pule fakalataha mo Iesu he haana a Kautu.—Luka 12:32.

Manatu nakai e koe e maveheaga he Atua ke he tau tagata Iutaia, kaeke ke omaoma a lautolu ke he haana a tau Fakatufono, to eke a lautolu mo “kautu he tau ekepoa”? Ko e mena haia ati fai kotofaaga ai a lautolu ke eke mo taha vala he Kautu he Atua mo e eke foki mo tau ekepoa i luga he lagi kaeke ke talia e lautolu a Iesu. Ka kua tokologa a lautolu ne fakatikai a Iesu.

Ti tali mai he magaaho ia ke hau fakahaga, kua nakai ko e motu fifili he Atua a Iutaia; ko Palesitaina foki kua nakai tumau ko e Motu he Maveheaga.—Mataio 21:43; 23:37, 38.

Ke kamata mai he vaha ia Iesu ke hoko mai ke he vaha nei ha tautolu, ne fakapotopoto ai e Iehova a lautolu nei ka pule fakalataha mo Iesu ke he lagi. Toko gahoa foki ni e afe ha lautolu ne momoui agaia he lalolagi he vaha nei. Kua fakahigoa e tautolu a lautolu ko e tau tagata tapu kua fakauku.—Fakakiteaga 12:17.

Ko e magaaho nei, kua kamata tuai ia koe ke kitia ko e heigoa e Kautu he Atua. Ko e fakatufono haia he lagi, ko e haana Patuiki foki ko Iesu Keriso haia, ti fakalataha ai foki mo ia e 144,000 tagata mai he lalolagi. To pule mai ai ke he tau tagata tua fakamooli he lalolagi mo e to ha ha i ai e malōlo ke ta mai e mafola ke he lalolagi.

Mole atu e mate haana, ne liu tu mai a Iesu mo e haele hake ke he lagi. Ha ha i ai ke he mena ia, ne tatali atu a ia ke he Atua ke talahau ko e magaaho fe ka kamata ai haana a pule ke eke mo Patuiki he Kautu he Atua. (Salamo 110:1) Ko e magaaho fe la a ia?

Ko e falu a magaaho ne fakakite mai e Iehova ke he tau tagata e tau miti ke maeke ke talahau ki a lautolu e tau mena he haana a Kautu.

Ko e vaha ia Tanielu, ne fakakite e Iehova e miti pihia ki a Nepukanesa ko e patuiki a Papelonia. Ko e fakatai ke he akau lahi mahaki.—Tanielu 4:10-37.

Ne hio ki lalo e akau ia ka ko e tagutugutu ne mau ai ke he pipi lapatoa ke he fitu e tau tau.

Kua fakatai e akau ki a Nepukanesa. Ke tuga ni e tagutugutu ne pipi ai ke he fitu e tau tau, ne uta kehe pihia mai ia Nepukanesa haana a manamanatuaga ke he fitu e tau tau. Ka mole ia ti liuaki mai ai ki a ia haana a manamanatuaga.

Ko e tau mena oti nei ko e fakatokaaga fakaperofeta ni. Ne fakatino mai e Nepukanesa e pule a Iehova ke he lalolagi oti. Fakamua, kua fakagahuahua e mena nei ke he tau fanau ne tutupu mai he Patuiki ko Tavita i Ierusalema. Ti ko e magaaho ne moumou ai e Papelonia a Ierusalema he tau 607 V.N.K., ti mamutu ai agataha e fakapapahi maiaga he tau patuiki. Ti nakai tuai liu fai patuiki foki ke nofo he nofoaiki a Tavita “ato haele mai a ia, ha ha i ai e tututonu.” (Esekielu 21:27) Ko Iesu Keriso ni haia.

Fiha e leva a ia mai he 607 V.N.K. ato hoko ke he magaaho ne kamata ai a Iesu ke pule? Ko e fitu e tau tau ia he perofetaaga. Ti katoa ai, 2,520 he tau tau. (Fakakiteaga 12:6, 14) Ti ko e 2,520 e tau tau ia mai he 607 V.N.K. ke moua ai e tautolu e 1914 V.N. (Vaha Nei)

Ti kamata pule ai a Iesu i luga he lagi he tau 1914. Ko e heigoa e kakano he mena ia?

Kua talahau mai he Tohi Tapu ki a tautolu mai he fakakiteaga ne kitia he aposetolo ko Ioane.

Ne kitia e ia e fifine he lagi kua fanau mai e tama tane.—Fakakiteaga 12:1-12.

Ko e fifine kua fakatino mai ai e fakapotopotoaga he Atua i luga he lagi, ko lautolu haia ko e tau agelu ko e tau fekafekau he Atua he lagi. Ti ko e tama tane kua fakatino mai ai e Kautu he Atua. Ne “fanau” mai e mena nei he tau 1914.

Ko e heigoa foki he mogoia ka tupu? Ko e mena fakamua ka taute e Iesu ka Patuiki, ko e liti hifo a Satani, mo lautolu e tau agelu ne totoko fakalataha mo ia, mai he lagi ke he lalolagi nei.—Fakakiteaga 12:9.

Kua talahau mai he Tohi Tapu ki a tautolu e fua: “Ko e mena ia kia fiafia ai a koe ko e lagi, mo mutolu kua nonofo ai. Oi fakaalofa kia mutolu kua nonofo ke he fonua mo e tahi, ha kua hifo kia mutolu e tiapolo kua ita lahi, ha kua iloa e ia kua tote hana vaha.”—Fakakiteaga 12:12.

Ti ko e magaaho ne kamata ai a Iesu ke pule i luga he lagi, ti kamata ai foki haana a tau fi ke malōlo lahi he lalolagi. Ka e tuga a ia ne talahau mai fita he Tohi Tapu, to kamata ai haana a pule he vahaloto he haana a tau fi.—Salamo 110:1, 2.

Ko e heigoa e kakano he mena nei ke he tau tagata?

Ne tala mai e Iesu ki a tautolu: ko e tau latau, tau hoge, tau tatalu, mo e tau mafuike.—Mataio 24:7, 8; Luka 21:10, 11.

Kua kitia mata tuai e tautolu e tau mena nei kua tutupu tali mai he tau 1914, ti ko e taha kakano haia ati iloa ai e tautolu ko e kamata e Kautu ke pule, mai he magaaho ia.

To ha ha i ai foki e “matematekelea he tau motu he fakahakuhaku . . . to mamate foki e tau tagata he matakutaku.” (Luka 21:25, 26) Kua kitia foki e tautolu e tau mena nei tali mai he tau 1914.

Ne lafi atu foki he aposetolo ko Paulo pehe, ko e tau tagata to “ofaofa e lautolu a lautolu ni, to velevele koloa, . . . to liuliu ke he tau matua, . . . to nakai fia loto mafola, to tauamuamu, to nakai taofi e tau manako he tino.”—2 Timoteo 3:1-5.

Ko e magaaho nei kua iloa tuai e koe ko e ha ne uka lahi ai e moui he vaha nei. Ko e kakano kua malōlo lahi a Satani. Ka kua malōlo foki e Kautu he Atua.

Ko e tau magaaho ku ia ni he mole atu e tau 1914, ne kamata ai a lautolu e tau tagata tapu ne amaamanaki ke pule fakalataha mo Iesu he lagi ke fakamatala atu e tala mitaki, kua fakatoka tuai e Kautu. Ti ko e gahua nei he magaaho nei kua holofa tuai ke he lalolagi oti, tuga ni he talahau mai e Iesu.—Mataio 24:14.

Ko e heigoa e kakano he gahua fakamatala nei?

Ko e mena fakamua, ke talahau atu ke he tau tagata e Kautu he Atua.

Ko e mena ke ua aki, ke lagomatai aki e tau tagata ke maeke ia lautolu ke fifili po ke ne manako nakai a lautolu ke eke mo tau tagata he Kautu.

Ne pehe mai a Iesu, ko e vaha nei ha tautolu to vevehe ua ai e tau tagata oti, ko e taha vahega ko e tau mamoe, ko e taha vahega ko e tau koti.—Mataio 25:31-46.

Ko e tau “mamoe” ko lautolu haia ne fakaalofa ki a ia mo e ko e haana a tau matakainaga. Ka ko e tau “koti” ko lautolu haia ne nakai fakaalofa.

Ko e tau “mamoe” to moua e lautolu e moui tukulagi ka ko e tau “koti” to nakai moua ai e lautolu.

Ko e gahua vehevehe nei hane fa e fakakatoatoa ai he gahua fakamatala he tala mitaki ke he Kautu.

Ko e perofetaaga hanei he perofeta ko Isaia.

“To hoko ni ke he tau aho a mui, to fakamau ai e mouga ha i ai e fale a Iehova ke he tapunu mouga he atu mouga, to fakatokoluga ai foki ki luga he tau matiketike, ti tafe atu ki ai e tau motu oti kana.”—Isaia 2:2.

Ko e lalolagi tagata he vaha nei kua hagaao atu ke he “tau aho a mui.”

Ko e “fale” a Iehova to “fakatokoluga” ai ki luga he tau lotu pikopiko.

“To o mai foki e tau motu kehe loga, mo e pehe age a lautolu: ‘O mai a, kia o hake a tautolu ke he mouga a Iehova, ko e fale he Atua a Iakopo; to fakaako mai foki e ia a tautolu ke he hana tau puhala, ti o ai a tautolu ke he hana tau puhala.’”—Isaia 2:3.

To tokologa mai he tau motu oti ke o mai ke tapuaki ki a Iehova mo e uiina atu ke he falu ke o fakalataha mo lautolu. Ti fakaako ai a lautolu ke gahua ke he

puhala ne finagalo a Iehova ki ai.

“Ti tukituki e lautolu ha lautolu a tau pelu ke eke mo tau koho ko e ha lautolu e tau tao foki ke eke mo tau titipi; . . . to nakai nikiti atu he taha motu e pelu ke he taha motu, to nakai liu ako tau foki a lautolu.”—Isaia 2:4.

Ko lautolu ne tapuaki ki a Iehova ko e tau tagata kau fakalataha mo e nonofo mafola.

Ko e fua he gahua nei he Kautu he Atua kua teitei tuai he magaaho nei ke tolu e miliona tagata he lalolagi katoa, ko lautolu ko e tau tagata he Kautu.

Ne fakapotopoto takai a lautolu he tau tagata tapu kua fifili, ko lautolu ne toe mai ia lautolu ne moua e amaamanakiaga ke pule fakalataha mo Iesu ke he lagi.

Kua moua mai e lautolu e tau mena kai fakaagaga mai he fakapotopotoaga he Atua.—Mataio 24:45-47.

Ko lautolu ko e tau matakainaga Kerisiano mai he lalolagi katoa ne nofo ai e fakaalofa fakamooli ko e taha ke he taha.—Ioane 13:35.

Kua moua e lautolu e fiafia mo e mafola he tau loto, ko e amaamanakiaga ma e vaha i mua.—Filipi 4:7.

Nakai leva e tau magaaho ne toe ti fakakatoatoa ai e tala mitaki he fakamatala. Ti katoa foki e tau “mamoe” he fakapotopoto. Ti ko e heigoa he mogoia he Kautu ka taute?

Manatu nakai e koe na kautu e Patuiki fakamooli ko Tavita ke he tau fi oti he tau tagata he Atua? Kua fakamooli ai foki, to taute pihia ni he Patuiki ko Iesu.

Ne miti ai he Patuiki ko Nepukanesa e taha miti ke he tupua lahi ne fakatai aki e lalolagi katoa ke kamata mai he haana a vaha ke hoko mai ke he vaha nei.

Ne kitia foki e ia e maka ne talai mai he mouga, ti lipilipi fakaikiiki aki e tupua na. Ne fakatai ai e maka nei ke he Kautu he Atua.

Ka e kakano he mena nei ko e moumouaga he fakatokaaga matahavala nei.—Tanielu 2:44.

Hanei e falu he tau mena ka fuluhi kehe ai he Kautu.

To galo kehe ai e lotu pikopiko, tuga e makaholo ka liti hifo ke he tahi.—Fakakiteaga 18:21.

Ko e kakano haia ati fakamafana mai ai ke he tau tagata oti ne fakaalofa ke he Atua ke o kehe mo e lotu pikopiko he MAGAAHO NEI NI.—Fakakiteaga 18:4.

Ka mole ia, ko e Patuiki ko Iesu ka “ta e ia e tau motu . . . to pule foki a ia kia lautolu ke he tokotoko lapatoa.”—Fakakiteaga 19:15.

Ti ko e fakapapahiaga, ma e tau Fakamooli a Iehova, pete ni he totogi ha lautolu a tau tukuhau mo e omaoma ke he tau fakatufono motu, ka kua nakai lata ke fio fakalataha mo e tau gahua fakatufono lalolagi.

Ko e fakahikuaga, ko Satani ko e “talako” lahi, to liti hifo a ia ke he pahua.—Fakakiteaga 20:2, 3.

Ko e tau “mamoe” ni hokoia, ko lautolu ne talia a Iesu ko e Patuiki, ka hao mai he moumouaga lahi.—Mataio 25:31-34, 41, 46.

Ko e fakakiteaga ne kitia ai he aposetolo ko Ioane ke he tau “mamoe” ka hao mai he moumouaga lahi.

“Ti kitia ai e au, kitiala, ko e moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe, kua tutu mai a lautolu ki mua he nofoaiki, ki mua foki he Punua mamoe, kua tapulu a lautolu ke he tau tapulu hina, kua toto foki e tau lau pama ke he tau lima ha lautolu.”—Fakakiteaga 7:9.

Ko e “moto tagata tokologa” kua moua mai ai ia lautolu ne fanogonogo ke he fakamatalaaga he tala mitaki.

Ko lautolu na kua “o mai mai he matematokelea lahi.”—Fakakiteaga 7:14.

Ko e tau “lau pama” kua fakakite ai kua talia e lautolu a Iesu ke eke mo Patuiki ha lautolu.

Ko e tapulu ha lautolu he tau “tapulu hina” kua fakatino mai ai ha lautolu a tua ke he lukutoto a Iesu.

Ko e “Punua mamoe” ko Iesu Keriso.

Ko e heigoa e tau fakamonuinaaga ati fiafia ai a lautolu? Manatu nakai e koe e fiafia a Isaraela he magaaho ne pule ai e Patuiki tua fakamooli ko Solomona? Kua fakite mai he mena nei taha tama vala tote he fakatino he fiafia he lalolagi ka pule ai e Patuiki ko Iesu.

To ha ha i ai e mafola mooli he tau tagata ti pihia foki mo e tau manu, tuga ni ne talahau mai e Isaia.—Salamo 46:9; Isaia 11:6-9.

Tuga ni ne fakamalōlo e Iesu e tau tagata gagao he magaaho ne nofo ai a ia he lalolagi, to uta kehe ni pihia e ia e gagao mai he tau tagata oti kana.—Isaia 33:24.

Tuga ni ne fagai e ia e tau tagata tokologa, to uta kehe ni pihia e ia e hoge mai he tau tagata oti kana.—Salamo 72:16.

Tuga ni he fakamomoui e ia a lautolu ne mamate, to fakamomoui ni pihia e ia a lautolu ne mamate, ne nakai moua katoatoa e magaaho ke fakaako a lautolu ke he Kautu he Atua.—Ioane 5:28, 29.

Ka to liuaki mai e ia e tau tagata ke he mitaki katoatoa ne fakagalo ai e Atamu.

Nakai kia ko e magaaho fiafia e vaha ha ha i mua? Manako nakai a koe ke kitia e mena ia? Kaeke ke manako, kia gahua ā, ke maeke ia koe ke foaki e koe a koe he magaaho nei ke he Kautu he Atua mo e eke ai mo taha he haana a tau “mamoe.”

Kia fakaako e Tohi Tapu mo e kia iloa mitaki e Atua ko Iehova mo Iesu Keriso.—Ioane 17:3.

Kia feoaki mo e falu ko lautolu foki ne fakahigoa ai ko e tau tagata he Kautu.—Heperu 10:25.

Kia fakaako e tau fakatufono he Kautu mo e omaoma ki ai.—Isaia 2:3, 4.

Kia fakatapu e moui haau ke fekafekau ki a Iehova, mo e, kia papatiso.—Mataio 28:19, 20.

Kia tiaki e tau mahani kelea, tuga e kaiha, pikopiko, mahani kelea, mo e konahia, ko e tau mena fakavihiatia ki mua he Atua ko Iehova.—1 Korinito 6:9-11.

Kia kau fakalataha ke he gahua fakamatala he tala mitaki ke he Kautu.—Mataio 24:14.

Ti mai ha ko e lagomataiaga he Atua, to kitia ai e koe e Parataiso ne fakagalo ai e Atamu, ka liuaki mai he haana a tau fanau, to kitia ai foki e koe e maveheaga nei ka fakamooli: “Ne logona foki e au e leo lahi mai he lagi, kua pehe mai, ‘Kitiala, kua fakalataha mo e tau tagata e fale uta fano he Atua, to nofo a ia mo lautolu; to eke a lautolu motu hana, to ha ia lautolu e Atua ni, ko e ha lautolu a Atua haia. To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.’”—Fakakiteaga 21:3, 4.

[Fakafonua he lau 20]

(Ma e puhala katoa ne tohi aki, kikite e tohi)

607 V.N.K. 1914 V.N.

V.N.K. | V.N.

500 1,000 1,500 2,000 2,520

[Tau Fakatino he lau 11]

Aperahamo

Isaako

Iakopo

Iuta

Tavita

[Fakatino he lau 14]

144,000

[Tau Fakatino he lau 16]

Atamu

Iesu