Tau Fakapotopotoaga ne Fakatokatoka ke Fakamatala e Kautu he Atua

He magaaho ne nofo he lalolagi, ne fakamatala e Iesu Keriso e Kautu he Atua, he fano ke he taha maaga mo e ke he taha maaga mo e mai he taha taone ke he taha taone. Ne fakamahani mo e fakafano atu foki e ia hana tau tutaki ke taute e gahua taha ia. Fakamua ato haele hake ke he lagi, ne poaki a ia ke he hana tau tutaki ke taute tutaki e tau tagata he tau motu oti kana. Mai he hana kamataaga, ne fakatokatoka e fakapotopotoaga Kerisiano fakamua ke fakamatala e tala mitaki. Ke he tau mena ne o fano e tau tutaki ki ai, kua moua ai a lautolu he fakamatala e Kautu he Atua.—Mataio 4:17, 23; 10:1-16; 28:19, 20; Luka 4:43, 44; 8:1; 10:1-9; Gahua 1:8; 4:31; 5:42; 8:12; 19:8; 28:23, 30, 31; Roma 10:9, 10, 14.

I loto he perofetaaga a Iesu ke he magaaho fakahikuhiku he fakatokaaga nei, ne talahau e ia: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” Ko e gahua fakamatala nei ko e fakalagoaga kua mua atu ki luga he fakapotopotoaga Kerisiano he vaha nei.—Mataio 24:14; Mareko 13:10.

Ke he lalolagi katoa, ne fakatokatoka e tau fakapotopotoaga he Tau Fakamoli a Iehova ke fakamaluia ha lautolu a tau matakavi tata ke he puhala fakatokatoka mitaki ke he fakamatalaaga he tala mitaki he Kautu he Atua. Ke maeke ai he mena ia ke taute ke he puhala maopoopo, i loto he tau motu takitaha ne kotofa he la ofisa he Kaufakalatahaaga he Kolo Toko e tau fahi fonua ke he tau fakapotopotoaga oti kana ke taute e fakamoliaga ki ai. Ne vehevehe he tau fakapotopotoaga e fahi fonua ne kotofa ki ai ke he tau valavala ikiiki, ti kua kotofa atu mogoia ki a lautolu ka fua e matagahua ia ke tokamata e gahua ahiahi ke he tau tagata i ai.—1 Korinito 14:33, 40.

Ne fa mahani e Tau Fakamoli ke feleveia e tau tagata he o atu ke he taha fale mo e taha fale. Mai he tau feleveiaaga he tau fakapotopotoaga ha lautolu, ne fakamahani e Tau Fakamoli a Iehova ke taute e tau fakatutalaaga kuku ke he fekau he Kautu ke he tau gutuhala, he fakaaoga ha lautolu a tau Tohi Tapu. Ne uta fano he Tau Fakamoli e tau tohi faka-Tohi Tapu ke toka mo e tau tagata he tau loto kaina ne manako ke moua lahi mahaki e lotomatala he Kupu he Atua.

Ke maeke ke tuku atu ke he tau tagata oti i loto he fahi fonua e magaaho ke logona e fekau aoga lahi he Kautu, ne fakamau hifo he Tau Fakamoli e fakamauaga fakamatafeiga he o a lautolu ke he taha fale mo e ke he taha fale, kua fakakite aki e tau kaina ne nakai moua ha tagata i kaina po ke ha ko e tau kakano kehekehe kua nakai maeke ke taute e gahua fakamoli katoatoa ki ai. To ahi atu ai he taha magaaho foki. Ka moua ai ko e fiafia, ne tohi hifo e mena ia, mo e liliu e Tau Fakamoli ke ahi atu ke foaki atu a falu fakailoaaga he Tohiaga Tapu. Kaeke kua manako, to taute tumau e taha kumikumiaga Tohi Tapu. Ne taute oti e tau mena nei ka e nakai fai totogi.

Ne foaki atu foki he Tau Fakamoli a Iehova e tau mekasini ke he tau tagata ne o fano he tau puhala tu. Ke he puhala nei kua maeke a lautolu ke feleveia mo e tau tagata loga ne kua liga nakai maeke a lautolu ke moua he tau loto kaina. Kua taute ai e tau laliaga moli ke hohoko ke he tau tagata oti ka fakakite kua fiafia ke fanogonogo.—Gahua 17:17; Fakakiteaga 14:6, 7; 22:17.

Ti ko e ha ne fa ahiahi tumau ai e Tau Fakamoli ka e loga e tau tagata ne fakakite e nakai fiafia ke fanogonogo? Ha kua fa mahani ke moua mau ko e fa hikihikifano e tau tutuaga he tau tagata takitokotaha mo e mitaki a lautolu he taha magaaho ka liu ahi, po kua to feleveia mo e falu tagata foki he loto kaina ka fakakite ko e fiafia a lautolu ke fanogonogo.

Ne pehe a Iesu ke he hana tau tutaki: “Ka kia kumikumi fakamua a mutolu ke he kautu he Atua mo e hana tututonu.” Ko e vala aoga lahi e gahua fakamatala he Kautu he Atua ke he kumikumiaga fakamua ha tautolu ke he Kautu, mo e taute he Tau Fakamoli a Iehova e mena nei mo foliaga aoga lahi he tau momoui ha lautolu.—Mataio 6:33; 2 Timoteo 4:2.

• Ko e heigoa e tau gahua a Iesu mo e tau Kerisiano fakamua ne talahau tuai mai ka taute foki he vaha ha tautolu?

• Ne fakatokatoka fefe e gahua fakamatala he Tau Fakamoli a Iehova?

• Ko e ha ne fa ahiahi tumau ai e Tau Fakamoli ke he tau tagata ka e nakai fakakite he tau tagata tokologa e fiafia ke fanogonogo?

[Tau Fakatino he lau 16, 17]

Tau Fakamoli a Iehova ne fakamatala e Kautu he Atua he tau motu kehekehe

Tailani

Mesiko

Netelani

Korea

Kurasao

Kana

Peritania

Ausetalia