Ko e Ha ne Fai Fakatokatokaaga e Atua?

Ko e vala tala nei kua fakalagā e tau hūhū kua liga hūhū e koe mo e fakakite e matakavi ka totou e koe e tau tali he Tohi Tapu haau. To fiafia e Tau Fakamoli a Iehova ke fakatutala e tau tali nei mo koe.

1. Ko e ha ne fakatokatoka he Atua e tau Isaraela?

Ne fakatokatoka he Atua e tau hologa he tupuna ko Aperahamo ke he motu mo e age ki a lautolu e tau matafakatufono. Ne fakahigoa e ia e motu ko Isaraela ti eke a lautolu mo levekiaga he tapuakiaga mooli mo e haana Kupu, ko e Tau Tohiaga Tapu. (Salamo 147:19, 20) Ti ko e tau tagata he tau motu oti kana ne aoga mai i ai.—Totou Kenese 22:18.

Ne fifili he Atua e tau Isaraela ke eke mo tau fakamooli haana. He omaoma a lautolu, ne aoga a lautolu mai he tau matafakatufono he Atua. (Teutaronome 4:6) He fakaako e fakamauaga tala tuai he tau Isaraela, maeke ia tautolu ke iloa mitaki e Atua mooli.—Totou Isaia 43:10, 12.

2. Ko e ha ne fakatokatoka e tau Kerisiano mooli?

Fai magaaho ai, ne galo e Isaraela e fiafia he Atua, ti hukui e Iehova e motu aki e fakapotopotoaga Kerisiano. (Mataio 21:43; 23:37, 38) Fakamua atu, ko e tau fakamooli he Atua e tau Isaraela. Mogonei, kua eke e tau Kerisiano mooli mo tau fakamooli ha Iehova.—Totou Gahua 15:14, 17.

Ne fakatokatoka e Iesu e tau tutaki haana ke fakamatala hagaao ki a Iehova mo e taute tutaki ke he tau motu oti kana. (Mataio 10:7, 11; 24:14; 28:19, 20) Kua hokotia e gahua nei ke he tapunu. He magaaho fakamua laia, ne fakalataha e Iehova e tau miliona tagata mai he tau motu oti kana ke he tapuakiaga mooli. (Fakakiteaga 7:9, 10) Kua fakatokatoka foki e tau Kerisiano mooli ke maeke ke atihake a lautolu mo e ke felagomataiaki. He lalolagi katoa, ne olioli e lautolu e fakaholoaga taha he fakaakoaga Tohi Tapu he tau feleveiaaga ha lautolu.—Totou Heperu 10:24, 25.

3. He vahā nei, kamata fēfē e Tau Fakamoli a Iehova?

Ko e fakatokatokaaga he vahā foou nei he Tau Fakamoli a Iehova ne kamata he atu tau 1870. Ko e matakau tote he tau tagata fakaako he Tohi Tapu ne kamata ke liu moua e tau kupu mooli he Tohi Tapu ne kua leva e galo. Iloa e lautolu na fakatokatoka e Iesu e fakapotopotoaga Kerisiano ke fakamatala. Ti fakatū e lautolu e matagahua fakamatala he Kautu ke he lalolagi katoa. He 1931 ne moua e lautolu e higoa Tau Fakamoli a Iehova.—Totou Gahua 1:8; 2:1, 4; 5:42.

4. Fakatokatoka fēfē e Tau Fakamoli a Iehova he vahā nei?

He senetenari fakamua, ko e tau fakapotopotoaga Kerisiano he tau motu loga ne aoga mai he matapatu kau fakatufono kua mailoga ko Iesu e Ulu he fakapotopotoaga. (Gahua 16:4, 5) Pihia foki mogonei, ne mailoga he Tau Fakamoli a Iehova ko Iesu e Takitaki ha lautolu. (Mataio 23:9, 10) Kua aoga foki a lautolu mai he takitakiaga he Kau Fakatufono he tau motua lotomatala ne foaki e fakamalolōaga mo e takitakiaga he Tau Tohiaga Tapu ke lata mo e tau fakapotopotoaga ne molea e 100,000. He tau fakapotopotoaga takitaha, ko e tau tagata taane ne kua latatonu ke eke mo tau motua, po ke tau leveki. Ko e tau tagata taane nei kua leveki fakaalofa e fuifui he Atua.—Totou 1 Peteru 5:2, 3.

Ne fakatokatoka e Tau Fakamoli a Iehova ke fakamatala e tala mitaki mo e taute tutaki. Ke maeke ke lagomatai e tau tagata oti, ne fakaliliu, lomi, mo e tufatufa e lautolu e tau tohi fakaako Tohi Tapu ke he molea e 500 e vagahau. Tuga e tau aposetolo, ne fakamatala a lautolu mai he taha fale ke he taha fale. (Gahua 20:20) Ne foaki e lautolu e fakaakoaga Tohi Tapu fakatagata ki a lautolu ne manako lahi ke he kupu mooli. He hagaaki e tau tagata a Iehova ke fakafiafia e Atua mo e lagomatai e falu, ko e fakatokatokaaga he tau tagata fiafia a lautolu.—Totou Salamo 33:12; Gahua 20:35.

Ma e falu vala tala foki, kikite e veveheaga 19 he tohi nei, Ko e Heigoa ne Fakaako Moli he Tohi Tapu?, ne taute fakailoa he Tau Fakamoli a Iehova.