Ha Ha Kia he Atua e Fakatokatokaaga?

KITIA e maopoopo he tufugatia he Atua ke he tau mena oti. Ma e fakatai, ko e tegatega he isi, ko e fakatokatokaaga ne ofoofogia. Kua liga teitei tatai e numera he tau vala tuga e vakalele Boeing 777. Ka ko e tau valavala oti ne fai gahuahuaaga mo e kua latatonu ke he matakavi ne lima ni e maikoromita (micrometer)a he loa. Nakai tuga e tau vakalele, maeke e tau tegatega he isi ke liliu tutupu. Kua ofoofogia mooli e maopoopo mo e fakatokatokaaga!​—1 Korinito 14:33.

Ko e fakatokatokaaga kua nakai ni kitia ke he tau mena ne tufugatia. Fakakite he Tohi Tapu ko e fakatokaaga fakaagaaga foki kua maopoopo lahi, ne fakatatau mo e finagalo he Tufuga. He fakakiteaga, ko e perofeta ko Tanielu ne kitia e matakau lahi he tau mena momoui fakaagelu ke he lotopā he Atua he lagi: “Ko e afe ni e afe ne fekafekau kia ia, ti hogofulu e afe kua taki hogofulu e afe ne tutu ki mua hana; ne eke ai e fakafiliaga, mo e fofola ai e tau tohi.” (Tanielu 7:9, 10) Manamanatu ke he fakatokatokaaga kua fakatū ai ke lata mo e numera makimaki nei he tau agelu—molea foki e taha e teau miliona—ke talia mo e taute e tau mena ne tala age he Atua ke lata mo e tau fekafekau haana he lalolagi!​—Salamo 91:11.

Pete ko Iehova ko e Tufuga ko e Fakatokatoka Tokoluga Ue Atu, ne nakai pule lahi po ke poaki malolō a ia. Ka ko ia ko e Atua fiafia po ke, monuina ne manamanatu ke he tau momoui he tau tufugatia oti kana haana. (1 Timoteo 1:11; 1 Peteru 5:7) Kua fakamooli e mena nei ke he puhala ne fehagai a ia mo e motu i tuai ha Isaraela mo e tau Kerisiano he senetenari fakamua.

Isaraela i Tuai​—Ko e Motu ne Fakatokatoka Fakamitaki

Ne fakaaoga e Iehova ko e Atua a Mose ke fakatokatoka e tau Isaraela ma e tapuakiaga mooli. Manamanatu la ke he tau fakaholoaga heaga api he fenoga ha lautolu he tutakale i Sinai. To miha mooli e tau magafaoa takitaha ane mai fakaatā ke fakatū e tau fale ie ha lautolu he tau mena ne manako a lautolu ki ai. Ne tuku age e Iehova e tau fakatonuaga pauaki ke he motu ke maeke e tau magafaoa takitaha ke fakatū ai e tau heaga api. (Numera 2:1-34) Ko e Fakatufono faka-Mose kua ha ha i ai foki e tau poakiaga fakameā mo e levekiaga malolō tino—ma e fakatai, hagaao ke he tanu he tau fakavao ha lautolu.​—Teutaronome 23:12, 13.

He huhū atu e tau Isaraela ke he Motu he Maveheaga, ko lautolu ko e motu kua fakatokatoka fakamitaki ke he loga e tau puhala. Kua vevehe e motu ke he 12 e magafaoa, igatia ai mo e vala kelekele. Ko e Fakatufono ne age e Iehova ke he motu he puhala ia Mose kua lauia e tau faahi oti he tau momoui he tau tagata​—tapuakiaga, fakamauaga, magafaoa, fakaakoaga, gahua, puhala kai, gahua fonua, levekiaga he tau manu, mo e falu foki.b Pete kua fakamahino mo e fakamaama falu matafakatufono, ko e tau fakakiteaga oti he levekiaga a Iehova ke he tau tagata haana mo e kua lafi ai ke he fiafia ha lautolu. He fakatatau ai ke he tau fakaholoaga fakaalofa nei, kua moua he tau Isaraela e taliaaga pauaki a Iehova.​—Salamo 147:19, 20.

Na mooli ko Mose ko e takitaki iloilo, ko e kautū po ke kaumahala ne falanaki ke he mahani fakamooli haana ke he fakatokatokaaga he Atua, ka e nakai ko e tau lotomatala haana he takitaki. Ma e fakatai, fifili fēfē e Mose e hala ke o ai he tutakale? Ne taute e Iehova e takitakiaga he puhala he aolagi fakatupou he aho mo e afi fakatupou he pō. (Esoto 13:21, 22) Pete he fakaaoga he Atua e tau tagata, na fakatokatoka mo e takitaki e Iehova e tau tagata haana. Ko e mena taha ia ni ne tupu he senetenari fakamua.

Ko e Tau Kerisiano Fakamua ne Fakatokatoka Fakamitaki

Ko e fua he fakamatala fakamakutu he tau aposetolo mo e tau tutaki, ne fakatū e tau fakapotopotoaga Kerisiano he tau faahi loga i Asia mo Europa he senetenari fakamua. Pete he vehevehe fano e tau fakapotopotoaga nei, ne nakai vevehe kehe po ke tutokotaha e tau matakau nei. Ka kua fakatokatoka fakamitaki ai, ti aoga ai mai he levekiaga he tau aposetolo. Ma e fakatai, ne kotofa he aposetolo ko Paulo a Tito ke finatu ki Kereta “ke fakatokatoka e tau mena oti i ai.” (Tito 1:5, The Jerusalem Bible) Ne tohi e Paulo ke he fakapotopotoaga Korinito kua “fakatu” falu matakainaga taane, po ke eke a “lautolu mo tau tagata fakatokatoka.” (1 Korinito 12:28) Ka ko hai ne fakalago ki ai e tau fakatokatokaaga pihia? Ne pehē a Paulo na “fakalataha” po ke “fakatokatoka” he Atua e fakapotopotoaga.​—1 Korinito 12:24; The Riverside New Testament.

Ko e tau leveki ne kotofa ke he fakapotopotoaga Kerisiano ne nakai ko e tau iki ke he tau matakainaga fakahele. Ka ko lautolu ko e “tau lagomatai” ne muitua ke he takitakiaga he agaaga he Atua, ti kua amanaki ki a lautolu ke eke mo “fakafifitaki ke he fuifui mamoe.” (2 Korinito 1:24; 1 Peteru 5:2, 3) Ko Iesu Keriso ne fakaliu tu mai, nakai ko e ha tagata noa ni po ke matakau he tau tagata taane nakai mitaki katoatoa, ne eke mo “ulu he ekalesia.”​—Efeso 5:23.

He kamata e fakapotopotoaga i Korinito ke taute e tau mena he puhala kehe lahi mahaki mai he tauteaga he falu fakapotopotoaga, ne tohi e Paulo: “Ne fina atu kia e kupu he Atua mai ia mutolu? po ko mutolu hoko mutolu kia ne hohoko e kupu he Atua ki ai?” (1 Korinito 14:36) Ne fakaaoga e Paulo e hūhū fakalagalaga nei ke fakahako aki e tau manamanatuaga ha lautolu mo e ke lagomatai a lautolu ke maama kua nakai lata a lautolu ke taute mena tokotaha. Ne tupu mo e fua mitaki e tau fakapotopotoaga he muitua e lautolu e takitakiaga he tau aposetolo.​—Gahua 16:4, 5.

Ko e Fakakiteaga he Fakaalofa he Atua

Ka e kua he vahā nei? Falu ne liga tehatehaua ke fakalataha ke he fakatokatokaaga fakalotu. Ka e fakakite he fakamooliaga he Tohi Tapu kua fakaaoga tumau he Atua e fakapotopotoaga haana he fakahoko e ia e finagalo haana. Fakatokatoka e ia e tau tagata tapuaki haana i Isaraela i tuai, ti fakatokatoka e ia e tau Kerisiano fakamua atu ke he tapuakiaga ha lautolu.

Nakai kia tonu mogoia, ke fakahiku aki kua takitaki agaia e Iehova ko e Atua e tau tagata haana tuga ni he vahā i tuai? E, he fakatokatoka mo e fakapotopoto auloa e tau tagata tapuaki haana ko e fakakiteaga he levekiaga fakaalofa haana ma lautolu. He vahā nei, kua fakaaoga e Iehova e fakatokatokaaga haana ke fakakatoatoa e finagalo haana ke he tau tagata. Maeke fēfē ke mailoga e fakatokatokaaga haana? Manamanatu ke he tau mena nā.

▪ Fakatokatoka e tau Kerisiano mooli ke taute e gahua. (Mataio 24:14; 1 Timoteo 2:3, 4) Ne poaki a Iesu ke he tau tutaki haana ke fakamatala e Kautu mo e tala mitaki ke he tau motu oti, ko e gahua kua nakai maeke ka nakai fai fakatokatokaaga he lalolagi katoa. Ke fakatai, mukamuka ia koe ke fagai e tagata tokotaha, ka e ke fagai e koe e tokoafe, po ke toko miliona, to lata a koe ke fai matakau fakatokatoka fakamitaki he tau tagata ne kaufakalataha e tau laliaga. He fakamooli e poakiaga ha lautolu, kua “loto fakalataha” e tau Kerisiano mooli ke he fekafekauaga. (Sefanaia 3:9) Gahuahua nakai e tau motu kehekehe, vagahau kehekehe, lanu kehekehe ka nakai fai fakatokatokaaga kaufakalataha ne lagotatai? Maaliali e tali.

▪ Fakatokatoka e tau Kerisiano mooli ke lalago mo e fakamafana e falu. Maeke he tagata toli mouga tokotaha ke fifili e matakavi ne manako a ia ke toli, ti nakai lata a ia ke leveki e tau tagata toli mouga ne tote e iloaaga. Ka e, kaeke ke pakia po ke lauia a ia he tau mena uka, to hagahaga kelea lahi a ia, ha kua nakai fai tagata ke lagomatai a ia. Ko e vevehe kehe e tagata kua nakai pulotu mooli. (Tau Fakatai 18:1) Ke maeke he tau Kerisiano ke taute e poakiaga a Iesu, kua lata ia lautolu ke lagomatai mo e lalago e falu. (Mataio 28:19, 20) Kua foaki fakalahi he fakapotopotoaga Kerisiano e fakaakoaga, fakamahaniaga, mo e fakamafanaaga faka-Tohi Tapu ma e tau tagata oti ke fakatumau mo e nakai kaumahala. To fano ki fe e tagata ke fakaako ke he tau puhala a Iehova ka nakai fai feleveiaaga Kerisiano ne fakatokatoka ma e fakaakoaga mo e tapuakiaga?​—Heperu 10:24, 25.

▪ Fakatokatoka e tau Kerisiano mooli ke fekafekau fakalataha ke he Atua. Ko e tau mamoe a Iesu kua fanogonogo foki ke he leo haana, kua eke a lautolu mo “taha ai e fuifui mamoe” i lalo he takitakiaga haana. (Ioane 10:16) Kua nakai vehevehe fano a lautolu ke he tau lotu takitaha mo e tau matakau; po ke mavehevehe a lautolu ke he tau fakaakoaga. Ka ko lautolu kua “taha ha [la]utolu a tau kupu oti kana.” (1 Korinito 1:10) Ke nonofo fakalataha, kua lata ia tautolu ke maopoopo, ti lata e maopoopo mo e fakatokatokaaga. Ko e tau matakainaga kaufakalataha hokoia ka moua e monuina he Atua.​—Salamo 133:1, 3.

Ko e fakaalofa mooli ma e Atua mo e manako lahi ke he kupu mooli he Tohi Tapu kua fakapotopoto e toko miliona ke he fakatokatokaaga kua lagotatai ke he tau mena nei mo e falu tuaga he Tohi Tapu. Ha ko e kau he tau tagata kua fakatokatoka mo e kaufakalataha, kua eketaha e Tau Fakamoli a Iehova he lalolagi katoa ke taute e finagalo he Atua. Kua mauokafua a lautolu ke he maveheaga haana: “To nofo au ki loto ia lautolu mo e fai fano ki loto ia lautolu; ke eke foki au mo Atua ha lautolu, ke eke foki a lautolu mo tau tagata haku.” (2 Korinito 6:16) Ko e monuina homo ue atu nei ko e haau foki ka tapuaki a koe ki a Iehova ko e Atua fakalataha mo e fakatokatokaaga haana.

[Tau Matahui Tala]

[Fakatino he lau 23]

Ko e heaga api he tau Isaraela kua fakatokatoka fakamitaki

[Tau Fakatino he lau 24, 25]

Ke taute e gahua fakamatala he lalolagi katoa kua lata ke fai fakatokatokaaga

Gahua he taha gutuhala ke he taha gutuhala

Lagomatai matematekelea

Tau toloaga

Talaga he tau fale tapuaki