Nofo Mau i Loto he Fakatokatokaaga he Atua

“Ko e higoa a Iehova, ko e kolo uka haia; kua hola atu ki ai e tagata tututonu, ti hao ai a ia.”—TAU FAKATAI 18:10.

1. Hagaao ke he liogi a Iesu, ko e heigoa e tuaga uka kua ha ha ai e tau Kerisiano?

NAKAI LEVA to mate a Iesu, ne liogi a ia ke he hana a Matua he lagi ke lata mo e tau tutaki hana. Mo e manamanatuaga fakaalofa, ne pehe a ia: “Kua tuku atu e au hau a kupu kia lautolu; kua fakavihia he lalolagi a lautolu, ha ko e mena nakai ko e tau tagata he lalolagi a lautolu; tuga na au, nakai ko e tagata he lalolagi au. Nakai liogi au kia uta kehe e koe a lautolu he lalolagi, ka kia leveki atu e koe a lautolu mai ia ia ne mahani kelea.” (Ioane 17:14, 15) Ne iloa e Iesu to hagahaga kelea e lalolagi ma e tau Kerisiano. To fakakite ai e vihiatia ki a lautolu he pikopiko ki a lautolu mo e favale ki a lautolu. (Mataio 5:11, 12; 10:16, 17) To eke foki mo punaaga he nakai fakamoli.​—2 Timoteo 4:10; 1 Ioane 2:15, 16.

2. Moua i fe he tau Kerisiano e matakavi he huaga fakaagaga?

² Ko e lalolagi ke vihiatia e tau Kerisiano ne moua mai ia lautolu ne o kehe he Atua mo e ha he pule a Satani. (1 Ioane 5:19) Kua mua atu e lahi he lalolagi nei ke he fakapotopotoaga Kerisiano, ti mua atu e malolo a Satani ke he ha tagata. Ti, ko e vihiatia he lalolagi ko e fakamatakutakuina moli. Moua i fe he tau tutaki a Iesu e huaga fakaagaga? Ko e talahauaga he fufuta he The Watchtower, Tesemo 1, 1922 ne talahau e tali: “Kua nonofo a tautolu mogonei he tau vaha kelea. Ko e felatauaki he fakatokatokaaga a Satani mo e fakatokatokaaga he Atua. Ko e tau lahi mahaki.” He taufetoko nei, ko e fakatokatokaaga he Atua ko e matakavi he huaga fakaagaga. Kua nakai kitia e kupu “fakatokatokaaga” he Tohi Tapu, ti ke he atu tau 1920, “ko e fakatokatokaaga he Atua” ko e talahauaga fou. Ko e heigoa mogoia e fakatokatokaaga nei? Mo e moua fefe e tautolu e puipuiaga i ai?

Fakatokatokaaga a Iehova

3, 4. (a) Hagaao ke he taha tohi fakamaama kupu mo e The Watchtower, ko e heigoa e fakatokatokaaga? (e) Ke he puhala fe kua maeke e feoakiaga he lalolagi katoa he Tau Fakamoli a Iehova ke ui ko e fakatokatokaaga?

³ Ko e fakatokatokaaga ko e “kau fakatokatoka,” talahau he Concise Oxford Dic­tion­ary. Mo e manatu ia, kua maama e tautolu ha ko e fakatokatoka he tau aposetolo e tau Kerisiano he senetenari fakamua ke he tau fakapotopotoaga he matakavi i lalo he levekiaga he tau patu i Ierusalema, ti kua tonu ni ke talahau ke he “tau matakainaga” ia ko e fakatokatokaaga. (1 Peteru 2:17) Ko e Tau Fakamoli a Iehova he vaha nei kua pihia e puhala fakatokatoka. Ko e fakalatahaaga he kau he senetenari fakamua ne fakamalolo he “tau mena fakaalofa ke he tau tagata,” tuga e “tau leoleo katoa mo e tau akoako.” Ko e falu ia lautolu nei kua o he taha fakapotopotoaga ke he taha fakapotopotoaga, ka e ko e falu ko e tau motua he tau fakapotopotoaga he matakavi. (Efeso 4:8, 11, 12; Gahua 20:28) Ko e “tau mena fakaalofa” pihia kua fakamalolo e fakalatahaaga he Tau Fakamoli a Iehova he vaha nei.

⁴ Ne pehe e fufuta he The Watchtower, Novema 1, 1922, hagaao ke he kupu “fakatokatokaaga”: “Ko e fakatokatokaaga ko e feoakiaga he tau tagata ma e kakano he puhala kua pulega ai.” Ne holo atu e Watchtower ke fakamaama ke fakahigoa e Tau Fakamoli a Iehova ko e fakatokatokaaga ne nakai taute a lautolu “ko e vahega lotu ke he puhala ne fakaaoga aki e kupu ia, ka ko e kakano ni ko e Tau Tagata Fakaako he Tohi Tapu [Tau Fakamoli a Iehova] kua amanaki lahi ke fakahoko e finagalo he Atua mo e taute ai tuga he taute he Iki e tau mena oti ke he puhala maopoopo.” (1 Korinito 14:33) Ne fakakite he aposetolo ko Paulo ko e tau Kerisiano he vaha hana kua gahua pihia foki ke he puhala maopoopo. Ne fakatatai e ia e fakalatahaaga Kerisiano fakauku ke he tino tagata, kua ha ha ai e tau lala loga, ti igatia mo e matagahua kotofa ke maeke he tino ke gahuahua fakamitaki. (1 Korinito 12:12-26) Ko e fakataitaiaga mitaki lahi a ia he fakatokatokaaga! Ko e ha ne fakatokatoka e tau Kerisiano? Ke fakahoko e “finagalo he Atua,” ti taute e finagalo a Iehova.

5. Ko e heigoa e fakatokatokaaga kitia he Atua?

⁵ Ne talahau tuai he Tohi Tapu to fakalataha e tau Kerisiano moli he vaha nei, he ta mai auloa ke he taha e ‘fonua’ ko e taha e “motu,” ne kua eke a lautolu mo “fakamaama aki e lalolagi.” (Isaia 66:8; Filipi 2:15) Ko e “motu” fakatokatoka nei kua molea e lima mo e hafa e miliona he mogonei. (Isaia 60:8-10, 22) Pete ia, nakai ko e katoatoaaga a ia he fakatokatokaaga he Atua. Ne putoia foki e tau agelu.

6. Ke he manatu lahi, ko hai kua moua ma e fakatokatokaaga he Atua?

⁶ Loga e tau magaaho he tau agelu kua gahua auloa mo e tau fekafekau tagata he Atua. (Kenese 28:12; Tanielu 10:12-14; 12:1; Heperu 1:13, 14; Fakakiteaga 14:14-16) Latatonu ai, ne pehe e fufuta he The Watchtower, Me 15, 1925: “Ko e tau agelu tapu oti ko e vala he fakatokatokaaga he Atua.” Lafi ai, ne pehe: “Ko e ulu he fakatokatokaaga he Atua, ne moua e tau pule mo e tau tui, [ko e] Iki ko Iesu Keriso.” (Mataio 28:18) Ti, ke he puhala laulahi, ko e fakatokatokaaga he Atua kua moua mai ia lautolu he lagi mo e lalolagi ne kua gahua auloa ke taute e finagalo he Atua. (Kikite e puha.) Ko e fakamonuinaaga homo ue atu ha ia ke putoia he mena nei! Mo e ko e olioli ha ia ke ono atu ke he magaaho ka fakamaopoopo e tau mena momoui oti, he lagi mo e lalolagi, ke fakaheke fakalataha ki a Iehova ko e Atua! (Fakakiteaga 5:13, 14) Ka ko e heigoa mogoia, e puipuiaga kua foaki he fakatokatokaaga he Atua he vaha nei?

Puipui he Fakatokatokaaga he Atua​—Fefe?

7. Puipui fefe he fakatokatokaaga he Atua a tautolu?

⁷ Kua maeke he fakatokatokaaga he Atua ke leveki mai a tautolu ia Satani mo e hana tau lagatau. (Efeso 6:11) Kua fakapehia, favale, mo e kamatamata e Satani e tau tagata fakaheke a Iehova mo e taha ni e foliaga: ke ta mai kehe a lautolu he ‘puhala ke o ai a lautolu.’ (Isaia 48:17; fakatatai Mataio 4:1-11.) Kua nakai maeke ia tautolu ke fehola katoatoa mai he tau fakaoho mai ia he fakatokaaga he tau mena nei. Pete ia, ko e fakafetuiaga tata ha tautolu mo e Atua mo e hana fakatokatokaaga kua fakamalolo mo e puipui a tautolu mo e lagomatai a tautolu ke tumau ke he “puhala.” Ti ko e fua, kua nakai galo e tautolu e amaamanakiaga ha tautolu.

8. Lagomatai fefe he fakatokatokaaga nakai kitia a Iehova hana tau fekafekau he lalolagi?

⁸ Foaki fefe he fakatokatokaaga he Atua e puipuiaga nei? Fakamua, ha ha ia tautolu e lagomataiaga nakai kaumahala he tau fekafekau agaga a Iehova. He magaaho ne pehia lahi a Iesu, ne vagahau atu e agelu ki a ia. (Luka 22:43) He matakutaku ke he mate, ne fakahao fakamana he agelu a Peteru. (Gahua 12:6-11) He nakai fai mana pihia e vaha nei, kua mavehe mai ke he tau tagata a Iehova e lagomataiaga fakaagelu ma e gahua fakamatala ha lautolu. (Fakakiteaga 14:6, 7) Kua fa moua e lautolu e malolo nakai fai kaupaaga he magaaho ka fehagai mo e tau tuaga uka. (2 Korinito 4:7) Mua atu ai, kua maimaina a lautolu “kua fakatu e fale api a Iehova ke pa takai a lautolu kua matakutaku kia ia, ke laveaki foki e ia a lautolu.”​—Salamo 34:7.

9, 10. Talahau fefe “ko e higoa a Iehova, ko e kolo uka haia,” mo e fakaaoga fefe e matapatu fakaakoaga nei ke he fakatokatokaaga katoa he Atua?

⁹ Kua puipui foki e fakatokatokaaga kitia a Iehova. Fefe? Kua totou e tautolu he Tau Fakatai 18:10: “Ko e higoa a Iehova, ko e kolo uka haia; kua hola atu ki ai e tagata tututonu, ti hao ai a ia.” Nakai hagaao e mena nei ko e fatiaki noa he higoa he Atua kua foaki e puipuiaga. Ka e, ko e huaga ha tautolu he higoa he Atua kua fakakite kua tua a tautolu ki a Iehova tokotaha. (Salamo 20:1; 122:4) Kua kakano ko e lagomatai hana pule katoatoa, omaoma hana tau fakatufono mo e tau matapatu fakaakoaga, mo e tua ke he hana tau maveheaga. (Salamo 8:1-9; Isaia 50:10; Heperu 11:6) Kua putoia foki e foaki ki a Iehova e tapuaki katoatoa. Ko lautolu ni kua tapuaki ki a Iehova he puhala nei kua talahau mo e salamo: “Ha kua fiafia kia [Iehova] ha tautolu a tau loto; ha kua tua a tautolu ke he hana higoa tapu.”​—Salamo 33:21; 124:8.

¹⁰ Ko lautolu oti i loto he fakatokatokaaga kitia he Atua kua talahau mo Mika: “Ko tautolu foki, to o a tautolu ke he higoa a Iehova ha tautolu a Atua tukulagi tukumuitea.” (Mika 4:5) Ko e fakatokatokaaga he vaha fou nei kua fakapotopoto viko he “Isaraela he Atua,” ne kua ui ai he Tohi Tapu ko e “tau tagata māna.” (Kalatia 6:16; Gahua 15:14; Isaia 43:6, 7; 1 Peteru 2:17) Ti, ko e ha ha he fakatokatokaaga a Iehova kua kakano ke fai vala he tau tagata kua kumi, mo e moua, e puipuiaga he higoa he Atua.

11. Ke he tau puhala pauaki fefe kua foaki puipuiaga e fakatokatokaaga a Iehova ma lautolu kua ha ha i ai?

¹¹ He lafi, ko e fakatokatokaaga kitia he Atua ko e maaga he tua, ko e feoakiaga he tau matakainaga talitonu kua feati hake mo e fefakamafanaaki. (Tau Fakatai 13:20; Roma 1:12) Ko e matakavi kua maeke he tau leveki Kerisiano ke leveki e tau mamoe, fakamalolo a lautolu kua gagao mo e lolelole, mo e kumi a lautolu ne veveli ke liuaki mai. (Isaia 32:1, 2; 1 Peteru 5:2-4) Ko e “fekafekau fakamoli mo e loto matala” kua foaki e “tau mena kai ke he tau magaaho” puhala mai he fakatokatokaaga. (Mataio 24:45) Ko e “fekafekau” ia, kua moua mai he tau Kerisiano fakauku, kua foaki e tau mena mitaki ue atu fakaagaga​—tonutika, iloilo fakave ke he Tohi Tapu ke takitaki ke he moui tukulagi. (Ioane 17:3) Fakaaue ke he takitakiaga mai he “fekafekau,” ne kua lagomatai e tau Kerisiano ke tumau e tau tutuaga mahani mitaki mo e ke ‘loto matala tuga e tau gata, totonu tuga e tau lupe’ he fonua hagahagakelea kua viko takai ia lautolu. (Mataio 10:16) Ti lagomatai tumau a lautolu ke “fakamakai nakai noa ke he gahua he Iki,” kua ha ha ai e puipuiaga malolo lahi.​—1 Korinito 15:58.

Ko Hai he Fakatokatokaaga he Atua?

12. Ko hai kua kitia i loto he fakatokatokaaga he Atua he lagi?

¹² Ha kua maeke e puipuiaga nei ki a lautolu i loto he fakatokatokaaga he Atua, ko hai kua lauia foki ke he mena nei? Hagaao ke he fakatokatokaaga he lagi, nakai fakauaua ai ma e tali ke he huhu nei. Kua nakai nonofo a Satani mo e hana tau agelu ke he lagi. He taha fahi, nonofo agaia ni e tau agelu fakamoli i ai “ke he fakapotopotoaga katoa.” Ne kitia he aposetolo ko Ioane e mena ia he tau aho fakamuiaki, ko e “Punua mamoe,” ko e tau kerupi (“tau mena momoui ne fa”), mo e “tau agelu tokologa” to fetataaki lahi mo e nofoa patuiki he Atua. Mo lautolu e tau patu ne 24​—ne hukui ai a lautolu ko e tau Kerisiano fakauku kua fita e huhu atu ke he ha lautolu a veveheaga mua ue atu he lagi. (Heperu 12:22, 23; Fakakiteaga 5:6, 11; 12:7-12) Ko e vala taha ia a lautolu oti he fakatokatokaaga he Atua. Nakai mahino mitaki mogoia, e tau talahauaga ke he tau tagata.

13. Fakakite fefe e Iesu a lautolu i loto he fakatokatokaaga he Atua mo lautolu kua nakai ha i ai?

¹³ Ne pehe a Iesu hagaao ke he falu ne talahau kua mumui ki a ia: “Tokologa ke pehe mai kia au ke he aho ia, Ko e Iki na e, ko e Iki na e, nakai kia ko e mena perofeta age a mautolu ke he hau a higoa, ko e hau a higoa foki ne vega ai e mautolu ki fafo e tau temoni, ko e hau a higoa foki ne eke aī e mautolu e tau mana loga. Ati tala age ai e au kia lautolu, nakai iloa ni e au a mutolu, kia o kehe a a mutolu ia au, ko mutolu ne eke e tau mahani kelea.” (Mataio 7:22, 23) Ka eke taha mo tagata eke mahani kelea, kua moli ni nakai nofo a ia he fakatokatokaaga he Atua, pete ni kua talahau a ia, mo e pete ni e fano a ia ke he tapuakiaga. Ne fakakite foki e Iesu e kitiaaga he taha kua fai vala he fakatokatokaaga he Atua. Ne pehe a ia: “Nakai hohoko ke he kautu he lagi a lautolu oti kua pehe mai kia au, Ko e Iki na e, ko e Iki na e; ka ko ia ni kua eke e finagalo he haku a Matua ha ha he lagi.”​—Mataio 7:21.

14. Ko e heigoa e tau puhala he finagalo he Atua kua fakakite ko e matagahua ki a lautolu i loto he fakatokatokaaga he Atua?

¹⁴ Ti, ke ha he fakatokatokaaga he Atua​—ko e “kautu he lagi” ko e matapatu vala a ia​—ke taute e ia e finagalo he Atua. Ko e heigoa e finagalo hana? Kua fakakite e Paulo e puhala aoga he pehe a ia: “Ko [e Atua] kua finagalo ke fakamomoui e tau tagata oti kana, mo e hokotia a lautolu he maama ke he kupu moli.” (1 Timoteo 2:4) Ka kumi fakamoli e tagata ke moua e iloilo tonu mai he Tohi Tapu, ke fakaaoga ke he hana moui, mo e folafola ai ke he “tau tagata oti kana,” kua taute e ia e finagalo he Atua. (Mataio 28:19, 20; Roma 10:13-15) Ko e finagalo foki he Atua ke fagai hana tau mamoe mo e leveki ki ai. (Ioane 21:15-17) Kua lahi e vala ne taute he tau feleveiaaga Kerisiano he mena nei. Ko e tagata kua ata ke fina atu ke he tau feleveiaaga pihia ka e fakaheu ke taute ai kua nakai loto fakaaue ke he hana tuaga he fakatokatokaaga he Atua.​—Heperu 10:23-25.

Kapitiga mo e Lalolagi

15. Ko e heigoa e hatakiaga ne foaki e Iakopo ke he tau fakapotopotoaga he vaha hana?

¹⁵ He 30 e tau he mole e mate a Iesu, ne fakakite he matakainaga hana ko Iakopo falu mena kua fakahagahaga kelea e tuaga he taha i loto he fakatokatokaaga he Atua. Ne tohi e ia: “Ko mutolu, ko e tau tane faivao na e, mo e tau fifine faivao na e, kua iloa nakai e mutolu ko e kapitiga mo e lalolagi ko e faitaua haia ke he Atua? Hanai, kaeke ke fia kapitiga taha mo e lalolagi, kua eke a ia mo fi ke he Atua.” (Iakopo 4:4) Ko e fi he Atua kua nakai fai vala moli he hana fakatokatokaaga. Ti, ko e heigoa mogoia, e kapitiga mo e lalolagi? Kua fita he fakamaama he kitia ai e tau puhala kehekehe, tuga e fakahui e feaki po ke putoia ke he tau feoakiaga kelea. Lafi ki ai, ne hagaaki a Iakopo hagaao ke he mena kua tutonu lahi​—hehe e tau aga manamanatu kua takitaki ke he mahani nakai lata.

16. Ko e heigoa e kakano he tau kupu a Iakopo ko e kapitiga mo e lalolagi ko e faitaua haia mo e Atua?

¹⁶ Ia Iakopo 4:1-3, ne totou e tautolu: “Mai fe kia e tau tau mo e tau latau ha ia mutolu? nakai kia ko e mena hanai, mai he tau manako kelea ha mutolu kua tau ke he tau tino oti ha mutolu? Kua manako lahi a mutolu, ka e nakai moua; kua kelipopo e mutolu mo e mahekeheke, ka e nakai maeke ia mutolu ke moua; kua latau mo e tau, ka kua nakai moua, he nakai ole atu. Kua ole atu a mutolu, ka e nakai moua, ha kua ole atu mo e nakai lata, kia fakaoti e tau mena ia ke he tau manako kelea ha mutolu.” He mole e tohi e tau kupu nei ne hataki e Iakopo aua neke kapitiga mo e lalolagi.

17. Ke he puhala fe he “tau tau” mo e “taufetoko” he fakapotopotoaga Kerisiano he senetenari fakamua?

¹⁷ He tau senetenari fakamui ne mate a Iakopo, ne hoko moli e felakutaki mo e fekelipopoaki he tau Kerisiano fakavai. Pete ia, ne tohi e Iakopo ke he tau tagata he senetenari fakamua he “Isaraela he Atua,” kua eke mo ‘tau ekepoa mo e tau patuiki.’ (Fakakiteaga 20:6) Ne nakai fekelipopoaki po ke fetamateaki a lautolu ke he tau felakutaki tino. Ti ko e ha ne tutala ai a Iakopo ke he tau mena pihia he tau Kerisiano? Ne fakahigoa e Ioane ha tagata kua fakavihia hana matakainaga ko e tagata kelipopo tagata. Ti tutala a Paulo ke he taufetoko fakatagata mo e matafi i loto he tau fakapotopotoaga ko e “taufetoko” mo e “tau miha.” (Tito 3:9; 2 Timoteo 2:14; 1 Ioane 3:15-17) He manatu taha nei, ne tokaloto tuai e Iakopo e kaumahala ke fakaalofa ke he tau matakainaga Kerisiano. He vahaloto ha lautolu, kua gahuahua e tau Kerisiano he fakakite e puhala ha lautolu he lalolagi kua fa fehagai mo e falu.

18. Ko e heigoa kua takitaki ke he tau gahua mo e tau logonaaga nakai fakaalofa ke he tau Kerisiano?

¹⁸ Ko e ha ne tupu e tau mena pihia ke he tau fakapotopotoaga Kerisiano? Ha ko e tau aga hehe, tuga e lotokai mo e “tau manako kelea.” Uta kehe foki he fakatokoluga, mahekeheke, mo e foliaga e feoakiaga fakaalofa Kerisiano he fakapotopotoaga. (Iakopo 3:6, 14) Ko e tau aga pihia kua taute e tagata mo kapitiga he lalolagi mo e, fi ke he Atua. Nakai fai ne feaki e tau aga pehenei kua amanaki ke tumau ko e vala he fakatokatokaaga he Atua.

19. (a) Ko hai ka matapatu ki ai e tukuaki ka moua he Kerisiano e manamanatu hehe kua vakavaka ke he hana loto? (e) Kautu mai fefe e Kerisiano he manamanatuaga hehe?

¹⁹ Ko hai ka tuku aki e tautolu ka moua e tautolu e manamanatuaga hehe kua vakavaka ke he tau loto ha tautolu? Satani? Fai fuafuaaga, e. ‘Ko e takitaki kua pule ha he pulagi’ a ia he lalolagi nei, ne kua holofa ai e tau aga pihia. (Efeso 2:1, 2; Tito 2:12) Fa mahani, ko e tau vakavaka he manamanatuaga hehe kua fakave ke he tino nakai mitaki katoatoa ha tautolu. He oti e hataki he kapitiga mo e lalolagi, ne tohi e Iakopo: “Poke manatu kia a mutolu kua talahaua noa e Tohi, Ko e loto ha ia mutolu kua manako lahi a ia ke he mahekeheke.” (Iakopo 4:5) Igatia oti a tautolu mo e aga pauaki ke taute e hehe. (Kenese 8:21; Roma 7:18-20) Maeke ia tautolu, ke tau ke he aga kaeke ke fakaata e tautolu e tau lolelole ha tautolu mo e falanaki ke he lagomatai a Iehova ke kautu mai ai. Ne pehe a Iakopo: “Ka kua foaki mai [he Atua] e fakaalofa noa ke mua [mai he aga pauaki ke mahekeheke].” (Iakopo 4:6) Fakaaue ke he lagomatai he agaga tapu he Atua mo e lagomataiaga he tau matakainaga fakamoli Kerisiano, mo e mai he fua he poa lukutoto a Keriso, ko e tau Kerisiano fakamoli kua nakai kautu mai he tau lolelole he tau tino ha lautolu. (Roma 7:24, 25) Kua malu a lautolu he fakatokatokaaga he Atua, tau kapitiga he Atua, nakai he lalolagi.

20. Ko e heigoa e tau monuina loga kua olioli e lautolu i loto he fakatokatokaaga he Atua?

²⁰ Kua mavehe mai he Tohi Tapu: “To foaki mai e Iehova, e malolo ke he hana motu; to fakamonuina e Iehova hana motu ke he mafola.” (Salamo 29:11) Kaeke ko e vala moli a tautolu he “motu” a Iehova he vaha nei, hana fakatokatokaaga kitia, to fakalataha a tautolu ke he malolo ka foaki e ia mo e olioli e mafola fakalataha mo e tau tagata hana kua fakamonuina e ia. Moli, lahi mahaki e lalolagi a Satani ke he fakatokatokaaga kitia a Iehova, ti mua atu e malolo ha Satani ke he ha tautolu. Ka ko e Mua Ue Atu a Iehova. Nakai fakatatai ke he malolo gahuahua hana. Kua fakalataha foki e tau agelu malolo hana mo tautolu he fekafekau ke he Atua. Ti, pete ni e fakavihia kua fehagai mo tautolu, kia mauokafua a tautolu. Tuga a Iesu, maeke ke kautu a tautolu ke he lalolagi.​—Ioane 16:33; 1 Ioane 4:4.

Maeke Nakai a Koe ke Fakamaama?

◻ Ko e heigoa e fakatokatokaaga kitia he Atua?

◻ Ke he tau puhala fe kua foaki he fakatokatokaaga he Atua e puipuiaga?

◻ Ko hai kua ha i ai he fakatokatokaaga he Atua?

◻ Fehola kehe fefe a tautolu mai he eke mo tau kapitiga he lalolagi?

[Puha he lau 21]

Ko e Heigoa e Fakatokatokaaga he Atua?

He tohi he Tau Fakamoli a Iehova, ko e talahauaga “fakatokatokaaga he Atua” ne fakaaoga ai ke he tolu e puhala.

1 Ko e fakatokatokaaga nakai kitia a Iehova he lagi, kua moua mai he tau mena momoui fakaagaga fakamoli. Ne ui e mena nei “ko Ierusalema i luga” i loto he Tohi Tapu.​—Kalatia 4:26.

2 Ko e fakatokatokaaga kitia ha Iehova he tagata. He vaha nei kua ha ha ai e kau fakauku ne toe kua fakalataha he moto tagata tokologa.

3 Ko e fakatokatokaaga a Iehova he lagi mo e lalolagi katoa. He vaha nei, kua ha ha ai e fakatokatokaaga a Iehova he lagi fakalataha mo e tau tama fakauku ne hiki mai he lalolagi, kua moua e amaamanakiaga fakaagaga. To nakai leva ti fakalataha foki e tau tagata mitaki katoatoa he lalolagi.

[Fakatino he lau 22]

Ko e tau mena kai mua ue atu ne foaki mai he fakatokatokaaga a Iehova