Veveheaga Hogofulu Ma fa
Takitaki Fefe e Iehova Hana Fakatokatokaaga?
1. Ko e heigoa e tau vala tala ke he fakatokatokaaga ha Iehova nukua fakakite mai he Tohi Tapu, mo e ko e ha kua aoga ki a tautolu?
FAI fakatokatokaaga kia e Atua? Fai he talahau mai ki a tautolu he tau Tohiaga Tapu ne omoomoi he agaga. I loto he Kupu hana, ne foaki mai e ia ki a tautolu e ata he vala he fakatokatokaaga homo ue atu ia he lagi. (Esekielu 1:1, 4-14; Tanielu 7:9, 10, 13, 14) Pete kua nakai kitia e tautolu e vala nei ne nakai kitia, kua lauia lahi mahaki e tau tagata tapuaki moli he vaha nei. (2 Tau Patuiki 6:15-17) Ha ha foki he fakatokatokaaga ha Iehova e vala kitia he lalolagi. Kua lagomatai he Tohi Tapu a tautolu ke maama e mena ia mo e puhala kua takitaki ai e Iehova.
Mailoga ko e Vala Kitia
2. Ko e heigoa e fakapotopotoaga fou ne fakatu he Atua?
2 Ke he 1,545 e tau tau ko e motu ko Isaraela e fakapotopotoaga he Atua. (Gahua 7:38) Ka e kaumahala a Isaraela ke omaoma ke he tau matafakatufono he Atua mo e tiaki hana Tama fuataha. Ko e fua, ne tiaki e Iehova e fakapotopotoaga ia mo e fakaoti ai. Ne tala age a Iesu ke he tau Iutaia: “Kitiala kua toka atu kia mutolu ha mutolu a fale kua moumou.” (Mataio 23:38) Ne fakatu he Atua e fakapotopotoaga fou, ti taute e ia e maveheaga fou. Ko e fakapotopotoaga nei ne 144,000 e tagata ne fifili he Atua ke fakalataha mo e Tama hana ke he lagi.—Fakakiteaga 14:1-4.
3. Ko e heigoa ne tupu he Penetekoso 33 V.N. ne eke mo fakamoliaga kua fakaaoga he Atua e fakapotopotoaga fou mogonei?
3 Ko lautolu e tau fua uluaki he fakapotopotoaga fou ia ne fakauku ke he agaga tapu ha Iehova he Penetekoso 33 V.N. Hagaao ke he mena tupu ofoofogia ia, ne totou e tautolu: “Kua hoko atu foki ke he aho Penetekoso, ha ha i ai a lautolu oti kana ke he mena taha mo e loto fakalataha. Ati fakaofo mai he lagi tuga ne matagi kua havili lahi mai, kua puke oti ai e fale ne nonofo ai a lautolu. Ne kitia foki e lautolu e tau alelo tuga ne afi kua mavehevehe kua nofo ki luga ha lautolu takitokotaha. Ne fakapuke foki a lautolu oti ke he [a]gaga [t]apu.” (Gahua 2:1-4) Ne foaki he agaga he Atua e fakamoliaga maaliali kua eke tuai e matakau nei mo tau tagata ka fakaaoga he Atua ke taute hana finagalo i lalo hifo he takitakiaga ha Iesu Keriso i luga he lagi.
4. Ko hai he vaha nei ne ha ha he fakatokatokaaga kitia ha Iehova?
4 He vaha nei, kua gahoa ni a lautolu he 144,000 ne toe agaia he lalolagi. Ka e ke fakamoli e perofetaaga he Tohi Tapu, “ko e moto tagata tokologa” he ‘tau mamoe kehe,’ kua totou miliona a lautolu, nukua lafi mo lautolu ne fakauku ne toe. Ko Iesu, ko e Leveki Mamoe Mitaki, ne lafi e tau mamoe kehe nei mo lautolu ne fakauku ne toe ati eke a lautolu mo fuifui ne taha i lalo hifo ia ia ko e Leveki Mamoe ne tokotaha. (Fakakiteaga 7:9; Ioane 10:11, 16) Kua ha ha a lautolu oti nei he taha e fakapotopotoaga kaufakalataha, ko e fakatokatokaaga kitia ha Iehova.
Fakateokarasi e Fakaveaga
5. Ko hai ne takitaki e fakatokatokaaga he Atua, mo e fefe?
5 Ko e talahauaga faka-Tohi Tapu “ko e [fakapotopotoaga] he Atua moui haia” kua fakakite moli a ia ne takitaki. Ko e fakapotopotoaga kua fakateokarasi, po ke pule he Atua. Ko Iehova ne foaki e takitakiaga ma e hana tau tagata he puhala ia Iesu, ko ia ne fifili e Ia ke eke mo Ulu nakai kitia he fakapotopotoaga ti puhala he Hana a Kupu ne omoomoi he agaga, ko e Tohi Tapu.—1 Timoteo 3:14, 15; Efeso 1:22, 23; 2 Timoteo 3:16, 17.
6. (a) Puhala fefe ne kitia ai e takitakiaga mai he lagi ke he fakapotopotoaga he senetenari fakamua? (e) Ko e heigoa ne fakakite ko Iesu agaia e Ulu he fakapotopotoaga?
6 Kua kitia maali e takitakiaga pihia he Penetekoso. (Gahua 2:14-18, 32, 33) Ne kitia ai he magaaho ne takitaki he agelu ha Iehova e folafolaaga he tala mitaki i Aferika, magaaho ne tala age e Iesu e tau fakamaamaaga ke he liliuina ha Saulo ko e Taso, mo e magaaho ne kamata a Peteru ke gahua fakamatala ke he tau Tagata Motu Kehe. (Gahua 8:26, 27; 9:3-7; 10:9-16, 19-22) Ka e ai leva, ne nakai liu logona ha leo mai he lagi, nakai liu kitia ha agelu, nakai liu fai mena fakaalofa fakamana ne foaki fakaagaga. Ka e fita he mavehe e Iesu: “Kitiala, to fakalataha au mo mutolu ke he tau aho oti, ato hoko ni ke he fakaotiaga he lalolagi.” (Mataio 28:20; 1 Korinito 13:8) He vaha nei, kua talia he Tau Fakamoli a Iehova e takitakiaga ha Iesu. Ka nakai fai mena pihia, to nakai maeke ke fakapuloa e fekau ke he Kautu he fehagai mo e favale kaka.
7. (a) Ko hai a lautolu he “fekafekau fakamoli mo e loto matala,” mo e ko e ha? (e) Ko e heigoa e matagahua ne age ke he “fekafekau”?
7 Nakai leva ato mate a ia, ne talahau e Iesu ke he tau tutaki hana hagaao ke he “fekafekau fakamoli mo e loto matala” ka tuku age e ia ko e Iki e matagahua pauaki. Ko e “fekafekau” ia ka toe hifo he magaaho ka haele e Iki ke he lagi mo e gahua malolo agaia ka liu mai nakai kitia e Keriso he malolo he Kautu. Ko e fakamaamaaga pihia kua nakai felauaki mo e ha tagata taha, ka e felauaki mo e fakapotopotoaga fakauku he Keriso. Ha kua fakatau aki e toto hana, ne hagaao a Iesu ki ai ko e hana “fekafekau.” Ne poaki e ia ke he tau tagata ia ke taute tutaki mo e ke fagai tumau a lautolu, he foaki ki a lautolu “e tau mena kai [fakaagaga] ke he tau magaaho.”—Mataio 24:45-47; 28:19; Isaia 43:10; Luka 12:42; 1 Peteru 4:10.
8. (a) Ko e heigoa e matagahua he vahega fekafekau he magaaho nei? (e) Ko e ha kua aoga e tali ha tautolu ke he tau fakaakoaga ne mai he halavaka he Atua?
8 Ha kua taute fakamoli he vahega fekafekau e gahua he Iki he hana liu mai nakai kitia he 1914, kua fai fakamoliaga ke he lahi atu he kotofaaga ne foaki ki a lautolu he 1919. Ko e tau tau tali mai he magaaho ia ko e magaaho ke fakamatala ke he lalolagi katoa e Kautu, ti hane fakapotopoto mai e moto tagata tokologa he tau tagata tapuaki ki a Iehova mo e onoonoaga ha lautolu ke fakahao mai he matematekelea lahi. (Mataio 24:14, 21, 22; Fakakiteaga 7:9, 10) Ko lautolu nei kua latatonu foki ke moua e tau mena kai fakaagaga, ti kua ta atu he vahega fekafekau ki a lautolu. Ke fakafiafia a Iehova, kua lata mogoia ia tautolu ke talia e tau fakaakoaga ne foaki mai e ia puhala mai he halavaka nei mo e gahua fakatatau atu ki ai.
9, 10. (a) He senetenari fakamua, ko e heigoa e fakaholoaga ke taute aki e tau huhu hagaao ke he tau fakaakoaga mo e takitakiaga he fakamatala e tala mitaki? (e) Ko e heigoa e fakaholoaga kua fakatu ke fakatokatoka aki e tau gahua he tau tagata ha Iehova he vaha nei?
9 Ke he tau magaaho, ne fa hake mai e tau huhu ke he fakaakoaga mo e tau puhala. Ko e heigoa mogoia? Talahau mai ia Gahua veveheaga 15 ki a tautolu e puhala ne taute aki e matakupu ke he tau tagata Motu Kehe ne liliuina. Ne ta atu e lekua ke he tau aposetolo mo e tau patu i Ierusalema, ne gahua ke he matapatu he kau fakatufono. Ne nakai pehe kua mitaki katoatoa a lautolu ia, ka e ne fakaaoga e Iehova a lautolu. Ne fakatutala a lautolu ke he tau kupu tohi ne hagaao ke he matakupu mo e fakamoliaga nukua gahuahua e agaga he Atua ke he hafagiaga he fonua Motu Kehe. Ti taute e lautolu e fifiliaga. Ne fakamonuina he Atua e fakaholoaga ia. (Gahua 15:1-29; 16:4, 5) Mai he matapatu kau fakatufono ia, ne fakafano e tau tagata ke fakalaulahi atu e fakamatala he Kautu.
10 He vaha ha tautolu ko e Kau Fakatufono he vala kitia he fakatokatokaaga ha Iehova ne ha ha ai e tau matakainaga fakauku he agaga mai he tau motu kehekehe ne fakatu he matapatu he Tau Fakamoli a Iehova he lalolagi katoa. I lalo hifo he ulu pule ha Iesu Keriso, ne fakalaulahi atu he Kau Fakatufono e tapuakiaga mea he tau motu oti, fakatokatoka e gahua fakamatala he Tau Fakamoli a Iehova he tau fakapotopotoaga totou hogofulu afe ha lautolu. Ko lautolu he Kau Fakatufono ne talia ke he manatu he aposetolo ko Paulo, ne tohi ke he tau matakainaga Kerisiano: “Nakai ko e mena fia pule a mautolu ke he ha mutolu a tua, ka ko e tau lagomatai a mautolu ke he ha mutolu a fiafia; ha ko e tua kua tumau ai a mutolu.”—2 Korinito 1:24.
11. (a) Puhala fefe ne fifili aki e tau motua mo e tau fekafekau lagomatai? (e) Ko e ha kua lata ia tautolu ke kauauloa mo lautolu ne kua fifili?
11 Kua fuluhi e Tau Fakamoli a Iehova he lalolagi katoa ke he Kau Fakatufono ke fifili e tau matakainaga tane kua lata, ko lautolu ia kua fakaata ke fifili e tau motua mo e tau fekafekau lagomatai ke leveki e tau fakapotopotoaga. Ko e tau tuaga ma lautolu ne fifili ne fakakite mai he Tohi Tapu mo e mailoga foki ko e tau tagata ia mena nakai mitaki katoatoa mo e fa hehe. Ko e tau motua ne tuku e tau manatu pulega mo lautolu ka fifili kua fakalago e matagahua mamafa lahi ki mua he Atua. (1 Timoteo 3:1-10, 12, 13; Tito 1:5-9) Ko e mena ia, ne liogi a lautolu ma e lagomatai he agaga he Atua mo e kumi e takitakiaga mai he hana Kupu ne omoomoi he agaga. (Gahua 6:2-4, 6; 14:23) Kia fakakite e tautolu e loto fakaaue ma e “tau mena fakaalofa ke he tau tagata” nei, ko lautolu ka lagomatai a tautolu oti ke moua e “loto fakalataha ke he tua.”—Efeso 4:8, 11-16.
12. Fakaaoga fefe e Iehova e tau fifine he fakaholoaga fakateokarasi?
12 Kua talahau mai he tau Tohiaga Tapu to leveki e lautolu nei e fakapotopotoaga. Nakai fakateaga he mena nei e tau fifine, ha ko e falu ia lautolu ko e tau hakega he Kautu he lagi mo e lahi foki e gahua fakamatala ha lautolu ne taute. (Salamo 68:11) Pihia foki, ha kua leveki fakamoli ke he tau kotofaaga fakamagafaoa ha lautolu, kua lafi e tau fifine ke he higoa mitaki he fakapotopotoaga. (Tito 2:3-5) Ka e ke fakaako i loto he fakapotopotoaga ne kua leveki he tau tane ne kua fifili ke taute ai.—1 Timoteo 2:12, 13.
13. (a) Ko e heigoa e onoonoaga he Tohi Tapu ne fakamalolo ke he tau motua ke taute aki e tau tutuaga ha lautolu? (e) Ko e heigoa e kotofaaga ka fakalataha a tautolu oti ki ai?
13 Ke he lalolagi, ko e tagata aoga lahi e tagata ne tu he tuaga tokoluga, ka e ke he fakatokatokaaga he Atua ko e matafakatufono ko e: “Ha ko ia ne tote ue atu ia mutolu oti, to mua a ia.” (Luka 9:46-48; 22:24-26) Kua tomatoma he tau Tohiaga Tapu e tau motua ke fakaeneene neke fia iki ke he kaina he Atua ka kia eke mo tau fakafifitakiaga mitaki ke he fuifui. (1 Peteru 5:2, 3) Nakai ko e gahoa kua fifili, ka e ko e Tau Fakamoli a Iehova katoatoa, tane mo e fifine, nukua moua e kotofaaga ke hukui e Pule Katoatoa he lagi mo e lalolagi, hane vagahau fakatokolalo ke he hana higoa mo e talahau ke he tau tagata he tau matakavi oti hana Kautu.
14. Fakaaoga e tau kupu tohi ne fakakite mai, fakatutala ke he tau huhu he matahiku he paratafa.
14 Kua mitaki ke huhu hifo ki a tautolu ni: ‘Kua loto fakaaue moli nakai au ke he puhala kua takitaki e Iehova hana fakatokatokaaga kitia? Fakaata nakai he aga, kupu vagahau, mo e tau gahua haku e mena ia?’ He manamanatu ke he tau manatu ne mui mai kua maeke ke lagomatai a tautolu takitokotaha ke taute e onoonoaga pihia.
Kaeke omaoma moli au ki a Keriso ko e Ulu he fakapotopotoaga, tuga ne fakakite he tau kupu tohi ne mumui mai, ko e heigoa haku ka taute? (Mataio 24:14; 28:19, 20; Ioane 13:34, 35)
Ka talia loto fakaaue au ke he tau foakiaga fakaagaga ne puhala mai he vahega fekafekau mo e hana Kau Fakatufono, ko hai haku kua fakalilifu ki ai? (Luka 10:16)
Puhala fe ha lautolu oti he fakapotopotoaga, mua atu ke he tau motua, ka fehagai ke he taha mo e taha? (Roma 12:10)
15. (a) Mai he tau aga ha tautolu ke he fakatokatokaaga kitia ha Iehova, ko e heigoa ha tautolu kua fakatata? (e) Ko e heigoa e tau tutuaga ke fakamoli e tautolu e Tiapolo ko e pikopiko mo e fakafiafia e loto ha Iehova?
15 Kua takitaki e Iehova a tautolu he vaha nei puhala he hana fakatokatokaaga kitia i lalo hifo he Keriso. Ko e aga ha tautolu ke he fakaholoaga nei ka fakatata e logonaaga ha tautolu ke he matakupu he pule katoatoa. (Heperu 13:17) Ne fakafetoko a Satani kua onoono lahi a tautolu ki a tautolu. Ka e ka fekafekau a tautolu he ha puhala kua lata mo e kalo mai he matalahi teao ia tautolu ni, kua fakamoli e tautolu ko e Tiapolo ko e pikopiko. Kaeke fakaalofa mo e fakalilifu a tautolu ki a lautolu ne takitaki a tautolu mo e fakatikai ke ‘nava ke he tau aga ke moua mena ai,’ kua fakafiafia e tautolu a Iehova. (Iuta 16; Heperu 13:7) He fakamoli ke he fakatokatokaaga ha Iehova, kua fakakite e tautolu ko Iehova ko e ha tautolu a Atua mo e kua kaufakalataha a tautolu he tapuaki ki a ia.—1 Korinito 15:58.
Fakatutala Fakamanatu
• Ko e heigoa e fakatokatokaaga kitia ha Iehova he vaha nei? Ko e heigoa hana finagalo?
• Ko hai e Ulu ne fifili ma e fakapotopotoaga, mo e heigoa e tau fakaholoaga kitia kua foaki mai e ia he takitakiaga fakaalofa ma tautolu?
• Ko e heigoa e tau aga atihake kua lata ia tautolu ke feaki ki a lautolu he fakatokatokaaga ha Iehova?
[Tau Fakatino he lau 133]
Takitaki e Iehova a tautolu puhala he hana fakatokatokaaga kitia i lalo hifo he Keriso