Ko e Ha ne Fai Fakatokatokaaga e Atua?

1. Ko e ha ne fakatokatoka he Atua a Isaraela i tuai?

Ne fakatokatoka he Atua e tau magafaoa he tupuna ko Aperahamo ke he motu ti tuku age ki a lautolu e tau matafakatufono loga. Ne fakahigoa e ia e motu ko “Isaraela” ti eke mo leoleo he tapuakiaga mooli mo e haana kupu. (Salamo 147:19, 20) Ko e tau tagata he tau motu oti kana to aoga mai i Isaraela.​—Totou Kenese 22:18.

Ne fifili he Atua e tau Isaraela ke eke mo tau fakamoli haana. Ko e fakamauaga tala i tuai ha lautolu kua fakakite e fakatātāaga he puhala kua aoga e tau tagata he omaoma ke he tau fakatufono he Atua. (Teutaronome 4:6) Ti puhala he tau Isaraela, maeke he falu ke iloa e Atua mooli.​—Totou Isaia 43:10, 12.

2. Ko e ha kua fakatokatoka ai e tau Kerisiano mooli?

Fai magaaho, ne galo e Isaraela e taliaaga he Atua, ti hukui e Iehova e motu ia aki e fakapotopotoaga Kerisiano. (Mataio 21:43; 23:37, 38) Mogonei he hukui a Isaraela, kua eke e tau Kerisiano mooli mo tau fakamoli a Iehova.​—Totou Gahua 15:14, 17.

Ne fakatokatoka e Iesu e tau tutaki haana ke fakamatala mo e taute tutaki ke he tau motu oti. (Mataio 10:7, 11; 24:14; 28:19, 20) Ko e gahua nei kua hokotia ke he tapunu mogonei, ke he fakaotiaga he fakatokaaga nei. He magaaho fakamua laia he fakamauaga tala, ne fakapotopoto e Iehova e tau miliona tagata mai he tau motu oti kana ke he tapuakiaga mooli. (Fakakiteaga 7:9, 10) Kua fakapotopoto e tau Kerisiano mooli ke fakamafana mo e lagomatai e taha mo e taha. He lalolagi katoa, kua olioli e lautolu e fakaholoaga taha he fakaakoaga Tohi Tapu ke he tau feleveiaaga ha lautolu.​—Totou Heperu 10:24, 25.

3. Kamata fēfē e fakatokatokaaga he vahā foou nei he Tau Fakamoli a Iehova?

He atu tau 1870, ko e matakau tote he tau tagata fakaako he Tohi Tapu kua kamata ke liu moua e tau kupu mooli he Tohi Tapu ne leva e galo. Ne iloa e lautolu ko Iesu ne fakatokatoka e fakapotopotoaga Kerisiano ke fakamatala, ti kamata e lautolu e matagahua fakamatala he Kautu ke he lalolagi katoa. He 1931 ne moua e lautolu e higoa Tau Fakamoli a Iehova.​—Totou Gahua 1:8; 2:1, 4; 5:42.

4. Fakatokatoka fēfē e Tau Fakamoli a Iehova?

He senetenari fakamua, ko e tau fakapotopotoaga Kerisiano he tau motu loga ne aoga mai he matapatu he kau fakatufono ne mailoga ko Iesu ko e Ulu he fakapotopotoaga. (Gahua 16:4, 5) Pihia foki he vahā nei, ko e Tau Fakamoli a Iehova he lalolagi katoa kua aoga mai he Kau Fakatufono he tau motua lotomatala. Kua leveki ai e tau la ofisa he Tau Fakamoli a Iehova ne fakaliliu, lolomi, mo e tufatufa e tau tohi fakaako Tohi Tapu ke molea 600 e vagahau. Ti ko e Kau Fakatufono ka foaki e fakamalolōaga mo e takitakiaga faka-Tohi Tapu ke molea 100,000 e fakapotopotoaga he lalolagi katoa. He tau fakapotopotoaga takitaha, ko e tau tagata taane kua latatonu ke eke mo tau motua, po ke tau leveki. Ko e tau tagata taane nei kua leveki fakaalofa e fuifui he Atua.​—Totou 1 Peteru 5:2, 3.

Ne fakapotopoto e Tau Fakamoli a Iehova ke fakamatala e tala mitaki mo e taute tutaki. Tuga e tau aposetolo, kua fakamatala a mautolu he taha fale ke he taha fale. (Gahua 20:20) Kua foaki foki e mautolu ke fakaako e Tohi Tapu mo e tau tagata loto fakamooli ke he kupu mooli. Ko e Tau Fakamoli a Iehova ne nakai ni ko e fakatokatokaaga. Ko mautolu ko e magafaoa ne ha ha i ai e Matua fakaalofa. Ko mautolu ko e tau matakainaga taane mo e tau matakainaga fifine ne felevekiaki. (2 Tesalonia 1:3) Ha kua fakapotopoto e tau tagata a Iehova ke fakafiafia e Atua mo e ke lagomatai e falu, kua fakatū e lautolu e magafaoa fiafia lahi mahaki he lalolagi.​—Totou Salamo 33:12; Gahua 20:35.