Fakaakoaga 14
Fakatokatoka Fefe e Tau Fakamoli a Iehova
Ha e fe e kamataaga ha lautolu ko e Tau Fakamoli a Iehova he vaha fou nei? (1)
Taute fefe e tau feleveiaaga he Tau Fakamoli a Iehova? (2)
Fefe e tau fakatokatokaaga he tau mena totogi? (3)
Ko hai ne takitaki he tau fakapotopotoaga takitaha? (4)
Ko e heigoa e tau feleveiaaga lalahi ne taute he tau tau takitaha? (5)
Ko e heigoa e tau gahua ke he matapatu mo e tau lala ofisa ha lautolu? (6)
1. Kamata e Tau Fakamoli a Iehova he vaha fou nei he tau tau 1870. Ke he magaaho fakamua, ne fakahigoa a lautolu ko e Tau Tagata Fakaako Tohi Tapu. Ka ko e tau 1931 ne hiki e lautolu ke he higoa faka-Tohi Tapu ko e Tau Fakamoli a Iehova. (Isaia 43:10) Ko e tote he kamataaga ka ko e fakapotopotoaga kua tupu ke he tau miliona e Tau Fakamoli, hane fa e lavelave he gahua fakamatala he tau motu ne kua molea e 230.
2. Ko e laulahi he tau fakapotopotoaga he Tau Fakamoli a Iehova ko e feleveia lagatolu he fahi tapu. Kua uiina a koe ke fakalataha ke he tau feleveiaaga nei. (Heperu 10:24, 25) Ko e Tohi Tapu e fakaveaga he tau fakaakoaga. Hafagi mo e fakaoti aki e liogi e tau feleveiaaga oti. Ko e tau lologo fakaagaga mai he tau loto ne lologo ke he laulahi he tau feleveiaaga. (Efeso 5:18, 19) Nakai totogi e huhu atu, mo e nakai oko e tau tupe.—Mataio 10:8.
3. Ko e laulahi he tau fakapotopotoaga ne feleveia ni ke he Fale he Kautu. Ko e tau fale ta mukamuka nei ko e mena talaga ni he Tau Fakamoli ne gahua noa. To nakai kitia e koe ha mena fakatai, tau akau fakalava ne tautau e tino fakatai ha Iesu, po ke ha mena pihia ke he Fale he Kautu. Ko e tau mena totogi ko e totogi aki ni e tau mena tuku fakaalofa. Ma lautolu ne manako ke foaki mena fakaalofa, ha ha i ai e puha tuku mena fakaalofa.—2 Korinito 9:7.
4. Ke he tau fakapotopotoaga takitaha, ha ha i ai e tau motua, po ke tau leveki. Takitaki e lautolu e tau fakaakoaga he fakapotopotoaga. (1 Timoteo 3:1-7; 5:17) Lagomatai he tau fekafekau lagomatai a lautolu. (1 Timoteo 3:8-10, 12, 13) Nakai tuku ki luga e tau tagata tane nei mai he laulahi he fakapotopotoaga. (2 Korinito 1:24) Nakai foaki ki a lautolu e tau matahigoa kotofa pauaki. (Mataio 23:8-10) Nakai kehe mai ha lautolu a tau tauteuteaga mai he falu. Nakai totogi foki a lautolu ke he ha lautolu a tau gahua. Ne fiafia mo e nakai noa e tau momotua ke leveki e fakapotopotoaga fakaagaga. Maeke ia lautolu ke foaki e tau fakamafanaaga mo e tau fakatonutonuaga ke he tau magaaho matematekelea.—Iakopo 5:14-16; 1 Peteru 5:2, 3.
5. Ha ha foki he Tau Fakamoli a Iehova e tau toloaga po ke tau fonoaga lalahi he tau tau takitaha. Ko e tau magaaho pihia ka fakapotopoto auloa e tokologa he tau fakapotopotoaga ma e fakaholoaga pauaki he tau fakaakoaga Tohi Tapu. Ko e papatisoaga he tau tutaki fou e taha vala ne fa taute tumau he tau toloaga po ke fonoaga lalahi takitaha.—Mataio 3:13-17; 28:19, 20.
6. Toka e matapatu he lalolagi he Tau Fakamoli a Iehova i New York. Ha ha foki i ai e Kau Fakatufono, ko e vahega matakainaga motua he lotouho ke leveki e fakapotopotoaga he lalolagi katoa. Ne ha ha i ai foki molea e 100 he tau lala ofisa ke he lalolagi. Ke he tau matakavi nei, ha ha i ai a lautolu ne foaki ne lautolu a lautolu ke lagomatai ke tohi mo e lau he toga e tau tohi faka-Tohi Tapu. Ha ha i ai foki e tau fakatonutonuaga ma e fakatokatokaaga he gahua fakamatala. Ko e ha ne nakai taute ai ha fakatokaaga ke ahi ke he la ofisa ne tata atu ki a koe?