Ka Hūhū Toko he Fuata Mui e Tua Haau

KUA mauokafua a koe kua fakaako he lotu haau e kupu mooli hagaao ke he Atua. Kua talitonu a koe kua omoomoi he Tohi Tapu e puhala moui kua mua atu e mitaki. Ko e aga pauaki mogoia, kua lali a koe ke feaki e tau mena uho haau ke he tama haau. (Teutaronome 6:6, 7) Ka e kua ka lahi hake e tama haau, ti galo e fiafia ke he tau mena fakaagaaga?b Ka e kua ka kamata a ia ke hūhū toko e tua haau ne tuga na talia fiafia e ia he vahā tama?—Kalatia 5:7.

Ka tupu e mena ia, kia nakai manatu kua kaumahala a koe ko e matua Kerisiano. Liga fai mena foki kua putoia ai, ka kitia ai e tautolu. Pete ia, iloa e mena nei: Ko e puhala ka tali aki e koe e tau hūhū toko he fuata mui haau to liga fakakite ai to fifili e ia ke futiaki fakatata ke he tua haau po ke tafea mamao mai i ai. Ka latau a koe mo e fuata mui haau ha ko e matakupu nei, to feleveia a koe mo e felakutaki lahi—ko e felakutaki ka liga ko koe mooli ka teitei kaumahala.—Kolose 3:21.

Kua mua e mitaki ke muitua ke he tomatomaaga he aposetolo ko Paulo. “Kua nakai lata ke taufetoko e fekafekau he Iki,” he tohi e ia, “ka kia mahani molu a ia ke he tau tagata oti, kia aga a ia ke fakaako atu, kia fakauka a ia.” (2 Timoteo 2:24) Maeke fēfē a koe ke fakakite a koe kua “aga a [koe] ke fakaako atu” ka hūhū toko he fuata mui e tua haau?

Kia Manamanatu

Fakamua, lali ke manamanatu ke he tau mena ka liga lafi ke he onoonoaga he fuata mui haau. Ma e fakatai:

▪ Logona hifo nakai e ia e matimati mo e nakai fai kapitiga i loto he fakapotopotoaga Kerisiano? “Ha kua manako au ke fai kapitiga, ne fakatata au ke he loga he tau kapitiga aoga haaku, ti mataofi e tupu fakaagaaga haaku ke he loga e tau tau. Ne galo e fiafia haaku ke he tau mena fakaagaaga, ha ko e kelea e tau feoakiaga, ti kua loga e tau mena kua tokihala au ki ai mogonei.”—Lenore, 19.

▪ Tote kia e mauokafua haana, ati uka ai a ia ke tutala hagaao ke he tua haana? “He fano au he aoga, ne fakauaua au ke talahau e tua haaku ke he tau kapitiga aoga haaku. Ne matakutaku au neke onoono mai a lautolu ki a au ko e kehe ni po ke ko e ‘tama Tohi Tapu.’ Ko e tama ne kehe na fakavihia, ti nakai manako au ke tupu e mena ia ki a au.”—Ramón, 23.

▪ Logona hifo kia e ia e pehia ha ko e matagahua ke moui fakatatau ke he tau tuaga faka-Kerisiano? “Logona hifo e au kua tuga ko e tau maveheaga he Tohi Tapu i luga matua he tau sitepe lalahi, ti kua nakai haia au he tau sitepe; kua mamao ligoligo au i ai. Ko e matakutaku ke hake he tau sitepe kua lahi mahaki ti kua manamanatu au ke tiaki e tua haaku.”—Renee, 16.

Fetutalaaki

Ko e heigoa e tau matalekua ne liga fehagai e fuata mui haau ki ai? Ko e puhala kua mua atu e mitaki ke iloa ai ko e hūhū ki a ia! Ka kia fakaeneene ke nakai totoho atu e fakatutalaaga ke hoko ke he taufetoko. Ka e muitua ke he tomatomaaga ha Iakopo 1:19: “Alumaki ke fanogonogo, kia fakatuai ke vagahau atu, kia fakatuai ke he ita.” Kia fakamanavalahi ki a ia. Fakagahua e “fakauka oti katoa mo e fakaako atu,” tuga ka taute e koe ke he taha tagata i fafo he magafaoa haau.—2 Timoteo 4:2.

Ma e fakatai, ka ai mahalo e fuata mui haau ke fina atu he tau feleveiaaga Kerisiano, lali ke iloa kua fai mena kua fakatauhele aki a ia. Ka e taute mo e fakauka. Na mitaki tote e fua ka moua he matua he fakataiaga i lalo.

Tama Taane: Ai tuai fia fano au he tau feleveiaaga.

Matua Taane: [leo vale] Fēfē e tala haau, ai fia fano a koe?

Tama Taane: Ai alaala kelea, koenaia!

Matua Taane: Pihia kia e logonaaga haau ke he Atua? Ai alaala a ia ki a koe? Moha ia, ke eke fēfē! Ka nofo a koe he fale haaku, hau a koe mo mautolu—he loto a koe ki ai po ke nakai!

Kua manako e Atua ke he tau matua ke fakaako e tau fanau ha laua hagaao ki a Ia mo e ke omaoma e tau fanau ke he tau matua ha lautolu. (Efeso 6:1) Ka kua manako foki a koe ke he tama haau ke nakai mui teao noa ni ke he fakaholoaga fakaagaaga haau mo e fano noa ni mo koe ke he tau feleveiaaga Kerisiano. Ka maeke ai, kua manako a koe ka hau a ia ti tamai foki e manamanatuaga mo e loto haana.

To liga laukauka e mena haau ka moua ka manamanatu a koe ke he ha lekua ati pihia e aga haana. He tokaloto e mena ia, onoono la ke he puhala ka liga maeke ke taute aki e fakatutalaaga i luga ke lauia mitaki.

Tama Taane: Ai tuai fia fano au he tau feleveiaaga.

Matua Taane: [fakatotoka] Ko e ha ne manatu pihia a koe?

Tama Taane: Ai alaala kelea, koenaia!

Matua Taane: Ko e nonofo ke he taha po ke ua e tulā na maeke ke nakai alaala. Ko e heigoa ne uka lahi ki a koe hagaao ke he mena ia?

Tama Taane: Ai iloa au. Liga logona hifo e au fakalata kua manako au ke haia he taha matakavi foki.

Matua Taane: Pihia kia e logonaaga he tau kapitiga haau?

Tama Taane: E, ko e lekua a ia! Ai fai au—he mogonei. Tali mai he hiki e kapitiga uho haaku, kua logona hifo e au tuga kua ai fai tagata au ke tutala ki ai! Kua fiafia e tau tagata oti. Tuga na ai pihia au!

He futiaki mai e fuata mui, ko e matua taane he tala i luga ne nakai ni hokotia ke he matapatu he lekua—he tuaga nei ko e matimati—ka kua feaki foki e falanaki, ti kua fakaatā e gutuhala ke hafagi ma e falu fakatutalaaga i mua—Kikite e puha he vala nei “Kia Fakamanavalahi!”

Fai magaaho, kua fakaako he tau fuata ikiiki tokologa kaeke ke fehagai a lautolu mo e tau lekua ne tohotua aki e tupu fakaagaaga ha lautolu to fa mitaki e logonaaga ha lautolu ki a lautolu ni mo e ke he tua ha lautolu. Manamanatu ki a Ramón, ko e fuata taane ne fatiaki he vala i luga, ne hopoate ke he manatu ke fakakite e ia a ia ko e Kerisiano he aoga. Fakahiku, ne iloa e Ramón ko e tutala hagaao ke he tua haana kua nakai fakatupetupe koa tuga he manatu e ia—pihia foki ni he vaiga. Ne talahau e ia:

“He taha mogo ne vaiga he taha tama taane au he aoga ha ko e lotu haaku. Ne hopoate lahi au, ti mailoga e au kua fanogonogo e vahega katoa. Ti fifili au ke fuluhi e fakatutalaaga mo e hūhū ki a ia hagaao ke he tua haana. Ne ofo au, kua mua atu e hopoate haana ki a au! Ti mailoga e au he mogoia na tokologa e tau fuata ikiiki ne fai taofiaga fakalotu, ka e nakai maama ai e lautolu. Lauka au he maeke ke fakamaama e tau taofiaga haaku. Mooli ai, ka fakatutala ke he tua, ko e tau kapitiga haaku he vahega kua lata ke fuafua kelea—nakai ko au!”

LALI PEHĒ: Futiaki mai e fuata mui haau he hūhū ki a ia ke he logonaaga haana he eke mo Kerisiano. He onoonoaga ni haana, ko e heigoa e tau mena kua aoga? Ko e heigoa e tau paleko? Mua hake nakai e tau mena ne aoga ke he tau paleko? Ka pihia, fēfē? (Mareko 10:29, 30) Maeke e fuata mui haau ke tohi hifo e tau manatu haana he lau pepa ke he ua e faahi—he faahi hema ko e tau paleko mo e he faahi matau ko e tau mena aoga. He kitia e fuafuaaga haana he lau pepa kua maeke ia koe ke lagomatai e fuata mui haau ke kitia e lekua haana ti kumi e puhala ke fehagai ki ai.

‘Malolō kua Lata ke Eke’ he Fuata Mui Haau

Kua kitia he tau matua mo e tau pulotu kua kehekehe lahi e puhala manamanatu he tau fanau ikiiki mo e puhala manamanatu he tau fuata mui. (1 Korinito 13:11) Ko e tau fanau ikiiki ne fa manamanatu a lautolu he puhala mahino, ē mo e nakai, ka ko e tau fuata mui kua hihiga ke fakakakano fakamahao e tau mena. Ma e fakatai, maeke e tama tote ke fakaako ko e Atua ne tufuga e tau mena oti. (Kenese 1:1) Pete ia, liga taufetului e fuata mui mo e tau hūhū tuga: ‘Iloa fēfē e au na fai Atua? Ko e ha e Atua he fakaalofa ne fakaatā e mahani kelea? Maeke fēfē ke mooli na kua leva tigahua e fai Atua?’—Salamo 90:2.

Liga logona hifo e koe ko e tau hūhū pihia kua liga fakamanou e tua he fuata mui haau. Ka ko e mena mooli, liga ko e lakaaga a ia ki mua. Kua maeke e hūhū ke eke mo vala aoga he tupuaga fakaagaaga he Kerisiano.—Gahua 17:2, 3.

Lafi ki ai, ko e fuata mui haau fa e fakaako ke fakaaoga e manamanatuaga ke he mena kua ‘lata ke eke.’ (Roma 12:1, 2) Ko e fua, to liga loto fakaaue a ia ke he “laulahi, mo e loa, mo e hokulo, mo e tokoluga” he tua faka-Kerisiano he puhala ne liga nakai maama e ia he vahā tote. (Efeso 3:18) Kua mua atu he magaaho nei e lata ke lagomatai e fuata mui haau ke fakakakano e tau taofiaga haana ke maeke a ia ke feaki e mauokafua malolō he tua haana.—Tau Fakatai 14:15; Gahua 17:11.

LALI PEHĒ: Liu ke he kamataaga mo e fuata mui haau, liu ahiahi e tau matakupu ne logona hifo e koe—mo ia—ne liga uta fakateaga. Ma e fakatai, fekau a ia ke manamanatu ke he tau hūhū tuga: ‘Ko e heigoa ne omoomoi au ke talitonu na fai Atua? Ko e heigoa ne fakakite kua mailoga e au na leveki he Atua au? Ko e ha ne logona hifo e au kua fa mitaki lahi ma haaku ke omaoma e tau fakatufono he Atua?’ Kia fakaeneene ke nakai peehi e tau onoonoaga haau ke he fuata mui haau. Ka kia lagomatai a ia ke feaki e ia e tau fifiliaga ni haana. Ke he puhala ia to mukamuka ma haana ke feaki e mauokafua he tua haana.

‘Omoomoi ke Iloa Tonuhia’

Ne tutala e Tohi Tapu ke he fuata taane ko Timoteo ne iloa e tau tohiaga tapu tali mai he “vaha tote.” Ka kua tomatoma he aposetolo ko Paulo a Timoteo: “Kia tumau a koe ke he tau mena kua ako ai e koe, mo e iloa tonuhia e koe.” (2 Timoteo 3:14, 15) Tuga a Timoteo, ko e fuata mui haau kua liga fakaako ke he tau tuaga he Tohi Tapu tali mai he fanau. He mogonei, kua lata ia koe ke omoomoi a ia ke maeke ia ia ke feaki e tau fifiliaga haana ni.

Ko e tohi Questions Young People Ask—Answers That Work, Volume 1, ne pehē: “He nofo e fuata mui haau he fale haau, kua ha ha ia koe e tonuhia ke fakatatau a ia ke he fakaholoaga fakaagaaga. Ka e he magaaho fakamui, ko e foliaga haau ke feaki e fakaalofa ke he Atua he loto he fuata mui haau—nakai ko e fakaohooho noa ni he falu gahua aga mau.” He tokaloto e foliaga ia, to maeke ia koe ke lagomatai e fuata mui haau ke ‘mauokafua ke he tua’ ti eke ai mo puhala moui haana—nakai ko e haau.c—1 Peteru 5:9.