Talahau Tuai Kia he Tohi Tapu e Vahā Anoiha?

Ko e vala tala nei kua fakatutala ke he tau hūhū kua liga hūhū e koe mo e fakakite e matakavi ka totou e koe e tau tali he Tohi Tapu haau. To fiafia e Tau Fakamoli a Iehova ke fakatutala e tau tali nei mo koe.

1. Lautonu kia e tau perofetaaga he Tohi Tapu?

Ko e Atua Mua Ue Atu hokoia ka kitia katoatoa e vahā anoiha. (Amosa 3:7) Ma e fakatai, tali mai he tau vahā fakamua atu, ne talahau tuai e ia e hauaga he taha ne higoa ko e Mesia, po ke Keriso. Ko e Mesia to hau he matohiaga he tagata fakamooli ko Aperahamo. Ko ia ko e pule ka maeke e tau tagata omaoma ke liu moua e fakamonuina he moui mitaki katoatoa ne atāina mai he tau gagao. (Kenese 22:18; Isaia 53:4, 5) Ko Ia nei ne Mavehe kua hau i Petelehema.—Totou Mika 5:2.

Ne eke a Iesu mo Mesia. Molea e fitu e senetenari ki mui, ne talahau tuai he Tohi Tapu ko e Mesia to fanau he tamāfine tote mo e to vihiatia ki ai. To foaki e ia e moui haana ke lata mo e tau agahala he tokologa, mo e to tanu a ia mo e tau maukoloa. (Isaia 7:14; 53:3, 9, 12) Ne fakapuloa foki he Tohi Tapu, ko e molea e lima he senetenari ki mui, to fina atu a ia ki Ierusalema he asini ti to afo a ia ke he 30 e tupe ario. Ne fakamooli oti e tau vala tala takitaha.—Totou Sakaria 9:9; 11:12.

2. Talahau tuai kia he Atua e tau aho?

Molea e lima e senetenari ki mui, ne talahau tuai he Tohi Tapu e tau tonu ia he hauaga he Mesia. Ko e magaaho ato hoko e hauaga haana ne fuafua ke he tau vaha tapu he tau tau, kakano ko e “vaha tapu” takitaha kua fitu e tau loloa. To ha ha i ai 7 lafi aki e 62 e vaha tapu ia, ke katoatoa ai e 69 e vaha tapu he tau tau. Tatai e mena ia mo e 483 e tau tau. Ko e magaaho fe ne kamata e loa he tau tau ia? Hagaao ke he Tohi Tapu, ko e vahā ne kamata he mogo ne hoko atu e fekafekau he Atua ko Nehemia ki Ierusalema ti kamata ke liu atihake e maaga. Ko e fakamauaga tala tuai Peresia ne fakatū e aho ko e 455 F.V.N. (Nehemia 2:1-5) Ne papatiso a Iesu ko e Mesia he 483 e tau he mogo fakamui, he tau 29 V.N., ko e magaaho tonu ia ni.—Totou Tanielu 9:25.

3. Hane fakamooli kia e tau perofetaaga he Tohi Tapu mogonei?

Ne perofeta e Iesu e tau mena tutupu aoga ia ma e magaaho ha tautolu. Totoku he perofetaaga haana e tala mitaki he Kautu he Atua, ka tamai e fakatotokaaga ke he lalolagi katoa ke he tau tagata kua fakaalofa ke he Atua. To tamai he Kautu e fakaotiaga ke he fakatokaaga katoa kelea ne nonofo ai a tautolu.—Totou Mataio 24:14, 21, 22.

Fakamaama fakamatafeiga he tau perofetaaga he Tohi Tapu e magaaho fakahiku he fakatokaaga nei. Ne fakakite he Tohi Tapu e kehekeheaga mo e mena ne liga amanaki ke tupu mo e magahala, to moumou he tau tagata e lalolagi. Ko e matematekelea ne fakatupu he tau felakutaki, kū e tau mena kai, tau mafuike, mo e tupu ki mua e tau gagao ka holo ki mua. (Luka 21:11; Fakakiteaga 11:18) Ko e tuaga he tau mahani to kelea lahi mahaki. He tau magaaho uka nei, to fakamatala he tau tutaki ha Iesu e tala mitaki he Kautu he Atua ke he tau motu oti kana.—Totou Mataio 24:3, 7, 8; 2 Timoteo 3:1-5.

4. Ko e heigoa e vahā anoiha he tagata?

Fai mena mitaki hane fakatoka he Atua Mua Ue Atu ma e tau tagata tua fakamooli. Ko Iesu Keriso, ko e Mesia, fakalataha mo lautolu ne fifili e ia, to pule ke he lalolagi mai he lagi. Ne fakakatoatoa e lautolu ia e fakatufono he Kautu, ka pule ke he afe e tau tau. Ko lautolu ka fakaliu tu mai to moua e magaaho ke latatonu ma e moui tukulagi. Lafi ki ai, ko e Kautu to fakamaulu a lautolu oti ka momoui he magaaho ia. To nakai liu ke fai gagao mo e mate.—Totou Fakakiteaga 5:10; 20:6, 12; 21:4, 5.

Ma e falu vala tala foki, kikite e lau 23-25 mo e 197-201 he tohi nei, Ko e Heigoa ne Fakaako Moli he Tohi Tapu?