Favale Mai ha ko e Mahani Tututonu

Kua liga logona e koe mai he tau kapitiga hau mo e tau magafaoa ko e fa moua lekua e Tau Fakamoli a Iehova mo e matafakatufono, ne pa he falu fakatufono a lautolu, po ke pehe ko e tau tagata kelea ni a lautolu. Ko e ha, kua kehe ai e tala nei, hagaao ki a lautolu?

Kua nakai ha kua ai fakalilifu e Tau Fakamoli ke he matafakatufono ka e ha kua muitua na lautolu ke he tau tuaga hui a Iesu. Ne pehe a Iesu ke he hana tau tutaki to ekefakakelea he tau tagata a lautolu, favale mai ki a lautolu, mo e talahau e tau mena fakavai kelea oti ke totoko ki a lautolu. Kua pihia e mena ia ha ko e iki totoko ke he Atua a Satani, ko e atua he lalolagi nei, mo e fia loto a ia ke liliu kehe e tau tagata ke ua fekafekau ke he Atua.—Mataio 5:10-12; 10:16-22, 34-39; 24:9, 10; Ioane 15:17–16:3; 2 Timoteo 3:12; 1 Peteru 5:8, Fakakiteaga 12:17.

He magaaho ne tapaki e tau aposetolo mo e uta ke he fale hopo, nakai ha ko e tau tagata moumou matafakatufono a lautolu, nakai ko e tau tagata mahani vale, po ke tau tagata fakaohooho totoko ke he motu. Kakano ha kua fakamatala e lautolu e tala mitaki. He magaaho ne vagahau atu e aposetolo ko Paulo ke he hana ni a vala puipui ke he tau hopoaga tokoluga atu, ne taute ai pihia ke papale mo e fakatu ke he matafakatufono e tonuhia he tau Kerisiano ke fakamatala e tala mitaki.—Gahua 4:18-20; 5:28-32; Filipi 1:7.

He vaha nei, ko e tau Kerisiano omaoma ke he matafakatufono e Tau Fakamoli a Iehova ne totogi ha lautolu a tau tukuhau mo e fakakite e fakalilifu ki a lautolu ne pule malolo. Ne totogi e lautolu e tau mena a Kaisara ki a Kaisara mo e tau mena he Atua ke he Atua. Kaeke kua ha ha i ai e fekeheaki mo e taha he tau pule malolo he fakatufono, kakano ha kua nakai mailoga he fakatufono e gahua fakamatala ha lautolu, po ke ha lautolu a tuaga tunoa mo e nakai kau ke he tau mena he tau motu. Ka ko e mena nei kua lata e Tau Fakamoli a Iehova ke uta e tuaga taha tuga ne taute he tau aposetolo, he pehe a laua: “Kua lata ni ke mua e omaoma ke he Atua ke he omaoma ke he tau tagata.”—Gahua 5:29; Mareko 12:17; Ioane 18:36; Tito 3:1, 2.

Ne nakai kumi e Tau Fakamoli a Iehova ke moua e favaleaga, ka e manako ke moua e moui mafola mo e milino. Ka e pete ni ia, kaeke ha kua muitua a lautolu ke he matafakatufono he Atua mo e fakafifitakiaga a Iesu Keriso ati favale mai ai ki a lautolu, kua fiafia ai a lautolu ke fakauka.—Mataio 5:10-12; Gahua 5:40, 41; 1 Korinito 4:12; 1 Timoteo 2:2; 1 Peteru 3:14, 15; 4:12-16.

• Ko e ha ne ekefakakelea ai mo e favale mai ke he tau fekafekau?

• Ko e ha, ne fa fekeheaki e Tau Fakamoli a Iehova he falu a magaaho mo e tau pule malolo fakatufono, ke tuga e tau aposetolo Kerisiano?

• Ne onoono fefe e tau fekafekau a Iehova ke he favaleaga?

[Tau Fakatino he lau 29]

Ne toho a Iesu ki mua a Pilato mo e tuku he fale puipui e aposetolo ko Paulo kakano ha ko e fakamatalaaga he Kautu he Atua