Veveheaga 7

Ko Iesu mo e Tau Makoi

KO E falu a tagata ne o mai he Fahi Uta. Ko e tau makoi a lautolu​—ko e tau tagata talahaua ne maeke ke fakamaama e tutuaga he tau fetu. Ke he magaaho ne ha ha agaia a lautolu he Fahi Uta, ne kitia e lautolu e fetu fou, mo e mumui a lautolu ki ai ke he teau e tau maila ki Ierusalema.

Ne hohoko e tau makoi ki Ierusalema, ne huhu a lautolu: “Po ko fe a ia ne fanau mai ko e patuiki he tau tagata Iutaia? Ha ko e mena kitia e mautolu hana fetu ke he fahi uta, kua o mai ai a mautolu ke hufeilo kia ia.”

Ne logona he Patuiki ko Herota i Ierusalema e mena nei, ti fakaatukehe lahi a ia. Ko e mena ia ne ui e ia e tau ekepoa ne mua mo e huhu ko e fanau i fe e Keriso. Ne fakave e tali ha lautolu ke he Tohiaga Tapu, ti tali a lautolu: “Ko Petelehema.” Ko e mena ia, ne ta mai e Herota e tau makoi ki a ia mo e tala age ki a lautolu: “O atu a a mutolu ke kumikumi fakamakutu ai e tama tote; ka kitia e mutolu, ti fakailoa mai e mutolu kia au, kia fina atu au ni ke hufeilo atu kia ia.” Ka ko e manako a Herota ke moua e tama ke kelipopo!

Ne mole a lautolu, ti ofomate lahi e mena ne tupu. Ko e fetu ne kitia e lautolu he nonofo agaia a lautolu he Fahi Uta ne holo atu i mua ha lautolu. Ko e moli, ko e fetu nakai fa mahani ai a nei, ka kua foaki pauaki mai ke takitaki aki a lautolu. Ne mumui e tau makoi ki ai ati oti ka e tu mai ki luga he fale ne nonofo a Iosefa mo Maria.

Ne huhu e tau makoi ki fale, ti kitia a Maria mo e hana a tama tote ko Iesu. Ne fakaveveli fakafohifo oti a lautolu ki a ia. Ne aki mai he tau kato ha lautolu e tau mena fakaalofa ko e auro, lipano mo e muro. Ko e magaaho fakamui, he magaaho ke liliu atu mo e tala age ki a Herota e nofoaga he tama, ne poaki tuai he Atua a lautolu ke he miti ke nakai liliu. Ko e mena ia ne liliu a lautolu ke he ha lautolu a motu he taha puhala kehe.

Ko hai he manamanatu e koe ne ta mai e fetu ne holo he lagi ke uta aki e tau makoi? Manatu, nakai takitaki fakahako he fetu a lautolu ki a Iesu i Petelehema. Ka e uta ki Ierusalema ti feleveia a lautolu mo e Patuiki ko Herota ne manako ke kelipopo a Iesu. A po kua taute pihia e ia ane mai ai poaki he Atua ke he tau makoi ke nakai tala age ki a Herota e nofoaga ha Iesu. Ko e fi he Atua, ko Satani ko e Tiapolo, ne manako ke kelipopo a Iesu, mo e fakaaoga e ia e fetu ke moua aki hana manako. Mataio 2:​1-12; Mika 5:2.

▪ Ko e heigoa e fakakiteaga ko e fetu ne kitia he tau makoi ko e fetu nakai fa mahani mau ai?

▪ Ko fe a Iesu he magaaho ne moua ai he tau makoi?

▪ Ko e iloa he ha e tautolu ko Satani ne ta mai e fetu ke mumui ai e tau makoi?