Veveheaga 8

Fehola Mai he Pule Favale

NE FAFAGU e Iosefa a Maria ke talaage ki a ia e tala mafiti. Ko e agelu ha Iehova ne fakakite mai ki a ia, mo e pehe: “Matike a, ti uta e tama tote mo e hana matua fifine, mo e fehola ki Aikupito ke nonofo ai ato tala atu e au kia koe; ha ko e kumi ha ne fai e Herota e tama tote ke kelipopo a ia.”

Ne fakamafiti a lautolu tokotolu ke fehola. Kua lata tonu ni e magaaho ia ha kua iloa e Herota kua fakavai he tau makoi a ia mo e kua toka tuai e lautolu e motu. Manatu, ko e mena kua lata ia lautolu ke liliu ke talaage ki a ia ka moua e lautolu a Iesu. Ne ita lahi a Herota. Ti ko e laliaga ke kelipopo ia Iesu, ne poaki e ia ke kelipopo oti e tau tama tane i Petelehema mo e hana a tau katofia, mo e tau fanau ne ua tau mo e tatao hifo. Ne fuafua e ia e tau tau nei ke he tau tala ne moua e ia mai he tau makoi ne o mai fakamua ki a ia mai he Fahi Uta.

Ko e kelipopo he tau tama tane mukemuke oti ko e taha na mena kelea muikau ke kitia! Ne o atu e tau kautau ha Herota ke he taha fale mo e taha fale. Ka moua e lautolu e tama tane mukemuke, ne hamuti e lautolu a ia mai he tau lima he matua fifine. Ne nakai iloa e tautolu ko e fiha e tama mukemuke ne kelipopo e lautolu, ka ko e tagi aue mo e tagi tatuki fakalahi he tau matua fifine ne fakamoli ai e perofetaaga he perofeta he Atua ko Ieremia i loto he Tohi Tapu.

Ka ko e magaaho taha ia, ko Iosefa mo e hana magafaoa kua hohoko mo e hao ki Aikupito, mo e nonofo a lautolu i ai ke he magahala ia. Ka ko e taha po ne liu fakakite mai e agelu a Iehova ki a Iosefa ke he miti. “Matike a, ti uta e tama tote mo e hana matua fifine,” he talahau he agelu, “ati o atu a ke he motu ko Isaraela; nukua mamate tuai a lautolu ne kumi e tama tote ke kelipopo.” Ti ko e fakamoliaga he taha perofetaaga he Tohi Tapu ne pehe to ui mai e Tama he Atua i Aikupito, ne liliu e magafaoa ke he ha lautolu a motu.

Ko e amaamanakiaga ha Iosefa ke nonofo i Iutaia, he taone i Petelehema tuga he magaaho fakamua to fehola a lautolu ki Aikupito. Ka e iloa e ia ko Arekilao ko e tama mahani kelea muikau ha Herota e patuiki i Iutaia ke he magahala ia, mo e ke he taha miti ne poaki mai e Iehova ki a ia e hagahagakelea. Ti ko Iosefa mo e hana magafaoa ne o atu ke he fahi tokelau mo e nonofo he taone ko Nasareta i Kalilaia. Ke he maga nei, ne fakatoka kehe mai mo e lotouho he moui lotu faka-Iutaia, ne tupu hake ai a Iesu. Mataio 2:​13-23; Ieremia 31:15; Hosea 11:1.

▪ Ko e magaaho ne nakai liliu mai e tau makoi, ko e heigoa e tau mena kelea muikau ne taute he patuiki ko Herota, ka e fakahao fefe a Iesu?

▪ Ko e magaaho ne liliu mai i Aikupito, ko e ha ne nakai liu a Iosefa ke nofo i Petelehema?

▪ Ko e heigoa e tau perofetaaga he Tohi Tapu ne fakamoli he magahala ia?