Veveheaga 22

Ui ke he Fa e Tau Tutaki

MOLE e lali ke kelipopo a Iesu he hana maga moli i Nasareta, ne fano a ia ke he maga ko Kapanaumi ne tata ke he Tahi Kalilaia. Ne fakamoli he mena nei e taha perofetaaga ha Isaia. Ko e perofetaaga ne talahau tuai ke he tau tagata Kalilaia ne nonofo he tapa tahi ka kitia e maama lahi.

He taute e Iesu hana a gahua fakamaama he fakamatala ke he Kautu hinai, ne moua e ia tokofa hana a tau tutaki. Kua fita a lautolu nei he fakatauo mo ia fakamua, ka kua liliu ke he ha lautolu a gahua takafaga ika he magaaho ne liliu mai mo Iesu i Iutaia. Ne liga kumi e Iesu a lautolu he magaaho nei, ha kua hoko ke he magaaho ke moua e tau lagomatai mau ke maeke ia ia ke fakaako ke matutaki e gahua fakamatala ka mole a ia.

Ko e magaaho ne fano a Iesu he mataafaga mo e kitia a Simona Peteru mo e hana a tau kapitiga ne fakamea ha lautolu a tau kupega, ne finatu a ia ki a lautolu. Ne toli a ia ki loto he foulua ha Peteru mo e ole ke o kehe mai he kauvai. He mamao atu mai he kauvai, ne nofo hifo a Iesu he foulua mo e kamata ke fakaako atu ke he moto tagata he mataafaga.

Ko e magaaho fakamui, ne pehe a Iesu ki a Peteru: “Ati ueue atu a ke he mena hokulo, mo e tuku hifo ai ha mutolu a tau kupega ke moua ai e falu a ika.”

“Ko e Iki na e,” he tali e Peteru, “ne tukumate a mautolu ne po, ati ahogia, ka e nakai moua ha mena; ka ko e hau a kupu to tuku hifo ai e au e kupega.”

Ko e magaaho ne tuku hifo ai e kupega, ne loga lahi e tau ika ne puto ai, ti kamata e kupega ke mahe. Ne fakamafiti, he kemokemo atu ke he tau hoa he foulua ne tata mai ke o mai ke lagomatai. Ko e magaaho ia ni ne puke e tau foulua ne ua he tau ika loga mo e kamata a lautolu ke tomo. He kitia e mena nei, ne fakaveli hifo a Peteru i mua ha Iesu mo e pehe: “Ko e Iki na e kia haele kehe a koe ia au, ha ko au ko e tagata hala.”

“Ua matakutaku a koe,” he tali e Iesu. “Ke kamata he vaha nai ke moua ai e koe e tau tagata.”

Ne uiina foki e Iesu e matakainaga ha Peteru ko Aneterea. “Kia mumui mai a kia au,” he fakalagalaga e ia, “to eke e au a mua mo takafaga ke he tau tagata.” Ko e ha laua a tau hoa takafaga ika ko Iakopo mo Ioane, ko e tau fanau ha Sepetaio, ne foaki age e uiina taha ia, mo e talia foki e laua mo e nakai fai fakauaua. Ko lautolu tokofa nei ne toka ha lautolu a pisinisi takafaga ika mo e eke a lautolu mo tau lagomatai mau fakamua ha Iesu ke mumui ki a ia. Luka 5:​1-11; Mataio 4:​13-22; Mareko 1:​16-20; Isaia 9:​1, 2.

▪ Ko e ha ne ui e Iesu hana tau tutaki ke mumui ki a ia, mo e ko hai a lautolu nei?

▪ Ko e heigoa e mana ne matakutaku a Peteru?

▪ Ko e takafaga ika fefe ne uiina e Iesu hana a tau tutaki ke taute?