Veveheaga 27

Ko e Uiaga ha Mataio

NAKAI leva he mole e fakamalolo e tagata pareluti ne fano kehe a Iesu i Kapanaumi ka e finatu ke he Tahi i Kalilaia. Ne o mai foki e moto tagata ki a ia, mo e kamata a ia ke fakaako atu ki a lautolu. Ha ne finatu a ia, ti kitia e ia a Mataio, ne fakahigoa foki ko Levi, ha ha a ia he ofisa oko tukuhau. “Mui mai a koe kia au,” e uiina ha Iesu.

Tuga kua fita e mahani ha Mataio mo e tau fakaakoaga ha Iesu, tuga foki a Peteru, Aneterea, Iakopo mo Ioane he magaaho ne ui ai ki a lautolu. Tuga ni a lautolu ia, ko e magaaho ia ni ne talia e Mataio e uiina. Ne matike a ia, toka hana gahua ko e oko tukuhau, mo e mui ki a Iesu.

Ko e magaaho fakamui, liga ke fakamanatu aki hana uiaga, ne taute e Mataio e galue he taliaaga ke he hana fale. Fakalataha foki mo Iesu mo e Hana tau tutaki, ko e tau kapitiga fakamua ha Mataio. Ko e tau tagata nei ne mahani ke vihiatia he ha lautolu a tau matakainaga Iutaia ha ko lautolu ne oko e tau tukuhau ma e tau pule Roma ne ita lahi ki ai. Ko e taha mena foki, ne fa mahani a lautolu ke oko fakalahi e tau tukuhau mai he mena kua lata ha ko e ha lautolu a tau mahani nakai fakamoli.

Ne kitia e lautolu a Iesu he galue mo e tau tagata pihia, ne huhu e tau Farasaio ke he hana tau tutaki: “Ko e ha ne kai mena ai ha mutolu a akoako fakalataha mo e tau telona mo e tau tagata hala?” Ne logona e Iesu e huhu, ti tali e Iesu e tau farasaio: “Nakai aoga e ekekafo ke he tau tagata malolo, ka ko e tau tagata gagao hokoia. Ati o a, ke ako po ke heigoa e kakano he kupu ē, Mena loto au ke he fakaalofa noa, ka e nakai ko e poa; ha ko e mena nakai hau au ke ui ke he tau tagata tututonu, ka ko e tau tagata hala kia tokihala a lautolu.”

Ko e kakano, ha kua uiina e Mataio a lautolu nei ko e tau tagata oko tukuhau ke he hana fale ke maeke ke fanogonogo ki a Iesu mo e moua e fakamaloloaga fakaagaga. Ko e mena haia ne fakalataha ai a Iesu mo lautolu ke lagomatai a lautolu ke moua e fakafetuiaga malolo mo e Atua. Ne nakai fakavihia e Iesu e tau tagata pihia, ke tuga e tau Farasaio fia tututonu. Ka kua fakalagalaga he fakaalofa hofihofi noa a ia ke fekafekau ko e ekekafo fakaagaga ki a lautolu.

Ti ko e fakaalofa noa ha Iesu ke he tau tagata hala nakai ko e fakamagaloaga he ha lautolu a tau hala ka ko e fakakiteaga he fakaalofa hofihofi noa taha ia ne fakakite e ia ki a lautolu ne gagao ke he tino. Manatu, ma e fakatai, he magaaho ne fakaalofa hofihofi noa a ia mo e aamo atu e tagata lepela, mo e pehe: “Na loto au ki ai, kia mea a koe.” Kia pihia foki a tautolu ke fakakite e fakaalofa noa ke lagomatai e tau tagata ne matematekelea mua atu e lagomatai fakaagaga ki a lautolu. Mataio 8:3; 9:​9-13; Mareko 2:​13-17; Luka 5:​27-32.

▪ Ko fe a Mataio he magaaho ne kitia e Iesu a ia?

▪ Ko e heigoa e gahua ha Mataio, mo e ko e ha e tau tagata ia ne vihiatia lahi he falu Iutaia?

▪ Ko e heigoa e hokotaki hagaao ki a Iesu, ti tali fefe e ia?

▪ Ko e ha ne fakalataha atu a Iesu mo e tau tagata hala?