Veveheaga 85

Kumi a Lautolu ne Galo

NE FIAFIA lahi a Iesu ke kumi a lautolu ka fekafekau mo e fakatokolalo ke he Atua. Ko e mena haia ne kumi e ia mo e tutala ke he tau tagata oti hagaao ke he Kautu, putoia ai foki e tau tagata ne mua atu e agahala. Ko e tau tagata pihia ne fakatata mogonei ke fanogonogo ki a ia.

Ne kitia e mena nei ti tala noa he tau Farasaio mo e tau tohikupu a Iesu he fakalataha mo e tau tagata ne manamanatu e lautolu ko e nakai fai aoga. Ne loma a lautolu: “Kua talia he tagata nai e tau tagata hala, kua kai fakalataha foki a ia mo lautolu.” Ko e onoonoaga tokolalo lahi a ia ki a lautolu! Ne taute he tau Farasaio mo e tau tohikupu e tau tagata tokolalo tuga e kelekele he tau alohui ha lautolu. Ko e moli, ne fakaaoga e lautolu e talahauaga Heperu ‛am ha·’aʹrets, “tau tagata he motu [kelekele],” ke fakakite aki ha lautolu a onoonoaga fakateaga ke he tau tagata pihia.

Ka ko e taha fahi, ne taute e Iesu e tau tagata oti mo e fakalilifu, totonu mo e fakaalofa hofihofi noa. Ko e fua, tokologa mai ia lautolu tokolalo nei, putoia ai e tau tagata ne talahaua he taute e tau mena hepehepe, ne fiafia ke fanogonogo ki a ia. Ka e kua e loma he tau Farasaio ki a Iesu he gahua mo lautolu ia ne onoono hifo a lautolu ki ai?

Ne tali e Iesu ha lautolu a totoko aki e fakatai. Ne vagahau a ia ke he maamaaga he tau Farasaio, tuga ko e tututonu mo e hagahaga mitaki he lotopa he Atua, ka ko e tau ‛am ha·’aʹrets kelea muikau ke he tuaga hehe mo e galo. Fanogonogo he huhu a ia:

“Ko hai kia taha ia mutolu ne teau hana tau mamoe, kaeke kua galo taha, nakai kia toka e ia e hivagofulu ma hiva ke he vao, ka e fano, mo e kumi e taha ne galo ato moua ai? Ka moua, ti fua mai ai mo e fiafia. Ka hoko atu foki ke he hana fale, ti fakapotopoto ai hana tau kapitiga katoa foki mo lautolu ne katofia mo ia, kua tala age a ia kia lautolu, Kia fiafia a a tautolu, nukua moua tuai e au haku a mamoe ne galo.”

Ne talahau e Iesu e kakano he tala nai hana, he fakamaama: “Kua tala atu e au kia mutolu, ha he lagi e fiafia pihia, kua lahi ni ka tokihala e tagata hala tokotaha; ka e tote e fiafia ke he tau tagata tututonu ne tokohivagofulu ma hiva nakai lata ki ai e tokihala.”

Ne talahau ni he tau Farasaio a lautolu ko e tututonu mo e nakai lata ke tokihala. Ko e magaaho ne loma he falu ia lautolu a Iesu he ua tau fakamua he kai fakalataha mo e tau telona mo e tau tagata hala, ne tala age a ia ki a lautolu: “Ko e mena nakai hau au ke ui ke he tau tagata tututonu, ka ko e tau tagata hala kia tokihala a lautolu.” Ko e tau Farasaio fia tututonu, ne kaumahala ke kitia e lata ha lautolu ke tokihala, ne nakai moua mai ha fiafia he lagi. Ka e moua mai he tau tagata ne tokihala fakamoli.

Ke fakalahi ua e malolo he maamaaga, ko e liu moua mai he tau tagata hala ne kua galo ko e mena ke fiafia lahi, ne liu a Iesu talahau foki e taha fakatai. Ne pehe a ia: “Ko hai kia foki e fifine ne hogofulu hana tau tupe, kaeke kua galo kia ia taha tupe, nakai kia tugi e ia e lamepa, ti tafitafi e fale mo e kumi fakamakutu ato moua ai? Ka moua, kua fakapotopoto ai e ia hana tau kapitiga katoa foki mo lautolu ne katofia mo ia, mo e tala age, Kia fiafia a a tautolu, ha kua moua tuai e au e tupe ne galo ia au.”

Ne foaki foki e Iesu e kakano taha ia ni. Ne matutaki a ia mo e pehe: “Pihia ni e fiafia ha i ai ki mua he tau agelu he Atua, ha ko e tagata hala tokotaha kua tokihala.”

Ko e mua ha ia e mitaki he manamanatu fakaalofa nei he tau agelu he Atua ka moua e tau tagata hala ne galo! Mua atu ke he mena nei ha ko e tau tagata nei, he taha magahala ko e tau ‛am ha·’aʹrets tokolalo mo e fakavihia kua hohoko mai ke he laini ke eke mo tau tagata he Kautu he Atua he lagi. Ko e fua, to moua e lautolu e tuaga i luga he lagi ne tokoluga hake he tau agelu! Ka e nakai mahekeheke po ke ita, ne fakatokolalo mo e fakaaue e tau agelu ke he tau tagata hala nei ha kua feleveia mo e kautu ke he tau tutuaga he moui ke fakakoloa aki a lautolu ke fekafekau ko e tau patuiki mo e tau ekepoa fakaalofa noa i luga he lagi. Luka 15:​1-10; Mataio 9:13; 1 Korinito 6:​2, 3; Fakakiteaga 20:6.

▪ Ko e ha a Iesu ne lafi ai mo e tau tagata hala muikau, mo e ko e heigoa e loma ne moua e ia mai he tau Farasaio?

▪ Fefe e onoonoaga he tau Farasaio ke he tau tagata tokolalo?

▪ Ko e heigoa e tau fakatai ne fakaaoga e Iesu, mo e ko e heigoa ne fakaako mai e tautolu i ai?

▪ Ko e ha e fiafia he tau agelu ne mua ai?