Veveheaga 28

Huhu Hagaao ke he Fakakanopogi

NE TEITEI mole e taha e tau he finatu a Iesu ke he Paseka he 30 V.N. Ka ko e magaaho nei, kua tuku tuai a Ioane ko e Papatiso ke he fale puipui ke he loga e tau mahina. Pete ni he manako a ia ke he hana a tau tutaki ke mumui atu ki a Keriso, nakai o atu oti a lautolu.

Ko e falu he tau tutaki nei ha Ioane ne kua tuku he fale puipui ne o mai ki a Iesu mo e huhu: “Ko heigoa e mena kua fakakanopogi mau ai a mautolu mo e tau Farasaio, ka ko e tau tutaki hau, nakai fakakanopogi a lautolu?” Ko e tau Farasaio ne mahani ke fakakanopogi lagaua he fahi tapu, ko e aga he ha lautolu a lotu. Ko e tau tutaki ha Ioane liga mumui foki ke he aga mo e mahani ia. Liga ko e fakakanopogi foki a lautolu he maanu ha kua tuku a Ioane ke he fale puipui mo e manamanatu ko e ha e tau tutaki ha Iesu ne nakai fakalataha ke maanu auloa.

Ne fakamaama e Iesu ke he tali; “Maeke kia he fakatutuku e tau kapitiga he tagata kitofaihoana, ka ko e ha ha ia lautolu e kitofaihoana? Ka e hoko mai e vaha ke uta kehe ai ia lautolu e kitofaihoana ati fakakanopogi ai a lautolu.”

Kua lata he tau tutaki ha Ioane ke manatu ko e mena vagahau ni e Ioane hokoia ko e Kitofaihoana a Iesu. Ha kua nofo agaia a Iesu mo lautolu, ne nakai lata he manatu e Ioane ke fakakanopogi, ti pihia foki ni e tau tutaki ha Iesu. Ko e magaaho fakamui, he mate a Iesu, ne maanu mo e fakakanopogi hana a tau tutaki. Ka ko e magaaho ne liu tu mai a ia mo e haele hake ke he lagi, ne nakai fai kakano ke maanu mo e fakakanopogi a lautolu.

Mui mai ai, ne fakakite e Iesu e tau fakatai nei: “Nakai fakai taha ke fono ha tapulu popo ke he kala ie fou, ha ko e mena mam[u]tu e tapulu ke he mena ne fono aki, ati au atu ai e mahēhe. Nakai utu foki e lautolu e uaina fou ke he tau lupo kili manu tuai; ka pihia, ti pa ai e tau lupo kili manu, mo e maligi ai e uaina, ti moumou ai foki e tau lupo kili manu; ka e utu e lautolu e uaina fou ke he tau lupo kili manu fou.” Ka ko e heigoa e kakano he tau fakatai nei ke he fakakanopogi?

Ko e lagomatai a Iesu ke he tau tutaki ha Ioane ko e Papatiso ke maama ne nakai fai taha ne amaamanaki ke he hana tau tutaki ke liliu ke taute e tau gahua tuai faka-Iutaia, tuga e taute mau e tau fakakanopogi. Ne nakai hau a ia ke fonofono mo e toka e tau mena he fakatokaaga tuai kua otioti he tapuakiaga nukua lata ke tiaki. Ko e fakaakoaga faka-Kerisiano kua nakai lata ke taute ke mumui ke he faka-Iutaia he vaha mo e hana aga mo e mahani he tau tagata. Nakai, to nakai tuga e fono fou ke he kalaie tuai po ke uaina fou ke he lupo kili manu tuai. Mataio 9:14-17; Mareko 2:18-22; Luka 5:​33-39; Ioane 3:​27-29.

▪ Ko hai ne taute e fakakanopogi, mo e ko e heigoa e kakano?

▪ Ko e ha e tau tutaki ha Iesu ne nakai fakakanopogi he nofo a ia mo lautolu, mo e ka mole atu ia to utakehe fefe e fakakanopogi?

▪ Ko e heigoa e tau fakatai ne talahau e Iesu, mo e ko e heigoa e tau kakano ha lautolu?