Veveheaga 29

Taute e Tau Gahua Mitaki he Sapati

KO E vaha tau tupu he 31 V.N. Ne fai mahina he mole he vagahau a Iesu ke he fifine he vai keli i Samaria he hau a ia i Iutaia ki Kalilaia.

Ke he magaaho ia, he mole e lahi e gahua fakaako hana i Kalilaia, ne toka ai foki e Iesu ka e finatu ki Iutaia, ti fakamatala a ia ke he tau sunako. Ka fakatatai ke he onoonoaga he Tohi Tapu ke he hana a fakamatala ke he tau tagata i Kalilaia, ne tote lahi e talahauaga ke he tau gahua ha Iesu i Iutaia ke he ahiaga nei hana mo e tau mahina foki ne nofo a ia hinei he mole atu e Paseka fakamua. Ko e moli, ne nakai talia lahi hana a fakamatala i Iutaia ke tuga i Kalilaia.

Ne nakai leva ti finatu a Iesu ke he maga lahi ha Iutaia, ko Ierusalema, ke he Paseka he 31 V.N. Ke he mena nei, tata atu ke he Gutuhala Mamoe he maga, e vai ne higoa ko Petesa, ne tokologa e tau tagata gagao, tau matapouli, mo e tau kunekune ne o mai ki ai. Ne talitonu a lautolu ko e malolo e tau tagata ka o hifo ke he vai ke he magaaho ka kalepu ai e vai.

Ko e Sapati, ne kitia e Iesu e tagata ne gagao ke he 38 e tau tau. Ne fioia e leva lahi he gagao he tagata, ti huhu a Iesu: “Kua manako nakai a koe ke fia malolo?”

Ne tali a ia ki a Iesu: “Ko e iki na e, nakai fai tagata au ke tuku hifo au ke he takeleaga, ka kalepu e vai; ka kua finatu au, ti mua hifo taha ia au.”

Ne pehe a Iesu ki a ia: “Ati matike a, uta hau a mohega, ti fano a koe.” Ko e magaaho ia ni ne malolo e tagata, ne uta hana mohega, mo e kamata ke fano!

Ka ko e magaaho ne kitia he tau Iutaia e tagata, ne pehe a lautolu: “Ko e Sapati hanai, kua tapu ke uta ai e koe hāu a mohega.”

Ne tali e tagata ki a lautolu: “Ko ia ne fakamalolo au, kua pehe mai a ia kia au, Uta a hāu a mohega, ti fano a.”

“Ko hai kia e tagata ne tala atu kia koe, Kia uta a hāu a mohega, ti fano?” he huhu e lautolu. Ne fano tuli a Iesu ha ko e moto tagata, mo e ko ia ne fakamalolo ne nakai iloa e higoa ha Iesu. Ka e taha e mena, he magaaho fakamui, ne feleveia a Iesu mo e tagata he faituga, ti iloa he tagata a ia ne fakamalolo a ia.

Ne kumi he tagata ne fakamalolo e tau Iutaia ke tala age ki a lautolu ko Iesu ne fakamalolo a ia. He iloa e mena nei, ne o e tau Iutaia ki a Iesu. Ko e heigoa e kakano? Ke iloa ko e puhala fe ne maeke ia ia ke taute e tau gahua fulufuluola nei? Nakai. Ka ko e kumi hepe ki a ia ha kua taute e ia e tau gahua mitaki he Sapati. Mo e kamata a lautolu ke favale ki a ia! Luka 4:44; Ioane 5:​1-16.

▪ Ka e liga fiha ia e leva mai he ahi fakamua ha Iesu ki Iutaia?

▪ Ko e ha ne mahuiga ai e vai i Petesa?

▪ Ko e heigoa e mana ne taute e Iesu he vai, mo e ko e heigoa ne taute he tau Iutaia?