Veveheaga 32
Ko e Heigoa kua Lata ke he Sapati?
KO E taha Sapati foki ne aahi a Iesu ke he sunako tata ke he Tahi i Kalilaia. Ne ha ha i ai e tagata ne mate hana a lima matau. Ne onoono fakalahi e tau tohikupu mo e tau Farasaio ke takahao ko e fakamalolo nakai e Iesu a ia. Ne huhu a lautolu he magaaho fakamui: “Lata nakai ke fakamalolo tagata ke he sapati?”
Ne talitonu e tau takitaki lotu Iutaia kua lata ke fakamalolo e tagata he Sapati kaeke kua hagahaga kelea e moui. Ne fakaako e lautolu, ma e fakatai, ko e Sapati kua nakai lata ke fakahako e polohui aitu po ke lili e mena ne mafenu. Ti ko e tau tohikupu mo e tau Farasaio ne ta huhu ki a Iesu ke maeke ke fai tukumale ki a ia.
Ka e taha e mena ko Iesu, ne fioia ha lautolu a tau manamanatuaga. Ko e magaaho taha ia, ne mailoga e ia ne ha ha ia lautolu e onoonoaga kehe lahi ne nakai mai he tohiaga tapu ke he moumouaga he aho Sapati ne fakatapu ke nakai gahua. Ti ko e mena ia ne fakatoka e Iesu e fakafeleveiaaga malolo lahi he tala age ke he tagata ne mate e lima: “Ati tu mai a ke he vaha loto.”
Ko e magaaho nei, ne fuluhi a ia ke he tau tohikupu mo e tau Farasaio, ti pehe a Iesu: “Ko hai kia taha ia mutolu ne taha hana mamoe, kaeke ke to foki a ia ke he luo ke he sapati, nakai kia toto ai, mo e ta hake ki luga?” Ha ko e mamoe ko e mouaaga he tau tupe, to nakai toka e lautolu ki loto he luo ke hoko ke he aho hake, to liga ke gagao ti tomo a lautolu. Ko e taha mena foki, ne pehe e tau Tohiaga Tapu: “Kua fakahelehele he tagata tututonu e manu hana.”
Ne fakatatai atu ai, he matutaki e Iesu: “Nakai kia mua e tagata ke he mamoe? ko e mena ia kua lata ai ke mahani mitaki ke he sapati.” Ne nakai maeke he tau takitaki lotu ke totoko e fakakakano tonu mo e fakaalofa ia, ti fakanono a lautolu.
Ne ita mo e momoko hana loto ha kua mao mo e goagoa ha lautolu a tau loto, ti onoono fano a Iesu. Ne tala age a ia ke he tagata: “Ati fakaolo a hau a lima.” Ne fakaolo e ia ti maulu e lima.
Mena kua lata ke fiafia ha kua maulu e lima he tagata, ka e o e tau Farasaio he magaaho ia ni ke pulega mo e matakau fakatufono ha Herota ke kelipopo a Iesu. Ko e matakau fakatufono nei ne maaliali kua putoia ai foki e tau tagata lotu Satukaio. Na fa mahani e matakau fakatufono nei ke taufetoko mo e tau Farasaio, ka kua kau fakalataha a lautolu ke totoko ki a Iesu. Mataio 12:9-14; Mareko 3:1-6; Luka 6:6-11; Tau Fakatai 12:10; Esoto 20:8-10.
▪ Ko e heigoa e fakafeleveiaaga malolo lahi ha Iesu mo e tau takitaki lotu Iutaia?
▪ Ko e heigoa e taofiaga he tau takitaki lotu Iutaia nei hagaao ke he fakamalolo he Sapati?
▪ Ko e heigoa e fakatai ne fakaaoga e Iesu ke fakaako aki ha lautolu a tau onoonoaga hepe?