Veveheaga 44
Fakamilino e Afa Lahi
NE LOGA lahi e tau gahua ha Iesu he aho ia, putoia ai e fakaako he tau moto tagata he mataafaga mo e magaaho fakamui ne fakamaama e tau fakatai ke he hana a tau tutaki hoko lautolu ni. Ko e magaaho afiafi, ne pehe a ia: “Ati o atu a a tautolu ke he fahi atu.”
Ko e fahi uta he mataafaga he Tahi i Kalilaia e matakavi ne fakahigoa ko Tekapoli, mai he kupu Heleni deʹka, ne kakano ko e “hogofulu,” mo e poʹlis, ne kakano ko e “maga.” Ko e tau maga ha Tekapoli ko e lotouho he moui faka-Heleni, mo e nakai fakauaua ko e kaina foki he tokologa he tau Iutaia. Ka e taha e mena nakai loga e tau gahua ha Iesu he matakavi nei. Pihia ni ke he ahiaga nei, ka kitia e tautolu ke he magaaho fakamui, ha kua taofi a ia ke ua nofo leva.
Ko e magaaho ne ole a Iesu ke o ke he taha fahi, ne uta he tau tutaki a ia he foulua. Ka e taha e mena ne mailoga e fenoga ha lautolu. Ne nakai leva ti heheke foki falu he ha lautolu a tau foulua ke o auloa. Ko e mena nakai mamao ke o atu ke he taha fahi. Ko e moli, ko e Tahi i Kalilaia ko e taha na namo lahi ia ko e kavi ke 21 e kilomita he loa mo e lahi ni ko e 12 e kilomita he laulahi.
Maama ai e mategugu ha Iesu. Ti ko e mena ia, nakai la leva e o ha lautolu, ti takoto a ia he muimui he vaka, ti uluga hana a ulu he uluga, mo e pulumohea. Tokologa e tau aposetolo ko e tau kauvaka iloilo, mo e aga he takafaga ika ke he tau fahi oti he Tahi i Kalilaia. Ko e mena haia ne pule a lautolu ke fakaholo e foulua.
Ka e nakai ko e fenoga mukamuka a nei. Ha ko e matagi mafana he fuga namo, ti ko e kavi ke 213 e mita i lalo hifo he fuga he tahi, mo e ko e matagi momoko he tau atu mouga tata mai, ti fa mahani e tau matagi malolo ke havili hifo mo e to fakaofo e afa ke he namo. Ti ko e mena ia ne tupu he magaaho nei. Ne nakai leva ti pa pihi e tau peau ke he foulua mo e pa pihi ki loto, ti kua teitei tomo. Ka e taha e mena, ko e mohe agaia ni a Iesu!
Ko e tau tagata iloilo he o tahi ne fakamakamaka he fakatila e foulua. Ne nakai fai fakauaua na kua mahani a lautolu ke fakalifalifa pihia he tau afa fakamua. Ka ko e magaaho nei kua oti ha lautolu a tau lagatau. Kua lahi e matakutaku ha lautolu ke he tau momoui, ne fafagu e lautolu a Iesu. ‘Ma iki na e, nakai kia fai laveaki a koe? Ko e tomo hane fai a tautolu!’ he vagahau fakalahi e lautolu. ‘Fakamoui a tautolu, ko e tomo hane fai a tautolu!’
Ne matike a ia, mo e poaki a Iesu ke he matagi mo e tahi: “Fakamate a kia milino a.” Ne milino e matagi vale mo e maha foki e tahi. Ne fuluhi a ia ke he hana tau tutaki, mo e huhu a ia: ‘Ko e ha ne matakutaku ai pihia a mutolu? Nakai kia la fai tua a mutolu?’
Ko e mena ia, ne kehe ni e matakutaku kua hoko ke he tau tutaki. “Ko hai kia e tagata nai?” he fehuhuaki a lautolu, “ha ko e mena kua poaki a ia ke he tau matagi mo e vai, ti fanogonogo ai kia ia.”
Ne fakakite e Iesu e malolo lahi! Ko e mafanatia ha ia ke iloa ko e ha ha he Patuiki ha tautolu e malolo ke he tau mena ne tufugatia ti ko e magaaho ka katoatoa e onoonoaga mai hana ke he lalolagi ha tautolu he magaaho he hana pule ke he Kautu, to momoui oti e tau tagata mo e haohao mitaki mai he tau malaia matakutakuina he tau mena ne tufugatia!
Ne fai magaaho he milino e matagi, hohoko mo e haohao mitaki a Iesu mo e hana a tau tutaki ke he fahi uta he mataafaga. Liga fakahao foki e falu foulua mai he afa mo e haohao mitaki e liliu ki kaina. Mareko 4:35–5:1; Mataio 8:18, 23-27; Luka 8:22-26.
▪ Ko e heigoa e Tekapoli, mo e ko fe e matakavi ia?
▪ Ko e heigoa e tau lekua ati tutupu e tau afa lalahi he Tahi i Kalilaia?
▪ Ko e magaaho ne nakai maeke ke fakahao mai he tau iloilo o tahi ha lautolu a lautolu, ko e heigoa he tau tutaki ne taute?