Veveheaga 53

Ko e Pule Malolo Lahi kua Manako ki Ai

NE OFOOFOGIA e tau tagata he fagai fakamana e Iesu e tau afe. “Ko e moli ni, ko e perofeta ia hanai, ke haele mai ke he lalolagi,” he talahau e lautolu. Ne fakahiku e lautolu, nakai ni ko Iesu e perofeta ne mua hake ia Mose ka e eke foki a ia mo patuiki ne manako lahi ki ai. Ti tauteute a lautolu ke taofi a ia ke eke mo patuiki.

Ka ko Iesu, ne fioia e ia e tau fakatokatokaaga he tau tagata. Ne fakamafiti a ia mo e fano kehe ke nakai taofi fakamalolo e lautolu a ia. Ne fakamavehevehe e ia e tau moto tagata mo e poaki ke he hana tau tutaki ke o ke he ha lautolu a foulua ke liliu ki Kapanaumi. Ka e fano a ia ke he mouga ke liogi. Ko e po ia ne ha ha i ai tokotaha ni a Iesu.

Toe tote ti matafatafa e aho ne ono hifo a Iesu he mena tokoluga ne ha ha ai a ia mo e kitia e tau peau lalahi he tahi ne loka ha ko e matagi malolo. Ko e maama he mahina kaulapalapa, ha kua tata ke he Paseka, ne kitia e Iesu e foulua mo e hana tau tutaki ne taufetului he aalo ha ko e tau peau malolo. Ne aalo fakamakamaka e tau tagata tane.

Ne kitia e Iesu e mena nei, ti hifo mai a ia he mouga mo e fano i luga he tau peau ke he foulua. Ko e foulua kua holo ke he liga tolu po ke fa e maila he magaaho ne hoko a Iesu ki ai. Ka e taha e mena, ne fano leva a ia tuga ke mole mai a lautolu. Ko e magaaho ne kitia he tau tutaki a ia, ne tauhea a lautolu: “Ko e aitu.”

Ne tali fakamafana a Iesu: “Ko au ni, ua matakutaku a mutolu.”

Ka e pehe a Peteru: “Ko e Iki na e, kaeke ko koe kia tala mai e koe kia au ke fina atu au kia koe i luga he vai.”

“Ati hau a,” he tali e Iesu.

Ko e magaaho ia ni, ko Peteru, ne hifo mai he foulua kua fano i luga he fuga vai ki a Iesu. Ka ko e onoono atu ke he matagi lahi, ne matakutaku a Peteru, ti kamata ke tomo a ia, kua hea: “Ko e Iki na e, kia fakamoui mai e koe au.”

Ko e magaaho ia ni ne fakaolo e lima hana, ti toto e Iesu a ia mo e pehe: “Ko koe ni ne tua fakatote, ko heigoa e mena ne mahalohalo ai a koe?”

Ne o hake a Peteru mo Iesu ke he foulua, ti milino e matagi, ti ofomate e tau tutaki. Ka kua lata nakai a lautolu ke pihia? Ane mai moua e lautolu e “maama ke he areto” mo e fakaaue ke he mana lahi ne taute e Iesu he tau magaaho gahoa fakamua he fagai e ia e tau afe ke he lima ni e areto mo e ua e ika ikiiki, ti nakai lata ke ofomate lahi ha kua fano a ia ki luga he fuga vai mo e fakamilino foki e matagi. Ka e taha e mena, ko e magaaho nei, ne taute he tau tutaki e hufeilo ki a Iesu mo e pehe: “Ko e moli, ko koe ni ko e Tama he Atua.”

Ne nakai leva ti hohoko a lautolu ki Kenesareta, ko e maga kelekele lau tatai fulufuluola, mo e loga e tau fua mo e tata ki Kapanaumi. Ne tuku taula e foulua ha lautolu i ai. Ka ko e magaaho ne o hake a lautolu ki uta, ne iloa he tau tagata a Iesu mo e o atu ke he tau motu ne agaagai ai, mo e moua a lautolu ne gagao. Ko e magaaho ne tamai a lautolu he ha lautolu a tau mohega mo e piki noa ni ke he ve tapulu ha Iesu, ne malolo oti a lautolu.

Ko e magaaho taha ia ni, ko e moto tagata ne kitia e fagai fakamana he tau afe ne iloa kua fano kehe a Iesu. Ti ko e magaaho ne hohoko mai e tau foulua ikiiki i Tiperia, ne o hake a lautolu he tau foulua nei mo e o atu ki Kapanaumi ke kumi ia Iesu. Ko e magaaho ne moua e lautolu a ia, ne huhu a lautolu: “Rapai na e, ne haele mai ne fe a koe ki hinai?” Ne akonaki e Iesu a lautolu, ka to kitia mafiti e tautolu. Ioane 16:14-25; Mataio 14:22-36; Mareko 6:45-56.

▪ He mole e fagai fakamana e Iesu e tau afe, ko e heigoa he tau tagata nei ne manako ke taute ki a ia?

▪ Ko e heigoa ne kitia e Iesu mai he mouga ne fina atu a ia ki ai, mo e ko e heigoa hana mogoia ne taute?

▪ Ko e ha e tau tutaki ne nakai lata ke ofomate lahi ke he tau mena nei?

▪ Ko e heigoa ne tupu he hohoko a lautolu ki uta?