Veveheaga 52
Fagai Fakamana e Iesu e Tau Afe
NE FIAFIA e tau aposetolo 12 ke he fenoga fakamatala kehe lahi i Kalilaia katoa. Ko e magaaho nei, nakai la leva e kelipopo ha Ioane, ne liliu a lautolu ki a Iesu mo e talahau ha lautolu a tau mena tutupu fulufuluola. Ne mailoga ha lautolu a lolelole mo e tokologa foki e tau tagata ne o atu mo e o mai ti nakai fai magaaho a lautolu ke kai, ati pehe ai a Iesu: ‘O mai a tautolu ke o ke he taha matakavi tokanoa ke maeke a mutolu ke okioki.’
Ne o a lautolu he foulua ha lautolu, liga tata ki Kapanaumi, ne o atu a lautolu ke he matakavi tokanoa, ko e fahi uta i Ioritana he mole atu a Petesaita. Ka e taha e mena, tokologa ne kitia a lautolu ne o, mo e tokologa ne iloa foki. Ne tafepoi a lautolu ki mua ke he mataafaga, ti ko e magaaho ne tu e foulua, kua fita he ha ha i ai e tau tagata ke feleveia mo lautolu.
Ne hopo mai a ia he foulua mo e kitia e moto tagata tokologa, ne hofihofi e fakaalofa ha Iesu ha kua tuga e tau mamoe nakai fai leveki e tau tagata. Ti ko e mena ia ne fakamalolo e ia ha lautolu a tau gagao mo e kamata ke fakaako ki a lautolu e tau mena loga.
Ne mafiti e mole he tau magaaho, ti o mai e tau tutaki ha Iesu ki a ia mo e pehe: “Ko e tutakale hanai, Kua leva tuai e aho; kia fakafano e koe a lautolu ke o atu a lautolu ke he tau kaina mo e tau magamotu ne tata mai, mo e fakafua ai e tau mena kai ma lautolu.”
Ka e taha e mena, ko e tali ne pehe a Iesu: “Kia age e mutolu e falu a mena kai ma lautolu.” Ti ko e magaaho fakamui, ha kua iloa tuai e Iesu e mena hana ke taute, ne kamatamata e ia a Filipo he huhu ki a ia: “To fakatau mai fe e tautolu e tau areto, ke kai ai a lautolu nai?”
Ko e maamaaga ha Filipo nakai maeke ke taute pihia. A ko e 5,000 he tau tagata tane, ti liga molea e 10,000 tagata ka totou foki e tau fifine mo e tau fanau! Ne tali a Filipo: “Nakai lahi e tau areto ke fakatau ke ua e teau e tenari, [ko e tenari he vaha ia ko e totogi ma e taha e aho] kia igatia ai a lautolu mo e hana mena tote.”
Liga ke fakakite e nakai maeke ke fagai e tokologa, ne vagahau mai a Aneterea: “Ha hinai e tama ha ia ia lima e areto karite, mo e ua e ika ikiiki, ka e aoga ha ha e tau mena ia kia lautolu tokologa?”
Ha ko e vaha tau tupu, toe tote ti hoko ke he Paseka he 32 V.N., ne ha ha i ai lahi e motie lanu uhiuhi. Ti tala age a Iesu ke he hana a tau tutaki ke tala age ke he tau tagata ke tatakoto he motie taki 50 mo e taki 100. Ne uta e ia lima e areto mo e ua e ika ti haga hake ke he lagi mo e fakaaue. Ne tofitofi e ia e tau areto mo e vehevehe e tau ika. Ne age e ia ke he tau tutaki ke tufatufa age ke he tau tagata. Ne ofomate lahi, ha kua kai oti e tau tagata mo e mamakona!
Ko e magaaho fakamui ne tala age a Iesu ke he hana tau tutaki: “Kia fakapotopoto e tau valavala mena ne toe, neke moumou ha mena.” Ko e magaaho ne taute pihia e lautolu, ne fafao e lautolu 12 e kato ne puke ke he tau valavala mena ne toe he kai e lautolu! Mataio 14:13-21; Mareko 6:30-44; Luka 9:10-17; Ioane 6:1-13.
▪ Ko e ha ne kumi e Iesu e matakavi tokanoa ma e hana a tau aposetolo?
▪ Uta e Iesu hana a tau tutaki ki fe, mo e ko e ha ne nakai moua e okioki ha lautolu?
▪ Ko e magaaho ne pouli ai, ko e heigoa ne fakaohooho he tau tutaki, ka e leveki fefe e Iesu e tau tagata?