Veveheaga 58

Ko e Tau Areto mo e Fakaea

KO E tau moto tagata ne fuhifuhi mai ki a Iesu i Tekapoli. Tokologa ne o mai mamao ke he maga nei ne tokologa he tau Motu Kehe ke fanogonogo ki a ia mo e fakamalolo mai he ha lautolu a tau gagao. Ne tamai e lautolu mo lautolu e tau kato lalahi ne fa mahani a lautolu ke tuku aki e tau kai ka o fenoga ke he tau maga Motu Kehe.

Ka e taha e mena, ko e fakahikuaga, ne ui a Iesu ke he hana tau tutaki mo e pehe: “Kua hofihofi haku a fakaalofa ke he lanu tagata ha ko e aho tolu ainei he nonofo a lautolu mo au, ti nakai fai mena kai a lautolu. Kaeke foki ke fakafano e au a lautolu ke he tau faoa ha lautolu mo e hoge ti mamate a lautolu he magahehala; ha ko e mena mamao e tau mena ne o mai ai e falu ia lautolu.”

“Mai fe kia e areto ke maeke ai ia taha ke fagai a lautolu ke he tutakale nai?” he huhu he tau tutaki.

Ne huhu a Iesu: “Po ke ne fiha ha mutolu a tau areto?”

“Ne fitu,” he tali e lautolu, “mo e tau ika gahoa to ikiiki.”

Ne tala age ke he tau tagata ke tatakoto ke he kelekele, ne uta e Iesu e tau areto mo e tau ika, ti liogi ke he Atua, tofitofi a lautolu, mo e age ke he hana tau tutaki. Ko lautolu mogoia ne tufa ke he tau tagata, ne kai a lautolu mo e mamakona ai. Ko e magaaho fakamui, he oko e tau valavala ne toe, ne puke ai fitu e kato tuku kai, pete ni he liga ko e 4,000 he tau tagata tane, fakalataha mo e tau fifine mo e tau fanau ne kai!

Ne fakafano e Iesu e tau tagata ke o, ti heke a ia he foulua mo e hana tau tutaki mo e o ke he fahi lalo he mataafaga he Tahi i Kalilaia. Ko e matakavi nei ko e tau Farasaio, he magaaho nei fakalataha mo e tau tagata he lotu he tau Satukaio, ne lali ke kamatamata a Iesu mo e ole ki a ia ke fakakite e taha fakamailoga mai he lagi.

Ne mailoga ha lautolu a lali ke kamatamata a ia, ne tali e Iesu: “Ka hoko ke he afiafi, kua pehe ai a mutolu, To afua, nukua kula mai e lagi. Ka pogipogi foki, kua pehe ai a mutolu, To uha e aho nai, nukua kula mai mo e malumalu hifo e lagi. . . . kua iloa e mutolu ke fakafili e mahani he lagi, ka ko e tau fakamailoga he tau vaha nakai kia maeke ia mutolu?”

Ko e mena ia, ne ui e Iesu a lautolu ko e hau kelea mo e feuaki mo e poaki ki a lautolu ko e, tuga he tala age ke he tau Farasaio he magaaho fakamua, to nakai fai fakamailoga ke foaki age ki a lautolu ka ko e fakamailoga ni ha Iona. Ne fano kehe a ia, ko ia mo e hana tau tutaki ne o he foulua mo e o atu ki Petesaita ke he fahi tokelau ki uta he mataafaga he Tahi i Kalilaia. Ke he fenoga ne mailoga he tau tutaki kua nimo ia lautolu ke uta e tau areto, ko e taha ni e areto mo lautolu.

Ne manatu e ia e feleveiaaga fou hana mo e tau Farasaio mo e tau Satukaio ko e tau tagata lagomatai ha Herota, ne tomatoma e Iesu: “A mutolu, kia kalo kehe a mutolu mo e mena fakaea he tau Farasaio, mo e mena fakaea a Herota.” Ko e moli, ko e tala ke he fakaea ne manatu e tau tutaki ko e tala a Iesu he nimo ia lautolu ke uta e areto, ti kamata a lautolu ke taufetoko ke he mena ia. Ne mailoga e ia ha lautolu a nakai maama, ati pehe a Iesu: “Ko e heigoa e mena ne fevagavagahauaki ai a mutolu he nakai fai mena kai a tautolu?”

Ne nakai la leva, ne foaki fakamana e Iesu e areto ma e tau afe tagata, taute e mana fakahiku nai liga ko e taha ni po ke ua e aho fakamua. Kua lata a lautolu ke iloa kua nakai hagaao a Iesu ke he nakai fai areto moli. “Nakai kia manatu a mutolu,” he fakamanatu e ia ki a lautolu, “ne tofitofi e au lima e areto ke he lima e afe tagata, ti fiha kia e kato ne puke he tau mena kai ne toe ne uta e mutolu?”

“Ne hogofulu ma ua ni,” he tali e lautolu.

“Katoa mo e fitu ke he fa e afe, ti fiha kia e kato kua puke he tau mena kai ne uta e mutolu?”

“Ne fitu la,” he tali e lautolu.

“Nakai logona fefe e mutolu?” he huhu e Iesu. “Nakai ko e areto ne tala atu ai e au kia mutolu, kia kalo kehe a mutolu mo e mena fakaea he tau Farasaio mo e tau Satukaio.”

Ne maama he tau tutaki ke he magaaho fakamui e matakupu. Ko e mena fakaea, ne fa mahani ke ea lahi e falaoa, ko e kupu ne fakaaoga ke talahau aki e kelea. Ti ko e magaaho nei kua maama he tau tutaki kua fakaaoga e Iesu e fakataiaga, ko e fakalaga e ia a lautolu ke puipui mai he tau “kupu he tau Farasaio mo e tau Satukaio,” ko e tau fakaakoaga ne maeke ke fakahehe mo e fakavai. Mareko 8:1-21; Mataio 15:32–16:12.

▪ Ko e ha e tau tagata ne ha ha ia lautolu e tau kato lalahi?

▪ Magaaho ne toka a Tekapoli, ko e heigoa e tau fenoga foulua ne uta e Iesu?

▪ Ko e heigoa e nakai maama he tau tutaki hagaao ia ke he talahauaga ha Iesu ke he fakaea?

▪ Ko e heigoa e kakano ha Iesu ke he talahauaga ko e “mena fakaea he tau Farasaio mo e tau Satukaio”?