Veveheaga 56

Ko e Heigoa ke Kelea e Tagata?

KUA mao lahi e totoko ki a Iesu. Nakai ni kua tokologa e tau tutaki hana ne kua o kehe ka kua kumi foki he tau Iutaia a ia i Iuta ke kelipopo, tuga ni he kumi e lautolu a ia i Ierusalema he magaaho he Paseka he 31 V.N.

Ko e Paseka he magaaho nei he 32 V.N. Ke lata mo e manako he Atua ke fakalataha, ne hake a Iesu ke he Paseka i Ierusalema. Ka e taha e mena, kua hake a ia mo e mataala ha kua tu hagahagakelea hana moui. Ko e magaaho fakamui ne liu a ia ki Kalilaia.

Liga ko Iesu i Kapanaumi he magaaho ne o mai e tau Farasaio mo e tau tohi kupu i Ierusalema ki a ia. Ko e kumi a lautolu ke he taha mena ke hokotaki aki a ia he moumou e fakatufono lotu. “Ko heigoa e mena kua holi ai he tau tutaki hau e kupu toka tuai he tau tagata i tuai?” he huhu e lautolu. “Ha ko e mena kua nakai holoholo ha lautolu a tau lima ka kai mena a lautolu.” Nakai manako e Atua ke he mena nei, ka e manatu e tau Farasaio ko e mena kelea lahi ke nakai taute e tau mena toka tuai, tuga e holoholo he tau lima ke hoko ke he tau tuli lima.

Ne nakai tali e ia hagaao ke he hokotaki, ne tuhi a Iesu ke he ha lautolu a tau mahani kelea mo e moumou pauaki e Fakatufono he Atua. “Ka ko mutolu, ko e ha kua holi ai e mutolu e poaki he Atua ke he tau kupu toka tuai ha mutolu?” he manako a ia ke iloa. “Ha kua poaki mai e Atua, kua pehe mai, Kia fakalilifu a koe ke he hau a matua tane mo e hau a matua fifine; mo e taha kupu foki, Ko e tagata kua kupu kelea ke he matua tane, po ke matua fifine, kia kelipopo ni a ia. Ka e pehe a mutolu, Ko ia ka tala age ke he matua tane, po ke matua fifine, Ko e haku a tau mena oti kua aoga ki a koe; kua foaki ia mo poa ke he Atua; ti nakai tuai fakalilifu a ia ke he hana matua tane.”

Ko e moli, ne fakaako he tau Farasaio ko e tupe, tau koloa po ke ha mena ni kua tukulele mo mena fakaalofa ke he Atua kua lata ni ma e faituga mo e nakai maeke ke fakaaoga ke he taha mena foki. Ka e taha e mena, ko e mena fakaalofa ne fakatapu ko e mena toka ni he tagata ne fakatapu e mena ia. Ko e puhala nei ko e tama tane, ko e talahauaga noa ke he hana tupe po ke koloa ko e “kopano”​—ko e mena fakaalofa ke he Atua po ke faituga​—kua kalo mai he hana kotofaaga ke lagomatai hana tau matua fuakau, ne liga ko e lahi e matematekelea.

Liga ita lahi ke he tau mahani kelea he tau Farasaio he hikihiki e Fakatufono he Atua, ti pehe a Iesu: “Kua fakahui e mutolu e poaki he Atua ke he tau kupu toka tuai ha mutolu. Ko e tau tagata fakavai na e, lata ni e talahau a Isaia kia mutolu, ne pehe mai, Kua fakatata mai kia au e motu nai ke he tau gutu ha lautolu, mo e fakaheke mai kia au ke he tau laugutu ha lautolu; ka ko e tau loto ha lautolu, kua fakamamao a ia ia au. Kua tapuaki noa mai a lautolu kia au he fakaako e lautolu e tau poaki he tau tagata.”

Liga kua tolomuli ki tua e moto tagata ka e ata e tau Farasaio ke huhu ki a Iesu. Ko e magaaho nei, ne nakai fai tali e tau Farasaio ke he vale lahi ha Iesu ki a lautolu, ti hea e ia e moto tagata ke fakatata mai. “Fanogonogo oti mai a a mutolu kia au,” he talahau e ia, “mo e logona ai e mutolu. Nakai fai mena i fafo he tagata ke fano ki loto ia ia, ke maeke ai ke kelea a ia; ka ko e tau mena ne hau i loto ia ia, ko e tau mena ia ke kelea ai e tagata.”

Ko e magaaho fakamui, he huhu a lautolu ki fale, ne huhu hana tau tutaki: “Kua fioia nakai e koe, kua tupetupe e tau Farasaio he logona e lautolu e kupu ia?”

“Ko e tau akau oti nakai to he haku Matua ha ha he lagi to huo ia,” he tali e Iesu. “Toka ai pihia a lautolu, ko e tau matapouli a lautolu ke takitaki e tau matapouli; kaeke ke takitaki he matapouli e taha matapouli, ti veveli ai a laua tokoua ke he luo.”

Ne tuga ko e ofo a Iesu he magaaho he hukui e tau tutaki, he huhu a Peteru ke fakamaama ko e heigoa ke kelea ai e tagata. “Nakai kia la logona foki e mutolu?” he tali e Iesu. “Nakai kia la iloa foki e mutolu, ko e tau mena oti kua tuku ke he gutu, kua hoko ia ke he manava, ti tiaki ke he vao. Ka ko e tau mena ke hau mai he gutu, kua hake ia mai he loto; ko e tau mena ia ke kelea ai e tagata. Ha ko e mena kua hake mai he loto e tau manatu kelea, ko e keli tagata, ko e faivao, ko e feuaki, ko e kaiha, ko e talahau pikopiko, mo e kupu kelea. Ko e tau mena ia ke kelea ai e tagata; ka ko e kai mena mo e tau lima nakai holoholo, nakai kelea e tagata he mena ia.”

Ne nakai fakalolelole e Iesu e mahani fakamea ne fa mahani mau ai. Ne nakai totoko a ia ke pehe nakai holoholo e tau lima to tauteute e tau mena kai po ke to kai he tau magaaho kai. Ko e vihiatia e Iesu e tau mahani fakavai he tau takitaki lotu ne lali ke kalo mo e fakahui e tau fakatufono tututonu he Atua he tapiki mau nivaniva ke he tau aga toka tuai nakai mai he tau kupu tohi. E, ko e tau mahani kelea ne kelea e tagata, mo e fakakite e Iesu kua puna mai e tau mena nei he loto he tagata. Ioane 7:1; Teutaronome 16:16; Mataio 15:​1-20; Mareko 7:​1-23; Esoto 20:12; 21:17; Isaia 29:13.

▪ Ko e heigoa e totokoaga he magaaho nei ne fehagai mo Iesu?

▪ Ko e heigoa e hokotaki he tau Farasaio, ka e mai ia Iesu, moumou pauaki fefe he tau Farasaio e Fakatufono he Atua?

▪ Ko e heigoa e tau mena ne fakakite e Iesu ke kelea ai e tagata?