Veveheaga 109

Fakafili e Iesu Hana Tau Tagata Totoko

NE FAKAGOAGOA katoatoa e Iesu hana a tau tagata totoko fakalotu ati matakutaku a lautolu ke huhu mena atu foki ki a ia. Ti ko e mena ia ne taute e ia ke fakatapakupaku ha lautolu a goagoa. “Ko e heigoa e taofi ha mutolu ke he Keriso?” he huhu e ia. “Ko e tama ha hai a ia?”

“Ko e tama a Tavita,” he tali he tau Farasaio.

Pete ni he nakai fakatikai e Iesu ko Tavita ko e tupuna ne tupu mai a Keriso, po ke Mesia, ne huhu a ia: “Ti kua totoku fefe e Tavita a ia ke he agaga [he Salamo 110], ko ia ko e hana Iki, kua pehe mai, Kua tala age e Iehova ke he haku a Iki, Kia nofo a koe ke he haku a fahi matau, ato eke e au a lautolu kua fai fi kia koe mo fakatuagahui hāu. Hanai, kaeke kua totoku e Tavita a ia ko e, Iki, ke eke fefe a ia mo tama hana?”

Ne fakanono e tau Farasaio, ha ko e mena nakai iloa e lautolu e talahauaga moli ke he Keriso, po ko ia ne fakauku. Ko e Mesia nakai ko e tagata noa ni ne tupu mai ia Tavita, tuga mo e taofiaga he tau Farasaio, ha ko e mena moui a ia ke he lagi mo e tokoluga hake ia Tavita, po ke Iki.

Ne fuluhi he magaaho ia ke he moto tagata mo e hana tau tutaki, ne hataki a Iesu hagaao ke he tau tohikupu mo e tau Farasaio. Ha kua fakaako e lautolu e Fakatufono he Atua, he “nonofo e tau tohikupu mo e tau Farasaio ke he nofoa a Mose,” ne fakaohooho e Iesu: “Ko e tau mena oti ke tala atu ai a lautolu kia mutolu ke omaoma ki ai, kia omaoma a mutolu ki ai mo e eke ai e mutolu.” Ka e lafi atu e ia: “Ka e aua neke fifitaki a mutolu ke he ha lautolu a tau mahani; ha kua talahau e lautolu, ka e nakai ni eke e lautolu.”

Ko e tau tagata fakavai a lautolu, mo e fakafili e Iesu a lautolu ke he tau kupu tuga ne talahau e ia ke he kaiaga mena he fale he Farasaio he falu mahina fakamua. “Kua eke e lautolu ha lautolu a tau mena oti,” he talahau e ia, “kia kitia ai he tau tagata.” Ne fakakite mai e ia e tau fakataiaga, he mailoga:

“Kua fakalaulahi foki e lautolu ha lautolu a tau filateri.” Ko e tau tama puha ikiiki nei, ne tautau he matale po ke lima, ne toka ai fa e vala he Fakatufono: Esoto 13:​1-10, 11-16; mo e Teutaronome 6:​4-9; 11:​13-21. Ka kua fakalalahi he tau Farasaio e tau tama puha nei ke kitia kua fakamakutu lahi a lautolu ke he Fakatufono.

Ne matutaki a Iesu ko e “fakalahi e tau kala [fakafelefele] tapulu ha lautolu.” He Numera 15:​38-40 ne poaki ke he tau Isaraela ke taute e tau fakafelefele ke he tau tapulu ha lautolu, ka kua fakalalahi he tau Farasaio ha lautolu mai he tau tagata oti. Ne taute e tau mena oti he fia kitia! “Kua fiafia foki a lautolu ke he mena mua,” he fakailoa e Iesu.

Kua momoko ai he pikitia foki hana tau tutaki he manako fia mua. Ko e mena haia ne fakatonu e ia: “Ka ko mutolu, aua neke ui a mutolu Rapai; ha ko e mena tokotaha ha mutolu a akoako, ko e Keriso haia; ka ko mutolu oti, ko e matakainaga a mutolu. Aua foki neke ui e mutolu taha ke he lalolagi ko e matua ha mutolu; ha ko e mena Tokotaha ha mutolu a Matua, ko Ia ha he lagi. Ti aua neke ui a mutolu ko e tau takitaki; ha ko e mena tokotaha ha mutolu a Takitaki, ko e Keriso haia.” Kua lata e tau tutaki ke tiaki e manako ke numera taha mai ia lautolu! “Ka ko e tagata ia mutolu kua mua, kia eke a ia mo fekafekau ha mutolu,” he akonaki e Iesu.

Ne fakailoa foki e ia e tau malaia he tau tohikupu mo e tau Farasaio, he ui lagaloga e ia a lautolu ko e tau tagata fakavai. Ne “pa e [la]utolu e kautu he lagi ke he tau tagata,” he talahau e ia, mo e “kua fakaoti e lautolu e tau fale he tau fifine takape, kua liogi fakaleleva foki ke eke mo ufiufi.”

“Oi fakaalofa kia mutolu ko e tau takitaki matapouli,” he talahau e Iesu. Ne fakafili e ia e gati fakaagaga he tau Farasaio, ne fakamoli ai he tau fakakeheaga ne taute e lautolu. Ke fakatai, ne pehe a lautolu, “Ka omonuo taha ke he faituga ko e mena noa ia; ka ko ia kua omonuo ke he auro he faituga, kua mau a ia.” He lahi e peehiaga ha lautolu ke he auro he faituga ka e nakai ko e aoga fakaagaga he faituga mo tapuakiaga, kua fakakite e lautolu e matapouli fakaagaga ha lautolu.

Ti, tuga he taute e ia fakamua, ne fakafili e Iesu e tau Farasaio he tiaki “e tau mena he Fakatufono ne mua, ko e fakafili tonu, mo e fakaalofa noa, mo e fakamoli” ka e fakamakutu ha kua totogi e mena ne hogofulu aki he tau akau fakateaga.

Ne ui e Iesu e tau Farasaio ko e “tau takitaki matapouli, kua lehu kehe e mutolu e namu, ka kua folofua e mutolu e kamela.” Ne hakahaka e lautolu e namu mai he uaina ha lautolu nakai ha ko e manu tote hokoia ka ko e mena kiva ke he fakamanatuaga. Ka e, ko e tiaki e lautolu e tau mena uho he Fakatufono kua tatai ni mo e folofua he kamela, ko e manu kiva foki ke he fakamanatuaga. Mataio 22:41–23:24; Mareko 12:35-40; Luka 20:41-47; Levitika 11:4, 21-24.

▪ Ko e ha ne fakanono e tau Farasaio he huhu a Iesu ki a lautolu hagaao ke he talahauaga ha Tavita he Salamo 110?

▪ Ko e ha ne fakalalahi he tau Farasaio ha lautolu a tau puha ne tuku ai e tau Tohiaga Tapu mo e tau felefele he ha lautolu a tau kala tapulu?

▪ Ko e heigoa e fakatonuaga ne foaki e Iesu ke he hana tau tutaki?

▪ Ko e heigoa e tau fakakeheaga ne taute he tau Farasaio, mo e fakafili fefe e Iesu a lautolu he kua tiaki e lautolu e tau mena uho?