Veveheaga 59

Ko Hai Moli a Iesu?

KO E magaaho ne hoko e foulua ne o ai a Iesu mo e hana tau tutaki ki Petesaita, ne ta mai he tau tagata e tagata matapouli mo e ole fakatokolalo ke aamo e ia e tagata mo e fakamalolo a ia. Ne takitaki e Iesu e lima he tagata ki tua he maga mo e anu ke he hana tau mata mo e huhu: “Po ke ne kitia nakai e koe ha mena?”

“Kua kitia e au e tau tagata,” he tali he tagata, “tuga ne tau akau a lautolu ha ne o he kitia e au.” Ne fakalago hana tau lima ke he tau mata he tagata ti liuaki mai e maama ke he hana tau mata ke kitia mitaki e tau mena oti. Ne fakafano e Iesu e tagata ki kaina mo e tala age ke nakai finatu ke he maga.

Ne o a Iesu mogonei mo e hana tau tutaki ke he tau maga i Kaisaria Filipi ke he fahi mamao atu i tokelau ha Palesetaina. Ko e toli hake he hala loa, liga ko e 50 e kilomita ke he matakavi fulufuluola ha Kaisaria Filipi, ko e 350 e mita he mamao hake he tahi. Liga ko e fenoga kua liga lata ke ua e aho.

He puhala, ne finatu ni a Iesu tokotaha ke liogi. Ko e toe hiva po ke hogofulu ni e mahina ne toe to hoko e mate hana, mo e tupetupe a ia ke he hana tau tutaki. Tokologa ne kua o kehe nakai mumui ki a ia. Ko e falu kua fakaatukehe mo e lolelole he nakai talia e ia e lali he tau tagata ke taute a ia mo patuiki mo e nakai talia ai e ia he magaaho ne paleko he tau fi hana, ke fakakite ha fakamailoga mai he lagi ke fakamoli aki hana kotofaaga patuiki. Ko e heigoa e talitonu he hana tau aposetolo ki a ia? Ko e magaaho ne o atu a lautolu ke he matakavi ne liogi ai a ia, ne huhu e Iesu: “Ko e heigoa e tau kupu he tau tagata kia au po ko hai?”

“Ko e kupu he falu ko koe ko Ioane ko e Papatiso,” he tali e lautolu, “ka ko e falu, ko Elia; ka ko e falu, ko Ieremia, po ke taha he tau perofeta.” E, ko e manatu e tau tagata nei ko Iesu taha ia lautolu ne kua liliu tutu mai he mate!

“Ka ko mutolu, po ke heigoa e kupu ha mutolu kia au, po ko hai?” he huhu e Iesu.

Ne tali fakaave a Peteru: “Ko koe ko e Keriso, ko e Tama he Atua moui.”

Ne oti e tau kupu vagahau fiafia ke he tali ha Peteru, ti pehe a Iesu: “Kua tala atu nai e au kia koe, Ko Peteru a koe, to fakatu foki e au haku a ekalesia ki luga he maka nai; ti nakai kautu ki ai e gutuhala a hate.” Ko e mena nai ne fakailoa fakamua e Iesu to fakatu e ia e ekalesia mo e to nakai taofi he mate e tau tagata he ekalesia ka mole e fekafekauaga fakamoli ha lautolu he lalolagi. Ko e magaaho nei ne tala age a ia ki a Peteru: “To ta atu foki e au kia koe e tau kei he kautu he lagi.”

Ne fakakite e Iesu to moua e Peteru e tau fakamonuinaaga pauaki. Nakai, foaki ki a Peteru e tuaga fakamua ke he tau aposetolo, nakai ko ia foki e fakaveaga he ekalesia. Ko ia ni ko Iesu e Maka ka fakatu ai hana ekalesia. Ka e foaki age ki a Peteru tolu e kei ke tuga ko e hafagi, ke fai magaaho e tau vahega he tau tagata ke huhu ke he Kautu he lagi.

To fakaaoga e Peteru e kei fakamua he Penetekoso he 33 V.N. ke fakakite ke he tau Iutaia ne tokihala e tau mena ke taute e lautolu ke moua e moui. To fakaaoga e ia e kei ke uaaki he nakai leva he mole ke hafagi ke he tau Samaria talitonu ke fai magaaho ke huhu ke he Kautu he Atua. Ko e 36 V.N. to fakaaoga e ia e kei ke toluaki ke hafagi ke he tau Motu Kehe nakai peritome, ko Konelio mo e hana tau kapitiga, ka moua e magaaho pihia foki.

Ne matutaki e Iesu hana fakatutalaaga mo e hana tau aposetolo. Ne fakaatukehe e ia a lautolu he tala age e tau mamahi mo e mate ka hoko mafiti ki a ia i Ierusalema. Ne kaumahala ke maama to liu tu mai a Iesu ke he moui he lagi, ti uta e Peteru a Iesu ki tua: “Ko e Iki na e, kia mamao ia koe e mena ia,” he talahau e ia. “Nakai ni hoko e mena ia kia koe.” Ne fuluhi hana tua, ti tali e Iesu: “Ma Satani na e, kia fano a koe ki tua haku; kua eke a koe mo mena ke tupetupe ai au; ha ko e mena nakai ko e tau mena he Atua kua manamanatu a koe ki ai, ka ko e tau mena he tagata.”

Ko e moli, ne ha ha i ai foki falu mo e tau aposetolo ne fakatauo mo Iesu, ti ui e ia a lautolu he magaaho nei ki a ia mo e fakamaama to nakai mukamuka ke mumui ki a ia. “Ko e tagata ne fia mui mai kia au,” he talahau e ia, “aua neke oma e ia a ia, ka e nikiti e ia hana satauro, mo e mui mai kia au. Ka ko e tagata kua fia kuku hana moui to moumou ai kia ia; ka ko ia ke moumou hana moui ha ko au ni, mo e vagahau mitaki to fakamoui ai e ia.”

E, kaeke ke fakakite e lautolu e fakamoli ke he hana fiafia, ko e tau tutaki ha Iesu kua lata ke fakamalolo mo e poa ni e lautolu a lautolu. Ne pehe a ia: “Ka ko e tagata ke ma ia au, mo e haku a tau kupu ke he hau nai kua faivao mo e hala, to ma foki e Tama he tagata kia ia, ka hau a ia fakalataha mo e tau agelu tapu hana, mo e lilifu he hana Matua.” Mareko 8:​22-38; Mataio 16:​13-28; Luka 9:​18-27.

▪ Ko e ha ne tupetupe a Iesu ke he hana tau tutaki?

▪ Ko e heigoa e tau talahauaga he tau tagata ki a Iesu?

▪ Ko e heigoa e tau kei ne foaki age ki a Peteru, mo e fakaaoga fefe a lautolu?

▪ Ko e heigoa e fakatonuaga ne moua e Peteru, mo e ko e ha?