Veveheaga 67

Ne Kaumahala a Lautolu ke Tapaki a Ia

HANE fakamanatu agaia e Galue he Tau Fale Api, ne fakafano he tau takitaki lotu e tau fekafekau leoleo ke tapaki a Iesu. Ne nakai lali a ia ke fakamumuli. Ka e matutaki ni a Iesu ke fakaako ke he tau tagata mo e pehe: “Toe tote he nofo ai au ia mutolu, ti fano ai au kia ia ne fakafano mai au. To kumi e mutolu au, ka e nakai kitia au; ko e mena foki ke nofo ai au, nakai maeke e mutolu he o ki ai.”

Ne nakai maama he tau Iutaia, mo e fehuhuaki a lautolu ni: “To fano ki fe a ia he nakai maeke ke kitia e tautolu a ia? To fano kia a ia ke he tau tagata kua paea ki Heleni, ke fakaako e tau tagata Heleni? Ko heigoa e kupu ne talahau mai nai e ia, To kumi e mutolu au, ka e nakai kitia au; ko e mena foki ke nofo ai au, nakai maeke he o ki ai a mutolu?” Ko e moli, ko e tala a Iesu hagaao ia ke he hana a mate ne tata mai mo e liu tu mai ke he moui he lagi, ka nakai maeke he hana a tau fi ke mumui ki ai.

Ne hoko ke he aho ke fitu aki ko e aho fakamuiaki he galue. Ko e tau pogipogi oti he galue, ne liligi he ekepoa e vai, ne ta mai e ia he Vai i Siloa, ti tafe hifo ke he kelekele he fatapoa. Liga ko e fakamanatu ke he tau tagata ke he fakamanatuaga ia he tau aho takitaha, ati hea fakalahi a Iesu: “Kaeke ke fia inu taha, ati hau a kia au ke inu ai. Ko ia ne tua kia au, ke tuga he talahau mai he Tohi, To lele mai e tau vailele mai loto ia ia, ko e vai moui ni.”

Ko e moli, ko e vagahau a Iesu ke he mena ia hagaao ke he tau mena lalahi ka mumui mai he magaaho ka liligi hifo e agaga tapu. Ko e tau hake ko e liligi hifo nei he agaga tapu ne fakahoko ai he Penetekoso. Ke he mena ia, ne tafe mai e vai he moui ke he magaaho ne kamata e fekafekauaga he tau tutaki nei ne 120 ke he tau tagata. Ka e to hoko ke he magaaho ia, ne nakai la fai agaga ia kakano nakai la fai ia he tau tutaki ha Keriso ne fakauku he agaga tapu mo e ui ke he moui ke he lagi.

Ko e tali ke he fakaakoaga ha Iesu, ne kamata e falu ke pehe: “Ko e moli, Ko e Perofeta ia ni hanai,” kua hagaao moli ke he perofeta ne mua hake ia Mose ne mavehe ke hau. Ne pehe e falu: “Ko e Keriso hanā.” Ka e totoko e falu: “To tupu kia e Keriso mai Kalilaia? Nakai kia talahau mai e Tohi, ke tupu mai e Keriso he fanau a Tavita, mai Petelehema ko e maga ne nofo ai a Tavita?”

Ne tupu ai e feveheveheaki he moto tagata. Ne manako falu ke tapaki a Iesu, ka e nakai fai tagata ne aamo atu ki a ia. Ko e magaaho ne liliu mai e tau fekafekau leoleo mo e nakai fai Iesu, ne huhu e tau ekepoa ne mua mo e tau Farasaio: “Ko e ha nakai takitaki mai ai e mutolu a ia?”

“Kua nakai fai tagata taha ke vagahau ke tuga e tagata na,” he tali he tau fekafekau.

Ne ita lahi e tau takitaki lotu mo e ekefakakelea, fakahehe, mo e tau amuamu. Ne tauage a lautolu: “Po kua fakahehe ai foki a mutolu? Po kua talia kia a ia he taha patu ne pule, po ke taha he tau Farasaio? Ka ko e moto tagata na, nakai iloa e Fakatufono, kua ulaafia ni a lautolu.”

Ke he mena nei, ko Nikotemo, ko e Farasaio mo e pule he tau Iutaia, (ko e taha he tau Saneheturini), ne toa ke vagahau ma Iesu. Liga manatu e koe, kua ua mo e hafa e tau tau fakamua, ne hau a Nikotemo ki a Iesu he po mo e talahau hana a tua ki a ia. Ko e magaaho nei ne pehe a Nikotemo: “Kua fakahala kia taha tagata ke he fakatufono ha tautolu, ka e nakai fanogonogo fakamua kia ia, mo e iloa hana tau mena ne eke?”

Ne une ki mua e ita he tau Farasaio he lago he taha ia ha lautolu a Iesu. “Ko e Kalilaia foki kia a koe?” he poaki fakagalo a lautolu. “Kia kumi a e koe mo e iloa ai, nakai tu mai ni ha perofeta mai Kalilaia.”

Pete ni he nakai tohi fakahako mai he tau Tohiaga Tapu ko e hau e perofeta mai Kalilaia, ka e tuhi a lautolu ke he Keriso ko e hau i ai, he pehe ko e “maama lahi” ka kitia ai he matakavi nei. Ko e taha mena foki, ne fanau a Iesu i Petelehema, mo e ko ia ko e huli mai ia Tavita. Na liga mailoga he tau Farasaio e tau mena nei, ka kua lagoia a lautolu ha ko e fakapuloa e tau manatu fakahehe ne ha ha he tau tagata ki a Iesu. Ioane 7:​32-52; Isaia 9:​1, 2; Mataio 4:​13-17.

▪ Ko e heigoa e tau mena tutupu he tau pogipogi oti he galue, mo e fakamanatu fefe e Iesu ke he mena nei?

▪ Ko e ha ne kaumahala e tau fekafekau ke tapaki a Iesu, mo e fefe e talahauaga he tau takitaki lotu?

▪ Ko hai a Nikotemo, ko e heigoa hana a aga ki a Iesu, mo e taute fefe he hana a tau matakainaga Farasaio a ia?

▪ Ko e heigoa e fakamoliaga to hau e Keriso i Kalilaia?