Veveheaga 66

Ha Ha he Galue he Tau Fale Api

KUA mahuiga lahi a Iesu ke he magahala kua teitei tolu e tau tau tali mai he hana a papatisoaga. Loga e tau afe ne kitia hana a tau mana, mo e tau hokotaki ke he hana a tau gahua kua holofa ke he motu katoa. Ko e magaaho nei, he fakapotopoto e tau tagata ke he Galue he Tau Fale Api i Ierusalema, ne kumi e lautolu a ia he matakavi ia. “Ka ko fe a ia?” he manako a lautolu ke iloa.

Kua eke a Iesu mo mena ke taufetoko ki ai. “Ko e tagata mahani mitaki a ia,” he talahau he falu. “Nakai, ka kua fakahehe e ia e tau tagata,” he fakamakamaka he falu. Ne loga e tau tutala fanafana pehenei he tau aho fakamua he galue. Ka e taha e mena ne nakai fai tagata malolo ke vagahau he toloaga tagata ma Iesu. Ko e pihia ha ko e matakutaku e tau tagata he totoko mai he tau takitaki Iutaia.

Ko e magaaho ne tulotoga e galue, ne hoko atu a Iesu. Ne hake a ia ke he faituga, ti ofomate e tau tagata ke he hana a tau puhala fakaako mitaki. Ha kua nakai fano a Iesu he tau aoga he tau akoako, ne manamanatu e tau Iutaia: “Kua pulotu fefe e tagata nei, nakai fakaako a ia?”

“Ko e haku a tau kupu, nakai ko e haku,” he fakamaama e Iesu, “ka ko e hana ne fakafano mai au. Ka manako taha ke eke Hana finagalo, ti iloa ai e ia e tau kupu, po ke mai he Atua, po ke vagahau noa ni e au.” Ko e tau fakaakoaga ha Iesu kua taofi lahi e fakatufono he Atua. Ti ko e mena ia, kua lata ke maaliali ko e kumi a ia he lilifu he Atua, nakai ko e hana. “Ka e nakai kia tuku atu e Mose e Fakatufono kia mutolu?” he huhu e ia. Ko e puhala he akonaki, ti pehe a ia: “Ka e nakai fakai taha ia mutolu ke oma e Fakatufono.”

“Ko heigoa e mena ne kolo ai a mutolu ke kelipopo au?” he huhu e Iesu.

Ko lautolu ia he moto tagata, liga ko e tau tagata ahiahi mai ke he galue, ne nakai mailoga e tau laliaga ia. Ne manatu a lautolu mo e nakai talitonu to fai tagata ne manako ke kelipopo e akoako mitaki nei. Ti talitonu a lautolu ko e fai mena ne lekua ai a Iesu ke manatu pihia a ia. “Ha ha ia koe e temoni,” he talahau e lautolu. “Ne kolo e hai ke kelipopo a koe?”

Ko e tau takitaki Iutaia ne manako ke kelipopo a Iesu, pete ni he nakai mailoga he moto tagata e mena nei. Ko e magaaho ne fakamalolo e Iesu e tagata he Sapati he tau mo e hafa fakamua, ne lali e tau takitaki ke kelipopo a ia. Ti tuhi e Iesu he magaaho nei e nakai fai kakano ha lautolu he huhu ki a lautolu: “Kaeke ke talia he tagata e peritome ke he sapati, neke holia e fakatufono a Mose, ti ko heigoa e mena ne ita mai ai a mutolu ki a au, he fakamalolo e au e tino katoa he tagata ke he sapati? Ua fakafili fakahanoa, ka kia fakafili e fakafiliaga tonu.”

Ko lautolu ne nonofo i Ierusalema, ne maama e tuaga, ne pehe he magaaho nei: “Ka e nakai kia ko e tagata hanā ne kolo e lautolu ke kelipopo? Kitiala, kua vagahau fakakite ni a ia, ka e nakai tala age e lautolu ha kupu kia ia; po kua iloa fakatonu kia he tau patu ne pule, ko e Keriso moli hanā?” Ne fakamaama e lautolu ne nonofo i Ierusalema e kakano ne nakai talitonu e lautolu ko Iesu ko e Keriso: “Ka kua iloa e tautolu e mena ne hau ai e tagata na; ka ko e Keriso, ka haele mai a ia, nakai fakai taha ke iloa po ke mai fe a ia.”

Ne tali e Iesu: “Kua iloa e mutolu au, kua iloa foki e mutolu e mena ne hau ai au; nakai hau noa au, ka kua moli ni a ia ne fakafano mai au, nakai iloa e mutolu a ia. Ka kua iloa e au a ia, ha ko e mena hau au ia ia ni; ko Ia foki ne fakafano mai au.” Ko e mena nei ne lali a lautolu ke tapaki a ia, liga ke tuku a ia ke he fale puipui po ke kelipopo ni a ia. Ka e nakai kautu a lautolu ha kua nakai la hoko e magaaho ke mate a Iesu.

Ka e pete ni he pihia, tokologa ne tua ki a Iesu, ha kua tonu ni ke pihia a lautolu. Ka ko e ha, ne fano hui a ia he vai, fakamilino e tau matagi, fakamilino foki e tahi afa, fagai fakamana e tokoafe ke he fiha ni e areto mo e tau ika, fakamalolo e tau tagata gagao, fakao e tau kulikuli, fakaala e tau mata pouli, fakamalolo e tau lepela, ti fakaliu tu mai foki e tagata mate. Ti huhu a lautolu: “Ka haele mai e Keriso, to mua kia he loga e tau fakamailoga ke eke e ia ke he tau fakamailoga kua eke he tagata nei?”

Ko e magaaho ne logona he tau Farasaio e moto tagata ne gugu e tau mena nei, ko lautolu mo e tau ekepoa ne mua ne fakafano e tau fekafekau ke tapaki a Iesu. Ioane 7:​11-32.

▪ Ko e magaaho fe ne hoko a Iesu ke he galue mo e ko e heigoa he tau tagata ne talahau hagaao ki a ia?

▪ Liga ko e ha ne pehe ai e falu kua ha ia Iesu e temoni?

▪ Ko e heigoa e onoonoaga ki a Iesu ne ha ha he tau tagata ne nonofo i Ierusalema?

▪ Ko e ha ne tokologa ne tua ki a Iesu?