Veveheaga 65

Ko e Fenoga Fufu ki Ierusalema

KO E vaha mateafu he 32 V.N., kua tata ke he Galue he Tau Fale Api. Ne fakakaupa ni e gahua ha Iesu ki Kalilaia tali mai he Paseka he 31 V.N., he magaaho ne lali e tau Iutaia ke kelipopo a ia. Liga, tali mai he magaaho ia ko e finatu ni a Iesu ki Ierusalema ke lata mo e tolu e galue he tau he tau Iutaia.

Ne fakaohooho he tau matakainaga ha Iesu a ia he magaaho nei: “Kia toka e koe e mena nai, ka e fina age ā ki Iutaia.” Ko Ierusalema e uho maga ha Iutaia mo e lotouho fakalotu he motu katoa. Ne fakakakano he hana a tau matakainaga: “Ha kua nakai eke fufu e taha ha mena, ka e fia fakakite a ia.”

Pete ni he nakai talitonu e Iakopo, Simona, Iosefa, mo Iuta ko e ha lautolu a taokete, ko Iesu, ko e Mesia moli, ne manako a lautolu ke fakakite e ia hana a tau malolo mana ki a lautolu oti ne tolo ke he galue. Ka e taha e mena, ko Iesu, ne mailoga e ia e hagahaga kelea. “Nakai maeke ke he lalolagi ke fakavihia a mutolu,” he talahau e ia, “ka e fakavihia a au, ha kua talahau e au a ia, kua kelea hana tau mahani.” Ti tala age a Iesu ke he hana a tau matakainaga: “O hake a a mutolu ke he galue ia; nakaila hake au ke he galue ia.”

Ko e Galue he Tau Fale Api ko e fakamanatuaga ke he fitu-aho. Ko e aho ke valu aki ke fakaoti ai mo e tau gahua fakatapu. Ko e galue ke fakamailoga e fakahikuaga he tau he tau gahua he fonua mo e ko e vaha he olioli lahi mo e tuku e tau fakaaue. Loga e tau aho he mole he toka he tau lafu ha Iesu ke fakalataha auloa mo lautolu ne fenoga hake, ko ia mo e hana a tau tutaki ne o fufu, mo e nakai fakakite ke he tau tagata. Ne o a lautolu hala i Samaria, ka e nakai he hala ne o ai e faoa tokologa ne tata ke he Vailele i Ioritana.

Ha kua lata ia Iesu mo lautolu ne fakalataha mo ia ke fai mena ke nonofo ai he maga i Samaria, ne fakafano fakamua e ia e tau uta fekau ke fai tauteuteaga. Ka e taha e mena, ko e tau tagata ne nakai talia ke taute ha mena taha ma Iesu, ha kua iloa ko e finatu fai a ia ki Ierusalema. Ne ita lahi, ti huhu a Iakopo mo Ioane: “Ko e Iki na e, kua loto nakai a koe, ke tala age a maua ke he afi ke hifo mai he lagi, ke fakaotioti a lautolu?” Ne akonaki e Iesu a lautolu he vagahau pihia, mo e o a lautolu ke he taha maga.

Hane o a lautolu he puhala, ne pehe e tohikupu ki a Iesu: “Ko e Akoako na e, to mui atu au kia koe ke he tau mena oti ke haele a koe ki ai.”

“Na fai ofaga e tau alope, ne fai mena foki ke momohe ai e tau manu lele,” he tali e Iesu, “ka ko e Tama he tagata, nakai fai mena a ia ke mohe ai.” Ne fakamaama e Iesu to feleveia e tohikupu mo e tau mena uka kaeke ke eke a ia mo tutaki Hana. Mo e liga ko e talahauaga ke he tohikupu kua fakatokoluga lahi ke talia e puhala moui pihia.

Ke he taha tagata, ne pehe a Iesu: “Ati mui mai a kia au.”

“Toka au ke fano fakamua ke tanu haku a matua tane,” he tali he tagata.

“Ati tokai a lautolu kua mamate ke tanu ha lautolu a tau tagata mamate,” he tali e Iesu, “ka ko koe, kia fano mo e fakakite atu e kautu he Atua.” Ko e moli ne nakai la mate e matua he tagata, ha ko e mena kaeke kua fita, ne nakai liga fano hana a tama tane ke fakalataha ke he mena ia mo e fanogonogo ki a Iesu. Ko e ole e tama tane ke fai magaaho ke fakatali ke he mate he hana matua. Ne nakai mautali a ia ke tuku fakamua e Kautu he Atua ke he hana a moui.

Hane o a lautolu he puhala ki Ierusalema, ne tala age foki taha tagata ki a Iesu: “Ko e Iki na e, to mui atu au kia koe; ka e toka au ke mavehe fakamua mo e haku a faoa.”

Ke he tali ne pehe a Iesu: “Ko ia kua toto hana lima ke he arote mo e haga ki tua, nakai lata a ia mo e kautu he Atua.” Ko lautolu ka eke mo tau tutaki ha Iesu kua lata ke toka ha lautolu a tau mata ke onoono fakatonu ni ke he gahua he Kautu. Tuga ni e kaiva palao ka keu ka nakai haga fakahako tumau e tagata palao ki mua, ti ko e ha tagata ni ka haga ki tua ke he tau mena he fakatokaaga tuai nei to liga tupetupe atu ke he mafoa mai he hala ke takitaki atu ke he moui tukulagi. Ioane 7:2-10; Luka 9:51-62; Mataio 8:​19-22.

▪ Ko hai e tau lafu ha Iesu, mo e fefe e logonaaga ha lautolu ki a ia?

▪ Ko e ha ne hemu lahi e tau Samaria, mo e ko e heigoa ne manako a Iakopo mo Ioane ke taute?

▪ Ko e heigoa e tau fakatutalaaga tolu ha Iesu he puhalatu, mo e peehi fefe e ia e lata ke gahua mo e foaki ne ia a ia?