Veveheaga 80

Tau Lotopa Mamoe mo e Leveki Mamoe

NE HAU a Iesu ki Ierusalema ke he Galue he Fakaulu Fale, po ke Hanukkah, ko e galue ne fakamanatu aki e liu fakaulu he faituga ki a Iehova. Ko e 168 F.V.N., fakalata ke he 200 he tau tau fakamua, ne kaumahala a Ierusalema ia Antiochus IV Epiphanes mo e moumou e faituga mo e fatapoa i ai. Ka e taha e mena, ko e tolu e tau he mole ne liuaki ni a Ierusalema mo e liu fakaulu foki e faituga. Tali mai he magaaho ia, ne fakamanatu tumau he tau tau oti e fakaulu fale.

Ko e Galue he Fakaulu Fale nei ne taute ia Kiselu 25, ko e mahina faka-Iutaia ne tatai mo e matahiku ia Novema mo e mataulu ia Tesemo he kalena he vaha fou nei ha tautolu. Ko e mena ia, ne molea fakatote e teau he tau aho ne toe ti hoko ke he Paseka ne mua he 33 V.N. Ha ko e vaha mokomoko e matagi, ati fakahigoa he aposetolo ko Ioane ko e “vaha makalili.”

Ne fakaaoga e Iesu he magaaho nei e fakatai ne talahau e ia tolu e lotopa mamoe mo e hana gahua ko e Leveki Mamoe Mitaki. Ko e lotopa mamoe fakamua ne vagahau mai e ia ne mailoga mo e fakatokaaga he maveheaga he Fakatufono faka-Mose. Ne eke e Fakatufono mo pa, ke vevehe kehe aki e tau Iutaia mai he tau mahani kelea he tau tagata ne nakai ha ha he maveheaga pauaki nei mo e Atua. Ne fakamaama e Iesu: “Ko e moli, ko e moli, ke tala atu e au kia mutolu, ko e tagata nakai hu atu ke he gutuhala ki loto he lotopa mamoe, ka e hake ki ai ke he taha fahi, ko e kaiha a ia mo e fofo mena. Ka ko ia kua hu atu ke he gutuhala, ko e leveki mamoe ni a ia.”

Ne o mai e falu mo e talahau ko e Mesia, po ke Keriso, ka e nakai ko lautolu e leveki mamoe moli ne matutaki ki ai e vagahau ha Iesu: “To vevete mai he leveki e pahala kia ia; kua fanogonogo foki e tau mamoe ke he hana leo. Kua ui ni a ia ke he hana tau mamoe ke he tau higoa ha lautolu; kua takitaki foki e ia a lautolu. . . . Ka e nakai mumui atu a lautolu ke he tagata kehe, ka e fehola kehe ai; ha kua nakai iloa e lautolu e tau leo he tau tagata kehe.”

Ko e ‘leveki he pahala’ he lotopa mamoe fakamua ko Ioane Papatiso. Ha ko e leveki he pahala, ne ‘hafagi’ e Ioane ki a Iesu he fakakite age a ia ki a lautolu e tau mamoe fakatai ka takitaki mai e ia ke he fonua motie. Ko e tau mamoe nei ne ui e Iesu ke he tau higoa mo e takitaki to fakahiku a lautolu ke he taha lotopa he tau mamoe, he fakamaama e ia: “Ko e moli ko e moli, ke tala atu e au kia mutolu, ko au nai ko e gutuhala he tau mamoe,” ko e pehe a ia, ko e gutuhala he lotopa mamoe fou. Ko e magaaho ne fakatu e Iesu e maveheaga fou mo e hana tau tutaki mo e liligi mai he lagi e agaga tapu ki a lautolu he aho Penetekoso, ko e huhu atu a ia ha lautolu ke he lotopa mamoe fou nei.

Ne fakamaama atu hana a gahua, ne pehe a Iesu: “Ko au nai ko e gutuhala; kaeke ke hu atu ai taha kia au, ti fakamoui ai a ia, to hu atu mo e hu mai a ia, to moua foki e ia e tau mena kai. . . . kua hau au kia moua e lautolu e moui, kia moua lahi ai ni. . . . Ko au ko e leveki mamoe mitaki; kua kitia e au haku a tau mamoe; kua kitia foki au he haku a tau mamoe; tuga he fioia he Matua au, mo e kitia foki e au e Matua. Kua tuku atu foki e au haku a moui ke hukui aki e tau mamoe.”

Ko e magahala ia, ne fakamafana e Iesu hana tau tagata ne mumui ki a ia, he pehe: “Ua matakutaku a koe e fuifui mamoe gahoa na e; ha ko e mena finagalo ha mutolu a Matua ke foaki mai e kautu kia mutolu.” Ko e fuifui mamoe gahoa nei to hoko e numera ke he 144,000, ne o atu ai ke he lotopa mamoe fou, po ke lotopa ke ua aki nei. Ka e kitia atu foki e Iesu: “Ti kua fai mamoe kehe au, nakai ha he lotopa nai; ko lautolu foki kua lata ke takitaki mai e au, to fanogonogo foki a lautolu ke he leo haku; ati taha ai e fuifui mamoe, mo e leveki mamoe ne tokotaha.”

Ha kua nakai mai he “lotopa nai” e ‘tau mamoe kehe,’ ko lautolu ni mai he taha lotopa foki, ko e lotopa ke tolu aki. Ko e tau lotopa ua fakahiku nei, po ke tau pa mamoe, kua kehekehe ha lautolu a tau tufaaga. Ko e “fuifui mamoe gahoa” he taha lotopa to pule fakalataha mo Keriso i luga he lagi, mo e ‘tau mamoe kehe’ he taha lotopa to momoui ke he lalolagi Parataiso. Ka e taha e mena, pete ni e ua e lotopa, ne nakai femahekehekeaki e tau mamoe, po ke logona e lautolu e feveheveheaki, ha ko e mena pehe a Iesu, “ati taha ai e fuifui mamoe” i lalo hifo he “leveki mamoe ne tokotaha.”

Ko e Leveki Mamoe Mitaki, ko Iesu Keriso, ne foaki fiafia hana moui ma e tau fuifui mamoe ne ua. “Ka ko au, kua tuku atu e au ni,” he talahau e ia. “Ha ha ia au e pule ke tuku atu ai ni, ha ha ia au foki e pule ke liu ta mai ai; ne moua e au e poaki nai mai he haku a Matua.” Ko e magaaho ne vagahau e Iesu e mena nei, ne tupu e mavehevehe ke he tau Iutaia.

Tokologa he moto tagata ne pehe: “Ha ha ia ia he temoni, kua vikoia foki a ia; kua fanogonogo he ha a mutolu kia ia?” Ka ko e tali he falu: “Ko e tau kupu na nakai ko e tau kupu he tagata kua heketia.” Ko e moli, ne liu fakamanatu ke he falu mahina kua mole ki tua he fakamalolo e ia e tagata ne fanau mai mo e matapouli, ne lafi atu e lautolu: “Kua maeke kia he taha temoni ke fakaala e tau matapouli?” Ioane 10:​1-22; 9:​1-7; Luka 12:32; Fakakiteaga 14:​1, 3; 21:​3, 4; Salamo 37:29.

▪ Ko e heigoa e Galue he Fakaulu Fale, mo e magaaho fe ne fakamanatu ai?

▪ Ko e heigoa e fuifui mamoe fakamua, mo e ko hai e leveki pahala?

▪ Hafagi fefe he leveki e pahala ke he Leveki Mamoe, mo e ko e heigoa ne huhu e tau mamoe ki ai?

▪ Ko hai a lautolu e tau fuifui mamoe ne ua he Leveki Mamoe Mitaki, mo e fiha e fuifui mamoe he katoa?