Ko e Moto Tagata Tokologa ne Tapuaki Moli—O Mai I Fe a Lautolu?
“Kitiala, ko e moto tagata tokologa, . . . mai he tau motu oti, mo e tau faoa, mo e tau tagata kehekehe, mo e tau vagahau kehekehe, kua tutu mai a lautolu ki mua he nofoaiki, ki mua foki he Punua mamoe.”—FAKAKITEAGA 7:9.
1. Fulufuluola lahi mahaki he ha ki a tautolu he vaha nei e tau fakakiteaga fakaperofeta ia Fakakiteaga?
HE TATA ke he fakaotiaga he senetenari fakamua aki he V.N., kua kitia he aposetolo ko Ioane e tau fakakiteaga ke he tau mena tutupu homo ue atu ne hagaao ke he finagalo a Iehova. Ko e falu he tau mena ne kitia e ia he fakakiteaga kua hane fa e fakamoli he magaaho tonu nei. Ka kua teitei lahi e falu ke fakamoli he vaha tata i mua. Kua putuputu viko oti e tau mena nei ke he tapunuaga ofoofogia he finagalo homo ue atu a Iehova ke fakatapu hana higoa ki mua he tau mena tufugatia oti kana. (Esekielu 38:23; Fakakiteaga 4:11; 5:13) Ke lafi ki ai, kua putoia ai he tau mena ia e amaamanakiaga he tau momoui ha tautolu takitokotaha. Pihia fefe e mena ia?
2. (a) Ko e heigoa ne kitia he aposetolo ko Ioane he hana fakakiteaga ke fa aki? (e) Ko e heigoa e tau huhu hagaao ke he fakakiteaga nei ka onoono a tautolu ki ai?
2 He fufuta ke fa aki he tau fakakiteaga ia Fakakiteaga, kua kitia e Ioane e tau agelu ne taofi e tau matagi afa ato fakamau fakamailoga “e tau tupa he Atua ha tautolu” he tau matale ha lautolu. Ti kitia mogoia e ia e tau mena tutupu fakafiafia lahi—“ko e moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe,” ne kua fefakalatahaaki he tapuaki ki a Iehova mo e fakalilifu hana Tama. Ko lautolu nei, he tala age ki a Ioane, ko e tau tagata ne hao mai he matematekelea lahi. (Fakakiteaga 7:1-17, fakatatai NW.) Ko hai a lautolu ia ne fakamaama mai ko e “tau tupa he Atua ha tautolu”? Mo e ko hai ka fakalataha he “moto tagata tokologa” ne hao mai he matematekelea lahi? To eke nakai a koe mo taha ha lautolu ia?
Ko Hai e “Tau Tupa he Atua ha Tautolu”?
3. (a) Ia Ioane 10:1-18, ne fakatai fefe e Iesu e fakafetuiaga hana mo e hana tau tutaki? (e) Ko e heigoa ha Iesu ne taute ke maeke ai hana tau mamoe ke moua kakano ha ko e hana poa ke he mate?
3 Teitei ke fa e tau mahina ato hoko hana mate, ne vagahau a Iesu hagaao ki a ia ni “ko e leveki mamoe mitaki” mo e hana tau tutaki ko e “tau mamoe” ka tuku hifo e ia hana moui ma lautolu. Ne tala pauaki a ia hagaao ke he tau mamoe ne moua e ia i loto he fuifui mamoe fakatai mo e he mole agataha ai kua tuku atu ai hana levekiaga pauaki. (Ioane 10:1-18)a He loto fakaalofa lahi, ne tuku atu ai e Iesu hana solu ma e hana tau mamoe, kua foaki mai ai e lukutoto ko e palepale kua lata, ke maeke a lautolu ke tokanoa mai he hala mo e mate.
4. Ko hai e kau fakamua ne fakapotopoto mo tau mamoe ke tatai mo e mena nei ne talahau e Iesu?
4 Fakamua ato taute e mena ia, ha ko Iesu e Leveki Mamoe Mitaki ne fakapotopoto e ia ni hana tau tutaki. Ko e kau fakamua ne fakakite age ki a ia e Ioane Papatiso, ko e ‘leveki he pahala’ he fakataiaga a Iesu. Kua kumi e Iesu e tau tagata ka talia fiafia e magaaho ke eke mo taha vala he “tega” valavala loga a Aperahamo. (Kenese 22:18, NW; Kalatia 3:16, 29) Ne tuku mo e feaki e ia ke he tau loto ha lautolu e fakaaueaga ma e Kautu he lagi, mo e tala age fakamoli e ia ki a lautolu ko e fano a ia ke taute e taha mena ke nonofo ai a lautolu he fale he hana Matua i luga he lagi. (Mataio 13:44-46; Ioane 14:2, 3) Kua lata lahi ai he talahau e ia: ‘Ne kamata mai foki he vaha a Ioane papatiso, kua hoko ke he vaha nai, ko e hou folia ke he kautu he lagi; ti kua uta foki e lautolu ne hou.’ (Mataio 11:12, fakatatai NW.) Ke maeke ke moua e folia ia, kua lata na lautolu ne muitua ki a ia ke fakakite moli ko e ha ha i loto he fuifui mamoe ne talahau e Iesu.
5. (a) Ko hai e “tau tupa he Atua ha tautolu” ne talahau mai ia Fakakiteaga 7:3-8? (e) Fakakite mai he heigoa ko e to tokologa lahi ka tapuaki fakalataha mo e tau Isaraela fakaagaga?
5 Ia Fakakiteaga 7:3-8, ko lautolu ne kautu lahi he fakamakamaka ke he foliaga ia ke he lagi ne kua fakahigoa foki “ko e tau tupa he Atua ha tautolu.” (NW; kikite 1 Peteru 2:9, 16.) Ko e tau Iutaia ni ka hokoia he tino e 144,000 ne talahau i ai? Ko e tau Iutaia ni ka hokoia a lautolu i loto he fuifui mamoe fakatai he tala fakatai a Iesu? Nakai pihia; ko lautolu ko e faoa he Isaraela fakaagaga he Atua, kua fakalataha oti a lautolu mo Keriso he tega fakaagaga a Aperahamo. (Kalatia 3:28, 29; 6:16; Fakakiteaga 14:1, 3) To hoko mai moli e magaaho, ka katoa ai e numela mau ia. Ti ko e heigoa mogoia ka tupu? Tuga he talahau tuai he Tohi Tapu, to eke e falu—ko lautolu ko e moto tagata tokologa—ke fakalataha mo lautolu nei ko e tau Isaraela fakaagaga ke tapuaki ki a Iehova.—Sakaria 8:23.
‘Tau Mamoe Kehe’—Ko Lautolu Kia ko e Tau Kerisiano he Tau Motu Kehe?
6. Ko e heigoa e tau mena tutupu ne fakakite mai ia Ioane 10:16?
6 He mole he talahau e taha fuifui mamoe ia Ioane 10:7-15, kua tamai e Iesu e taha matakau ke he fakatino ia, he pehe: “Ti kua fai mamoe kehe au, nakai ha he lotopa nai; ko lautolu foki kua lata he takitaki mai e au, to fanogonogo foki a lautolu ke he leo haku; ati taha ai e fuifui mamoe, mo e leveki mamoe ne tokotaha.” (Ioane 10:16) Ko hai e ‘tau mamoe kehe’ ia?
7, 8. (a) Hepe he ha e manatu ko e tau Kerisiano he tau Motu Kehe e tau mamoe kehe? (e) Ko e heigoa e finagalo moli he Atua ma e lalolagi ne kua lata ke hufia ha tautolu a maamaaga ko hai e tau mamoe kehe?
7 Fa mahani mau e tau tagata talahau tala i Kerisitenitome ke ha ha e onoonoaga ko e tau mamoe kehe nei ko e tau Kerisiano he tau Motu Kehe mo e ko lautolu he fuifui mamoe ne talahau fakamua ko e tau Iutaia, ko lautolu ne kua ha ha i lalo he maveheaga he Matafakatufono, mo e o tokoua e tau matakau ia ke he lagi. Ka e fanau mai a Iesu ko e Iutaia ti kua ha i lalo he maveheaga he Matafakatufono hana tupumaiaga. (Kalatia 4:4) Ke lafi ki ai, ko lautolu ne pehe ko e tau mamoe kehe ko e tau Kerisiano he tau Motu Kehe a lautolu ia ka moua e palepale he moui ke he lagi, ko e mena kua kaumahala ai ke mailoga e taha vala aoga lahi he finagalo he Atua. He magaaho ne tufugatia e Iehova e tau tagata fakamua mo e tuku a laua he kaina ko Etena, kua talahau fakamaaliali e ia hana finagalo ke fakapuke tagata e lalolagi, ke taute oti ai mo parataiso, mo e eke ai hana tau tagata leveki ke olioli e moui tukulagi—kaeke ni kua fakalilifu a laua mo e omaoma ke he ha laua a Tufuga.—Kenese 1:26-28; 2:15-17; Isaia 45:18.
8 He magaaho ne hala a Atamu, ne nakai kaumahala e finagalo a Iehova. Ne taute he Atua e lagomataiaga fakaalofa lahi ma e fanau a Atamu ke maeke ai ke moua e magaaho ke olioli ke he mena ne kaumahahala a Atamu ke fakaaue ki ai. Ne talahau tuai e Iehova ko e to fakatu hake e ia e laveakiaga, ko e tega, kua maeke ai e tau fakamonuinaaga ke puhala mai ke he tau motu oti kana. (Kenese 3:15; 22:18) Nakai pehe e kakano he maveheaga ia ko e to uta oti e tau tagata mitaki ke he lagi. Ne fakaako e Iesu hana tau tutaki ke liogi: “Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.” (Mataio 6:9, 10) Nakai leva to tala age e ia e tala fakatai ne fakamau ia Ioane 10:1-16, ne talahau e Iesu ke he hana tau tutaki ko e “fuifui mamoe gahoa” ni hokoia ne kua talia he hana Matua ke age e Kautu he lagi ki ai. (Luka 12:32, 33) Ti ko e magaaho ka totou e tautolu e tala fakatai a Iesu ni ko e Leveki Mamoe Mitaki ne foaki hana solu ma e hana tau mamoe, kua hepe ni ke uta kehe mai he fakatino a lautolu ne tokologa kua tamai e Iesu ki lalo he hana levekiaga fakaalofa, ko lautolu ko e tau tagata ka nonofo he lalolagi i lalo he hana Kautu he lagi.—Ioane 3:16.
9. Fakamua he tau 1884, kua maama he Tau Tagata Fakaako Tohi Tapu e heigoa hagaao ke he kitiaaga moli he tau mamoe kehe?
9 He fakamua atu he tau 1884, ne fakakite he Kolo Toko e tau mamoe kehe ko e tau tagata ka foaki age e magaaho ke momoui he lalolagi nei i lalo he tau tutuaga ka fakamoli aki e finagalo he Atua mai he kamataaga. Ne mailoga he Tau Tagata Fakaako Tohi Tapu fakamua ia ko e to eke e falu he tau mamoe kehe nei mo tau tagata kua fita he momoui mo e kua mamate ato taute ai e fekafekauaga a Iesu ke he lalolagi. Pete ni, kua ha ha i ai e falu mena fakamatafeiga ne nakai hako e maamaaga ha lautolu ki ai. Ma e fakatai, kua manatu a lautolu ko e fakapotopoto maiaga he tau mamoe kehe to hoko ai ka mole he moua oti he faoa fakauku ha lautolu a palepale ke he lagi. Ka e, fita a lautolu he iloa moli ko e tau mamoe kehe, nakai ko e tau Kerisiano he tau Motu Kehe ni hokoia. Ko e magaaho ke eke mo taha he tau mamoe kehe kua mahafagi ke he tau Iutaia mo e tau Tagata Motu Kehe, ke he tau tagata he tau motu oti kana mo e tau lanu tagata.—Fakatatai Gahua 10:34, 35.
10. Ke maeke a tautolu ke eke ko lautolu ne kitia moli e Iesu ko e hana tau mamoe kehe, ko e heigoa mogoia kua lata ke moli hagaao ki a tautolu?
10 Ke tatai tonu mo e fakamaamaaga ne age e Iesu, kua lata e tau mamoe kehe ke eke mo tau tagata, pete ni ko e heigoa e tau lanu po ke tau tupumaiaga kehekehe, ke mailoga ko e Leveki Mamoe Mitaki a Iesu Keriso. Kua fakalataha e heigoa ke he mena ia? Kua lata a lautolu ke fakakite e mahani molu mo e manako moli ke takitaki he taha ha ko e tau aga naia he tau mamoe. (Salamo 37:11) Ke tuga moli e fuifui mamoe gahoa, kua lata a lautolu ke ‘iloa e leo [he leveki mamoe mitaki]’ mo e nakai fakaata a lautolu ni ke fakataki he falu ne kua kumi ke fakaheheina a lautolu. (Ioane 10:4; 2 Ioane 9, 10) Kua lata a lautolu ke fakaaue ke he mena aoga lahi ne taute e Iesu he tuku atu hana solu ma e hana tau mamoe mo e fakagahuahua katoatoa ai e tua ke he foakiaga mena ia. (Gahua 4:12) Kua lata a lautolu ke “fanogonogo” ke he leo he Leveki Mamoe Mitaki ka ole fakamakamaka a ia ki a lautolu ke tuku atu e fekafekauaga tapu ni hokoia ki a Iehova, ke tuku fakamua tumau e Kautu, ke fakamamao mai he lalolagi, mo e ke fakakite e feofanaki ne kua poa ne ia a ia ni. (Mataio 4:10; 6:31-33; Ioane 15:12, 13, 19) Kua tatai tonu nakai a koe mo e fakamaamaaga ia ki a lautolu ne kitia e Iesu ko e hana tau mamoe kehe? Kua manako nakai a koe? Ko e mena homo ue atu ha, e fakafetuiaga kua mahafagi ki a lautolu oti kana ne kua eke moli mo tau mamoe kehe a Iesu!
Fakalilifu ke he Pule Malolo he Kautu
11. (a) Ke he fakamailoga he hana ha ha hinei, ko e heigoa ne talahau e Iesu hagaao ke he tau mamoe mo e tau koti? (e) Ko hai e tau matakainaga ne kua hagaao e tau kupu a Iesu ki ai?
11 Kua loga e tau mahina ne mole he tala age e ia e tala fakatai i luga, ti kua liu foki a Iesu ke ha ha i Ierusalema. He magaaho ne nonofo i luga he Mouga Olive, ti kua onoono hifo ke he matakavi he faituga, kua foaki e ia fakamatafeiga ke he hana tau tutaki ‘e fakamailoga he hana a ha ha hinei mo e fakaotiaga he lalolagi.’ (Mataio 24:3, fakatatai NW.) Ne liu foki a ia talahau e fakapotopoto maiaga he tau mamoe. Kua fakalataha mo e falu mena, ne pehe a ia: “Ka hau e Tama he tagata mo e hana lilifu, ko e tau agelu tapu oti foki fakalataha mo ia, ti nofo ai a ia ke he hana nofoaiki lilifu; To fakapotopoto ki mua hana e tau motu oti kana; ati vevehe kehekehe ai e ia a lautolu, tuga e leveki mamoe kua vevehe e tau mamoe mo e tau koti; To tuku e ia e tau mamoe ke he hana fahi matau, ka ko e tau koti ke he fahi hema.” I loto he tala fakatai nei, ne fakakite e Iesu ko lautolu ne onoono fakalahi e Patuiki ki ai, to fakave ai e fakafiliaga ke he tau mena ne taute e lautolu ke he hana “tau matakainaga.” (Mataio 25:31-46) Ko hai e tau matakainaga nei? Ko lautolu ko e tau Kerisiano ne fakauku he agaga tapu, ti kua eke mogoia mo “tau tama he Atua.” Ko Iesu e Tama uluaki he Atua. Ha ko e mena ia, ko e tau matakainaga ha Keriso a lautolu. Ti ko lautolu “ko e tau tupa he Atua ha tautolu” ne talahau mai ia Fakakiteaga 7:3 (NW), ko lautolu haia ne fifili mai he tau tagata ke fakalataha auloa mo Keriso ke he hana Kautu he lagi.—Roma 8:14-17.
12. Ko e ha e puhala ne taute he tau tagata ke he tau matakainaga a Keriso ko e mena aoga lahi mahaki?
12 Kua aoga lahi e puhala ne taute he falu tagata ke he tau hakega nei he Kautu. Kua onoono nakai a koe ki a lautolu tuga ne taute e Iesu Keriso mo e ne taute e Iehova? (Mataio 24:45-47; 2 Tesalonia 2:13) Kua atagia mai he aga he tagata ki a lautolu nei ne fakauku hana aga ki a Iesu Keriso ni mo e ke he hana Matua, ko e Pule Katoatoa he Lagi mo e Lalolagi Katoatoa.—Mataio 10:40; 25:34-46.
13. Laulahi fefe e maamaaga he Tau Tagata Fakaako Tohi Tapu he tau 1884 ke he tala fakatai he tau mamoe mo e tau koti?
13 He hana fufuta tohi ia Aokuso he tau 1884, kua hako e mena ne fakakite mai he Watch Tower ko e “tau mamoe” he tala fakatai nei, ko lautolu haia ne kua fakatoka ki mua ia lautolu e amaamanakiaga he moui mitaki katoatoa ke he lalolagi. Kua maama foki ko e liga hagaao e tala fakatai ke he magaaho ka pule a Keriso mai he hana nofoaiki lilifu he lagi. Ka e, he magaaho ia nakai maama lahi e lautolu ko e magaaho fe ka kamata a ia ke taute e gahua vehevehe ne fakamaama mai i ai po ke to leva lahi fefe ka taute ai.
14. Lagomatai fefe he lauga he fonoaga he tau 1923 e Tau Tagata Fakaako Tohi Tapu ke mailoga e magaaho ka fakamoli ai e perofetaaga he tala fakatai a Iesu?
14 Ka e taha e mena, he tau 1923, mai he lauga a J. F. Rutherford he fonoaga, ko e pelesiteni he Sosaiete he Kolo Toko he magaaho ia, ne fakamaama fakamahino mai ai e magaaho ka fakamoli e tala fakatai ke he tau mamoe mo e tau koti. Ko e ha? Ke he vala nei, kakano he fakakite mai ai he tala fakatai ko e to eke ai e tau matakainaga he Patuiki—e falu ha lautolu—ke ha ha agaia he lalolagi. Mai he tau tagata, ko e tau tutaki ni hokoia hana ne fakauku he agaga tapu ka fakahigoa moli ko e hana a tau matakainaga. (Heperu 2:10-12) To nakai ha ha a lautolu nei he lalolagi he vaha he Afetau katoa ke maeke ai e tau tagata ke taute e tau mena mitaki ki a lautolu tuga e tau puhala ne fakamaama mai e Iesu.—Fakakiteaga 20:6.
15. (a) Ko e heigoa e falu mena tutupu ne lagomatai aki e Tau Tagata Fakaako Tohi Tapu ke kitia moli e tau mamoe he tala fakatai a Iesu? (e) Foaki mai fefe he tau mamoe e fakamoliaga ke he ha lautolu a tau loto fakaaue ke he Kautu?
15 Mai he lauga ia he tau 1923, kua taute e tau laliaga ke kitia a lautolu ne kua tatai tonu mo e fakamaamaaga he Iki ke he tau mamoe mo e tau koti, ka e kua lata ni ke maama mua e falu mena ato maeke katoa ai e kakano he tala fakatai ke maaliali. He vaha he tau tau ne mumui mai, kua fakakite fakahaga e Iehova ke he hana tau fekafekau e tau mena fakamatafeiga nei ne mua atu e aoga. Kua fakalataha ke he tau mena nei e maamaaga maaliali he tau 1927, ko e “tupa fakamoli mo e loto matala” ko e kau katoa he tau Kerisiano he lalolagi ne fakauku he agaga tapu; ti kua fakaaue foki he mailoga he tau 1932, kua lata ke nakai matakutaku ke fakakite he taha a ia ni ko e feoaki fakalataha mo e tau fekafekau fakauku a Iehova, tuga ne taute e Ionatapu ke fakalataha mo Iehu. (Mataio 24:45, NW; 2 Tau Patuiki 10:15) Ke he magaaho ia, he fakave ke he Fakakiteaga 22:17, kua fakamafana pauaki ke he tau tagata nei ne tuga e tau mamoe ke gahua auloa ke uta e fekau he Kautu ke he falu. Ko e loto fakaaue ha lautolu ke he Kautu faka-Mesia ka omoi aki a lautolu nakai ni ke lagomatai ke he tau mena he tino he faoa fakauku he Iki ka e ke tukulele ha lautolu a tau momoui ki a Iehova he puhala atu ia Keriso mo e feoaki tata lahi mo e hana faoa fakauku, he fakamakutu auloa ke he gahua ne fa e taute e lautolu. Kua taute nakai e koe e mena ia? Ki a lautolu ne taute pihia, to pehe e Patuiki: “O mai a, ko mutolu kua fakamonuina he haku a Matua, kia eke ma mutolu, e kautu kua taute ma mutolu, ka e nakaila fakave e lalolagi.” Kua ha ha i mua ia lautolu e amaamanakiaga homo ue atu he moui tukulagi kua mitaki katoatoa he matakavi lalolagi he Kautu.—Mataio 25:34, 46.
Ko e “Moto Tagata Tokologa”—O a Lautolu ki Fe?
16. (a) Ko e heigoa e tau manamanatu hehe he Tau Tagata Fakaako Tohi Tapu ne hagaao ke he kitiaaga moli he tau tagata loga lahi mahaki, po ke moto tagata tokologa, ia Fakakiteaga 7:9? (e) He magaaho fe mo e fakave ke he heigoa e fakahakoaga he ha lautolu a onoonoaga?
16 Kua ha ha ai e tau magaaho ne tali tonu e tau fekafekau a Iehova ko e tau tagata tokologa lahi mahaki (moto tagata tokologa) ia Fakakiteaga 7:9, 10 kua kehe mai he tau mamoe kehe ia Ioane 10:16 mo e tau mamoe ia Mataio 25:33. Kakano ha kua pehe e Tohi Tapu kua ‘tutu i mua he nofoaiki’ a lautolu, ti kua manamanatu ai ko e ha ha a lautolu i luga he lagi, nakai nonofo he tau nofoaiki, ke pule ha ko e tau hakega fakalataha mo Keriso, ka e ha ha ni he tutuaga ke ua aki i mua he nofoaiki. Ha ko e mena pehe e onoonoaga ko e tau Kerisiano nakai fakamoli lahi a lautolu ia, he nakai fakakite e lautolu e agaga taute poa moli ne ia a ia. Ti kua fakahako ai e onoonoaga ia he tau 1935.b Mai he kumikumiaga ke he Fakakiteaga 7:9 mo e he onoono foki ke he maamaaga he tau kupu tuga ia Mataio 25:31, 32 ne kua fakakite maaliali mai ko e tau tagata i nai he lalolagi ka ‘tutu ki mua he nofoaiki.’ Kua fakakite mai foki ko e nakai fakavahega ua he Atua e mahani fakamoli. Ko lautolu ka moua hana taliaaga kua lata ai ni ke taofimau e mahani hakohako ki a ia.—Mataio 22:37, 38; Luka 16:10.
17, 18. (a) Ko e heigoa moli ne tupu tolomaki lahi ai, tali mai he tau 1935, e numela ha lautolu kua amaamanaki lahi ke moui tukulagi he lalolagi? (e) Ko e heigoa e gahua kua mua atu e aoga ne kau auloa a lautolu he moto tagata tokologa ke taute?
17 Kua loga e tau tau ne tutala e tau tagata a Iehova ke he tau maveheaga he Atua hagaao ke he lalolagi. Kakano ha ko e mena ne amaamanaki a lautolu ke tupu he vaha kua mole he atu tau 1920, ne tukuogo ai e lautolu ko e “Tau Miliona ne Momoui he Magaaho Nei To Nakai Mamate.” Ka e nakai ha ha ai e tau miliona ne kuku mau e tau foakiaga lagomatai he Atua ma e moui he magaaho ia. Ko e mena tokologa a lautolu ne talia e kupu moli, ne kua tuku he agaga tapu e amaamanakiaga ke he moui i luga he lagi. Mua atu foki he mole e tau 1935, kua hiki lahi mahaki e mena ne tupu. Ko e mena nakai fakagalogalo he Ko e Kolo Toko e amaamanakiaga ke he moui tukulagi he lalolagi. Ha kua loga e tau hogofulu tau ne fa tutala e tau fekafekau a Iehova hagaao ke he mena nei mo e kumi a lautolu ne kua tatai tonu mo e fakamaamaga he Tohi Tapu. Ka e ke he magaaho pauaki ni a Iehova, to takitaki ne ia a lautolu nei he moto tagata tokologa ke fakakite ne lautolu a lautolu.
18 Kua fakakite mai he tau fakamauaga kua loga e tau tau ne kua teitei oti e tau faoa ne o ke he Fakamanatuaga ke kai e tau mena fakatai. Ka e he 25 e tau tau he mole e tau 1935, kua tupu tolomaki ke molea e fakalahi teau a lautolu ne o ke he tau Fakamanatuaga ke he mate a Keriso ne taute lagataha he tau, ti kua molea mai ai he numela ha lautolu ne kai mena. Ko hai a lautolu ia? Ko e tau faoa ka eke mo moto tagata tokologa. Kua maaliali, kua hoko tuai e magaaho a Iehova ke fakapotopoto mai a lautolu mo e ke tauteute a lautolu ke hao mai he matematekelea lahi ne tata mai i mua. Ke tuga he talahau tuai mai, kua o mai a lautolu he “tau motu oti, mo e tau faoa, mo e tau tagata kehekehe, mo e tau vagahau kehekehe.” (Fakakiteaga 7:9) Kua fakamakutu a lautolu he kau auloa ke he gahua ne talahau tuai mai e Iesu he magaaho ne pehe a ia: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”—Mataio 24:14.
[Tau Matahui Tala]
a Ma e fakamaamaaga fou mo e katoatoa lahi ke he tau fuifui mamoe he veveheaga 10 a Ioane, kikite ke he The Watchtower, Fepuali 15, 1984, tau lau tohi 10-20, 31.
b The Watchtower, Aukoso 1 mo e 15, 1935.
Ko e Heigoa Hau a Talahauaga?
◻ Ko e ha e fakakiteaga ia Fakakiteaga veveheaga 7 ko e mena fulufuluola pauaki?
◻ Ko e ha e tau mamoe kehe ia Ioane 10:16 kua nakai fakakaupa ni ke he tau Kerisiano mai he tau Motu Kehe?
◻ Lata ko e heigoa moli ka ha ha ia lautolu ne kua tatai tonu mo e fakamaamaaga he Tohi Tapu ke he tau mamoe kehe?
◻ Pehi lahi fefe he tala fakatai ke he tau mamoe mo e tau koti e fakalilifu ke he pule malolo he Kautu?
◻ Fakakite mai he heigoa kua hoko e magaaho a Iehova ke fakapotopoto mai e moto tagata tokologa ia Fakakiteaga 7:9?