Lalago Fakamooli e Tau Matakainaga he Keriso

1, 2. (a) Ko e heigoa e tau fakataiaga ne tala age e Iesu ke he tau kapitiga tata haana? (Kikite fakatino he kamataaga.) (e) Ko e heigoa kua lata ia tautolu ke iloa hagaao ke he fakataiaga he tau mamoe mo e tau koti?

KUA tutala a Iesu ke he tau kapitiga tata haana ko Peteru, Aneterea, Iakopo, mo Ioane hagaao ke he taha mena ofoofogia lahi. He tala age ai ki a lautolu e tau fakataiaga he fekafekau mo e loto matala, tau tamafine tote ne tokohogofulu, mo e tau taleni, ne tala age foki e Iesu e taha fakatai ke he tau kapitiga haana. I ai, ne tutala a ia hagaao ke he magaaho ka fakafili he “Tama he tagata” e “tau motu oti kana.” Pehē a ia ko e “Tama he tagata” to vevehe e tau tagata ke he ua e matakau, ne fakamaama e taha ko e tau mamoe mo e taha foki ko e tau koti. Ti fakamaama e ia e matakau ne aoga ke toluaki, ko e “tau matakainaga” he Patuiki.​—Totou Mataio 25:31-46.

² Tuga e tau aposetolo, ne fiafia foki e tau fekafekau ha Iehova he magahala ha tautolu ke he fakataiaga nei ha kua putoia e tau momoui he tau tagata. Pehē a Iesu to moua he falu e moui tukulagi ka e to tamate e falu. Kakano hanei kua aoga lahi ke iloa e tautolu e kakano he fakataiaga mo e mena kua lata ia tautolu ke taute ke moua e moui tukulagi. I loto he vala tala nei, to tali e tautolu e tau hūhū nā: Lagomatai fēfē e Iehova a tautolu ke maama e fakataiaga nei? Iloa fēfē e tautolu kua fakamaama he fakataiaga e gahua fakamatala? Ko hai ne kua lata ke fakamatala? Ti ko e ha kua aoga ma e tau tagata ke fakamooli mogonei ke he “Patuiki” mo e “tau matakainaga” haana?

LAGOMATAI FĒFĒ E IEHOVA A TAUTOLU KE MAAMA E FAKATAIAGA?

3, 4. (a) Ko e heigoa kua lata ia tautolu ke iloa ke maama e fakataiaga nei? (e) He 1881, fakamaama fēfē he Watch Tower e fakataiaga nei?

³ Ke maama e kakano he fakataiaga ke he tau mamoe mo e tau koti, kua lata ia tautolu ke iloa (1) ko hai e “Tama he tagata,” po ke “Patuiki,” ko hai e tau mamoe mo e tau koti, mo e ko hai e “tau matakainaga” he Patuiki? (2) magaaho fe ne vevehe, po ke fakafili ai he “Tama he tagata,” e tau mamoe mo e tau koti? mo e (3) ko e ha ne fakahigoa ai e falu ko e tau mamoe mo e falu ne fakahigoa ko e tau koti?

⁴ He 1881, ne pehē e Watch Tower hagaao ke he “Tama he tagata,” po ke “Patuiki,” ko Iesu a ia. Ti fakamaama ai ko e “tau matakainaga” he Patuiki, nakai ni ko lautolu ne pule fakalataha mo Iesu he lagi ka e ko lautolu oti foki ka nonofo he lalolagi ne kua hohoko atu ke he mitaki katoatoa. Ne pehē e Watch Tower to vehevehe e tau tagata he Pule Afe Tau he Keriso ti ko lautolu kua fifitaki ke he fakaalofa he Atua ke he tau mena oti to fakahigoa ai ko e tau mamoe.

5. He 1923, maama fēfē he tau tagata he Atua e fakataiaga?

⁵ He magaaho fakamui, ne lagomatai e Iehova haana tau tagata ke maama mitaki e fakataiaga nei. He 1923, ko e Watch Tower ia Oketopa 15 ne pehē ko e “Tama he tagata” ko Iesu a ia. Ka e fakaaoga mogoia e tau kupu Tohi Tapu ke fakamaama aki ko e “tau matakainaga” he fakataiaga kua hagaao ni ki a lautolu ka pule fakalataha mo Iesu ti ko lautolu oti ia to ha ha he lagi he magahala he Pule Afe Tau. Pehē foki ko e tau mamoe kua hagaao ki a lautolu ka nonofo he lalolagi i lalo he pule ha Iesu mo e haana tau matakainaga. Ti pehē e fakataiaga ko lautolu nei ne lagomatai e tau matakainaga he Patuiki, ko e vevehe, po ke fakafiliaga kua lata ni ke hoko he magaaho ne nonofo agaia e tau matakainaga fakauku ha Iesu he lalolagi, ato kamata e Pule Afe Tau. Ne pehē foki e vala tala ko e tau mamoe ko lautolu foki haia ne talitonu ki a Iesu mo e talitonu to tamai he Kautu e moui mitaki.

6. He 1995, hiki fēfē e maamaaga ha tautolu ke he fakataiaga?

⁶ Ke he loga he tau tau na manatu a tautolu to fakafili e tau tagata puhala he gahua fakamatala he vahā nei he fakahikuaga. Kaeke kua talia e lautolu e fekau ko e tau mamoe a lautolu, mo e ka fakatikai e lautolu e fekau ko e tau koti a lautolu. Ka e he 1995 kua hiki e maamaaga ha tautolu ke he fakataiaga. Ne fakatatai he The Watchtower a Mataio 24:29-31 (totou) mo e Mataio 25:31, 32 (totou), ti fakamaama ai to fakafili e Iesu e tau tagata he magahala he matematekelea lahi ka “hau e Tama he tagata mo e hana a lilifu.”a​—Kikite matahui tala.

7. Ko e heigoa e kakano he fakataiaga?

⁷ He vahā nei, kua maama mitaki e tautolu e fakataiaga nei ke he tau mamoe mo e tau koti. Kua iloa e tautolu ko e “Tama he tagata,” po ke “Patuiki,” ko Iesu a ia. Ko e “tau matakainaga” he Patuiki kua fakauku ke he agaaga tapu mo e to pule fakalataha mo Iesu he lagi. (Roma 8:16, 17) Ko e “tau mamoe” mo e “tau koti” ko e tau tagata mai he tau motu oti. To fakafili a lautolu he tata atu ke he matahiku he matematekelea lahi ka nakai leva to kamata. Ti iloa e tautolu to fakafili e Iesu e tau tagata fakavē ke he puhala kua leveki e lautolu e kau fakauku ne nonofo agaia he lalolagi. Ko e fiafia ha ia ha tautolu ha kua lagomatai e Iehova a tautolu ke he tau tau loga ke maama e fakataiaga nei mo e falu fakataiaga foki ia Mataio veveheaga 24 mo e 25!

FAKAAKO MAI HE FAKATAIAGA KI A TAUTOLU E UHO HE GAHUA FAKAMATALA

8, 9. Ko e ha ne fakahigoa “tututonu” ai e Iesu e tau mamoe?

⁸ Nakai fakaaoga e Iesu e tau kupu “fakamatala” po ke “gahua fakamatala” ke he fakataiaga he tau mamoe mo e tau koti. Ti iloa fēfē e tautolu kua fakaako mai he fakataiaga e uho he gahua fakamatala?

⁹ Ke moua e tali, fakamua kua lata ia tautolu ke mailoga ko e fakaakoaga ne fakaako e Iesu kua puhala mai he fakatai. Nakai tutala a ia hagaao ke he tau mamoe mo e tau koti mooli? Ke he puhala pihia, nakai kakano a ia ko e tau tagata oti kua fakafili ko e tau mamoe, ha kua fagai mo e fakatapulu ki a lautolu ne fakauku, leveki ka gagao, po ke ahiahi ki a lautolu he fale puipui. Nakai, pehē a Iesu kua “tututonu” e tau mamoe ha kua kitekite atu ai ki a lautolu ne fakauku ko e tau matakainaga haana mo e ha kua fakamooli ki a lautolu ne fakauku he tau aho fakamui nei ne uka.​—Mataio 10:40-42; 25:40, 46; 2 Timoteo 3:1-5.

10. Lagomatai fēfē he tau mamoe e tau matakainaga ha Keriso?

¹⁰ Ko e magaaho ne talahau e Iesu e fakataiaga ke he tau mamoe mo e tau koti, ko e tutala a ia hagaao ke he mena ka tupu he magahala he fakaotiaga. (Mataio 24:3) Ma e fakatai, ne pehē a ia: “To fakamatala atu foki e tala mitaki nai he kautu ke he lalolagi oti.” (Mataio 24:14) Ti ko e mogoia, to tutala a ia hagaao ke he tau mamoe mo e tau koti, ne talahau e ia e fakataiaga ke he tau taleni. Talahau e Iesu e fakataiaga nei ke fakaako aki a lautolu ne fakauku ke eketaha mo e fakamalolō ke he gahua fakamatala. Ka e tote e numera ha lautolu ne toe he lalolagi ka e lahi mahaki e gahua ke taute! Kua poaki ki a lautolu ne fakauku ke fakamatala ke he “tau atu motu oti” ato hoko e fakaotiaga. Tuga he iloa e tautolu mai he fakataiaga ke he tau mamoe mo e tau koti, kua lagomatai he “tau mamoe” e tau matakainaga ha Iesu. Ti ko e taha puhala mua atu e mitaki ka taute e lautolu e mena nei ko e lagomatai e tau matakainaga ha Iesu ke he gahua fakamatala. Lata ni kia he naia ke foaki e tau mena fakaalofa tupe ma e gahua po ke fakamafana ki a lautolu ke taute e gahua fakamatala?

KO HAI KUA LATA KE FAKAMATALA?

11. Ko e heigoa e hūhū kua liga hūhū he falu, mo e ko e ha?

¹¹ He vahā nei kua valu e miliona he tau tutaki ha Iesu, ti ko e tokologa ia lautolu ne nakai fakauku. Ne nakai foaki age e Iesu ki a lautolu e tau taleni. Foaki age e ia e tau taleni ke he tau matakainaga fakauku haana. (Mataio 25:14-18) Falu ne hūhū, ‘Kaeke kua nakai age e Iesu e tau taleni ki a lautolu, kua lata kia a lautolu ke fakamatala?’ Ē. O mai la ke kitia e kakano.

12. Ko e heigoa ne fakaako e tautolu mai he tau kupu ha Iesu ia Mataio 28:19, 20?

¹² Poaki a Iesu ke he tau tutaki oti haana ke fakamatala. Mole e liu tu mai ha Iesu, ne pehē a ia ke he tau tutaki haana ke taute tutaki mo e fakaako ki a lautolu e “tau mena oti” ne poaki e ia. Ti kua lata he tau tutaki nei ke omaoma foki ke he poakiaga ha Iesu ke fakamatala. (Totou Mataio 28:19, 20.) Kua maaliali ai ko tautolu oti kua lata ke fakamatala, he amaamanaki a tautolu ke momoui ke he lagi po ke lalolagi.​—Gahua 10:42.

13. Ko e heigoa ha tautolu kua fakaako mai he fakakiteaga ne kitia e Ioane?

¹³ Mai he tohi ha Fakakiteaga, fakaako e tautolu ko e gahua fakamatala to taute e lautolu ne fakauku mo e falu. Ne tala age e Iesu e fakakiteaga ke he aposetolo ko Ioane ke he “kitofaitane” kua uiina e tau tagata ke o mai mo e inu e vai he moui. Hagaao e kitofaitane ke he 144,000 ia lautolu ne fakauku ka pule mo Iesu he lagi. (Fakakiteaga 14:1, 3; 22:17) Hagaao e vai ke he poa lukutoto ha Iesu ka lagomatai e tau tagata ke moua e moui nakai agahala mo e mate. (Mataio 20:28; Ioane 3:16; 1 Ioane 4:9, 10) Fakaako fakamakutu e lautolu ne fakauku e tau tagata hagaao ke he lukutoto mo e puhala ka aoga a lautolu mai i ai. (1 Korinito 1:23) Ka e totoku he fakakiteaga e taha matakau foki he tau tagata ne nakai fakauku ka e moua e amaamanakiaga he moui ke he lalolagi. Kua poaki foki ki a lautolu ke tala age ke he tau tagata: “Ati hau ā.” Ti omaoma a lautolu ke he poakiaga ia he fakaako e tala mitaki ke he falu. Ko e fakakiteaga nei mogoia kua fakakite ko lautolu oti kua talia e fekau he tala mitaki kua lata ke fakamatala ke he falu.

14. Omaoma fēfē a tautolu ke he “fakatufono a Keriso”?

¹⁴ Ko e tau tagata oti kua omaoma ke he “fakatufono a Keriso” kua lata ke fakamatala. (Kalatia 6:2) Amanaki a Iehova ke he tau tagata oti kua tapuaki ki a ia ke omaoma ke he tau matafakatufono ia. He vahā kua mole, ne amanaki a ia ke he tau Isaraela mo e tau tagata motu kehe ne nonofo mo lautolu ke omaoma ke he tau matafakatufono haana. (Esoto 12:49; Levitika 24:22) Mooli, kua nakai lata a tautolu he vahā nei ke omaoma ke he tau matafakatufono oti ne age ke he tau Isaraela. Pete ia, kaeke kua fakauku po ke nakai, kua lata ia tautolu ke omaoma ke he “fakatufono a Keriso.” Taha he tau mena aoga lahi ne fakaako e Iesu ki a tautolu ko e fakaalofa. (Ioane 13:35; Iakopo 2:8) Kua lata ia tautolu ke fakaalofa ki a Iehova, Iesu, mo e tau tagata. Ti ko e puhala mitaki lahi mahaki ke fakakite e tautolu e fakaalofa ia ke tala age e tala mitaki he Kautu ke he tau tagata.​—Ioane 15:10; Gahua 1:8.

15. Ko e ha ne talahau e tautolu na poaki a Iesu ke he tau tutaki oti haana ke fakamatala?

¹⁵ Ko e mena ne talahau e Iesu ke he falu tutaki haana kua hagaao he falu magaaho ke he tau tutaki tokologa. Ma e fakatai, ne taute e Iesu e maveheaga mo e tau tutaki toko 11 ni haana ti mavehe ki a lautolu to pule a lautolu mo ia he Kautu haana. Ka ko e 144,000 to pule fakalataha mo ia. (Luka 22:29, 30; Fakakiteaga 5:10; 7:4-8) He mole e liu tu mai ha Iesu, ne tokogahoa ni he tau tutaki haana ne logona e poakiaga haana ke fakamatala. (Gahua 10:40-42; 1 Korinito 15:6) Ka ko e tau tutaki oti ha Iesu he senetenari fakamua ne omaoma ke he poakiaga ia. (Gahua 8:4; 1 Peteru 1:8) He vahā nei foki, iloa e tautolu kua lata ia tautolu ke fakamatala, pete ne nakai logona e leo ha Iesu ne tala mai ki a tautolu ke taute e gahua nei. Ti toko valu e miliona ha tautolu hane taute e gahua fakamatala. Iloa e tautolu he fakamatala, kua fakakite e tautolu na tua mooli a tautolu ki a Iesu.​—Iakopo 2:18.

KO E MAGAAHO ANEI KE FAKAMOOLI

16-18. Maeke fēfē a tautolu ke lagomatai fakamooli e tau matakainaga he Keriso, ti kua lata he ha a tautolu ke taute ai mogonei?

¹⁶ Kua tau fakalahi a Satani ke he tau matakainaga fakauku he Keriso ne haia agaia ke he lalolagi, ti iloa e ia “kua tote hana vaha” ne toe. (Fakakiteaga 12:9, 12, 17) Ka e pete ne totokoaga ha Satani, ne matutaki a lautolu ne fakauku ke takitaki e gahua fakamatala mo e tokologa atu e tagata mogonei ne logona e tala mitaki. Maaliali ai, kua fakalataha a Iesu mo lautolu ne fakauku, ti takitaki e ia a lautolu.​—Mataio 28:20.

¹⁷ Logona hifo e tautolu ko e lilifu ke lagomatai e tau matakainaga he Keriso he fakamatala. Lagomatai foki e tautolu he foaki tupe mo e gahua malolō ke talaga e tau Fale he Kautu, tau Fale Toloaga, mo e tau la ofisa. Ka omaoma fakamooli a tautolu ke he tau motua mo e falu matakainaga taane ne kotofa he “fekafekau fakamoli mo e loto matala,” kua fakakite e tautolu na manako a tautolu ke lagomatai e tau matakainaga he Keriso.​—Mataio 24:45-47; Heperu 13:17.

¹⁸ Nakai leva ko lautolu ne fakauku ne toe to moua e fakamau fakamailoga fakahiku. Ati fakatoka mai mogoia he tau agelu e tau matagi ne fa he lalolagi, ti kamata e matematekelea lahi. (Fakakiteaga 7:1-3) Ato kamata a Amaketo, to tahake e Iesu a lautolu ne fakauku ke he lagi. (Mataio 13:41-43) Ti ka manako a tautolu ke haia he faahi he tau mamoe ka hau a Iesu, ko e magaaho anei ke fakamooli ke he tau matakainaga fakauku he Keriso.