To “Mataala” Nakai a Koe?

1, 2. (a) Ko e heigoa ne fakakite e Iesu hagaao ke he tau aho fakamui? (e) Ko e heigoa e tau hūhū ka fakatutala a tautolu ki ai?

LALI ke manamanatu kua nofo a Iesu he Mouga ko Olive hane onoono ke he faituga i Ierusalema. Ko ia mo e tau aposetolo tokofā haana ko Peteru, Aneterea, Iakopo, mo Ioane. Ne fanogonogo fakamitaki a lautolu ki a Iesu he tala age e ia ki a lautolu e perofetaaga ofoofogia ke he vahā anoiha. Fakakite he perofetaaga e mena ka tupu he tau aho fakamui he lalolagi kelea nei ka pule a Iesu he Kautu he Atua. Tala age a Iesu ki a lautolu he magahala ofoofogia ia, to hukui he “fekafekau fakamoli mo e loto matala” a ia he lalolagi mo e to foaki ke he tau tutaki haana e tau mena kai fakaagaaga he tau magaaho tonu.​—Mataio 24:45-47.

² Matutaki atu, he perofetaaga taha ia, ne talahau e Iesu e fakatai ke he tau tamafine tote ne tokohogofulu. (Totou Mataio 25:1-13.) He vala tala nei, to fakatutala a tautolu ke he tau hūhū nei: (1) Ko e heigoa e kakano aoga he fakataiaga? (2) Fakagahua fēfē e lautolu ne fakauku fakamooli e fakatonuaga he fakatai, ti ko e heigoa e tau fua? (3) Aoga fēfē a tautolu takitokotaha he vahā nei mai he fakatai ha Iesu?

KO E HEIGOA E KAKANO HE FAKATAIAGA

3. He tau tau kua mole, fakamaama fēfē he tau tohi ha tautolu e fakatai ke he tau tamafine tote ne tokohogofulu, ti ko e heigoa mogoia e fua?

³ He vala tala kua mole, ne fakaako e tautolu he tau tau e kua mole, ne hikihiki he fekafekau fakamoli e puhala ne fakamaama aki e falu tala Tohi Tapu. Ne hagaaki lahi e fekafekau fakamoli mogonei ke he tau fakaakoaga aoga mo e nakai lahi ke he tau kakanoaga fakatai po ke fakaperofeta. Tuga anei, ko e fakatai ha Iesu ke he tau tamafine tote ne tokohogofulu. Fa mahani e tau tohi ha tautolu ke talahau ko e tau lamepa, magalolo, mo e tau lupo ne hukui taha mena po ke taha tagata. Maeke kia ke hagaaki ke he tau vala tala matafeiga, ati galo e fekau mafiti mo e mukamuka he fakatai? Ko e tali ke he hūhū ia kua aoga.

4. He fakatai, iloa fēfē e tautolu (a) ko hai e kitofaihoana? (e) ko hai e tau tamafine tote?

⁴ Kia kumikumi la tautolu ke he fekau aoga he fakatai ha Iesu. Fakamua, manamanatu ke he tau tagata he fakatai ke he tau tamafine tote ne tokohogofulu. Ko hai e kitofaihoana? Ko Iesu. Iloa e tautolu e mena nei ha ko e mogo fakamua, ne hagaao a Iesu ki a ia ko e kitofaihoana. (Luka 5:34, 35) Ko hai e tau tamafine tote? Ko lautolu ko e “fuifui mamoe gahoa” he tau Kerisiano fakauku. Iloa fēfē e tautolu? He fakatai, kua lata he tau tamafine tote ke mautali mo e ha lautolu a tau lamepa kua puho he magaaho ka hau e kitofaihoana. Mailoga la mogonei e mena ne talahau e Iesu ke he tau tutaki fakauku haana: “Kia pipi ha mutolu a tau tokupu, kia puho foki ha mutolu a tau lamepa; Ko mutolu foki, kia tuga e tau tagata a mutolu ne talifaki atu ke he iki ha lautolu, ato liu mai a ia he kaiaga mena.” (Luka 12:32, 35, 36) Lafi ki ai, ko e aposetolo ko Paulo mo e aposetolo ko Ioane ne fakatatai tokoua e tau tutaki fakauku he Keriso ke he tau tamafine tote fakamoli. (2 Korinito 11:2; Fakakiteaga 14:4) Ti kitia e tautolu ko e fakatonuaga mo e hatakiaga ne moua ia Mataio 25:1-13 kua hagaao ke he tau tutaki fakauku ha Iesu.

5. Fakakite fēfē e Iesu e magaaho ka fakagahua e fakatai haana?

⁵ Matutaki atu, ko e magaaho fe ne hagaao e fakatonuaga ha Iesu ki ai? Ko e mena ne talahau e Iesu tata atu ke he matahiku he fakatai ne lagomatai a tautolu ke iloa. Pehē a ia: “Ti hau ai e kitofaihoana.” (Mataio 25:10) He Kolo Toko ia Iulai 15, 2013, ne fakaako e tautolu ko e perofetaaga ha Iesu ia Mataio veveheaga 24 mo e 25, laga valu e hagaao ke he “hau” ha Iesu. Magaaho ne hagaao a Iesu ke he “hau” haana, ne hagaao a ia ke he magaaho he matematekelea lahi ka hau a ia ke fakafili mo e moumou e lalolagi kelea nei. Ti fakahiku e tautolu kua hagaao e fakatai ha Iesu ke he tau aho fakamui ka e to “hau” a ia he magaaho matematekelea lahi.

6. Ko e heigoa e fekau aoga he fakatai?

⁶ Ko e heigoa e fekau aoga kua fakaako e tautolu mai he fakatai nei? Manatu e kakano he tala Tohi Tapu. Ia Mataio veveheaga 24, ne fakatutala a Iesu ke he “fekafekau fakamoli mo e loto matala.” Ko e fekafekau ia ko e matakau tote he tau tagata taane fakauku ka takitaki e tau tutaki he Keriso he tau aho fakamui. Ne hataki e Iesu e tau tagata taane ia kua lata ia lautolu ke fakatumau e mahani fakamooli. He veveheaga ka mui mai kua fakaaoga e Iesu e fakatai he tau tamafine tote ne tokohogofulu ke fakatonu aki e tau tutaki fakauku oti haana he tau aho fakamui. Ko e fekau “kia mataala” ke nakai galo e lautolu e palepale ha lautolu ke he lagi. (Mataio 25:13) Kia kumikumi la tautolu mogonei ke he fakatai mo e kitia e puhala kua fakagahua e lautolu ne fakauku e fakatonuaga.

FAKAGAHUA FĒFĒ E LAUTOLU NE FAKAUKU E FAKATONUAGA HE FAKATAI?

7, 8. (a) Ko e ha kua mautauteute e tau tamafine tote ne iloilo? (e) Mautauteute fēfē a lautolu ne fakauku?

⁷ He fakatai, ne fakamaama e Iesu he nakai tuga e tau tamafine tote ne goagoa, ko e tau tamafine tote ne iloilo kua mautali he magaaho ne hau e kitofaihoana. Ko e ha? Ha kua mautauteute mo e mataala a lautolu. Lata e tau tamafine tote oti ne tokohogofulu ke fakatumau ke mataala mo e ke tumau e puho he tau lamepa ha lautolu he pō. Nakai tuga e tau tamafine tote ne goagoa, kua mautauteute e tau tamafine tote tokolima ne iloilo ha kua uta fakalahi e lautolu e magalolo mo e tau lamepa ha lautolu. Mautauteute fēfē e tau Kerisiano fakauku fakamooli ma e hoko maiaga ha Iesu?

⁸ Kua mautauteute a lautolu ne fakauku ke fakamooli e kotofaaga ha lautolu ato hoko ke he fakaotiaga. Mailoga e lautolu ko e fekafekauaga ha lautolu ke he Atua kua lata ke nakai hagaaki ke he tau koloa fakatino ne moua he lalolagi ha Satani, ka kua makai a lautolu ke taute pihia. Ne eketaha a lautolu ke fekafekau fakamooli ki a Iehova, nakai ha kua tata e fakaotiaga, ka e fakaalofa a lautolu ki a Ia mo e haana Tama. Kua tumau e mahani fakamooli ha lautolu ti nakai fakaatā e velevelekoloa, mahani feuaki, mo e tau aga lotokai he lalolagi ke lauia a lautolu. Tuga e tau tamafine tote ne iloilo kua mautali mo e ha lautolu a tau lamepa, ne matutaki a lautolu ne fakauku ke kikila lahi, he talifaki fakaeneene ma e hauaga he Kitofaihoana, pete foki kua tuga na mule a ia.​—Filipi 2:15.

9. (a) Ko e heigoa e hatakiaga ne foaki e Iesu hagaao ke he fia momohe? (e) Tali atu fēfē a lautolu ne fakauku: “Kitiala, ko e kitofaihoana”? (Kikite foki e matahui tala.)

⁹ Ne mautali foki e tau tamafine tote ne iloilo ma e hoko maiaga he kitofaihoana ha kua mataala a lautolu. Ka e he fakatai, ko e tau tamafine tote oti ne tokohogofulu ne “fia momohe ai a lautolu oti, kua pulumohea ni” he fa e talifaki ke he kitofaihoana ne tuga na mule. Ti kua maeke nakai he tau Kerisiano fakauku he vahā nei ke “pulumohea,” kakano, kua fakatauhele he fa e talifaki ke he hoko maiaga he Keriso? Ē. Iloa e Iesu ko e tagata foki kua makai mo e mautali lahi kua lolelole mo e fakatauhele he fa e talifaki ke he hoko maiaga haana. Ti kua eketaha fakalahi foki e tau Kerisiano fakauku fakamooli ke tumau e mataala. Pihia fēfē? He fakatai, ne ogo atu e tau tamafine tote oti ne tokohogofulu: “Kitiala, ko e kitofaihoana.” Ka ko e tau tamafine tote ne iloilo ni ne fakatumau ke mataala. (Mataio 25:5, 6; 26:41) Pihia foki, he tau aho fakamui, ko e tau Kerisiano fakauku ne fakamooli kua ogo atu: “Kitiala, ko e kitofaihoana.” Ne talia e lautolu e fakamooliaga malolō kua amanaki tuai a Iesu ke hau, ti kua mautali a lautolu ke he hoko maiaga haana.a (Kikite matahui tala.) Kia kumikumi foki la tautolu ke he matahiku he fakataiaga ha Iesu, ne hagaaki ke he magahala pauaki.

PALEPALE MA LAUTOLU NE ILOILO MO E FAKAHALA MA LAUTOLU NE GOAGOA

10. Ko e heigoa kua liga hūhū e tautolu hagaao ke he fakatutalaaga he tau tamafine tote ne iloilo mo e tau tamafine tote ne goagoa?

¹⁰ Tata ke he matahiku he fakatai, kua ole e tau tamafine tote ne goagoa ke he tau tamafine tote ne iloilo ke age taha magalolo ma e tau lamepa ha lautolu. Ka e nakai manako e tau tamafine tote ne iloilo ke lagomatai. (Totou Mataio 25:8, 9.) Ka ko e magaaho fe ne nakai manako e tau Kerisiano fakauku fakamooli ke lagomatai e taha kua manako lagomatai? Manatu e magahala kua hagaao e fakatai ki ai. Kua hau a Iesu, ko e Kitofaihoana, ke fakafili he tata atu ke he fakaotiaga he matematekelea lahi. Ti tuga kua hagaao e fakatutalaaga ke he mena ne tupu ato hoko e fakaotiaga he matematekelea lahi. Ko e ha ne talahau pihia a tautolu? He magaaho ia, to moua e lautolu ne fakauku e fakamau fakamailoga fakahiku ha lautolu.

11. (a) Ko e heigoa ka tupu ato kamata e matematekelea lahi? (e) Ko e heigoa e kakano he tau tamafine tote ne iloilo he tala age ke he tau tamafine tote ne goagoa ke o atu mo e fakatau ai e magalolo?

¹¹ Ato kamata mogoia e matematekelea lahi, to moua e lautolu oti ne fakauku kua fakamooli ne ha ha he lalolagi e fakamau fakamailoga fakahiku ha lautolu. (Fakakiteaga 7:1-4) Tali mai mogoia, to o hake mooli a lautolu ke he lagi. Ka e manamanatu la ke he tau tau ato hoko e matematekelea lahi. Ko e heigoa ka tupu ki a lautolu ne fakauku ne nakai tumau ke mataala ti kua nakai mahani fakamooli? To nakai moua e lautolu e fakamau fakamailoga fakahiku. He magaaho ia, to fakauku e falu Kerisiano fakamooli. Ka kamata e matematekelea lahi, to liga ofomate a lautolu ne goagoa ke kitia e moumouaga ha Papelonia Lahi. Liga ko e mogo tonu ia ni ne mailoga e lautolu kua nakai mautali a lautolu ke he hoko maiaga ha Iesu. Mogoia, ko e heigoa ka tupu ka ole lagomatai a lautolu? Ko e tali he fakataiaga. Ne nakai manako e tau tamafine tote ne iloilo ke foaki e magalolo ha lautolu ke he tau tamafine tote ne goagoa ka e tala age a lautolu ke o atu mo e fakatau ai e magalolo. Ha kua “tuloto po,” ne nakai fai tagata fakafua ke age e magalolo ki a lautolu. Kua mule lahi tuai!

12. (a) He magahala he matematekelea lahi, ko e heigoa ka tupu ke he ha tagata ne fakauku he taha vahā ka kua nakai mahani fakamooli ato hoko e fakamau fakamailoga fakahiku? (e) Ko e heigoa ka tupu ki a lautolu kua tuga e tau tamafine tote ne goagoa?

¹² He matematekelea lahi, ko lautolu ne fakauku kua fakamooli to nakai maeke ke lagomatai taha kua nakai mahani fakamooli. To mule lahi ai. Ti ko e heigoa ka tupu ki a lautolu ne nakai mahani fakamooli? Mailoga e mena ka tupu ke he tau tamafine tote ne goagoa ne o atu ke fakatau e magalolo: “Ti hau ai e kitofaihoana; ko lautolu foki ne tauteute kua huhu fakalataha a lautolu mo ia ke he taonaga, ti pa ai e gutufale.” Ka hau a Iesu ke he lilifu haana tata ke he fakaotiaga he matematekelea lahi, to fakapotopoto e ia a lautolu ne fakauku ne fakamooli ke he lagi. (Mataio 24:31; 25:10; Ioane 14:1-3; 1 Tesalonia 4:17) Ka e to tiaki e Iesu a lautolu ne nakai mahani fakamooli. Tuga e tau tamafine tote ne goagoa, liga pehē a lautolu: “Ko e iki na e, ko e iki na e, kia vevete a e koe e gutuhala ma mautolu.” Ka e to tali atu fēfē a Iesu? Momoko ai, to tali pihia foki a ia ki a lautolu tuga ka tali e ia ke he tokologa ia lautolu ne tuga e tau koti: “Ko e moli, ke tala atu e au kia mutolu, nakai iloa e au a mutolu.”​—Mataio 7:21-23; 25:11, 12.

13. (a) Ko e ha kua nakai lata ke fakahiku ai to tokologa e tutaki fakauku he Keriso ka nakai mahani fakamooli? (e) Ko e ha kua talahau e tautolu na fakakite he fakatai ha Iesu e mauokafua haana he tau Kerisiano fakauku? (Kikite fakatino he kamataaga.)

¹³ Pehē kia a Iesu ko e tokologa ha lautolu ne fakauku to nakai mahani fakamooli ti kua lata ke hukui? Nakai. Ia Mataio veveheaga 24, totou e tautolu na hataki e Iesu e fekafekau fakamoli mo e loto matala ke nakai eke mo fekafekau kelea. Nakai kakano ai kua amanaki a ia to tupu e mena nei. Pihia foki, ko e fakatai ke he tau tamafine tote ne tokohogofulu ko e hatakiaga. Tuga ni e tau tamafine tote tokolima ne goagoa mo e tokolima ne iloilo, kua lata e tau Kerisiano fakauku takitaha ke fifili ke mautauteute mo e mataala. Neke fakahiku a ia ke goagoa mo e nakai mahani fakamooli. Ne tuku age e Paulo e hatakiaga pihia ke he tau matakainaga fakauku haana. (Totou Heperu 6:4-9; fakatatai Teutaronome 30:19.) Kua lautonu e hatakiaga ka e mauokafua foki a ia to moua he tau matakainaga haana e palepale ha lautolu. Ko e hatakiaga he fakatai ke he tau tamafine tote ne tokohogofulu kua fakakite na mauokafua pihia foki a Iesu ki a lautolu ne fakauku. Iloa e ia kua maeke e tau fekafekau fakauku takitaha haana ke fakatumau e mahani fakamooli mo e moua e palepale homo ue atu!

AOGA FĒFĒ E ‘TAU MAMOE KEHE’ HE KERISO?

14. Ko e ha kua aoga foki e ‘tau mamoe kehe’ mai he fakatai he tau tamafine tote ne tokohogofulu?

¹⁴ Ne hagaao e fakatai ha Iesu ke he tau Kerisiano fakauku. Ka e maeke foki kia ke aoga e ‘tau mamoe kehe’ mai he fakatai ha Iesu? (Ioane 10:16) Ē! Kua mukamuka e fekau he fakatai: “Kia mataala a mutolu.” Ti talahau foki e Iesu: “Ko e mena kua tala atu e au kia mutolu, kua tala atu ai e au ke he tau tagata oti, Kia mataala a.” (Mareko 13:37) Manako a Iesu ke he tau tutaki oti kana haana ke mautauteute mo e mataala. Ti kua lata he tau Kerisiano ke muitua e fakafifitakiaga mitaki ha lautolu ne fakauku, ne tuku fakamua e gahua fakamatala ke he tau momoui ha lautolu. Manamanatu na ole e tau tamafine tote ne goagoa ke he tau tamafine tote ne iloilo ke age taha magalolo ma lautolu. Nakai moua e ole ha lautolu. Ti fakamanatu he mena ia ki a tautolu kua lata ke igatia ni a tautolu mo e fakatumau e mahani fakamooli ke he Atua, ke mautauteute, mo e ke tumau e mataala. Nakai fai tagata ke taute e mena ia ma tautolu. Igatia a tautolu mo e fai fakalagoaga ke he fakafili tututonu ko Iesu Keriso, ka nakai leva ti hau. Ti kua lata ia tautolu ke mautali!

15. Ko e ha e fakamauaga he Keriso mo e haana a kitofaitane kua ofoofogia ma e tau Kerisiano mooli oti?

¹⁵ Kua fiafia lahi e tau Kerisiano oti ke he fakamauaga ne totoku he fakatai ha Iesu. He vahā anoiha, he mole e felakutaki i Amaketo, to eke e tau Kerisiano fakauku mo kitofaitane he Keriso. (Fakakiteaga 19:7-9) Ko lautolu oti he lalolagi to aoga mai he fakamauaga ia he lagi. Ko e ha? Ha kua fakamooli ai e fakatufono mitaki katoatoa ma e tau tagata oti kana. He amaamanaki a tautolu ke momoui tukulagi he lagi po ke lalolagi, kia eketaha tumau a tautolu ke mautauteute mo e tumau e mataala. Ka taute pihia e tautolu, maeke ia tautolu ke moua e vahā anoiha kua tauteute e Iehova ma tautolu!