Kia Mataala mo e Kia Fakailoilo!

“Hanai, kia mataala a mutolu, ha kua nakai iloa e mutolu e aho, po ke magaaho ke hau ai e Tama he tagata.”​—MATAIO 25:13.

1. Ko e heigoa ne matakaki e aposetolo ko Ioane ki ai?

HE MATUTAKIAGA fakamui i loto he Tohi Tapu, ne mavehe a Iesu: “To fina atu vave au.” Ne tali age hana aposetolo ko Ioane: “Amene. Haia ni, ko e Iki na e ma Iesu, kia haele mai a koe.” Kua nakai fakauaua e aposetolo to haele mai a Iesu. Ha kua fakalataha a Ioane mo e tau aposetolo ne huhu ki a Iesu: “Po ke hoko a fe e tau mena ia? po ke heigoa foki e fakamailoga he hāu a [“ha ha hinei,” NW, faka-Heleni, pa·rou·siʹa] mo e fakaotiaga he lalolagi?” E, kua mauokafua e amanakiaga ha Ioane ke he ha ha hinei ha Iesu he vaha anoiha.​—Fakakiteaga 22:20; Mataio 24:3.

2. Ke he ha ha hinei ha Iesu, ko e heigoa e tuaga i loto he tau lotu?

² Kua lavea ni e mauokafua pihia he vaha nei. Kua ha ha he tau lotu loga e taofiaga hagaao ke he “haele mai” ha Iesu, ka e tokofiha ni ia lautolu ne amanaki ki ai. Ti kua nonofo pihia a lautolu. Ne talahau he tohi The Parousia in the New Testament: “Kua tote e fakaohoohoaga he amaamanakiaga he Parousia ke he moui, manatu mo e gahua he lotu. . . . Ko e mafiti lahi ne kua lata he lotu ke taute e matagahua hana ke fakatokihala mo e he fakapuloa e evagelia he gahua misionare, kua lolelole lahi kaeke kua nakaila galo moki ia.” Ka e nakai pihia e tau tagata oti!

3. (a) Fefe e logonaaga he tau Kerisiano hagaao ke he pa·rou·siʹa? (e) Ko e heigoa kua lata ia tautolu ke manamanatu pauaki ki ai he mogonei?

³ Hane fakatalitali fakamakutu e tau tutaki ha Iesu ke he fakaotiaga he fakatokaaga kelea he tau mena nei. He taute fakamoli pihia, kia lata ia tautolu ke tumau ke hako e onoonoaga ke he tau mena oti ne putoia ke he ha ha hinei ha Iesu mo e omaoma ki ai. To lagomatai he mena ia a tautolu ke “tumau ato hoko ke he fakaotiaga, to fakamoui.” (Mataio 24:13) Ko e kakano he perofetaaga ne moua e tautolu he Mataio tau veveheaga 24 mo e 25, ne tomatoma fakapulotu mai a Iesu ke lata ia tautolu ke fakagahuahua, ke he aoga ni ha tautolu. He veveheaga 25 kua toka ai e tau fakataiaga ne liga iloa e koe, putoia ai taha ne hagaao ke he tau tamafine tote ne tokohogofulu (tau tamafine iloilo mo e goagoa) mo e ke he fakataiaga he tau taleni. (Mataio 25:1-30) Ka e aoga fefe a tautolu mai he tau fakataiaga ia?

Kia Mataala, Tuga e Tau Tamafine Tote ne Tokolima!

4. Ko e heigoa e alito he fakataiaga he tau tamafine tote?

⁴ Liga manako a koe ke liu totou e fakataiaga he tau tamafine tote, ne moua he Mataio 25:1-13. Ko e mauhoana mahuiga i Iuta ne fano e kitofaihoana ke he fale he matua tane he kitofaitane ke luaki a ia ke he kaina he kitofaitane (po ke he matua tane hana). He tau fakaholoaga pihia kua ha ha ai e tau tagata ta kofe mo e tau tagata lologo, ti kua nakai iloa tonu e magaaho ka hohoko ai. I loto he fakataiaga, ne fakatali e tau tamafine tote ne tokohogofulu ke he hauaga he kitofaihoana ti hoko ke he pouli he po. Tokolima ne goagoa he ai uta foki ha magalolo ma e lamepa ati liliu ai ke fakatau magalolo foki. Ka kua iloilo e tokolima ne toe he fai magalolo foki ne uta he tau lupo ke utu aki e tau lamepa ha lautolu ka maha he fakatalitali. Ti ko lautolu ni e tokolima nei ne nonofo mo e mautali he magaaho ne hau e kitofaihoana. Ha kua pihia, ko lautolu ni hokoia ne fakaata ke huhu atu ke he taonaga. He magaaho ne liliu mai e tau tamafine tote goagoa ne tokolima, kua mule lahi a lautolu ke huhu ki loto.

5. Ko e heigoa e tau Tohiaga Tapu ne fakamaama mai e kakano fakatai he fakataiaga he tau tamafine tote?

⁵ Loga e vala i loto he fakataiaga nei ne kua maama mo mena fakatai. Ke fakatai ki ai, ne tala e tau Tohiaga Tapu hagaao ki a Iesu ko e kitofaihoana. (Ioane 3:28-30) Ne fakatai e Iesu a ia ke he tama he patuiki, ko ia haia ne kua tauteute ai e taonaga. (Mataio 22:1-14) Mo e fakatatai he Tohi Tapu e Keriso ke he tagata fai hoana. (Efeso 5:23) Fuluola ai, ha kua fakamaama e tau Kerisiano fakauku he falu mena ko e “hoana” he Keriso, ka kua nakai totoku e hoana i loto he fakataiaga. (Ioane 3:29; Fakakiteaga 19:7; 21:2, 9) Ka kua, vagahau ai hagaao ke he tau tamafine tote ne tokohogofulu, mo lautolu ne fakauku he falu mena ni kua fakatatai ke he tamafine tote ne fakatu tane ke he Keriso.​—2 Korinito 11:2.a

6. Ko e heigoa e tomatomaaga ne foaki e Iesu he magaaho ne fakahiku e fakataiaga he tau tamafine tote?

⁶ Kehe mai he tau matafeiga pihia mo e he ha hagaaoaga fakaperofeta, kua ha ha ai e tau matapatu fakaakoaga mitaki ka ako e tautolu mai he fakataiaga nei. Ke tuga anei, ne fakaoti aki e Iesu e tau kupu: “Hanai, kia mataala a mutolu, ha kua nakai iloa e mutolu e aho, po ke magaaho ke hau ai e Tama he tagata.” Kua fakakite ai he fakataiaga e lata ha tautolu takitokotaha ke mataala, ke mailoga e hoko maiaga he fakaotiaga he fakatokaaga kelea nei. To hoko mai moli e fakaotiaga, pete ni kua nakai iloa moli e tautolu e aho. Ke he mena nei, kia mailoga e tau mahani ne fakakite he matakau ne ua he tau tamafine tote.

7. Ko e heigoa e kakano ne goagoa ai e tau tamafine tote ne tokolima i loto he fakataiaga?

⁷ Ne talahau a Iesu: ‘Kua goagoa e tokolima ha lautolu.’ Kua pihia kia ha kua nakai talitonu a lautolu kua hane haele mai e kitofaihoana? Kua o kia a lautolu ke tutuli e tau mena ne fiafia ki ai? Po kua fakavaia a lautolu? Nakai pihia. Ne talahau e Iesu ko lautolu nei ne tokolima kua “o atu ke fonofono e kitofaihoana.” Iloa e lautolu hane haele mai a ia, mo e manako a lautolu ke putoia ki ai, mo e ke fakalataha ke he “taonaga.” Ka e, kua mautauteute katoatoa nakai a lautolu? Ne fakatali a lautolu ki a ia, ato ‘tuloto e po,’ ka kua nakai mautauteute a lautolu ke he ha magaaho ni he hauaga hana​—ko e hau tuai kia po ke mule ke he mena ne amanaki a lautolu ki ai he mogo fakapa.

8. Ko e puhala fe ne kitia e tau tamafine tote ne tokolima i loto he fakataiaga ke iloilo?

⁸ Ka ko e tokolima​—ko lautolu ne iloilo he talahau e Iesu​—ne o foki mo e tau lamepa puho, ke fakatali ke he hauaga he kitofaihoana. Ne fakatalitali foki a lautolu, ka e “iloilo” a lautolu. Ko e kupu Heleni ne fakaliliu “iloilo” kua kakano ke “lotomatala, fai manamanatu, fai pulotu.” Ko lautolu nei ne tokolima nei kua fakakite e iloilo he utu foki taha magalolo he tau lupo ti ta mai ke utu aki e tau lamepa ha lautolu ka maha. Kitia ai e matakaki ha lautolu ke mautauteute ma e kitofaihoana ti nakai age e lautolu e magalolo ha lautolu. Ko e mataala pihia kua nakai hepe, ha kua fakamoli ai he ha ha i ai ha lautolu mo e kua mautauteute katoatoa he magaaho ne hau e kitofaihoana. Ko lautolu nei “ne tauteute kua huhu fakalataha a lautolu mo ia ke he taonaga, ti pa ai e gutufale.”

9, 10. Ko e heigoa e manatu he fakataiaga he tau tamafine tote mo e ko e heigoa e tau huhu kua lata ke huhu hifo ki a tautolu ni?

⁹ Nakai ko e fakaakoaga a ia ha Iesu ke he puhala kua lata ma e mauhoana, nakai ni ko e fakatonuaga foki a ia hana hagaao ke he fakafetuiaga. Ko e manatu hana: “Hanai, kia mataala a mutolu, ha kua nakai iloa e mutolu e aho, po ke magaaho.” Kia huhu hifo ni ki a koe, ‘Kua mataala moli kia au hagaao ke he ha ha hinei ha Iesu?’ Kua talitonu a tautolu kua hane pule a Iesu ainei i luga he lagi, ka e fefe e onoonoaga ha tautolu ke he moli he ‘hauaga nakai to mule mai he Tama he tagata ke he tau aolagi mo e malolo mo e lilifu lahi’? (Mataio 24:30) Ti he “tuloto po,” kua tata lahi tuai e hauaga he kitofaihoana ke he magaaho ne o fakamua e tau tamafine tote ke feleveia mo ia. Kua pihia ai foki e tata lahi he hauaga he Tama he tagata ke fakaotioti e fakatokaaga kelea nei ke he magaaho fakapa ne fakatalitali a tautolu ke he hana haele mai. (Roma 13:11-14) Kua mauoka nakai a tautolu ke mataala, ti mua atu ke mataala he kua tatatata lahi mai tuai e magaaho ia?

¹⁰ Ke omaoma e poakiaga “kia mataala” kua lata ni ke mataala tumau. Tokolima e tamafine tote ne maha e magalolo ha lautolu ti liliu ke fakatau magalolo foki. Liga kua fakalavelave pihia e Kerisiano he vaha nei ati nakai mautali katoatoa a ia ke he hauaga ha Iesu ne tata lahi mai. Kua tupu ai ke he falu Kerisiano he senetenari ke fakamua aki. Kua maeke ke tupu ke he falu foki he vaha nei. Ti, kia huhu hifo a tautolu ki a tautolu, ‘Kua tupu foki kia ki a au?’​—1 Tesalonia 5:6-8; Heperu 2:1; 3:12; 12:3; Fakakiteaga 16:15.

Kia Fakailoilo he kua Tatatata Mai e Fakaotiaga

11. Ko e heigoa foki taha fakataiaga ha Iesu, mo e ko e ha kua tatai ai?

¹¹ I loto he taha fakataiaga foki hana, kua mahomo atu e mena ne taute e Iesu he fakamalolo noa e tau tutaki hana ke mataala. He mole e talahau hagaao ke he tau tamafine tote iloilo mo e goagoa, ne talahau e ia e fakataiaga ke he tau taleni. (Totou Mataio 25:14-30.) Ke he tau mena loga kua fakatata he mena nei hana fakataiaga ke he tau mina, ne talahau e Iesu ha kua tokologa ne “piko na lautolu ko e hoko mai ne fai e kautu he Atua.”​—Luka 19:11-27.

12. Ko e heigoa e alito he fakataiaga he tau taleni?

¹² I loto he fakataiaga he tau taleni, ne tala age a Iesu ke he tagata tane, ne amanaki ke fano fenoga, ke ui ke he tau fekafekau tokotolu. Kua age e ia lima e taleni ke he taha, ka e ua ke he taha, ti taha ki a ia fakamui​—“kua fakalata ke he malolo ha lautolu takitokotaha.” Liga ko e taleni ario anei, ko e tupe lahi ne moua he tagata gahua he 14 e tau tau​—ko e tupe lahi! He magaaho ne liumai e tagata, ne fakafili e ia e tau fekafekau hana ke he mena ne taute e lautolu he magahala ne “mole atu e po loga” ne fano kehe ai a ia. Ko e tau fekafekau tokoua fakamua kua fakalahiua e aoga he mena ne age ki a laua. Ne tala age a ia “kua mitaki,” ti kotofa a laua takitokotaha ke he tau mena loga, ti fakahiku age: “Ati hu mai a a koe ke he fiafia he hau a Iki.” He ui ko e tagata uka e iki, ko e fekafekau ne taha e taleni ne nakai taute ha mena ke fai muka ai. Ne fufu e ia e tupe, ka e nakai tuku ke he tau fakafua tupe ke moua e taui. Ne ui ai he iki a ia “ko e fekafekau kelea na e, mo e teva” ha kua totoko a ia ke he fiafia he hana iki. Fakahiku ai, ne uta kehe e taleni ia ia, ti liti a ia ki fafo ke he mena ne “ha ha i ai e tagi aue mo e konoi he tau nifo.”

13. Kitia fefe a Iesu ke tuga e iki i loto he fakataiaga?

¹³ Kua maama foki e tau matafeiga nei mo mena fakatai. Ke fakatai ki ai, ko Iesu, ne fakatino he tagata fano fenoga, kua toka hana tau tutaki, hake ke he lagi, ti fakatali ke he magaaho loa ato moua e ia e pule fakapatuiki.b (Salamo 110:1-4; Gahua 2:34-36; Roma 8:34; Heperu 10:12, 13) Ti, pihia agaia ni, kua maeke ia tautolu ke maama e fakaakoaga ne mua po ke matapatu fakaakoaga ne kua lata ia tautolu oti ke fakagahuahua he tau momoui ha tautolu. Ko e heigoa e mena ia?

14. Ko e heigoa e mena kua lata ne peehi mai he fakataiaga he tau taleni?

¹⁴ Pete ni ko e amaamanakiaga ha tautolu ke moui nakai mate i luga he lagi po ke moui tukulagi he lalolagi parataiso, kua fakamaaliali mai he fakataiaga ha Iesu kua lata ia tautolu ke fakamakamaka ke he tau gahua faka-Kerisiano. Ti kua lata moli ni e fekau he fakataiaga nei ke fakakatoatoa ke he kupu: fakailoilo. Ne fakatoka he tau aposetolo e fifitakiaga tali mai he Penetekose 33 V.N. Ne totou e tautolu: “Ko e falu a kupu loga foki ne talahau fakatonu atu e ia mo e tomatoma atu ai, kua pehe atu, Kia fakamomoui a a mutolu mai he hau fakakeukeu nai.” (Gahua 2:40-42) Mo e kua mahomo atu ha e tau mena ne moua ha ko e tau gahua hana! He fakalataha atu falu mo e tau aposetolo ke he gahua fakamatala faka-Kerisiano, ne iloilo foki a lautolu, mo e tala mitaki ‘kua fua ke he lalolagi oti.’​—Kolose 1:3-6, 23; 1 Korinito 3:5-9.

15. Ko e puhala uho fe kua lata ia tautolu ke fakagahuahua e manatu ne mua he fakataiaga he tau taleni?

¹⁵ Kia tokaloto e hagaaoaga he fakataiaga nei​—ko e perofetaaga hagaao ke he ha ha hinei ha Iesu. Kua toka ai ia tautolu e tau fakamoliaga loga ko e pa·rou·siʹa ha Iesu hane tolomaki mai mo e nakai leva to hokotia ai ke he tapunu. Liu manatu la e matutakiaga ne taute e Iesu he vahaloto he “fakaotiaga” mo e gahua ne kua lata he tau Kerisiano ke taute: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:14) Mo e mena nei he loto, ko e faga fekafekau fefe a tautolu? Huhu hifo ki a koe ni: ‘Ha ha i ai kia ha kitiaaga ke fakahiku kua tatai au ke he fekafekau ne fufu e mena ne age ki a ia, liga kua lavelave ni he taute e tau mena hana? Po kua kitia maali au ke tuga a laua ne mitaki mo e fakamoli? Kua gahua katoa kia au ke fakatupu e fiafia he Iki ke he tau magaaho oti?’

Mataala mo e Iloilo he Magahala he Hana Ha Ha Hinei

16. Ko e heigoa e fekau ne ha ha he tau fakataiaga ua ne tutala a tautolu ki ai ma hau?

¹⁶ E, kehe mai he tau kakano fakatai mo e fakaperofeta he tau mena ia, ko e tau fakataiaga ua nei kua tuku mai ki a tautolu mo e fakamaloloaga maaliali ne hau ni he gutu ha Iesu. Ko e hana fekau anei: Kia mataala; kia iloilo, mua atu ka kitia ai e fakamailoga he pa·rou·siʹa ha Iesu. Ko e mogonei a ia. Ti kua mataala mo e iloilo moli nakai a tautolu?

17, 18. Ko e heigoa ne fakatonu he tutaki ko Iakopo hagaao ke he ha ha hinei ha Iesu?

¹⁷ Kua nakai nofo e matakainaga ha Iesu ko Iakopo i luga he Mouga ko Olive ke logona e perofetaaga ha Iesu; ka kua ako fakamui e ia, mo e maama maaliali e ia e kakano he perofetaaga. Ati tohia e ia: “Hanai, ko e tau matakainaga na e, kia fakauka a mutolu ato hohoko ke he [“ha ha hinei”] he Iki; kitiala, kua tatali atu e tagata gahua fonua ke he tau fua mitaki he kelekele, mo e fakauka ki ai, ato moua e ia e uha fakamua mo e fakamui. Kia fakauka foki a mutolu, kia fakamau ha mutolu a tau loto, ha kua tata e vaha ke [“haele mai”] e Iki.”​—Iakopo 5:7, 8, fakatatai NW.

¹⁸ Ha kua fita e fakamoli mai to fakafili lahi he Atua a lautolu ne fakaaoga kelea ha lalu tau koloa, ne fakamalolo e Iakopo e tau Kerisiano ke fakauka he fakatali ki a Iehova ke gahua. Liga to nakai fakauka e Kerisiano ti liga ita, tuga ko ia kua moua e tonu ke fakahako e hehe ne taute. Ka kua nakai lata ke pihia, ha ko e mena to hoko moli mai e magaaho he fakafiliaga. Kua fakakite he fakatai ke he tagata gahua fonua e mena ia, tuga ne fakamaama e Iakopo.

19. Ko e fakauka fefe ne fakagahuahua he tagata Isaraela gahua fonua?

¹⁹ Ko e tagata Isaraela gahua fonua ne to e tega akau kua fakatalitali, fakamua ke tuputupu hake, ti ke motua e akau, mo e fakahiku ke helehele. (Luka 8:5-8; Ioane 4:35) He tau mahina ia kua fai magaaho ai ti liga fakatupu falu tupetupeaga. To hoko mai nakai e uha fakamua mo e ke lahi foki? Ka e kua e uha fakamui? Liga kai nakai he tau moko po ke malona he afa e tau akau? (Fakatatai Ioelu 1:4; 2:23-25.) Pete ni ia, ke he tau mena oti kua falanaki e tagata Isaraela gahua fonua ki a Iehova mo e tau fakaholoaga pauaki ne taute e ia. (Teutaronome 11:14; Ieremia 5:24) Ko e fakauka he tau tagata gahua fonua kua mauokafua moli ke he mena ne amaamanaki ki ai. Ha ko e tua, ne iloa e ia to hoko mai e mena ne fakatali a ia ki ai. Ti to pihia moli!

20. Fakatata fefe e tautolu e fakauka ke lautatai atu ke he fakatonuaga ha Iakopo?

²⁰ Pete ni kua fai mena iloa e tagata gahua fonua ke he magaaho ka helehele ai, kua nakai maeke he tau Kerisiano he senetenari ke fakamua aki ke fuafua e magaaho he ha ha hinei ha Iesu. Ka ko e mena to hoko mai moli. Ne tohia e Iakopo: “Kua tata e vaha ke [“haele mai,” NW, faka-Heleni, pa·rou·siʹa] e Iki.” He magaaho ne tohia e Iakopo e tau kupu ia, ko e puhala lahi, po ke lalolagi katoa, he fakamailoga he ha ha hinei he Keriso kua nakai la kitia moli ia. Ka kua kitia ai he mogonei! Ti kua lata ke fefe e logonaaga ha tautolu he magahala nei? Ko e mena kitia moli e fakamailoga. Kua kitia ai e tautolu. Maeke ai ia tautolu ke talahau mo e fakamoli, ‘Ne kitia e au e fakamailoga he fakamoli.’ Kua maeke ia tautolu ke talahau mo e mauokafua, ‘Kua hoko mai tuai e ha ha hinei he Iki ti tata mai e fakaotiaga.’

21. Ko e heigoa kua fifili mauokafua a tautolu ke taute?

²¹ Ha kua pihia e mena ka tupu, kua ha ha ia tautolu e kakano malolo ke mauloto mo e fakagahuahua e matapatu he tau fakaakoaga he tau fakataiaga ua ha Iesu ne kua fakatutala a tautolu ki ai. Ne pehe a ia: “Hanai, kia mataala a mutolu, ha kua nakai iloa e mutolu e aho, po ke magaaho.” (Mataio 25:13) Ko e mogo tonu hanei ma tautolu ke fakamakutukutu ke he fekafekauaga faka-Kerisiano. Kia fakakite a he tau aho takitaha ke he tau momoui ha tautolu kua maama e tautolu e manatu ha Iesu. Kia lata ai a tautolu ke mataala! Kia lata ai a tautolu ke iloilo!

[Tau Matahui Tala]

Manatu Nakai e Koe?

◻ Ko e heigoa e fekau ne moua e koe mai he fakataiaga he tau tamafine iloilo mo e goagoa?

◻ Ha ko e fakataiaga he tau taleni, ko e heigoa e matapatu hatakiaga hane foaki mai e Iesu ma hau?

◻ Ko e kakano fe ne hagaao e fakauka hau ke he pa·rou·siʹa ke tuga he tagata Isaraela gahua fonua?

◻ Ko e ha ne kua mahomo atu e magaaho nei ke fiafia mo e paleko ke nonofo ai?